Bawi-passport sa 'di nagsusustento ng anak

ni Jenny Rose Albason @Overseas News | May 9, 2026

Sisimulan ng US State Department na i-revoke o bawiin ang pasaporte ng mga Amerikanong may malalaking hindi nababayarang child support o sustento sa anak.

Sakop nito ang mga magulang na may utang na lampas sa $2,500 (humigit-kumulang ₱140,000), bagama’t pangunahing tututukan ang may “malalaking” atraso. Layunin ng hakbang na paigtingin ang pagsunod sa batas at tiyakin ang obligasyon ng mga magulang sa kanilang mga anak.

Hinihikayat ang mga apektado na agad ayusin ang kanilang bayarin sa tamang ahensya upang maiwasan ang pagkansela ng pasaporte. Kapag nakansela, hindi na ito magagamit sa paglalakbay at hindi rin makakakuha ng bagong pasaporte hangga’t hindi nababayaran ang utang.

Pinapayagan ang ganitong hakbang sa ilalim ng isang batas sa Estados Unidos na ipinatupad noong 1996, ngunit bihira itong gamitin noon. Sa bagong polisiya, makikipagtulungan ang State Department sa Department of Health and Human Services para tukuyin ang may mga atraso.

Wala pang tiyak na petsa ng implementasyon, ngunit inaasahang magsisimula ito sa lalong madaling panahon. Ang mga nasa labas ng US na maaapektuhan ay kailangang pumunta sa embahada o konsulado para sa emergency travel document upang makabalik sa bansa.

WHO, ‘di pa tiyak kung sa cruise ship nakuha ang unang kaso ng Hantavirus

ni Jenny Rose Albason @Overseas News | May 9, 2026

Maaaring hindi nakuha ng unang kaso ng hantavirus ang impeksiyon habang nasa cruise ship na MV Hondius, ayon sa isang eksperto mula sa World Health Organization (WHO).

Ayon kay Anaïs Legand, technical expert on viral hemorrhagic fevers sa WHO, ang incubation period ng sakit—o ang panahon mula sa pagkaka-impeksiyon hanggang sa pagsisimula ng sintomas—ay karaniwang nasa isa hanggang anim na linggo.

Sa kaso ng 70-anyos na Dutch national na pasahero, na kabilang sa walong kumpirmado at pinaghihinalaang kaso ng hantavirus, siya ang unang nagkasakit. Nagsimula siyang makaranas ng mga sintomas tulad ng lagnat, pananakit ng ulo, at mild diarrhea noong Abril 6. Kalaunan, nagkaroon siya ng respiratory distress noong Abril 11 at pumanaw sa parehong araw habang nasa barko.

Dahil dito, posible umanong hindi sa barko o sa mga islang pinuntahan patungong Cape Verde nakuha ng pasyente ang impeksiyon. Ayon sa WHO, mas malamang na nagkaroon na siya ng exposure sa hantavirus bago pa man sumakay sa cruise ship, partikular na kaugnay ng pagkakalantad sa rodent o daga.

Samantala, patuloy na naglalayag ang barko patungong Canary Islands ng Spain matapos ang tatlong araw na pag-stay malapit sa Cape Verde mula noong Linggo.

Ang hantavirus ay karaniwang naipapasa sa tao mula sa infected na rodent sa pamamagitan ng ihi, dumi, o laway nito. Gayunman, ang isang partikular na strain nito na tinatawag na “Andes virus” ay maaaring maipasa rin mula tao patungo sa tao.

Ang nasabing strain ay na-detect sa parehong buhay na kumpirmadong kaso ng hantavirus. Ayon sa datos, ang case fatality rate nito ay maaaring umabot ng hanggang 40%, kaya itinuturing itong mataas ang panganib.

Batay sa paunang ebidensya mula sa WHO, ang Andes virus ay maaaring maipasa sa pamamagitan ng close contact, kabilang ang “exchange of saliva” o halik sa pagitan ng magkapareha.

Edad 9 pataas... Titser sa Singapore, puwedeng mamalo ng estudyante

ni Jenny Rose Albason @Overseas News | May 9, 2026

Pinapayagan sa Singapore ang paggamit ng pisikal na parusa ng mga guro sa kanilang mga estudyante bilang bahagi ng disiplina sa paaralan.

Ayon kay Desmond Lee, ang Minister of Education ng Singapore, maaaring gamitin ang pamalo sa mga mag-aaral na may edad siyam pataas, alinsunod sa umiiral na patakaran.

Nilinaw niya na may mahigpit na mga alituntunin na sinusunod upang matiyak na hindi ito nagdudulot ng labis na pananakit o pang-aabuso sa mga mag-aaral.

Sinusuportahan din ito ng ilang punong-guro at mga administrador ng paaralan bilang bahagi ng kanilang sistema ng pagdidisiplina.

Kasalukuyang bumubuo ng mga panibagong patakaran ang mga mambabatas ng Singapore hinggil sa tamang paraan ng disiplina sa mga paaralan, na posibleng ipatupad sa mga susunod na taon.