Proposal ng Iran, ibinasura ni Trump

ni Jenny Rose Albason @World News | May 13, 2026

Nagpadala ang Iran ng panukala sa Estados Unidos sa pamamagitan ng tagapamagitan na Pakistan, na layong wakasan ang umiinit na tensyon at mga kaguluhan sa iba’t ibang bahagi ng Middle East.

Sa nasabing proposal, iginiit ng Iran ang pagtanggal ng sanctions ng US Office of Foreign Assets Control (OFAC) sa pagbebenta ng Iranian oil sa loob ng 30 araw, gayundin ang pagwawakas ng naval blockade ng Amerika sa kanilang mga daungan.

Ayon sa mga ulat, kasama rin sa hiling ng Iran ang pagbigay ng kontrol sa Strait of Hormuz, sakaling matupad ng Estados Unidos ang ilang hindi ispesipikong kondisyon.

Gayunman, mariing tinanggihan ni US President Donald Trump ang naturang counter proposal sa pamamagitan ng kanyang Truth Social platform, at tinawag itong “totally unacceptable.”

Nagbabala rin ang Iran na hindi ito magpapaatras sa anumang posibleng ganting aksyon mula sa Estados Unidos, at tutol din ito sa pagpasok ng mas maraming foreign warships sa Strait of Hormuz.

Sa hiwalay na pahayag, binigyang-diin ni Iranian President Masoud Pezeshkian na hindi sila magpapasupil sa anumang kalaban, at ang pakikipag-usap o negosasyon ay hindi dapat ituring na pagsuko o pag-atras.

Biglang tumawid sa runway... Lalaki nasagasaan ng eroplano, dedbol

ni Jenny Rose Albason @Overseas News | May 11, 2026

Isang katao ang nasawi matapos masagasaan ng isang eroplano sa Denver International Airport.

Ayon sa mga otoridad, bigla umanong tumawid sa runway ang isang lalaki habang papalipad ang isang Frontier Airlines Airbus A321.

Paalis sana ang eroplano mula Denver patungong Los Angeles, sakay ang 224 na pasahero at pitong crew members.

Dahil sa insidente, naantala ang biyahe at inilipat sa ibang eroplano ang mga pasahero.

Nagkaroon din ng sunog sa bahagi ng cabin ng eroplano kaya agad rumesponde ang mga bumbero at emergency crews upang apulahin ito at tiyakin ang kaligtasan ng mga sakay.

Bagama’t hindi pa inilalabas ang pagkakakilanlan ng biktima, naniniwala ang mga otoridad na isa itong empleyado ng paliparan.

---

15-ANYOS, NIREYP NG MONGHENG BUDISTA

Arestado ang isang mataas na ranggong mongheng Budista sa Sri Lanka at ikinulong sa remand prison dahil sa paratang na panggagahasa at sekswal na pang-aabuso sa isang 15-anyos na babae.

Ang monghe na si Venerable Pallegama Hemarathana Thero ay itinuturing na isa sa mga pinakamataas na lider sa Budismo sa bansa bilang tagapangalaga ng walong banal na lugar sa Sri Lanka.

Inaresto siya matapos ang reklamo ng ahensya ng proteksyon ng mga bata, na nag-ulat din ng kabiguan ng pulisya na agad siyang dakpin kahit dati nang tinukoy bilang suspek.

Wala pa siyang pahayag tungkol sa mga akusasyon at nakatakdang humarap sa korte sa ika-12 ng Mayo.

Kasabay nito, inaresto rin ang ina ng umano’y biktima dahil sa paratang na pagtulong sa naganap na pang-aabuso.

Nasa pribadong ospital sa Colombo ang monghe nang arestuhin at kalaunan ay iniutos na ilipat sa ospital ng bilangguan. Pinaiiwas din siya ng korte na makalabas ng bansa habang dinidinig ang kaso. 

Bangka sumabog, mga sakay tumilapon

ni Jenny Rose Albason @Overseas News | May 11, 2026

Iniimbestigahan ng mga otoridad sa Estados Unidos ang sanhi ng pagsabog sa isang bangka sa Miami, southern Florida, na ikinasugat ng 11 katao.

Ayon kay Miami-Dade Fire Rescue Battalion Chief Juan Arias, tumugon ang mga emergency team sa ulat ng isang posibleng pagsabog ng bangka sa Haulover Sandbar, isang kilalang lugar na dinarayo ng mga turista.

Labing-isang biktima ang agad na isinugod sa mga ospital sa lugar upang gamutin dahil sa mga paso at iba pang malubhang pinsala.

Sa ngayon, hindi pa inilalabas ng mga otoridad ang tiyak na sanhi ng pagsabog. Patuloy pa ang imbestigasyon at pakikipag-ugnayan ng mga opisyal sa iba pang ahensya para sa karagdagang detalye.

Ayon sa isang saksi na isang lokal na boat charter operator, may mga taong nakita umanong tumilapon mula sa bangka matapos ang insidente. Dagdag pa niya, mabilis umanong kumalat ang apoy at malamang ay pinalakas pa ng gasolina, dahilan upang mas malubha ang mga natamong paso ng mga biktima.

Makikita rin sa ilang video mula sa pinangyarihan ang isang helicopter na dumaong malapit sa Miami marina habang inililipat ng mga emergency responder ang isa sa mga sugatang pasahero gamit ang stretcher.

Bukod sa mga fire at rescue team, tumulong din sa operasyon ang U. Coast Guard at ang Florida Fish and Wildlife Conservation Commission.

Ang Haulover Sandbar ay isang sikat na destinasyon sa Miami dahil sa malinaw at mababaw nitong tubig, kaya madalas puntahan ng mga turista at nagbo-boat trip.