Monasteryo, 2 beses binomba, 14 todas

ni Justine Berganio @Overseas News | August 24, 2026

Photo: Ang monasteryo sa Myanmar na tinamaan ng military airstrike - Ko Nway Oo via AP

Nasawi ang 14 katao sa military airstrike sa isang monasteryo sa Myanmar nitong Biyernes ng umaga, ayon sa mga mandirigmang oposisyon at isang lokal na rescue worker.

Pawang matatanda ang mga nasawi, habang ilang monghe naman ang sugatan. Ayon sa rescue worker, dalawang beses binomba ang lugar.

Naganap ang pag-atake bandang alas-9 ng umaga sa Myaung township sa Sagaing region, 70 kilometro (47 milya) sa kanluran ng Mandalay, ayon sa AFP.

Naiulat na nagtipon sa monasteryo ang mga sibilyan para sa isang meditation retreat bilang paggunita sa Buddhist Lent. Kabilang sa mga nasawi ang 11 lalaki at tatlong babae, na nasa edad 50 hanggang 70.

Isang mandirigmang oposisyon na tumulong sa rescue operation ang nagsabing muling binomba ng mga eroplano ang lugar habang hinahanap nila ang mga nakaligtas.

Nasa gitna ng digmaang sibil ang Myanmar mula nang agawin ng militar ang kapangyarihan noong 2021 at patalsikin si Aung San Suu Kyi. Wala pang pahayag ang militar tungkol sa pinakahuling pag-atake.

Para ipagpatuloy ang pag-akyat... 7-anyos, inwan ng tatay sa Mount Fuji

ni Justine Berganio @Overseas News | August 24, 2026

Photo: Mt. Fuji - Pakutaso - Japan Today

Isang ama ang sinita ng pulisya matapos nitong iwan nang ilang oras ang kanyang 7-anyos na anak sa Mount Fuji, pinakamataas na bundok sa Japan, habang soft drink at meryenda lamang ang dala ng bata.

Natagpuan ang bata na mag-isang nakaupo sa isang bangko sa mahigit 2,000 metro (6,500 talampakan) na taas, habang makapal ang hamog at umuulan.

Ayon sa ulat, sinabi ng 48-anyos na ama sa bata na maghintay matapos itong magreklamong pagod na. Ipinagpatuloy naman ng ama ang pag-akyat kasama ang kanyang nakatatandang anak.

Natagpuan ng staff ng isang mountain hut ang bata malapit sa sixth station ng ruta at agad na tumawag ng pulis. Natunton naman ang ama sa pagitan ng seventh at eighth stations, na tinatayang tatlong oras ang layo mula sa kinaroroonan ng kanyang anak.

Alas-7:30 ng umaga noong Huwebes natagpuan ang bata at makalipas ang ilang oras ay muling nagkita ang mag-ama. Ayon sa ulat, pagod at iritable na ang bata matapos maghintay nang walong oras.

Sinita ng mga pulis ang ama dahil sa pag-iwan sa bata sa bundok. Humingi naman umano ito ng paumanhin at inamin ang kanyang naging padalus-dalos na desisyon.

Dumaan ang pamilya sa Fujinomiya Route, na nagsisimula sa fifth station ng Mount Fuji. Mula rito, inaabot ng humigit-kumulang limang oras ang pag-akyat sa tuktok at tatlong oras ang pagbaba.

May taas na 3,776 metro (12,389 talampakan) ang Mount Fuji at ilang aksidente na ang naitala rito nitong mga nakaraang taon.

Noong Hulyo, isang 99-anyos na babae ang kinailangang sagipin matapos mahulog at masugatan ang balakang at likod. Noong nakaraang taon naman, isang 27-anyos na estudyante ang dalawang beses na kinailangang sagipin matapos umakyat sa labas ng opisyal na climbing season.

Isang aktibong bulkan ang Mount Fuji na matatagpuan sa timog-kanluran ng Tokyo. Idineklara itong World Heritage Site noong 2013 at isa sa tatlong tradisyunal na “Holy Mountains” ng Japan, kasama ang Mount Tate at Mount Haku.

Tinatayang 200,000 katao ang umaakyat dito bawat taon, ngunit nililimitahan ang bilang ng mga umaakyat sa ilang ruta upang maiwasan ang pagsisikip.

15% ng suweldo, ibibigay... Prime Minister ng UK, bibigyan ng bahay ang mga homeless

ni Justine Berganio @Overseas News | August 21, 2026

Photo: AP Photo / Jon Super

Target ng bagong British Prime Minister na si Andy Burnham na mailipat sa ligtas na tirahan ang mga taong natutulog sa lansangan bago sumapit ang Pasko, kasabay ng pangakong maglalaan siya ng bahagi ng sariling suweldo para sa mga programang laban sa homelessness.

Sa ilalim ng bagong plano ng pamahalaan, maglalaan ng emergency accommodation at pangmatagalang housing support sa mga lugar sa England na pinakamalubha ang problema sa kawalan ng tirahan.

Aabot sa £442 milyon (P37B) ang pondong ilalaan para sa programa, kung saan mas malaking bahagi ang matatanggap ng mga lugar na may mataas na bilang ng homeless at matinding housing pressure.

Bukod sa pondo ng gobyerno, nangako si Burnham na 15% ng kanyang suweldo ay ido-donate sa mga organisasyong tumutulong sa mga taong walang tahanan.

Sinabi ni Burnham na ayaw niyang maging normal na tanawin sa Britain ang mga taong natutulog sa bangketa, labas ng istasyon at iba pang pampublikong lugar. Iginiit din niyang kailangang manguna siya sa pagtulong kung nais niyang hikayatin ang publiko na makiisa.

Batay sa government figures, umabot sa record na 4,793 ang bilang ng rough sleepers sa England noong 2025. Mas malaki naman ang kabuuang bilang ng homeless, na tinatayang 382,000, kabilang ang mga pamilya at batang walang permanenteng tahanan.

Nagbabala naman ang Institute for Public Policy Research na maaaring tumaas pa ng 25% pagsapit ng 2030 ang bilang ng mga homeless kung hindi maaaksyunan ang problema.

Ayon kay Burnham, nais niyang gayahin ang naging hakbang noong COVID-19 pandemic nang nailipat sa temporary accommodation ang maraming rough sleepers. Nanawagan din siya sa mga lokal na lider, faith organizations at iba pang sektor na makiisa sa programa.

Bukod sa pansamantalang tirahan, target ng pamahalaan na makatulong sa pagtatayo ng mahigit 1,000 permanenteng bahay sa loob ng tatlong taon.

Bagama’t tinanggap nang positibo ng ilang charity groups ang plano, kinuwestiyon naman ito ng opposition Conservatives dahil umano sa kakulangan ng malinaw na detalye kung paano ito ipatutupad at popondohan.