Heatwave sa Spain pumalo sa 40°C, mga residente, pinag-iingat

ni Jenny Rose Albason @Overseas News | June 23, 2026

Nakaranas ng matinding init ang Spain matapos maranasan ang unang opisyal na heatwave nito ngayong 2026, kung saan umabot sa halos 40 degrees Celsius ang temperatura sa Madrid.

Ayon sa mga ulat, maraming turista at lokal na residente ang nahirapang makibagay sa matinding init, lalo na sa mga matataong lugar gaya ng El Rastro flea market.

May ilang turista ring gumamit ng portable electric fan at nagsuot ng mapuputing damit upang kahit papaano ay maibsan ang epekto ng matinding sikat ng araw habang naglalakad.

Ayon sa Spanish weather agency, 13 sa 17 rehiyon ng Spain ang nasa ilalim ng orange heat alert, habang nakataas naman ang red alert sa Basque Country, ang pinakamataas na antas ng babala dahil sa matinding init ng panahon.

Inaasahang magpapatuloy ang heatwave hanggang Huwebes.

Dahil dito, nagbabala ang mga otoridad tungkol sa posibleng epekto nito sa kalusugan, lalo na sa mga nakatatanda at iba pang vulnerable na sektor ng populasyon.

Pinangangambahan din ang pagtaas ng panganib ng mga wildfire sa iba't ibang bahagi ng bansa.

Dahil sa technical malfunction... 54 sugatan, 18 iba pa missing sa pagsabog ng pinakamalaking hub sa mundo

ni Jenny Rose Albason @Overseas News | June 23, 2026

Nag-iwan ng pinsala at ilang sugatan ang malakas na pagsabog sa isa sa mga pasilidad sa Ras Laffan Industrial City sa Doha, Qatar.

Ayon sa state-owned company na QatarEnergy at sa Ministry of Interior ng Qatar, nagmula ang pagsabog at sunog sa isang technical malfunction sa Barzan gas supply facility habang isinasagawa ang pagsisimula ng operasyon nito.

Dahil sa insidente, sumiklab ang sunog at naramdaman ang malakas na pagyanig maging sa mga kalapit na lugar. Batay sa inisyal na ulat, umabot sa 54 katao ang nasugatan habang 18 naman ang naiulat na nawawala.

Ang Ras Laffan ang itinuturing na pinakamalaking pasilidad ng Liquefied Natural Gas (LNG) sa buong mundo at matatagpuan ito sa hilagang baybayin ng Qatar.

Ayon sa mga ulat, mabilis namang naapula ng Civil Defence teams ang sunog. Kinumpirma rin ng pamahalaan na walang naitalang pagtagas ng gas o anumang kemikal na maaaring magdulot ng panganib sa publiko.

Samantala, patuloy na mino-monitor ng mga otoridad ang sitwasyon sa lugar dahil malapit ang pinangyarihan ng pagsabog sa mga pinagtatrabahuhan ng maraming overseas Filipino workers (OFWs) sa rehiyon.

Bago ang insidente, matindi nang napinsala ang Ras Laffan hub dahil sa kamakailang digmaan na kinasangkutan ng Estados Unidos, Israel, at Iran, na nagbunsod sa Qatar upang pansamantalang ihinto ang operasyon ng ilan nitong pasilidad sa gas production.

Dahil sa lawak ng pinsala mula sa mga pag-atake, inaasahang aabutin pa ng tatlo hanggang limang taon ang rehabilitasyon ng pasilidad. Tinataya rin na bababa ng 17 porsyento ang kapasidad nito sa pagluwas ng liquefied natural gas (LNG).

---

15 years nakulong at napatunayang inosente

75-ANYOS, TATANGGAP NG P165M DANYOS

PAGKATAPOS ng mahigit isang dekadang pagkakakulong dahil sa mga kasong hindi naman niya ginawa, pagkakalooban ng 2.5 million euros (humigit-kumulang P165 milyong danyos) ang isang Moroccan national matapos kilalanin ng Korte Suprema ng Spain na nagkaroon ng malinaw na pagkakamali sa paghawak ng kanyang kaso.

Ang 75-anyos na si Ahmed Tommouhi, isang mason na lumipat sa Spain noong 1991 upang magsimula ng bagong buhay, ay nahatulan noon kaugnay ng dalawang kaso ng panggagahasa at isang kaso ng pagnanakaw sa rehiyon ng Catalonia sa hilagang-silangang bahagi ng bansa.

Bagama't sinentensiyahan siya ng 24 na taong pagkakabilanggo, nakalaya siya matapos makulong nang 15 taon. Noong Disyembre, tuluyan siyang napawalang-sala sa huling kasong isinampa laban sa kanya matapos ang matagal na kampanya upang patunayan ang kanyang kawalang-sala. Isa rin sa mga biktima ang lumantad at nagsabing hindi si Tommouhi ang salarin.

Binaligtad ng Korte Suprema ng Spain ang naunang desisyon ng National Court na tumangging magbigay sa kanya ng kompensasyon sa kabila ng kanyang pagpapawalang-sala.

Ayon sa Korte Suprema, naging biktima si Tommouhi ng isang malinaw at seryosong pagkakamali sa hudikatura sa orihinal na paglilitis sa Barcelona.

Napag-alaman din na hindi isinasaalang-alang noon ng hukuman ang resulta ng isang biological expert test na nagpapakitang hindi si Tommouhi ang taong responsable sa mga panggagahasa.

US-Iran war, tapos na — Trump... Strait of Hormuz, bubuksan na

ni Jenny Rose Albason @World News | June 18, 2026

Inanunsyo ni US President Donald Trump na ganap nang bubuksan sa Biyernes, Hunyo 19, ang Strait of Hormuz, isang mahalagang ruta para sa pandaigdigang kalakalan ng langis.

Ito ay matapos magkasundo ang Estados Unidos at Iran na wakasan ang digmaan sa Middle East, isang malaking hakbang tungo sa pagtatapos ng ilang buwang labanan at kaguluhang pang-ekonomiya sa rehiyon.

Ayon kay Trump, muli nang papayagang dumaan ang mga barko sa Strait of Hormuz at maghatid ng mga kargamentong langis sa iba't ibang bansa.

Sinabi rin ng US President na hindi niya inaasahang mangangailangan ng malaking pagsisikap upang muling mabuksan ang naturang lagusan.

Nitong Lunes, iniulat ng Iranian media na tatlong oil tanker at dalawang cargo ship na ang nakadaan sa lugar na dating isinailalim sa US naval blockade.

Samantala, nakatakdang lagdaan sa Biyernes sa Switzerland ang kasunduang pangkapayapaan sa pagitan ng Estados Unidos at Iran, sa pamamagitan ng Pakistan bilang tagapamagitan.

---

172 DRONE IBINAGSAK SA RUSSIA, OIL DEPOT, NASUNOG

NAGDULOT ng sunog sa isang oil depot sa timog na rehiyon ng Krasnodar sa Russia ang mga bumagsak na bahagi ng drone.

Dahil dito, isinara rin ang isang lokal na kalsada na nag-uugnay sa lugar patungo sa Crimean Peninsula.

Ayon sa mga opisyal, walang naiulat na nasawi o nasugatan sa insidente sa oil depot sa Poltavskaya, Krasnodar.

Isinara rin ng mga otoridad ang isang kalsadang konektado sa rutang patungo sa tulay sa Kerch Strait, na nagsisilbing mahalagang daanan ng mga suplay papunta sa Crimea.

Noong Lunes, tinamaan ng Ukraine ang dalawang tulay na nag-uugnay sa bahagi ng Kherson region na kontrolado ng Russia at sa Crimea. Pinaigting din ng Ukraine ang mga pag-atake sa mga rutang ginagamit sa paghahatid ng suplay sa tangway.

Sa Krasnodar, nagdulot ng pangamba sa kakulangan ng gasolina ang pagkaantala sa distribusyon ng suplay, dahilan upang magmadaling bumili at mag-imbak ng gasolina ang ilang residente.

Samantala, patuloy ang pag-apula ng sunog sa isang fuel depot sa lungsod ng Rybinsk sa Yaroslavl region matapos itong tamaan ng drone attack noong Linggo.

Ayon sa mga otoridad, karaniwang uling lamang ang mga nalalabing materyal mula sa sunog at hindi ito mapanganib sa agrikultura. Naglagay rin ng mga harang sa Rybinsk Reservoir upang maiwasan ang kontaminasyon ng tubig.

Sa magdamag na operasyon, iniulat ng Russia na nakapagpabagsak ito ng 172 drone na pinaniniwalaang mula sa Ukraine.

---

Guilty sa kasong rape, pang-aabuso, atbp.

STEPSON NG NORWEGIAN PRINCE, 4 YRS. KULONG

HINATULAN ng Oslo District Court si Marius Borg Høiby, stepson ni Crown Prince Haakon ng Norway, ng apat na taong pagkakakulong matapos mapatunayang guilty sa mga kasong rape, domestic violence, at iba pang krimen.

Sa desisyong inilabas nitong Lunes matapos ang pitong linggong paglilitis, napatunayang guilty si Høiby sa 34 sa 40 kasong isinampa laban sa kanya, kabilang ang dalawang kaso ng rape at ilang insidente ng pananakit sa dating kasintahan.

Isa sa mga kaso ng rape ay umano'y naganap sa basement ng tirahan ng Crown Prince.

Ayon sa korte, hindi nakapagsalita o nakapanlaban ang isa sa mga biktima dahil sa kanyang kalagayan nang maganap ang insidente.

Bukod sa rape at pananakit, napatunayang guilty rin si Høiby sa pagmamay-ari at pamamahagi ng ilegal na droga, paglabag sa restraining orders, at iba pang kaugnay na kaso. Gayunman, naabsuwelto siya sa dalawa pang kasong rape.

Sa paglilitis, iniharap ang iba't ibang ebidensya, kabilang ang electronic messages, video recordings, at mga testimonya na nag-uugnay sa kanya sa paggamit ng droga at marahas na pag-uugali.

Balak naman ng kampo ni Høiby na iapela ang desisyon ng korte.

Ayon sa prosekusyon, ipinakikita ng kaso na walang sinuman, anuman ang katayuan sa lipunan, ang nakahihigit sa batas.

Hindi na nagbigay ng pahayag ang Norwegian royal household at sinabing nasa kamay na ng korte ang usapin.

Bagama't wala siyang opisyal na titulo o tungkulin sa royal family, nagdulot ang kaso ng malaking kontrobersiya sa Norway at nakaapekto sa imahe ng maharlikang pamilya.