Zaldy Co, ‘di raw nagka-kickback sa flood control project, weh?!

ni Pablo Hernandez @Prangkahan | November 17, 2025

MAHIRAP PANIWALAAN NA HINDI NAGKA-KICKBACK SI ZALDY CO SA FLOOD CONTROL PROJECT DAHIL NAGKAROON SIYA NG SANGKATUTAK NA PRIVATE JETS AT HELICOPTERS -- Sa unang video na ‘pasabog’ ni former Cong. Zaldy Co na si Pres. Bongbong Marcos (PBBM) ang nagpa-insert umano ng P100 billion sa Bicam ay naging hati ang opinyon ng publiko, may mga naniniwala at hindi naniniwala.

Pero sa ikalawang video na ‘pasabog’ ni Cong. Zaldy ay tuluyan siyang nawalan ng kredibilidad nang sabihin niyang wala raw siyang naging pakinabang, hindi raw siya nagkaroon ng kickback sa P100B "commission" sa mga flood control projects.

‘Ika nga, engot na lang ang maniniwala na hindi nagka-kickback sa flood control projects si Cong. Zaldy dahil nga nabulgar na mayroon siyang sangkatutak na air assets o mga private jets at mga helicopters, boom!

XXX

MATAPOS KAYA NANG MAPAYAPA ANG 3-DAY PROTEST, MA-PEOPLE POWER SI PBBM O MAGDEKLARA NG MARTIAL LAW ANG MARCOS ADMIN? -- Kahapon na (Nov. 16) nagsimula ang tatlong araw na protesta ng kapatiran ng Iglesia ni Cristo (INC) na magtatapos sa Nov. 18, 2025, at ang protestang ito ay tinapatan ng libu-libong pulis, sundalo at coast guard ng Marcos administration.

Dahil diyan, tatlong isyu ang inaabangan ng publiko rito, kung matatapos nang mapayapa ang 3-day protest, kung magkakaroon ng People Power para mapatalsik si PBBM bilang presidente ng bansa, at kung magdedeklara ng martial law ang Marcos admin kapag nagkaroon ng karahasan, abangan!

XXX

TILA MAY NAIS PAGTAKPAN ANG ICI KAYA HALOS 3 WEEKS NA HINDI NA NASUNDAN ANG IMBESTIGASYON NA NAGING DAHILAN KAYA PROMISE NA LIVE TELECAST O LIVE STREAMING HINDI MAIPATUPAD -- Noong October 22, 2025 ay nangako si Independent Commission for Infrastructure (ICI) Chairman Andres Reyes na ang mga susunod daw nilang hearing sa flood control projects ay isasapubliko na nila sa pamamagitan ng live telecast at live streaming, pero halos tatlong linggo na ang nakakalipas ay hindi na nasundan ang imbestigasyon ng ICI sa flood control scandal.

Isa lang ang ibig sabihin niyan kaya hindi na nagsasagawa ng hearing ang ICI, ‘pang-uunggoy’ lang sa mamamayan ang ipinangako nilang isasapubliko na nila ang kanilang imbestigasyon, na ayaw talaga nilang i-live telecast at live streaming ang ICI hearing, na ‘ika nga tila meron talaga silang gustong pagtakpan sa imbestigasyon ng flood control projects, pwe!

XXX

TOTOO KAYA O FAKE NEWS NA PATI RAW SI SEN. IMEE NANANAWAGAN KAY PBBM MAG-RESIGN? -- May kumakalat sa social media na maging si presidential sister, Sen. Imee Marcos ay nananawagan na rin sa kanyang kapatid na si PBBM na mag-resign na bilang pangulo ng bansa.

Sa ngayon ay hindi pa malaman ng publiko kung totoo o fake news ang panawagang ito ni Sen. Imee, pero kung sakaling totoo ay isa lang ang ibig sabihin niyan, na kahit ang senadorang kapatid ng Presidente ay hindi na nagugustuhan ang pamumuno ni PBBM sa ‘Pinas, period!

Para iwas-krimen, mga motoristang susuway sa Anti-Balaclava, may parusa

ni Leonida Sison @Boses | November 17, 2025

Dapat malinaw at tumpak ang pagpapatupad ng anumang batas lalo na kung may kaakibat na parusa para sa mga ordinaryong motorista. 

Kaya ngayong umiiral na sa Maynila ang City Ordinance 9134, o ang “Anti-Balaclava and Other Face Covering Ordinance”, mas mahalaga ang tamang impormasyon para sa magandang pagkakaunawaan.

Inaprubahan ni Mayor Isko Moreno Domagoso ang ordinansang nagbabawal sa sinumang motorcycle rider na takpan ang mukha gamit ang helmet, balaclava, headgear, ski mask, bonnet, bandana, panyo, sombrero, hoodies at iba pa na kayang itago ang pagkakakilanlan o itsura. Layunin nitong sugpuin ang krimen, mula sa snatching hanggang holdapan, na madalas ginagawa ng mga salarin na nakasakay o bagong baba sa motorsiklo. 

Gayunman, nakasaad sa ordinansa na hindi ipinagbabawal ang helmet o protective gear habang umaandar ang motor o nagmamaneho. Obligado pa rin ang pagsusuot ng helmet dahil sa ipinapatupad na national law. Ang ipinagbabawal lamang ay ang pagtatakip ng mukha kapag nakahinto na, lalo na sa loob ng tatlong metro mula sa motor, o kapag pumapasok sa bangko, palengke, tindahan, ATM at iba pang establisimyento. 

May mga exempted din dito, katulad ng mga law enforcers on duty, may sakit, at mga taong kailangang magsuot ng turban o religious head covering. May pahintulot naman kapag may pandemya o public health emergency. 

Ang pinakamahalagang dapat tandaan ng mga kababayan sakaling lumabag sa ordinansa ay ang kaakibat na multa, na mula P1,000 hanggang P5,000, depende sa bigat ng violation. Ibig sabihin, hindi na puwedeng magsawalang-bahala ang mga motorista rito, lalo na’t inaatasan din ang mga establisimyento na maglagay ng malinaw na signage bago papasukin ang mga riders. 

Bilang isang mamamayan, mahalaga ang kaalaman patungkol sa mga ipinatutupad na ordinansa sa kanilang lugar, habang malinaw na nailatag ang lahat ng kailangan at tamang impormasyon. Kaalinsabay nito ay ang pagsunod sa itinakdang polisiya upang hindi naman umabot sa puntong maparusahan.  

Ang mga motorista, rider at iba pa na sumusunod sa batas ay hindi dapat natatakot sa nasabing ordinansa, ang dapat kabahan ay ‘yung talagang may balak na masama.

Mahalaga ang seguridad sa bawat lungsod, at sa rami ng mga nagkalat na kriminal, mahirap talagang tukuyin kung sino o hindi sa kanila, lalo na kung nakatakip ang mga mukha. Kaya naman nasa sa atin na rin ang pagsunod at pakikiisa sa mga otoridad para hindi tayo mapahamak.

Isipin din natin, bukod pa sa mga riders, na ang hindi paggamit ng mga face covering sa mga itinatakdang lugar ay hindi lang nakakatulong sa kinauukulan kundi nakakaiwas pa ito sa anumang krimen.

Hindi lang sana sa Maynila ipatupad ang ganitong ordinansa, gawin din ito sa marami pang lugar sa ating bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Nakatakda ang malawakang kilos-protesta, pero AFP tapat pa rin daw sa Konstitusyon

ni Ka Ambo @Bistado | November 16, 2025

Aktuwal nang ‘naghahalo ang balat sa tinalupan’.

Sa English, ‘yan mismo ang blood bath.

-----$$$--

HANGO ang talinghagang ito sa royal rumble ng mga talisain sa isang kulungan — nagsasabong-sabong ang mga manok — hanggang sa isa lang ang matira.

Sa isang kuwento sa Brgy. Longos sa Bigaa, Bulacan, sinasabing nagising isang gabi si Tata Ige dahil sa hindi magkamayaw na putak at sabong ng mga manok sa likuran ng kanyang bahay-kubo.

-----$$$---

Nagsabong-sabong pala ang lahat ng kanyang alagang talisain — at kinabukasan nang magliwanag -- iisa ang natirang buhay pero marami ring sugat.

Ang kulungan na ginawang gradas ay napuno ng mga nagkalat na balahibong manok na humalo-halo sa mga tigpas na balat o skin ng kanyang mga patay nang talisain na naliligo nang dugo.

Bulong niya habang naglilinis ng kulungan: “Naghalo ang balat sa tinalupan”.

----$$$--

MATATANDAANG ibinabala ni VP Sara ang blood bath nang magkahiwalay sila ng landas ni PBBM.

Kasunod nito, inimbestigahan ng Kongreso ang kanyang confidential fund at isinampa ang impeachment case.

-----$$$--

Mistulang “madugo” ang mga kasunod na pangyayari dahil inaresto ang kanyang ama at iniregalo sa ICC sa The Hague.

Sopresang sinibak naman si dating Senate President Chiz Escudero na inakusahang tumanggap ng campaign fund sa isang kaibigang kontraktor.

----$$$--

HABANG umaandar ang mga araw, inakusahan na ng pandarambong ang ilang senador, kongresista at mga dating pulitiko kasama ang mga DPWH officials, COA at maging ang executive secretary kaugnay ng multi-bilyong pisong flood control projects.

Napuwersang magbitiw si Rep. Martin Romualdez bilang Speaker at Zaldy Co na congressman, bago binuo ang ICI sa isang executive order ni PBBM.

----$$$-

PERO ngayon, biglang idinawit na mismo ni Co si PBBM, na agad itong idinepensa umano ni Senate Blue Ribbon Committee chairman Sen. Panfilo Lacson imbes na magpahayag ng ‘neutral’.

Kaliwa’t kanan na ang palitan ng akusasyon ng magkabilang-panig.

----$$$--

Nakatakda ang malawakang kilos-protesta sa susunod na mga araw.

Pero, agad nang naglabas ng opisyal na pahayag ang AFP na mananatili silang tapat sa Konstitusyon.

-----$$$--

SA totoo lang, maging sina ex-AFP Fidel Ramos, ex-DND Secretary Juan Ponce Enrile ay naunang nagpahayag ng pagiging tapat kay dating Pangulong Ferdinand Marcos Sr. pero binali rin nila ang pahayag.

Iyan din ang matatag na pahayag ni ex-AFP Chief Angelo Reyes pero ‘trinaydor’ din niya ang kanyang Commander-in-Chief na si Pareng Erap Estrada.

Nang lumaon, nag-suicide at nagbaril sa sarili -- si Reyes!

Aktuwal na madugo.

---$$$--

SA aktuwal, matagal na ang talamak na corruption across all department sa gobyerno kahit wala pa si PBBM.

Ang nararanasan naman ngayon ni PBBM ay normal na nararanasan ng isang “lider o pangulo” na malapit nang matapos ang termino.

Unti-unti nang lalayo ang mga hunyango para kumapit at lumipat naman sa naaamoy nilang susunod na uupo sa Malacanang.

Walang personal d’yan, teknikal na pagtaya ‘yan.

----$$$--

DAPAT kaawaan si PBBM, dahil masasaksihan natin kung paano siya iiwanan ng kanyang mga “tinulungan” — dahil pahina nang pahina ang kanyang poder — habang lumalapit ang 2028.

Maikukumpirma natin ngayon kung isang mahinang lider ba o strong si PBBM.

----$$$--

TOTOO bang weak lider si PBBM? Ere ang panukat o barometro.

Una, mapapatunayang mali si Digong sa pagsasabing “weak leader” si PBBM — bagkus ay malinaw na strong leader siya -- kapag nairaos ng mister ni First Lady Liza Araneta Marcos ang termino hanggang 2028.

Ikalawa, maikukumpirma na “weak leader” si PBBM kapag hindi natapos ang kanyang termino — magbitiw, magkudeta o biglang magkasakit at mawala sa Malacanang bago mag-2028.

Sa ngayon, wala pang makakapagsabi kung isang weak o strong leader ang anak ni FEM, Sr.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.