2027 budget, may ‘pork barrel’ na naman para sa mga cong?!!

ni Pablo Hernandez @Prangkahan | August 17, 2026

TANGGAPIN KAYA NI CONG. RIDON ANG HAMON NI MAYOR MAGALONG NA IMBITAHAN SIYA SA KAMARA – Matapos hamunin ni Bicol Saro partylist Rep. Terry Ridon si Baguio City Mayor Benjamin Magalong na pangalanan ang mga kongresistang miyembro ng House prosecution panel sa impeachment ni Vice President Sara Duterte na umano’y may mga insertion sa 2027 national budget, agad tumugon ang alkalde at sinabing imbitahan siya sa Kamara at doon niya isa-isang papangalanan ang mga ito.

Eh, ang tanong: Tanggapin kaya ni Cong. Ridon ang hamon ni Mayor Magalong na sa Kamara niya papangalanan ang mga kongresistang umano’y may mga insertion sa 2027 national budget? Abangan!

XXX

2027 NATIONAL BUDGET, MAY 'PORK BARREL' PA RIN? – Sinabi ni Sen. Ping Lacson na may nasilip daw siyang mga lump-sum appropriations para sa mga infrastructure project ng mga mambabatas sa 2027 national budget.

Ang isa sa mga taguri sa pork barrel ay lump sum.

Kaya't kung totoo ang sinabi ni Sen. Lacson, ibig sabihin niyan ay hindi talaga nakakatiis ang mga buwayang senador at kongresista na wala silang pork barrel yearly. Boom!

XXX

NASIRANG P6B EDSA PROJECT NI DPWH SEC. DIZON, DAPAT IMBESTIGAHAN NI OMBUDSMAN REMULLA – Matapos ang pananalasa ng Habagat, lumantad sa publiko na nawasak ang mga ni-repair na kalsada sa kahabaan ng EDSA.

Mantakin n‘yo, P6 bilyon ang ginastos d‘yan ng Department of Public Works and Highways (DPWH) sa pamumuno ni Sec. Vince Dizon, tapos winasak lang ng Habagat.

Aba’y sa laki ng ginastos d‘yan ng DPWH, dapat may managot. Dapat itong imbestigahan ni Ombudsman Boying Remulla para malaman kung substandard din ang EDSA projects na ito ni Sec. Dizon. Period!

XXX

KAHIT BUMAGAL ANG INFLATION RATE, MATAAS PA RIN ANG PRESYO NG MGA BILIHIN AT BAYARIN SA ‘PINAS – Last week ay ibinida ng Malacañang ang pagbagal sa 6.2% ng inflation rate sa bansa.

Sa totoo lang, hindi dapat ibinida iyan ng Malacañang kasi kahit bumagal sa 6.2% ang inflation rate noong Hulyo 2026, hindi naman bumaba ang presyo ng mga bilihin at bayarin. Nanatiling mataas ang mga ito. Boom!

School activities, dapat dumaan sa safety assessment

ni Leonida Bonifacio-Sison @Boses | August 17, 2026

Sa paaralan dapat unang nararamdaman ng isang estudyante ang seguridad, hindi takot na baka mapahamak habang nasa loob ng silid-aralan. Ang insidenteng kinasangkutan ng isang 15-anyos na Grade 10 honor student ay malinaw na paalala na walang aktibidad na dapat isagawa nang isinasantabi ang kaligtasan.

Noong Agosto 11, ang estudyante ay nagbabasa ng kanyang notes sa classroom nang aksidenteng tamaan sa leeg ng palasong pinaputok ng kapwa Grade 10 student. Ayon sa ulat, nagsasanay ang kabilang estudyante para sa nalalapit na Palaro ng Bayan sa loob ng Grade 10 New Building nang mangyari ang insidente alas-4:30 ng hapon.

Dahil dito ay kinailangang sumailalim sa operasyon ang biktima upang alisin ang palaso. Para sa pamilya ng biktima, hindi dapat matapos sa pag-aalala at imbestigasyon ang insidente. 

Mahalaga ring linawin na ng school head ang naturang archery practice. Wala rin umanong school personnel na nagbigay ng utos o direktiba para isagawa ito sa loob ng paaralan. 

Sa ganitong insidente, hindi sapat ang sabihing aksidente lamang. May mga aktibidad na nangangailangan ng malinaw na lugar, sapat na supervision at mahigpit na safety rules. Dapat ding maunawaan ng mga paaralan na ang paghahanda para sa paligsahan ay hindi dapat maging dahilan para malagay sa panganib ang ibang estudyante.

Ang paaralan ay lugar ng pagkatuto, hindi lugar ng hindi kinakailangang panganib. Kailangang maging aral ang nangyari para masigurong bawat ensayo, paligsahan at school activity ay dumaraan sa tamang pahintulot at safety assessment.

Ang tunay na tagumpay ng isang palaro ay hindi lamang nasusukat sa medalya. Mas mahalaga na matapos ito nang ligtas ang bawat estudyante. Dapat maging malinaw ang panawagan na kaligtasan muna bago laro, at responsibilidad muna bago aktibidad.

Pag-ibig sa Diyos na higit sa sariling buhay

ni Fr. Robert Reyes @Kapaayapaan / Patakbo-takbo | August 16, 2026

San Maximiliano Kolbe, saksi ng pananampalataya at katotohanan

Labintatlong taon na ang nakararaan nang ipagkaloob sa atin ang Unang Pamamahayag ng Pangako (First Vows) bilang kasapi ng Order of Friars Minor (OFM) o mga Franciscano. Naganap ito sa isang Misa sa Parokya ni San Buenaventura sa Liliw, Laguna, bilang masayang pagtatapos ng isang taong pagsasanay sa Nobisyado ng mga Franciscano sa Juan de Plasencia Novitiate.

Napakasayang pagdiriwang iyon. Naroon ang aking nanay Naty at napakaraming kaibigan mula sa iba’t ibang lugar. Dumating din si Fr. Jim Mulroney, isang Columban Missionary na naglilingkod sa Hong Kong. Naroon ang mga kababata, mga dating kaeskwela sa seminaryo na may kanya-kanya nang pamilya, mga dating guro at mga dating parokyano. Tunay na isang pagdiriwang na puno ng masasayang alaala.

Mula noon hanggang ngayon, sari-saring anyo ng pagiging martir at pagsaksi sa Panginoon ang ating naranasan at patuloy na nararanasan. Malaking tulong sa buhay ni San Maximiliano Kolbe ang kanyang malalim na debosyon sa Mahal na Birheng Maria.

Sa isang pangitain, nakita niya ang Inang Maria na nag-aalok sa kanya ng dalawang korona—isang puti at isang pula. Ang puting korona ay sumasagisag sa kalinisan, samantalang ang pulang korona ay para sa pag-aalay ng sariling buhay bilang martir. Pinapili siya ng Mahal na Birhen kung alin ang nais niya. “Pareho po,” ang sagot niya. At kapwa nga ipinagkaloob sa kanya ang dalawang korona.

Nakita rin ni San Maximiliano ang malaking kahalagahan ng pamamahayag sa pagpapalaganap ng pananampalataya. Nagsulat siya at naglathala ng Militia Immaculatae o Militia of the Immaculata, isang kilusang naglalayong ipalaganap ang debosyon sa Mahal na Birhen at labanan ang kasamaan, kasinungalingan, karahasan at kasakiman sa mundo.

Itinatag din niya ang Niepokalanów sa Poland, isang malaking komunidad na naging sentro ng kanyang gawaing pangmisyon at pamamahayag. Malinaw sa kanya ang kahalagahan ng komunikasyon at organisasyon sa pagpapalaganap ng Ebanghelyo. Kung nabuhay siya sa panahon ng Internet at social media, marahil ay gagamitin niya ang bawat makabagong plataporma at app upang maabot ang mas maraming tao. Umabot sa mahigit isang milyon ang sirkulasyon ng mga publikasyong kaugnay ng kanyang kilusan.

Noong 1939, sinalakay at binomba ang Niepokalanów. Hinuli si San Maximiliano at ang kanyang mga kasama, ngunit pinalaya rin sila makalipas ang ilang buwan. Noong 1941, muli siyang hinuli at ikinulong sa Auschwitz.

Isang araw, matapos makatakas ang isang bilanggo, sampung preso ang pinili upang magsilbing kapalit nito at patayin. Isa sa mga napili ang nagmakaawa dahil mayroon siyang pamilya at nais pa niyang makita ang mga ito. Sa halip na manood lamang, lumabas si Maximiliano sa hanay at hiniling sa kumander na siya na lamang ang ipalit sa lalaking may pamilya. Nagulat ang kumander ngunit pinagbigyan ang kanyang kahilingan.

Dinala si Maximiliano at ang iba pang mga bilanggo sa isang silid kung saan sila ay sinadyaang patayin sa pamamagitan ng gutom at uhaw. Sa huli, itinurok kay Maximiliano ang carbolic acid upang wakasan ang kanyang buhay.

Noong 1971, idineklarang Beato si Maximiliano Kolbe. Noong 1982, itinaas siya sa karangalan ng pagiging santo bilang si San Maximiliano Maria Kolbe.

Taon-taon, tuwing sumasapit ang kanyang kapistahan, tahimik nating pinagninilayan ang ating maliit at abang buhay. Sinasariwa rin natin ang malalim na kaugnayan sa Mahal na Inang Maria, na mahalaga sa buhay ng paglilingkod at sa pagsusulong ng katotohanan at katarungan ng Kaharian ng Diyos.

Salamat po, San Maximiliano. Tulungan po ninyo kami, lalo na ngayon sa gitna ng sari-saring pag-uusig at panganib. Nawa’y manatiling buhay at maalab ang aming pagmamahal sa Panginoong Hesukristo at sa Kanyang pinakamamahal na Ina, ang Mahal na Birheng Maria.

Panginoon, pagkalooban Mo po kami ng malinaw at matatag na pagtutok sa gawain ng pamamahayag at pagpapalaganap ng Iyong Kaharian, tulad ng ipinakita sa amin ni San Maximiliano sa kanyang buhay ng paglilingkod at pag-aalay ng sarili.

Nakapapagod ang kasalukuyang kalagayan at kapaligiran, hindi lamang sa ating bansa kundi maging sa buong mundo. Ibalik Mo po sa amin ang maalab na pagmamahal sa Iyong Anak at ang debosyon sa Kanyang Ina upang manatili kaming matatag at handa sa anumang hamon, pagsubok at panganib.

San Maximiliano Kolbe, ipanalangin mo kami.

Amen. Amen. Amen.