Isa sa namaril sa iskul... 14-anyos, adik sa online game na GoreBox

ni Jeff Tumbado @News | June 24, 2026

Photo: Gorebox

Habang patuloy na binubuo ng mga otoridad ang larawan sa likod ng madugong pamamaril na yumanig sa loob ng San Jose National High School (SJNHS), isa sa mga natuklasan sa imbestigasyon ay ang umano’y matinding pagkahilig ng isa sa dalawang menor-de-edad na suspek sa mobile game application na “GoreBox”.

Ayon kay Police Regional Office-8 Director Brig. Gen. Jason Capoy, lumabas sa mga paunang imbestigasyon na ang 14-anyos na suspek ay madalas umanong naglalaro ng naturang online game na naglalaman ng mga eksena ng karahasan at paggamit ng iba’t ibang uri ng armas.

“During the investigation, it was learned that the 14-year-old was reportedly addicted to a mobile game called GoreBox, which supposedly features graphic violence and gun use,” pahayag ni Capoy sa panayam ng media kaugnay sa nagpapatuloy na imbestigasyon.

Dahil sa lumabas na impormasyon, naglabas ng kautusan ang Cybercrime Investigation and Coordinating Center (CICC) na pansamantalang ipagbawal ang access sa “GoreBox” habang isinasagawa ang mas malalim na pagsusuri upang malaman kung may naging papel ang laro sa nangyaring karahasan.

Ayon sa CICC, hindi dapat balewalain ang posibleng epekto ng labis na pagkakalantad ng mga kabataan sa mararahas na digital content, lalo na kung may kaugnayan ito sa mga online communities na maaaring magpalaganap o magnormalisa ng agresibong pag-uugali.

Gayunman, nilinaw ng mga otoridad na wala pang pinal na konklusyon na ang paglalaro ng “GoreBox” ang direktang dahilan o motibo ng suspek sa pamamaril.

Ex-Coach Baldwin, humarap na sa NBI

ni Gina Pleñago @News | June 24, 2026

Photo: File / Tab Baldwin - Ateneo de Manila University

Humarap kahapon sa National Bureau of Investigation-Homicide Division (NBI-HD) ang nagbitiw na si Ateneo coach Tab Baldwin para sa nagpapatuloy na imbestigasyon sa pagkamatay ng student-athletes na sina Rene Baterbonia at Divine Adili nitong Martes.

Walang ibinigay na sagot o pahayag si Baldwin sa mga pagtatanong ng media, nang dumating sa NBI headquarters sa Pasay City ala-1:45 ng hapon ng Hunyo 23, kasama ang abogadong si Atty. Karl Justine David.

Isa si Baldwin na pinadalhan ng subpoena ng NBI sa 20 indibidwal para sa fact-finding investigation sa pagkalunod at pagkamatay ng dalawang basketbolista sa team building na isinagawa sa isang beach resort sa Dipaculao, Aurora noong Hunyo 8, 2026.

Matatandaang hindi sumipot si Baldwin sa subpoena ng NBI noong nakaraang linggo kaya nagpalabas ng warning ang NBI na maaaring maharap sa contempt proceedings ang sinumang indibidwal na pinadalhan ng notice.

Kabilang sa sisilipin sa imbestigasyon kung may paglabag sa Anti-Hazing Act at iba pang batas.

Samantala, ayon kay NBI Director Melvin Matibag, malapit nang makumpleto ang kanilang imbestigasyon at hawak na rin nila ang autopsy reports sa mga labi nina Baterbonia at Adili.

PNP sa mga magulang, titser: Kabataan, bantay-sarado sa socmed, gadget

ni Jeff Tumbado @News | June 24, 2026

Photo: PNP Tacloban CPO Police Station 3

Hinimok ng Philippine National Police (PNP) ang mga magulang, guro, at tagapangasiwa ng paaralan na mas higpitan ang pagmamatyag sa mga anak sa paggamit ng social media at mga gadget kasunod ng madugong insidente ng pamamaril sa isang paaralan sa Tacloban City.

“Ang mga magulang at tagapag-alaga ang unang linya ng depensa. Kailangan nilang maging aktibo at mapagmatyag sa digital na buhay ng kanilang mga anak at ituring ang kanilang online na gawain na kasing halaga ng pag-alam sa kanilang pisikal na kinaroroonan,” ayon kay PNP Chief Police General Jose Melencio Nartatez Jr.

Nanawagan din ang PNP sa mga guro at administrador ng paaralan na maging katuwang ng mga otoridad sa tinatawag na “digital watch” sa pamamagitan ng maagap na pagtukoy sa pagbabago ng asal o mga nakababahalang interes ng mga estudyante upang maagapan ang anumang posibleng karahasan.

Ang hakbang na ito ay alinsunod sa direktiba ni Pangulong Ferdinand Marcos Jr., upang palakasin ang mga hakbang sa komunidad para sa pag-iwas sa karahasang kinasasangkutan ng kabataan at mas mapahusay ang maagang pagtukoy sa mga senyales nito.