Francis Leo Marcos, tatalupan sa police uniform — PNP

by BRT @News | February 12, 2026

Photo: Francis Leo Marcos / NAPOLCOM-PNP / Circulated

Pinag-aaralan ng Philippine National Police (PNP) ang pagsasampa ng mga reklamo laban sa vlogger na si Norman Mangusin, alyas “Francis Leo Marcos.”

Ito ay matapos mag-viral ang litrato nito sa social media na nakasuot ng uniporme ng PNP.

Ayon kay PNP Spokesperson PBGen. Randulf Tuaño, maaaring maharap sa kasong usurpation of authority at illegal use of uniforms or insignia si Mangusin na maaaring magresulta sa pagkakakulong.

Bukod dito, mayroon ding video kung saan nagmumura at naghahamon siya ng suntukan kay PRO2 Director PBGen. Antonio Marallag, Jr.

Bumagsak sa kalsada, nakaladkad ng kotse... PCU student, tumalon sa LRT, lasog

ni Mai Ancheta @News | February 12, 2026

Photo: Chivas Castello via Bulgar

Patay ang isang lalaking estudyante matapos umanong tumalon sa San Fernando Poe Jr. Avenue Station ng LRT-1 sa Quezon City nitong Miyerkules ng umaga.

Ang biktima ay estudyante umano ng Philippine Christian University (PCU) batay sa nakuhang identification card nito.

Mula sa itaas ng LRT station ay tumalon umano ang hindi pinangalanan estudyante at pagbagsak sa northbound lane ng EDSA ay nahagip ng isang sasakyan at nakaladkad pa ito nang ilang metro.

Hindi naman masabi ng mga guwardiya ng LRT 1 station kung paano nakalampas sa platform ng istasyon ang estudyante.

Batay sa pahayag ng isang saksi na dispatcher ng jeep, inakala niyang piraso lamang ng damit ang nahulog mula sa itaas ng LRT station pero laking gulat nito nang makita na tao ang nakaladkad ng kotse matapos itong bumagsak sa kalsada.

Nagpapatuloy ang imbestigasyon sa insidente at nagpahayag ang management ng LRT 1 na makikipagtulungan sila sa imbestigasyon ng mga otoridad.

PBBM, walang colon cancer — Castro

ni Mylene Alfonso @News | February 12, 2026

Photo: Presidential Communications Office

Pinabulaanan ng Malacañang ang alegasyon na na-diagnose umano ng colon cancer si Pangulong Ferdinand R. Marcos, Jr.

Ginawa ni Palace Press Officer Claire Castro ang pahayag matapos magbahagi ng larawan si dating presidential spokesperson Harry Roque ni Pangulong Marcos, kung saan pinalalabas umano na tila may suot itong colostomy bag, sa dinaluhang public engagement nito kamakailan.

“‘Yun na nga po ang masama kasi mga rumors, mga tsismis, walang katotohanan na nakakapanira sa gobyerno, nakakapanira sa Pangulo na nakakaapekto sa ekonomiya,” diin ni Castro sa Palace briefing.

Kasabay nito, tinawag ni Castro si Roque na isang “fake news peddler”.

“Nakita naman po natin ang video, iyong kabuuan kung saan itinaas pa po mismo ng Pangulo ang kanyang mga kamay habang siya ay kumakaway sa ating mga kababayan,” patuloy ni Castro.

“At kitang-kita po na ang sinasabing larawan o ipinakitang larawan ni Harry Roque ay pawang kasinungalingan lamang,” hirit niya.

Bunsod nito, hinikayat ng Palace official ang publiko na huwag paniwalaan ang naturang alegasyon.

“Huwag na po tayong maniwala at nakikiusap po tayo. Huwag na po natin dalhin sa anumang usapan ang mga fake news peddlers katulad nila,” dagdag ni Castro.

Matatandaang pansamantalang nagpahinga ang Pangulo sa kanyang mga public engagements at nagsagawa muna ng mga private meetings matapos ma-diagnose na may diverticulitis.