Landbank nag-remit ng P50B sa Maharlika

ni Mylene Alfonso @News | September 16, 2023

Inanunsyo ng Land Bank of the Philippines na nag-remit ang ahensya ng P50 bilyong kontribusyon sa Maharlika Investment Fund (MIF).

Sa isang pahayag, sinabi ng Landbank na ginawa nito ang pamumuhunan sa sovereign wealth fund sa pamamagitan ng Bureau of the Treasury nitong nakalipas na Setyembre 14, Huwebes.

Inaatasan ng batas ang Landbank at ang national government na magbigay ng tig-P50 bilyon sa MIF.

Habang ang Development Bank of the Philippines ay maglalaan naman ng P25 bilyon.

"With the regulatory requirements in place, and after securing the seed capital from state-run institutions, we are confident that the Fund will be operational by yearend," wika ni Finance Secretary Benjamin Diokno.

Binanggit naman ng Finance department na nakatanggap na sila ng mga interesadong maglagak ng salapi para sa Maharlika Fund.

Matatandaang ang mga implementing rules and regulations ng nasabing kauna-unahang sovereign wealth fund ng Pilipinas ay inilabas noong huling bahagi ng Agosto.

Pura Luka, no show ulit sa hearing

ni Mylene Alfonso @News | September 16, 2023

Hindi na naman dumalo sa ikalawang pagkakataon ng isinasagawang preliminary investigation sa Manila Prosecutors Office ang drag queen na si Pura Luka Vega.

Ayon kay Val Samia, presidente ng Hijose del Nazareno ng Quiapo, mukhang binabalewala ni Pura Luka ang isinampa nilang kaso.

Kasong indecent show at umano'y paglabag sa cybercrime law ang isinampa ng mga opisyal ng Hijos del Nazareno mula sa Simbahan ng Quiapo kaugnay ng "Ama Namin" drag performance ni Pura Luka.

Gayunman, sinabi ni Samia na handa naman ang Hijos del Nazareno na iatras ang kaso, humingi lang ng tawad si Pura Luka sa mismong Simbahan ng Quiapo.

Nabatid na maaaring maglabas na ng resolusyon ang Manila Prosecutors Office dahil sa dalawang beses na pagbabalewa ng drag queen sa preliminary investigation.

P-BBM, sinisi na walang plano.. 'Pinas, No. 1 importer ng bigas sa buong mundo

ni Mylene Alfonso @News | September 15, 2023

Naungusan na ng Pilipinas ang China bilang top importer ng bigas ngayong taon, base sa inilabas na ulat ng United States Department of Agriculture (USDA).

Sa ulat ng "Grain: World Markets and Trade", inaprubahan ng gobyerno ng Pilipinas ang pag-aangkat ng 3,900 metriko tonelada ng bigas mula noong Enero hanggang sa Disyembre.

Batay sa ulat, noong 2008 nag-angkat din ng daan-daang libong tonelada ang Pilipinas dahil sa pagtaas ng presyo at ngayong taon hinihintay na lamang na bumaba ang presyo para sa pag-aangkat.

Sa darating na Enero hanggang Agosto ng susunod na taon, posibleng mabawasan ng 100 metriko tonelada ang aangkatin na bigas ng Pilipinas habang magdadagdag naman ang China ng 500 metriko tonelada.

Sa usapin naman ng produksyon, ang Pilipinas ay nakapagtala ng 12,631 metriko tonelada, 145,946 MT sa China at 136,000 MT ang India.

Samantala, sinisi naman ng iba't ibang grupo si Pangulong Ferdinand Marcos, Jr. sa polisiya ng pag-aangkat, na patuloy umanong pumapatay sa lokal na industriya ng palay at bigas.

"Simula nang maupo siya sa puder, bukambibig niya ang importasyon at pagmamakaawa sa ibang bansa ng imported rice samantalang kaya namang i-prodyus dito sa atin," ani Cathy Estavillo, tagapagsalita ng Bantay Bigas.

"Malaking krimen ito ni Marcos Jr. sa mamamayang Pilipino dahil sa kapabayaan na paunlarin ang lokal na industriya ng palay at bigas at walang komprehensibong plano sa pagsusulong ng national food security at self-sufficiency ng bansa," dagdag pa nito.

Ani Estavillo, na secretary general din ng Amihan National Federation of Peasant Women, at Kilusang Magbubukid ng Pilipinas, napapanahon nang ibasura ang Republic Act 11203 o Rice Liberalization Law, bagay na naging dahilan umano ng pagkalugi nang marami magsasaka.