PUP main building, nasunog

ni Mylene Alfonso @News | May 6, 2026

Photo: Circulated - Jose Caridad FB

Natupok ang bahagi ng main building ng Polytechnic University of the Philippines (PUP) matapos na sumiklab ang sunog kahapon ng hapon sa Sta. Mesa, Maynila.

Batay sa ulat ng Manila Bureau of Fire Protection (BFP), alas-2:30 ng hapon nang magsimula ang sunog dahil sa “electrical fire.”

Sa advisory ng PUP management, alas-3 ng hapon nang maideklara itong fire under control.

“Rest assured that the situation is already under control and the fire has been extinguished,” nakasaad pa sa advisory.

Bunsod nito, suspendido ang klase ng mga estudyante at pinayuhan na gamitin ang mga fire exits ng unibersidad.

Samantala, wala naman iniulat na nasaktan o namatay sa nabanggit na sunog.

Patuloy naman ang imbestigasyon kaugnay sa halaga ng pinsala ng sunog.

Konsyumer, inaabuso — Imee... Meralco, kinastigo sa dagdag-singil

ni Mylene Alfonso @News | May 5, 2026

Photo: Imee Marcos - Senate of the Philippines

“Parang nawiwili na kayo sa kadadagdag!” Ito ang naging buwelta ni Senator Imee Marcos sa pamunuan ng Manila Electric Company (Meralco) sa gitna ng pagdinig ng Senate PROTECT Committee kung saan binatikos ang tila “magic” umano sa pagkukuwenta ng kuryente na sa bawat pag-angat ng presyo ng fuel at transmission ay ginagamit na dahilan para lalong palobohin ang singil sa mga consumer. 

Kinuwestiyon ni Sen. Imee ang mekanismo ng paniningil kung saan ang tumataas na Generation at Transmission charges ay muli umanong “ikinakarga” o idinaragdag sa pagkalkula ng System Loss. 

“Ang mahal na nga ng generation charge, tapos idodoble n’yo pa sa system loss? Ganoon din sa transmission, may ancillary charges na nga, isasama n’yo pa sa computation ng system loss.” 

Ayon pa sa Senador, ang sistemang ito ay nagreresulta sa double-charging, tumataas ang singil sa kuryente kapag tumaas ang presyo ng petrolyo at kapag humihina ang piso bukod pa rito ay awtomatiko umanong tumataas ang System Loss charge kahit hindi naman dumami ang kuryenteng nawawala sa linya. 

“Parang pinaglalaruan n’yo ang computation para lang lalong bumigat ang bayarin. Isang beses lang tumaas ang cost ng kuryente, pero dalawa o tatlong beses n’yo kaming siningil sa iba-ibang line item,” giit ng mambabatas. 

Lalong uminit ang pagdinig nang busisiin ni Marcos ang pagtaas ng transmission cost na dulot ng Ancillary Services o ang “standby” na kuryente para sa grid stability. “Eh, hindi pa naman ginagamit, bakit kinukubra na sa consumer? Nakatambay lang ‘yan, pero ang laki ng dagdag sa bill. At ang masakit, pati itong standby na kuryente, pinapatawan n'yo pa rin ng system loss charge. Overwhelming na ito para sa mga pamilyang hirap na hirap na,” paliwanag ni Marcos. 

Hindi rin pinalampas ng senadora ang pagpasa ng Meralco sa mga consumer ng gastos para sa Lifeline Rate at Senior Citizen discounts. Bagama’t nasa piso o sentimo lang ito, kinuwestiyon ni Marcos kung bakit kailangang ang publiko pa rin ang magpasan nito.

“Meralco is the biggest utility. Hindi ba puwedeng i-absorb na lang ng Meralco ‘yan kaysa ipasa pa sa ibang consumer? Bakit kailangang lahat ng discount, kaming maliliit na tao rin ang magpapasan?” hamon niya. Binatikos din ng senadora ang pagpataw ng Value Added Tax (VAT) sa bawat component ng bill, kabilang ang system loss at transmission, na lalong nagpapalobo sa kabuuang babayaran. 

Sa pagtatapos, binalaan ni Marcos ang Meralco at ang mga regulator (ERC at DOE) na hindi sapat ang mga "refund" na barya-barya lang kung ikukumpara sa bigat ng monthly bill. 

Nanawagan siya para sa agarang rebyu ng EPIRA Law upang tuluyang alisin ang mga hindi makatarungang pass-on charges at ang "compounded calculation" sa system loss.

Lalaki, nahulog sa elevator mula 12th flr., patay

ni Mylene Alfonso @News | May 4, 2026

Photo: File

Dedo ang isang 33-anyos na lalaki matapos mahulog sa elevator shaft na nasa loob ng isang condominium kahapon ng madaling-araw sa Malate, Maynila.

Ayon sa sketchy report ng Manila Police District (MPD), nakatanggap sila ng tawag, alas-3:30 ng madaling-araw kaugnay sa isang lalaki na nalaglag mula sa elevator shaft ng Victoria De Manila II na nasa Taft Avenue, corner Malvar Street, Brgy. 696.

Natagpuan ng mga imbestigador na wala nang buhay ang biktima na sinasabing nahulog mula sa ika-12 palapag.

Batay sa inisyal na imbestigasyon, nagkaroon ng mga bali sa katawan, sugat sa ulo at katawan ang biktima.

Sa impormasyong nakuha, uminom umano ng alak ang biktima kasama ng kanyang mga kaibigan alas-8:30 ng gabi sa kanyang unit simula Mayo 2 at lumipat na sa kalapit na bar ala-1:39 ng madaling-araw.

Nang bumalik sa condo ay sumakay ng elevator at paglabas ay nawalan umano ng balanse at napaupo sa sahig at sumandal sa isang Hardiflex board na nasa malapit sa elevator area kung saan bumigay ang sandalan kaya bumulusok ang biktima.

Alas-3 ng madaling-araw nang ideklarang patay ng Manila Disaster Risk Reduction and Management Office (MDRRMO) ang biktima.