HIRIT NI IPE: NATIONAL ARTIST AWARD, MATAGAL NA DAPAT IBINIGAY KAY NORA

ni Melba R. Llanera - @Insider | December 5, 2020

Sa special screening din ng Isa Pang Bahaghari ay nakausap namin si Phillip Salvador na nagpahayag na long overdue o matagal na dapat ibinigay kay Nora Aunor ang National Artist award.

Nagkatambal sina Phillip at Nora sa pelikulang Bona at ngayon ay sa Isa Pang Bahaghari, kaya alam ni Phillip na karapat-dapat sa Superstar ang karangalamg ito katulad ni Ricky Lee na long overdue na rin, pero naniniwala siya na ang lahat ay itatakda pa rin ng Diyos kung kailan mangyayari.

Masaya rin si Kuya Ipe na pumasa na sa Kongreso ang Eddie Garcia Act at hinihintay na lang na aprubahan ng Senado. Ayon sa aktor, matagal na nila itong napag-usapan nina Sen. Bong Go at Robin Padilla nang dalawin nila sa ospital si Manoy Eddie habang nakaratay ito.

Naniniwala siya na ito ang proteksiyon ng mga taga-industriya tulad niya at gaya ng pagiging National Artist ng Superstar ay dapat matagal na rin itong naging batas.

Labis ang pasasalamat ni Kuya Ipe kay Direk Joel Lamangan at sa line producer na si Dennis Evangelista dahil sa kabila ng pagtanggi niya noong una na gawin ang Isa Pang Bahaghari ay kinumbinse siya ng mga ito na basahin ang script at tanggapin ang pelikula.

Nang malaman niyang makakasama niya muli rito sina Ate Guy at Michael de Mesa ay siya na ang tumawag kay Direk Joel na tinatanggap niya ang pelikula. Bonus na rin para kay Kuya Ipe na mahuhusay din ang mga kabataang kasama nila sa pelikula tulad nina Sanya Lopez, Joseph Marco at Zanjoe Marudo.

Sa ganda ng pelikula, sa husay ng pagkakadirek ni Direk Joel Lamangan, sa galing ni Ate Guy at buong cast ng Isa Pang Bahaghari, sigurado kaming hahakot ng napakaraming awards sa MMFF Awards Night ang pelikula.

Siniguro rin sa amin ng Heaven's Best Entertainment producer na si Harlene Bautista na pagkatapos niyang i-produce ang mga de-kalidad na pelikula tulad ng Rainbow Sunset at Isa Pang Bahaghari ay balak na nilang gumawa ng mas maraming pelikula sa susunod na taon matapos lang ang pandemya.

Gagawa na rin daw sila ng ibang tema tulad ng rom-com, comedy at iba pa at mukhang mas magiging aktibo ang Heaven's Best sa pagpo-produce.

Positibo naman si Harlene na sa kabila ng walang regular screening ay magiging maganda pa rin ang pagtanggap ng mga tao sa 2020 Metro Manila Film Festival entries. Maaari nang manood ang isang buong pamilya ng isang pelikula dahil online ito, at mas malaki ang sakop dahil kahit ang mga nasa ibang bansa ay puwede na ring makapanood online.

Wala raw utang na loob… JAKE, TODO-PRAMIS NA 'DI IIWAN ANG DOS, NASA SINGKO NA

ni Melba R. Llanera - @Insider | December 3, 2020

Hindi nagpapaapekto at tinatanggap lang ni Jake Cuenca ang sunud-sunod na pamba-bash sa kanya ng ilang netizens dahil sa paggawa niya ng series na may titulong Ate ng Ate Ko sa TV5.

Isa ang dating Kapamilya actor sa mga pinaparatangan ngayong walang utang na loob dahil sa paglipat sa bakuran ng Kapatid Network pagkatapos na 'di maaprubahan ang franchise ng ABS-CBN.

Binabalikan ng ibang netizens ang mga binitawang salita noon ni Jake na hindi niya iiwan ang ABS kahit na ano ang mangyari sa laban nito at hindi siya lilipat. Isa rin si Jake sa mga artistang nakiisa sa noise barrage-rally ng ABS.

Depensa ng aktor, nagustuhan niya ang proyekto kaya niya tinanggap, bukod pa sa gusto niyang makatrabaho ang dating Kapuso actress na si Kris Bernal.

Pero kahit napapanood ngayon sa TV5 si Jake, nanatili naman ito sa ilalim ng Star Magic management.

May nagtanong sa amin kung makakabalik pa raw kaya sa Kapamilya Network ang mga artistang umalis sa kanila at sumakabilang-bakod kung saka-sakaling maibalik muli ang franchise ng istasyon.

'Di kami makasagot dahil 'di namin alam ang saloobin ng mga nakakataas sa Kapamilya Network.

Ang sigurado lang kami ay lalo nilang aalagaan at mamahalin ang mga artistang nanatili sa kanila at naging tapat.

9 months pa lang kasal… MATTEO, NAGSALITA NA SA ON THE ROCKS NA PAGSASAMA NILA NI SARAH

ni Melba R. Llanera - @Insider | November 25, 2020

Nagulat si Matteo Guidicelli nang matanong tungkol sa bulung-bulungan na on the rocks diumano ang pagsasama nila ng asawang si Sarah Geronimo.

Nakapanayam ng press ang aktor sa nakaraang SunLife Newlywed Starter Pack virtual mediacon at nakakapagtaka nga naman ang pinagmulan ng balita dahil 9 buwan pa lang mula nang mag-civil wedding sila ng Pop Princess at nasa honeymoon stage pa nga naman kung tutuusin dahil wala pang isang taon ang pagsasama nila.

Wala pa ngang masasabing honeymoon talaga sina Sarah at Matteo dahil 'di sila makapagbiyahe dahil sa covid 19 pandemic.

Ayon kay Matteo, napakasuwerte niya na napangasawa niya ang isang tulad ni Sarah na isang mabuti at mabait na asawa.

Tinanong din kung may balak ba silang magpakasal sa simbahan gaya nu'ng naunang balak nila pero nauwi nga sa isang secret wedding.

Sagot ng aktor ay 'pag dumating ang tamang oras lalo na kapag may bakuna na laban sa covid-19.

Kung matatandaan ay isang grand wedding ang unang plano nina Sarah at Matteo at balita na sa Italya ito gagawin kung saan piling-piling mga bisita at malalapit na tao lamang sa dalawa ang imbitado, pero ang lahat ay 'di natuloy at nauwi sa isang civil wedding na lumikha ng kontrobersiya dahil sa pagsugod ng ina ni Sarah na si Mommy Divine dahil lingid sa kaalaman nila ang naganap na kasalan.