Ex ni John Lloyd, ayaw daw maging kabit…

PAMILYADONG AKTOR-PULITIKO, GUSTONG MAKAISA, BASTED KAY ELLEN

ni Melba R. Llanera - @Insider | January 6, 2021

Mukhang tuluy-tuloy na ang pagbabalik-showbiz ni Ellen Adarna dahil kahapon, January 5, ang unang taping day ng sitcom na pagbibidahan nila ni John Estrada, ang John En Ellen. Mapapanood ito sa Tv5 simula sa January 17 sa ilalim ng direksiyon ni Direk Willy Cuevas, prodyus ng Icthus Production na pag-aari ni John.

Hango ito sa sikat na sitcom na John En Marsha na pinasikat nina Dolphy at Nida Blanca. Iniba lang ang apelyido nila kung saan mula sa Puruntong ay Kulantong naman ang ginamit na apelyido ng pamilya nina John at Ellen.

Magtatagal ang locked-in taping hanggang January 9, kung saan kukunan ang lahat ng mga eksena sa isang mansion sa Antipolo.

Sumailalim sa swab testing ang lahat ng crew at cast nu'ng January 3 kung saan nu'ng araw ding 'yun ay nagkaroon ng friendly lunch naman sina Ellen at John sa isang restaurant sa Global City para magkakilanlan at maging komportable sa isa't isa.

Nagkaroon naman ng welcome dinner ang lahat ng crew, staff at mga artista ng sitcom para makilala ang bawat isa.

Isa sa mga isyung inaabangan ng marami ay kung mali-link daw kaya sa isa't isa sina Ellen at John lalo't madalas silang magkakasama. Ito ay sa kabila na masaya si John sa buhay-may-asawa sa piling ni Priscilla Meirelles, habang may anak naman si Ellen sa aktor na si John Lloyd Cruz.

Pero bago pa man magkaroon ng mga isyu, inunahan na ni Ellen ang mga mang-iintriga sa kanila ni John at sinabing 'di siya pumapatol sa mga may-sabit o may pananagutan na sa buhay. Patunay daw nito ay ang pagbasted ni Ellen sa isang actor-politician na nagbalak na dumiskarte sa aktres sa kabila ng pagiging pamilyado nang tao.

Ex ng aktres… MARLO, PAYAG MAG-NINONG SA ANAK NINA JANELLA AT MARKUS

ni Melba R. Llanera - @Insider | December 21, 2020

"Why not? Kung masaya siya na kunin akong ninong, eh, di masaya rin ako. Tatanggapin ko," ang naging pahayag ni Marlo Mortel nang makausap namin siya sa pocket presscon ng Suarez, The Healing Priest at tinanong kung aprubado ba sa kanya kung saka-sakaling kunin siyang ninong sa nababalitang ipinagbuntis ng dating kapareha na si Janella Salvador sa boyfriend nito na si Markus Paterson.

Aware rin sa mga isyu kina Janella at Markus, ayon kay Marlo ay sobrang close sila ng aktres kahit nabuwag na ang tambalan nila at masaya siya kung masaya si Janella sa mga desisyon nito sa buhay. Huling nakausap ni Marlo si Janella bago nagpandemya. Gumawa ng vlog si Marlo sa nangyari sa tambalang MarNella at nagustuhan-suportado naman ito ng dating kapareha.

Naikuwento rin sa amin ni Marlo na sa ngayon ay may girlfriend na ang kanyang ama pagkatapos ng dalawang taong pagluluksa nila sa pagkamatay ng ina dahil sa breast cancer.

Para kay Marlo, wala na siyang adjustments na pinagdaanan sa pagkakaroon ng bagong madrasta dahil alam niya na deserve rin ng ama na maging masaya ito.

Papuri pa ng actor-singer sa bagong girlfriend ng ama, may nag-aalaga na sa kanila ngayon at 'di nila alam ang gagawin nila ngayong pandemic kung wala ang kanyang madrasta dahil 'di sila marunong magluto.

Samantala, aminado si Marlo na may mabigat na pinagdaanan ngayong pandemya na inakala niyang 'di niya malalagpasan.

Siniguro sa amin ng aktor na wala naman itong kinalaman sa pagkawala ng trabaho niya sa ABS-CBN kundi personal at malala ang pinagdaanan niyang anxiety attacks dahil dito.

Sa nangyari ay nalaman ni Marlo kung ano ang layunin niya sa buhay at ito ay makapagbahagi ng salita ng Diyos.

Timing naman dahil kasama siya sa pelikulang Suarez: The Healing Priest kung saan isang reporter ang role na ginagampanan ni Marlo. Naikuwento ng aktor na malayo pala nilang kamag-anak ang namayapang healing priest at naikukuwento ito sa kanya ng kanyang lola.

Pinanghihinayangan nga lang ni Marlo na 'di sila nagkakilala nang personal ni Father Fernando Suarez at sumakabilang-buhay na ito habang isinu-shoot ang pelikula.

Itinanong din namin kung bukas ba siya kung saka-sakaling may mag-alok sa kanya ng BL series o movie, at ayon kay Marlo, wala pa naman siyang natatanggap na ganitong alok pero 'di siya nagsasarado ng pinto at depende pa rin ang lahat sa istorya at sa kung ano ang magiging role niya.

After ng hiwalayan kay Andrea… DEREK, SI POPS ANG KASAMA NU'NG BIRTHDAY AT HOUSE BLESSING

ni Melba R. Llanera - @Insider | December 10, 2020

Tiyak na lalong uugong ang balitang nag-uugnay kina Derek Ramsay at Pops Fernandez ngayong lumabas ang mga larawan na dumalo ang Concert Queen sa house blessing-cum intimate birthday celebration ng Kapuso hunk nu'ng Lunes (Disyembre 7).

Nag-post nga si Derek ng pasasalamat sa lahat ng kapamilya at malalapit na kaibigang dumalo sa okasyon.

Si Pops ang naituturong third party sa hiwalayang Derek-Andrea Torres sa kabila ng pagkaklaro ng parehong kampo ng dating magkasintahan na walang third party gaya ng inaakala ng iba.

Ang pinagmulan pala ng isyu ay dahil nagpunta si Pops nu'ng nakaraang birthday ng ina ni Derek dahil malapit palang kaibigan ng pamilya ng aktor ang singer. Kasama ang manager ng aktor na si Joji Dingcong, buwanan ay dumadalaw ang grupo ng tatlo sa Manaoag.

Sa ngayon ay ini-enjoy muna ni Derek ang oras kasama ang pamilya at ilang malalapit na kaibigan. Bigo man ang puso ay nagmu-move on ang aktor sa hiwalayan nila ni Andrea.

Maaaring tama ang parehong sinabi ng dalawa na hindi lang talaga sila nakatakda para sa isa't isa kaya't sa kabila ng nasabi nilang sa susunod na taon na sana ang kasal nila ay nauwi pa rin sa hiwalayan.