Shabu lab, buking... Bilyong pisong droga, kemikal nasamsam

by Maeng Santos @News | February 24, 2026

Photo: NALANSAG ng pinagsamang mga operatiba ng PDEA Cavite Provincial Office, at PDEA RO-NCR Northern District Office, kasama ang Station Drug Enforcement Unit (SDEU) ng Valenzuela City Police sa pangunguna ni P/Lt. Sherwin Dascil ang isang shabu laboratory sa loob ng isang warehouse sa Brgy. Viente Reales, Valenzuela City matapos ang pagkakaaresto sa isang High-Value Drug Personality na si alyas John, 30, sa ikinasang buy-bust operation sa lugar. Tinatayang nasa bilyong pisong halaga ng ilegal na droga, mga kemikal, at mga kagamitan sa paggawa ng shabu ang nasamsam. (Maeng Santos)

Isang shabu laboratory ang nalansag ng mga tauhan ng Philippine Drug Enforcement Agency (PDEA), kasunod ng pagkakaaresto sa isang High-Value Drug Personality sa buy-bust operation sa Valenzuela City, Linggo ng madaling-araw.

Ikinasa ang operasyon ng pinagsamang mga operatiba ng PDEA Cavite Provincial Office, PDEA RO-NCR Northern District Office, Station Drug Enforcement Unit (SDEU) ng Valenzuela City Police sa pangunguna ni PLt. Sherwin Dascil laban sa isang alyas John, 30, ng Cubao, Quezon City.

Matapos umano ang transaksyon sa pagitan ni alyas John at ng isang PDEA agent na nagpanggap na buyer, alas-4:15 ng madaling-araw sa Brgy. Viente Reales ng lungsod, ay biglang tumakbo umano ang suspek papasok sa isang warehouse.

Hinabol siya ng mga operatiba hanggang sa maaresto sa loob ng warehouse at nakumpiska sa kanya ang isang plastic bag na naglalaman ng humigi't kumulang kalahating kilo ng hinihinalang shabu na may standard drug price na P3.4 milyon at buy-bust money.

Kasunod nito, nadiskubre ng mga operatiba ng PDEA sa loob ng nasabing warehouse ang isang shabu laboratory kung saan ginagawa ang droga.

Nasamsam sa nasabing shabu lab ang humigi't kumulang 25 kilos ng umano'y shabu, mga kemikal at kagamitan sa paggawa ng drugs at ilang drum na naglalaman ng suspected cocaine.

Ayon sa PDEA, tinatayang umaabot lahat sa bilyong piso ang halaga ng mga nasamsam na ilegal na droga, mga kemikal at mga kagamitan sa paggawa ng shabu habang inaalam pa kung sino ang nagpapatakbo ng naturang shabu laboratory.

CMU, binulabog ng bomb threat

by Maeng Santos @News | February 20, 2026

Photo: CMU-I-Connect / SS

Nakatanggap ang City of Malabon University (CMU) ng mensahe sa e-mail na may bomba umaano sa naturang pamantasan kaya agad ipinatupad ang mahigpit na panuntunan, Huwebes ng tanghali.

Hindi naman nagsuspinde ng klase ang unibersidad pero inabisuhan ng pamunuan ang miyembro ng kanilang pamayanan na maging kalmado, mapagmasid, at ipagkaloob ang kooperasyon sa mga pulis at security personnel.

Batay sa inilabas na kalatas ng pamunuan ng naturang pamantasan, nagsagawa ng imbestigasyon ang mga tauhan ng Malabon City Police Station at inalam agad ang sitwasyon habang nagdagdag at hinigpitan na rin nila ang seguridad sa buong campus.

Matapos ang masusing pagsisiyasat sa buong campus, walang nakitang panganib subalit patuloy pa rin ang mahigpit na panuntunang ipinatupad sa mga pumapasok sa campus at masusing nirerekisa ang dalang gamit pati na ang pag-monitor sa mga sasakyan sa pasilidad.

Bagama’t hindi inilagay sa kalatas na inilabas ng pamunuan ang uri ng pananakot na kanilang natanggap, kinumpirma naman ni Malabon Station Community Affairs Section (SCAS) chief P/Capt. Eduardo Antalan, Jr. na bomb threat ang mensaheng natanggap ng pamunuan na ipinadala sa kanilang e-mail.

Sa pahayag ng pamunuan, sineseryoso nila at kinokondena ang lahat ng uri ng mensahe ng pananakot at karahasan kasabay ng pagtiyak na hahabulin ang mga ito hanggang sa lawak na maaabot ng batas.

Sandbags sa nasirang pader bumigay... Ilang lugar sa Navotas, muling binaha

ni Maeng Santos @News | June 30, 2025

Muling binaha ang ilang lugar sa Navotas City nang bumigay nitong Linggo ng umaga ang mga inilagay na sandbag sa nasirang riverwall sa Celeste St., Brgy. San Jose noong Sabado ng bago magtanghali.

Kaya, muling iniutos ni Mayor John Rey Tiangco ang pagpapalikas sa mga pamilyang labis na maaapektuhan ng paglalim ng tubig baha na dala ng high tide ala-1:07 Linggo ng hapon.

Sabado ng hapon nang magsagawa ng rescue operations ang Navotas Disaster Risk Reduction and Management Office (DRRMO), katuwang ang BFP-Navotas, PNP-Navotas, fire volunteers, SCAN International, at mga boy scouts sa mga apektadong pamilya sa ilang lugar sa lungsod, partikular sa Brgy. San Jose matapos umabot ng hanggang leeg ang lalim ng baha bunga ng pagkasira ang dike pasado alas-11 ng umaga.

May 22 pamilyang inilikas ang pansamantalang nanuluyan sa Navotas Elementary School 1 habang walong pamilya ang dinala sa barangay hall kung saan sila binigyan ng pagkain, kumot, hygiene kits at iba pang pangunahing pangangailangan.

Nang mag-low tide, sinimulang maglagay ng mga sandbag sa nasirang dike ng mga tauhan ng City Engineering Office subalit, bumigay din ito nitong Linggo ng umaga matapos magkaroon ng butas.

Samantala, nagpadala rin ng mga rescue boat si Malabon Mayor Jeannie Sandoval sa pamamagitan ng City DRRMO para tumulong sa paglikas sa mga apektadong pamilya.