Pets, puwede na sa LRT2

ni Lolet Abania | January 26, 2023

Simula sa Pebrero 1, papayagan na ang mga alagang hayop sa Light Rail Transit Line 2 (LRT2), ayon sa Light Rail Transit Authority (LRTA).

“Beginning February 1, puwede nang magdala at magsakay ng ating mga pets sa mga istasyon at tren ng LRT Line 2,” ani LRTA administrator Hernando Cabrera sa isang televised public briefing ngayong Huwebes.

Gayunman, sinabi ni Cabrera na ang mga alagang hayop ay dapat na fully vaccinated at nasa loob lamang ng cage nito para maiwasan ang posibleng kaguluhan at makaistorbo sa ibang mga pasahero.

Kailangan ding malinis at nakasuot ng diaper ang mga pets na dala ng mga pasahero. May partikular lamang din na sizes ng mga alagang hayop na papayagan dahil maaaring mahirapan na maipasok ang mga malalaking pets sa loob ng mga istasyon, banggit ni Cabrera.

Aniya pa, ang karaniwang polisiya sa mga pet-friendly establishments ay ipapatupad sa LRT2. Ayon kay Cabrera, pinapayagan na ng Metro Rail Transit Line 3 (MRT3) ang mga pets sa kanilang mga istasyon simula pa noong 2021.

Makikipag-ugnayan naman rin sila sa pamunuan ng Light Rail Transit Line 1 (LRT1) para gawin na rin ang parehong hakbang. Ang LRT2 ay nag-o-operate sa 13 stations mula Recto Avenue sa Manila hanggang Antipolo City.

“Daming expert, pero dapat mahal ang mga magsasaka” – Villar

ni Lolet Abania | January 24, 2023

Maraming mga eksperto sa sektor ng agrikultura, subalit ang Department of Agriculture (DA) ay dapat na pamunuan ng isang indibidwal na may pagmamahal sa mga magsasaka, ayon kay Senator Cynthia Villar.

Ito ang naging tugon ng chairwoman ng Senate committee on agriculture, food and agrarian reform nang tanungin siya hinggil sa statement ni Pangulong Ferdinand "Bongbong" Marcos Jr. na ang susunod na DA chief ay dapat na isang expert o dalubhasa sa larangan.

“Maraming expert kaya lang kung wala namang heart for the farmers, aapihin din ang mga small farmers,” pahayag ni Villar sa isang interview ng mga reporters ngayong Martes.

“Ako maganda rin ‘yung may secretary of Agriculture but be sure na ‘yung secretary of Agri e mahal ang farmer kasi kahit ikaw ay may secretary of Agriculture, kung hindi mo naman mahal ang farmer e ‘di wala ring serbisyo,” anang senadora.

Sinabi rin ni Villar na ang isang DA secretary na mayroong puso para sa mga magsasaka ay makakayang mapaglabanan ang “temptations” o tukso mula sa mga indibidwal na layong maimpluwensiyahan ang kayang mga desisyon.

“Kasi alam mo ano e, mahirap din ‘pag maraming nag-i-influence sa iyo to do something that’s not good for the farmers and minsan hindi na rin maka-resist, kaya dapat talaga may heart na devoted sa farmer para maka-resist doon sa mga temptation na gano’n,” ani Villar.

Nang tanungin ang senadora kung mayroon siyang maire- ecommend kay Pangulong Marcos para mamuno sa DA, ayon kay Villar, “I don’t want to comment on that... sabi ng husband ko, huwag magko-comment ng gano’n... ‘Di ako nagre-recommend sa president mamaya mapalpak ‘yun ako pa ang masisi.”

“’Di ako naghahanap e kasi di naman ako presidente. Ba’t ako maghahanap?” dagdag pa niya.

Sarangani, niyanig ng 5.9-magnitude na lindol

ni Lolet Abania | January 24, 2023

Niyanig ng magnitude 5.9 na lindol ang silangan ng Balut Island sa Sarangani, Davao Occidental ngayong Martes ng umaga, ayon sa Philippine Institute of Volcanology and Seismology (PHIVOLCS).

Batay sa ahensiya ang lindol, kung saan ibinaba mula sa magnitude 6, ay naitala ng alas-10:13 ng umaga at may lalim na 27 kilometro habang tectonic ang pinagmulan.

Ayon pa sa PHIVOLCS, wala namang napinsala sa subalit asahan na ang mga aftershocks.

Nauna rito, isa ring 5.2-magnitude na lindol ang tumama sa timog-silangan sa parehong isla.