DND at AFP, katapatan dapat para sa Konstitusyon at sa bayan

ni Leonida Sison @Boses | September 14, 2025

Sa gitna ng mga panawagan ng publiko laban sa umano’y katiwalian, partikular na sa flood control projects, nananatili naman ang suporta at hindi bibitiw sa gobyerno ang mga sundalo at militar.

Naninindigan ang Department of National Defense (DND) at Armed Forces of the Philippines (AFP) ng kanilang pagiging tapat sa Konstitusyon at sa taumbayan. 

Sa inilabas na pahayag nina Defense Secretary Gilberto Teodoro Jr. at AFP Chief of Staff General Romeo Brawner Jr., mariin nilang tinututulan ang mga tangkang ilihis ang misyon ng militar sa mga usaping pulitikal. Tinawag nila itong “futile and irresponsible”, na para bang sinasabing hindi dapat ginagawang ‘laruan’ ang AFP sa mga agenda ng iilang grupo. Sa halip, binigyang-diin nila ang pagiging propesyonal at non-partisan ng institusyon — isang paninindigan na dapat pahalagahan sa panahon ng kahinaan ng tiwala ng publiko sa pamahalaan. 

Hindi rin nila kinakalimutan ang laban kontra-korupsiyon, na kanilang tinaguriang pambansang krusada. Ang ganitong mensahe ay mahalaga dahil ipinapakita nitong hindi sila basta nagbubulag-bulagan sa mga usaping nagpapahirap sa mamamayan at sa bayan. Pinaninindigan nila na ang tunay na serbisyo ay nakaugat sa integridad at pananagutan, isang pangakong iniaalay nila sa mga bayani at sa susunod na henerasyon ng mga Pinoy. 

Sa kabila ng mga panawagan na magsalita, o pumabor ang militar sa ilang isyu, pinatutunayan ng AFP na ang tanging sinusunod nila ay ang tinatawag na Chain of Command at ang mandato ng batas. Ito ay nagpapakita ng respeto sa demokratikong proseso, taliwas sa mga panawagang magpatupad ng hakbang na wala sa legal na balangkas o labag sa batas. Ang ganitong paninindigan ay hindi lamang pagtalima sa Konstitusyon kundi isang proteksyon laban sa kaguluhan na maaaring idulot ng pamumulitika. 

Ang pahayag ng AFP at DND ay hindi lamang simpleng depensa laban sa tila nagtatangkang guluhin ang ating bansa. Isa itong paalala sa ating lahat na ang tunay na pagbabago ay hindi kailanman makakamit sa marahas o anumang pag-aaklas. Ang kapayapaan at kaunlaran ay makakamtan lamang kung may pagtitiwala sa demokratikong institusyon, paggalang sa mga proseso at pagkakaisa sa ilalim ng batas. 

Tulad nila, at bilang mamamayan, ipanata rin natin na maging tapat sa Konstitusyon, sa kapwa at sa bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Malinaw na patakaran sa paggamit ng face shield, now na!

ni Leonida Bonifacio Sison - @Boses | June 22, 2021

Inaasahang lalabas ngayong linggo ang memorandum ni Pangulong Rodrigo Duterte hinggil sa paggamit ng face shield.

Ayon kay Cabinet Secretary Nograles, habang wala pa ang memorandum, mananatili ang umiiral na regulasyon sa pagsusuot ng face shield sa pampublikong lugar.

Kamakailan, sinabi ni Senate President Vicente Sotto III na pumayag ang Pangulo na isuot lamang ang face shield sa mga ospital.

Kasunod nito, inirekomenda ng Inter-Agency Task Force Against COVID-19 sa Pangulo na kailangang isuot ang face shield sa mga enclosed/indoor spaces ng ospital, eskuwelahan, lugar ng paggawa, commercial establishment, PUV at place of worship.

Matatandaang, marami ang naguluhan kung ano ang patakaran ng gobyerno sa pagsusuot ng face shield. Makalipas ang ilang oras nang kumpirmahin ng Palasyo na ang pahayag ng Pangulo, binawi rin ito at sinabing mananatili ang mandatory wearing of face shield dahil umapela ang IATF na isuot pa rin ito sa lahat ng nasa indoor spaces.

Tutal, sa Pangulo na manggagaling ang ilalabas na memorandum, hangad nating maging malinaw ang lahat. Ang hirap kasi kung laban-bawi tayo sa regulasyon, tapos hindi alam ng taumbayan kung kanino makikinig o susunod.

Kumbaga, bago tayo magbaba ng kautusan o patakaran, dapat lahat ng kinauukulan na kailangang magdesisyon ay nakapag-usap-usap at nagkasundo.

Bukod sa tinitiyak nating magiging ligtas ang hakbang na ito laban sa pagkalat ng virus, dapat ding masiguradong maiiwasan ang kalituhan.

Bagama’t nananatiling hati ang opinyon ng publiko sa paggamit ng face shield, panawagan natin sa lahat na patuloy na sumunod sa mga umiiral na patakaran.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagiging kampante at pasaway ng taumbayan, no. 1 dahilan ng pagtaas ng COVID cases

ni Leonida Bonifacio Sison - @Boses | March 2, 2021

Mas mataas na arawang kaso ng COVID-19 sa bansa.

Ito ang inaasahan ng mga eksperto ng UP-OCTA Research Group kung magpapatuloy ang trend sa pagtaas nito na nag-umpisa noong mga nakaraang araw kung saan giit ng mga eksperto, posibleng umabot sa 2,500 ang arawang kaso ng COVID-19 sa bansa.

Matatandaang noong Sabado, naitala ang 2,921 bagong kaso ng COVID-19, pero bumaba naman ito sa 2,113 noong Linggo.

Binigyang-diin ng mga eksperto na ang naturang pagtaas ng COVID-19 cases ay maaaring dulot ng mga nagdaang selebrasyon tulad ng Valentine’s Day at maging ang Chinese New Year kung saan marami ang lumabas at namasyal, pero pangunahing dahilan umano ang maaaring pagkakumpiyansa ng publiko.

Samantala, naniniwala rin ang Department of Health (DOH) na ang pagbabawas sa ilang quarantine restrictions at ang maluwag naman na pagtugon ng mga lokal na pamahalaan ang isa sa mga maaaring dahilan ng muling pag-angat ng COVID-19 cases.

Kapansin-pansin nga ang pagtaas ng kaso ng COVID-19 sa ilang lugar sa bansa, partikular sa Metro Manila. Sa Pasay City, may pinakamalaking itinaas ng mga kaso, na dahilan para isailalim sa “localized lockdown” ang nasa 56 barangay. Kasabay nito, binabantayan din ng OCTA Research ang posibleng pagtaas ng mga kaso Manila, Quezon City at Makati.

Sa totoo lang, marami talagang dahilan ng pagtaas ng COVID-19 cases at kung sakali mang pumalo ito sa 2,500 kada araw, hindi nakapagtataka dahil hanggang ngayon, napakaraming pasaway.

Kahit may curfew, kapansin-pansing napakaraming istambay. Dikit-dikit, walang mga facemask at madalas, nag-iinuman pa. Ang iba naman, todo-lakwatsa at dedma sa mga health protocols.

Kahit patuloy ang mga paalala at babala tungkol sa virus, wa’ ‘wenta kung hindi makikinig ang taumbayan.

Isa pa, kampante ang marami dahil may bakuna na, pero hindi ito sapat para umastang normal na ang lahat. Paalala lang, marami pa ho tayong pagdaraanan kaya utang na loob, pairalin pa rin ang disiplina at wastong pag-iingat sa lahat ng oras.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com