Bigtime oil price hike... P19.80 diesel, P5.90 gasoline, P9.10 kerosene

ni Jeff Tumbado | April 7, 2026

Inaasahang muling sasabak ang mga motorista sa panibagong bugso ng malakihang taas-presyo sa petrolyo, ngayong Martes.

Shell Pilipinas Corp.

Gasoline: + P5.90 per liter

Diesel: + P19.80 per liter

Kerosene: + P9.10 per liter

Petron Corp.

Gasoline: + P4.90 per liter

Diesel: + P18.80 per liter

Kerosene: + P8.10 per liter

Sa ngayon, wala pang inilalabas na anunsyo ang iba pang mga kumpanya ng langis kaugnay ng kanilang magiging price adjustments.

Ayon sa mga source sa industriya, ang panibagong pagtaas ng presyo ay iniuugnay pa rin sa nagpapatuloy na tensyon at digmaan sa Gitnang Silangan, na patuloy na nagbabanta sa suplay ng langis sa pandaigdigang merkado.

Bagama’t nakakuha na umano ng katiyakan ang Pilipinas mula sa Iran para sa ligtas na paglayag ng mga barkong may kargang langis sa Strait of Hormuz—isang mahalagang ruta ng kalakalan ng enerhiya—nanatiling mataas ang presyo ng langis dahil sa kawalan ng senyales kung kailan tatagal ang tensyon sa rehiyon. 

Plunder vs. Romualdez at Escudero, kasado na — Ombudsman

ni Jeff Tumbado | April 7, 2026

Iniihayag ni Ombudsman Jesus Crispin Remulla na seryoso nang ikinakasa ng kanyang tanggapan ang kasong plunder laban kina Leyte 1st District Rep. Martin Romualdez at Senator Francis “Chiz” Escudero kaugnay sa kinalaman umano ng mga ito sa flood control scandal.

Ayon kay Remulla, may elemento ng sabwatan o conspiracy ang reklamong inihahanda at posibleng maisampa ito sa loob ng buwan ng Mayo.

Ipinaliwanag ni Remulla na may kaugnayan ang naturang kaso sa flood control scandal “sa maraming paraan,” at inaasahang marami pang indibidwal mula sa dalawang kapulungan ng Kongreso ang maaaring madamay.

Sinabi rin niya na iikot ang kaso sa proseso ng pagbuo ng pambansang badyet, partikular kung paano ito ipinasa sa dalawang kapulungan at kung anu-anong proyekto ang naisakatuparan dahil dito.

Ayon pa kay Remulla, maaaring balikan ng imbestigasyon ang panahon ng panunungkulan ni Lord Allan Velasco bilang House Speaker mula 2020 hanggang 2022.

Binanggit din ng Ombudsman na bahagi ng case buildup ang mga testimonya ng mga testigo sa mga pagdinig ng Senate Blue Ribbon Committee kaugnay ng flood control projects noong nakaraang taon.

Nauna nang itinanggi nina Romualdez at Escudero ang mga alegasyon na sila umano ang nasa likod ng mga kwestiyonableng budget insertion.

Lahat ng fire safety inspectors sa Metro Manila, sibak

ni Jeff Tumbado | April 1, 2026

Sinibak sa puwesto ang lahat ng fire safety inspectors (FSIs) sa Metro Manila ng Bureau of Fire Protection (BFP) bilang bahagi ng hakbang sa pagsugpo sa mga katiwalian sa ahensya.

Sa inilabas na pahayag nitong Martes, sinabi ng BFP na layunin ng hakbang na magtakda ng bagong pamantayan ng transparency bago palawakin ang programa sa iba pang rehiyon.

Ayon sa ahensya, marami sa mga FSIs ang tapat at dedikado sa serbisyo, ngunit kinakailangan ang malawakang relief upang matugunan ang mga sistematikong anomalya at makapagsimula ng panibagong sistema.

Hindi naman agad pinangalanan ng BFP kung sinu-sino ang mga apektadong FSIs at kung ilan ang kabuuang bilang ng mga ito.

Ipinaliwanag ng BFP na papalitan ang mga inalis na FSIs ng mga kwalipikadong tauhan na hindi pa nagsisilbi bilang inspector sa NCR.

Kung kulangin ang tauhan sa rehiyon, kukuha ang ahensya ng karagdagang personnel mula sa ibang regional offices.

Titiyakin din ng BFP ang due process sa sistema ng inspeksyon at magtatag ng mas malinaw at patas na proseso sa pagpapatupad ng fire code.

Isinagawa ang hakbang ng ahensya halos dalawang linggo matapos masuspinde sa puwesto si dating BFP Chief Fire Director Jesus Fernandez dahil sa alegasyon ng graft and corruption kaugnay sa umano’y P14.7 milyong kickback sa procurement ng mga ambulansya noong 2024.

Sa kasalukuyan, itinalaga si Fire Chief Superintendent Wilberto Rico Neil Kwan Tiu bilang officer-in-charge ng BFP kapalit ni Fernandez.