Lahat ng fire safety inspectors sa Metro Manila, sibak

ni Jeff Tumbado | April 1, 2026

Sinibak sa puwesto ang lahat ng fire safety inspectors (FSIs) sa Metro Manila ng Bureau of Fire Protection (BFP) bilang bahagi ng hakbang sa pagsugpo sa mga katiwalian sa ahensya.

Sa inilabas na pahayag nitong Martes, sinabi ng BFP na layunin ng hakbang na magtakda ng bagong pamantayan ng transparency bago palawakin ang programa sa iba pang rehiyon.

Ayon sa ahensya, marami sa mga FSIs ang tapat at dedikado sa serbisyo, ngunit kinakailangan ang malawakang relief upang matugunan ang mga sistematikong anomalya at makapagsimula ng panibagong sistema.

Hindi naman agad pinangalanan ng BFP kung sinu-sino ang mga apektadong FSIs at kung ilan ang kabuuang bilang ng mga ito.

Ipinaliwanag ng BFP na papalitan ang mga inalis na FSIs ng mga kwalipikadong tauhan na hindi pa nagsisilbi bilang inspector sa NCR.

Kung kulangin ang tauhan sa rehiyon, kukuha ang ahensya ng karagdagang personnel mula sa ibang regional offices.

Titiyakin din ng BFP ang due process sa sistema ng inspeksyon at magtatag ng mas malinaw at patas na proseso sa pagpapatupad ng fire code.

Isinagawa ang hakbang ng ahensya halos dalawang linggo matapos masuspinde sa puwesto si dating BFP Chief Fire Director Jesus Fernandez dahil sa alegasyon ng graft and corruption kaugnay sa umano’y P14.7 milyong kickback sa procurement ng mga ambulansya noong 2024.

Sa kasalukuyan, itinalaga si Fire Chief Superintendent Wilberto Rico Neil Kwan Tiu bilang officer-in-charge ng BFP kapalit ni Fernandez.

Kinasuhan ng lady cop ng sexual harassment... PNP-HPG Chief, nag-resign

ni Jef Tumbado @News | March 26, 2026

Nagbitiw sa puwesto si Philippine National Police-Highway Patrol Group (PNP-HPG) Acting Director PBGen. Jessie Tamayao matapos sampahan ng reklamong sexual harassment ng isang babaeng pulis sa National Police Commission (NAPOLCOM).

Sa isang pahayag, itinanggi ni Tamayao ang akusasyon, “I want to state, in the clearest and most categorical terms, that I am innocent of these charges… I firmly deny the allegations. I can only deduce this as a personal vendetta the reason of which I am not aware”.

Nahaharap sa reklamong administratibo si Tamayao matapos magsampa ng kasong sexual harassment ang isang babaeng pulis laban sa kanya nitong Martes.

Pinangalanan si Tamayao sa limang pahinang sinumpaang salaysay na isinumite sa NAPOLCOM Inspection, Monitoring and Investigation Service (IMIS).

Ayon sa complainant, niyaya siyang makipagtalik ng opisyal at umano’y hinawakan ang kanyang puwet. Sinamahan umano ito ng pananakot at pagbabanta, kabilang ang posibilidad na mailipat siya sa Mindanao kung hindi siya papayag sa mga hinihingi nito.

Ibinunyag din ng complainant na in-access ng opisyal ang kanyang cellphone nang walang pahintulot, binasa ang kanyang mga mensahe, at kinunan ng larawan ang mga laman ng kanyang gallery, Messenger, at Viber.

Pinagbantaan din umano siya na gagamitin ang mga ito laban sa kanya sakaling magsumbong siya sa dating HPG Director na si Hansel Marantan.

Piktyur ng 2 suspek sa ambush kay Abiad, inilabas

ni Jeff Tumbado | July 6, 2023

Inilabas na ng Quezon City Police District (QCPD) ang mga larawan ng dalawang suspek sa tangkang pagpatay sa photojournalist na si Rene Joshua Abiad noong Hunyo 29, sa Quezon City.

Sa pulong balitaan kahapon sa QCPD Headquarters sa Camp Karingal, ipinrisinta ni Director Police Brig. General Nicolas Torre III ang mga larawan ng mga salarin na kuha mula sa CCTV, ilang oras bago ang pananambang.

Ayon kay Torre, may pagkakakilanlan na sa mga suspek pero tumanggi muna itong ilahad ang kanilang pangalan at iba pang detalye.

"Alam ko nanunuod sila. So, I really think it is best for their interest to just surrender. I think they are outside Metro Manila. 'Yung iba sa kanila outside Metro Manila," pahayag ni Torre.

Matatandaan na Hunyo 29 nang pagbabarilin ng mga suspek si Abiad, photographer ng Remate Online habang sakay siya sa isang SUV kasama ang ilan niyang mga kaanak sa Bgy. Masambong.

Anim ang lahat ng sakay sa SUV kabilang ang tatlong menor-de-edad, isa ang apat na taong gulang na lalaki na pumanaw nitong nakaraang araw dahil sa tama ng bala ng baril sa kanyang ulo.

Nasa limang indibidwal ang nakilala at tinukoy bilang mga “persons of interest” sa likod ng pananambang kay Abiad.