Nagawa ng U.S. military bases sa ‘Pinas — Coseteng.. Prostitusyon, krimen at droga, talamak!

ni Jeff Tumbado | February 16, 2023

Pinag-iingat ni dating Senador Nikki Coseteng ang gobyerno ng Pilipinas sa binabalak na pagbuhay ng mga base-militar sa ilalim ng Enhance Defense Cooperating Agreement (EDCA).

Sa Pandesal Forum sa Kamuning Bakery Cafe sa Quezon City, ipinahayag ni Coseteng ang pagkabahala sa aniya’y unti-unting pagpapagamit ng Pilipinas sa Amerika kaugnay sa plano nito na makidigma laban sa China.

May duda ang dating senador na ginagamit lamang ng U.S. ang Pilipinas upang itulak nito na labanan ang China dahil sa isyu ng agawan ng teritoryo sa West Philippine Sea (WPS).

Wala umanong naidulot ang U.S. Military Bases sa bansa noong 1990s bagkus ay nagresulta lamang ng paglaganap ng prostitusyon, krimen at ilegal na droga.

Tinukoy pa ni Coseteng na bagsak din ang ekonomiya sa Olongapo City noong naroon ang military base ng U.S. dahil wala naman itong nalikhang malaking trabaho para sa mga Pilipino.

Idinagdag ng dating mambabatas na gagamitin lamang ng mga Amerikano ang bansa para isulong ng U.S. government ang sarili nitong interes na negosyo ng armas tulad ng ginagawa ngayon sa Ukraine.

Matutulad lamang aniya ang Pilipinas sa ibang mga bansa gaya ng Ukraine, Egypt, Vietnam at Iraq na nalugmok sa kahirapan bunsod ng giyera na ginawa ng United States.

Engineer at pamangkin niratrat ng riding-in-tandem, utas

ni Jeff Tumbado | February 10, 2023

Pinagbabaril hanggang sa mapatay ng hindi pa natutukoy na salarin ang isang inhinyero at kanyang pamangkin habang ang mga ito ay nasa sasakyan sa bayan ng Lemery, Batangas kamakalawa.

Dead-on-the-spot ang mga biktima na sina Frederick Casalme, 46, at ang 29-anyos na pamangkin na si Kingjay sanhi ng tinamong mga tama ng bala ng baril sa iba’t ibang bahagi ng kanilang katawan.

Napag-alaman kay Police Major Gerry Abalos, Miyerkules ng gabi nang isagawa ang pananambang sa mga biktima ng suspek na angkas sa isang motorsiklo sa Bgy. Mayasang.

Sinasabing lulan ang mga biktima sa isang SUV at papasok na sana sila sa kanilang compound nang pagbabarilin.

Mabilis na tumakas ang mga suspek matapos isagawa ang krimen.

Napag-alaman na isang project engineer si Frederick at nangongontrata ng mga government projects sa malaking bahagi ng Batangas.

Patuloy ang imbestigasyon ng mga awtoridad para malaman ang motibo sa krimen at pagkakakilanlan ng salarin.

Sex video at nude photos ng mga utol ibinebenta, bebot kulong

ni Jeff Tumbado | February 9, 2023

Arestado ang isang 31-anyos na babae sa ikinasang entrapment operation ng pulisya dahil sa pagbebenta nito ng malalaswang larawan at videos ng mismong mga kapatid sa Cebu City, kamakalawa.

Sa presinto natukoy ang pagkakakilanlan ng suspek na si Majo Rabe, na nadakma sa operasyon sa Bgy. Tisa, bandang alas-11 ng tanghali ng Martes.

Kabilang umano sa ibinebenta ng suspek ay ang mga video ng kanyang mga nakababatang kapatid na babae, na isa sa kanila ay menor-de-edad.

Napag-alaman din na nag-aalok ang suspek ng cam-shows sa kanyang mga parokyano na karamihan ay mga dayuhan.

Nailigtas at nasa kustodiya na ng mga awtoridad ang menor-de-edad na kapatid ng suspek.

Nahaharap ang suspek sa reklamong Qualified Trafficking in Persons.