Granular lockdowns, sabayan ng testing

ni Grace Poe - @Poesible | September 20, 2021

Nagsimula na noong Setyembre 16 ang implementasyon ng eksperimental na granular lockdown sa Metro Manila bilang panibagong estratehiya ng pamahalaan sa laban sa COVID-19. Kasabay ito ng pagsasailalim sa kapital ng bansa sa General Community Quarantine-Alert Level 4 bilang pamalit sa dating klasipikasyon ng mga kuwarentina na sumasakop sa buong mga lalawigan at lungsod. Batay sa magiging resulta sa National Capital Region (NCR), isusunod ang implementasyon ng ganitong sistema sa buong bansa.

Tula ng sa quarantine classifications, may nakatakdang pagbabawal at pinapayagan sa bawat alert level. Lahat ng negosyong hindi nakabilang sa ipinagbabawal, puwedeng magbukas ng 100% ang kapasidad. Sa Alert Level 4, kapansin-pansing puwede na ang fully vaccinated sa loob ng ilang establisimyento sa 10% capacity. Ito ang tugon sa kahilingan ng sektor ng ekonomiya na muling buksan ang mga negosyo para makapaghanapbuhay ang mga tao.

Samantala, ipinatutupad naman ngayon ang granular lockdowns sa maraming lugar sa NCR na natukoy ng local government unit (LGU) na may mga kaso ng COVID-19. Kapag naka-granular lockdown ang lugar, tanging healthcare workers at unipormadong mga tao ang maaaring makapasok at makalabas mula rito. Papayagan rin ang Overseas Filipino Workers (OFWs) na may flight paalis ng bansa at iyong mga pauwi sa kanilang tahanan, mga nakatira sa lugar na iyon na gustong umuwi pero hindi na puwedeng lumabas ulit, mga may pangangailangang medikal, at delivery ng pagkain at essential items. Bibigyan ng food stubs ang mga kabahayang sakop ng granular lockdown.

Nanawagan tayo sa mga LGU natin na huwag daanin sa paninindak ang implementasyon ng granular lockdown. Kailangang bigyan ng karampatang babala ang mamamayan kung sila ay isasailalim dito para makapag-stock sila ng pagkain, gamot, at iba pang pangangailangan lalo pa at mahaba ang panahon na hindi sila makalalabas ng bahay.

Ang mga nagtatrabaho ay dapat bigyan ng pagkakataong makauwi at masabihan ang kanilang employer na hindi sila makapapasok dahil sa naka-granular lockdown ang kanilang tahanan para hindi malagay sa peligro ang kanilang trabaho.

Ang pinakamahalaga, sabayan ng testing at maagang paggamot sa mga apektado ang mga isinasailalim sa granular lockdown. Tigilan na ang pagkukulong lang sa mga tao na walang kasabay na aksiyon. Simula pa lamang ng pandemya, sinasabi na ng mga eksperto ang kahalagahan ng malawakang testing. Ito ang pagkakataon para matutukan ng pamahalaan ang pagte-test ng mamamayan.

Sa karanasan ng mga bansang may mahusay na tugon sa COVID-19, nakita nating naiiwasan ang hospitalisasyon kapag maagap na nagagamot ang sintomas ng nasabing impeksiyon. Huwag hintaying hindi na makahinga ang tao bago asikasuhin.

Nasa higit dalawampung libong bagong kaso tayo kada araw nitong nakaraang mga linggo. Nagpapatupad ng panibagong sistema sa pag-asang mababalanse at ekonomiya at ang kaligtasan ng mamamayan. Kapwa nakamamatay ang gutom at ang karamdaman.

Samantala, ang kaligtasan natin ay nasa ating mga kamay. Nasa tahanan na ang laban sa COVID-19 lalo’t pami-pamilya na ang apektado. Gawin natin ang lahat ng pag-iingat para sa proteksiyon ng ating tahanan.

Keep safe, mga bes.

Prayoridad ang kalusugan ng mga estudyante ngayong balik-eskuwela ulit!

ni Grace Poe - @Poesible | September 13, 2021

Ngayong araw, simula na ng pasukan ng mga mag-aaral sa pampublikong paaralan sa ating bansa.

Ikalawang taon nang magpapasukan pero ang mga estudyante, nasa bahay pa rin. Lahat nagsasabing mas mahirap ang pag-aaral sa bahay. Para sa may online schooling, malaking hamon ang hindi maasahang internet connection at limitadong espasyo sa tahanan.

Nand'yan din ang hirap ng paggabay sa mga anak na modular ang pag-aaral. Ang masaklap, hindi na bata ang nagsasagot sa ilang modules at aktibidad kundi magulang para lang makapagpasa sa takdang deadline. Naging biro na tuloy na ngayong panahong ito, ang dapat bigyan ng honor ay ang mga nanay, tita, at lola na gumagawa ng mga asignatura sa paaralan.

Noong Sabado, nakapagtala tayo ng 26,303 na bagong kaso ng COVID-19 sa bansa, ang pinakamataas na bilang mula noong nagsimula ang pandemya. Lalo at walang bakuna pa para sa mga bata, hindi natin sila basta mapalalabas para sa kanilang kaligtasan.

Samantala, iniintindi rin natin ang “learning loss” na nagaganap dahil hindi lahat ay nakapag-aaral. Maraming magulang ang pinahinto muna ang kanilang mga anak sa pag-aaral habang pandemya dahil walang magagamit na gadget ang mga anak para sa online learning. Problema rin ang tututok o magbabantay sa mga mag-aaral sa pagsasagot ng modules.

Ngayong simula na ng pasukan, isaisip natin palagi na ang kalusugan at kaligtasan ng ating mga anak ang prayoridad. Hamon para sa lahat ang remote learning. Habang nasa bahay, pilitin nating mabigyan ang ating mga mag-aaral ng kapaligirang angkop sa pagkakatuto. Alalayan natin sila pero huwag tayo ang gumawa ng mga aktibidad na para sa kanila.

Hindi ligtas ang mga bata sa Delta variant ng COVID-19. Nakita natin ito sa dami ng pediatric cases sa ating bansa mismo. Habang hindi pa umaabot sa mga bata ang pagbabakuna, bigyan natin ng proteksiyon ang ating mga anak sa pamamagitan ng pag-iingat para sa kanila. Huwag natin silang ihawa ng karamdaman. Magpabakuna kung maaari na at sundin ang lahat ng safety protocols kapag lumalabas para maiwasang makapag-uwi ng sakit sa mga tahanan.

Manatiling ligtas, mga bes.

Hindi lamang basta ayuda, kabuhayan para sa mga tsuper

ni Grace Poe - @Poesible | September 06, 2021

"Hari ng Daan” ang tawag natin sa ating mga jeepney dahil sa prominenteng lagay nila sa ating kultura at araw-araw na pamumuhay. Pero dahil sa pandemya, nakita natin ang kaawa-awang sitwasyon na namamalimos ang ating mga tsuper sa kalsada noong hindi sila payagang pumasada. Hanggang ngayon, masakit pa rin sa puso ang imaheng ito ng pagpapakababa para magkaroon ng pagkaing ipanglalaman sa kumakalam na tiyan.

Pinangunahan natin ang paglulunsad ng proyektong magbibigay ng tulong pangkabuhayan sa mga kuwalipikadong tsuper ng jeepney sa National Capital Region (NCR) at mga karatig lalawigan sa pangagasiwa ng Department of Labor and Employment (DOLE). Sa ilalim ng programang pangkabuhayang ito, ang napiling benepisaryo ay pagkakalooban ng livelihood package na nagkakahalaga ng P30,000 bawat isa.

Dalawa ang maaaring matanggap ng benepisaryong tsuper: “Starter Kit” o “Negosyo sa Kariton.”

Sa pamamagitan ng Starter Kit na napili, makapagsisimula ang benepisaryo ng kabuhayan tulad ng pagbibigay ng serbisyong elektrikal, plumbing, welding, car wash, pagkukumpuni ng motorsiklo, cellular phone, appliance, upholstery, o pagmamasahe.

Samantala, ang Nego-Kart naman ay magbibigay ng paunang kapital at kagamitan para sa pagtitinda tulad ng mga kariton at iba pang materyales upang makapagtayo ang makatatanggap ng maliit na tindahan.

Ang mga target na benepisaryo ay kailangang nasa hustong gulang, hindi kasama sa mga tumatanggap na ng 4Ps, nakatira sa NCR Plus, at nawalan ng trabaho o hindi makapagpatuloy bilang tsuper dahil sa restriksiyon ng pandemya, sakit, o iba pang kahalintulad na dahilan.

May pitak ang ating mga tsuper sa ating puso dahil sa pagmamahal sa kanila ng aking amang si FPJ. Bago pa man ito, sinikap nating makapagpaabot ng tulong sa kanila sa pamamagitan ng Panday Bayanihan. Gayunman, kinikilala nating hindi lamang ayuda ang kailangan nila, kung hindi pagkakakitaan.

Sa pagbibigay ng kabuhayan sa ating mga tsuper, ibinabalik natin ang kanilang dignidad sa pamamagitan ng marangal na paghahanapbuhay.