Isang slot sa Asian Qualifying pipiliting kunin ng Dragonboat

ni Gerard Peter - @Sports | December 4, 2020

Butas ng karayom muna ang susuutin ng koponan ng Canoe team Olympic Qualifying Tournament, ngunit determinado pa rin ang mga ito na makakuha ng nag-iisang slot na ibinibigay para sa darating na Asian Qualifying na nakatakda sa Marso 11-13 sa Pattaya, Thailand.

Inihayag ni Philippine Canoe-Kayak-Dragonboat Federation (PCKDF) head coach Leonora “Len” Escollante na patuloy pa rin ang paghahanda at pagsasanay ng dalawang atletang nila sasabak para sa qualifying tournament na sina 2019 Southeast Asian Games gold at double silver medalist Hermie Macaranas at ka-tandem nitong si Ojay Fuentes para sa 1000-meters canoe doubles.

“Puspusan pa rin naman ang ating ginagawang mga pagsasanay at programa sa ating mga athletes, kaso lang hindi lang sila maka-paddle sa ngayon dahil sa mga protocols. Ang mahalaga sumunod sila sa programs na pinapadala natin sa mga athletes natin sa probinsya na nache-check naman sa paggamit ng mga series of tests para malaman kung nagte-training talaga sila,” pahayag ni Escollante, kahapon sa lingguhang TOPS: Usapang Sports na live na mapapanood sa Sports on Air sa Facebook page at suportado ng Philippine Sports Commission (PSC), Games and Amusement Board (GAB) at PAGCOR. “Pero inaasahan na namin na talagang dadaan ka sa butas ng karayom bago ka makapag-qualify dito, lalo na’t 1km long distance talaga,” dagdag ng Tacloban City-native.

Mabigat na makakatapat ng Pilipinas para sa qualifying ay ang powerhouse na China, Iran at Kazakhstan, gayundin ang mga koponan mula sa Tajikistan, Kyrgistan, at Uzbekistan dahil tiyak na malalaki at matatangkad ang mga manlalaro nito na paniguradong malalakas sa long distance events.

“Mahirap pa na mag-predict sa ngayon dahil kadarating lang ng invitation and sa nangyaring pandemic all over the world. Maging yung mga makakalaban naman natin naapektuhan rin, kaya hindi natin masabi pa ngayon ang tsansa ng mga athletes natin pero panigurado lalaban ang ,ga iyan,” saad ni Escollante.

Hindi nakalahok ang koponan ng Pilipinas sa nagdaang World 2019 ICF Canoe Sprint World Championshsips noong Agosto 21-25, 2019 sa Szeged, Hungary na mayroon ng 10 nagkwalipika na kinabibilangan ng China, Cuba, Brazil, Germany, Romania, Poland, Russia, Ukraine, Czech Republic at Sao Tome and Principe. Tig-iisang slot na lamang ang inilalaan para sa Asian, Europe at Americas.

Sambo World Cup, bawal ang fans sa December meet dahil sa COVID-19

ni Gerard Peter - @Sports | December 3, 2020

Mananatiling bakante para sa mga manonood at mga tagasubaybay ng larong Sambo ang gaganaping World Cup: A. Kharlampiev Memorial sa Disyembre 18-19 sa Luzhniki Sports Complex sa Moscow, Russia, bilang pag-iingat sa patuloy na paglaganap ng mapaminsalang novel coronavirus disease (Covid-19) pandemic.

Inaasahang aabot sa mahigit 300 sambo wrestlers at iba’t ibang representante ng national sports federations ang nagsimula ng magparehistro upang lumahok sa prestihiyosong event na dadaluhan ng 15 bansa sa buong mundo.

Ipinangalan ang naturang torneo sa isa sa mga founder ng sambo sa Soviet Union na si Anatoly Kharlampiev, isang Russian researcher ng iba’t ibang klase ng wrestling at martial arts. “In view of the difficult epidemiological situation in the country and in line with recommendations of [Russia’s sanitary watchdog] Rospotrebnadzor a decision was made to hold the tournament without spectators in attendance,” pahayag ng organizing committee sa inilabas na statement nito.

Ayon kay Pilipinas Sambo Federation (PSF) secretary-general Paolo Tancontian, pag-aaralan pa nila kung magpapadala sila ng mga atleta sa naturang kompetisyon, higit na si 5-time World bronze medalist at 2019 Asian Sambo champion Sydney Sy Tancontian, na kakapanalo pa lang ng tansong medalya sa Sambo World Championships senior’s division noong nakaraang buwan.

Kakulangan ng oras sa preparasyon at pondo ang tinukoy na dahilan ni Tancontian, na inaaasahang mabigat umano sa bulsa ang pamasahe patungong Russia. “Medyo mahal kase ang pamasahe papuntang Russia, isa pa pandemic ngayon at medyo wala masyadong preparation ang ating mga athletes, also less budget tayo ngayon. Wala pang budget ang Philippine Sports Commission (PSC) para sa ganyang mga competition,” pahayag ni Tancontian sa panayam ng Bulgar sa online interview.

Sinabi ni Tancontian na paghahandaan na lamang nila ang darating na Asian Indoor Martial Arts Games (AIMAG) sa susunod na taon sa Bangkok at Chonburi sa Thailand. Pina-finalized pa nila ang listahan ng bagong line up sa national team.“We are still preparing our new lists of athletes. Medyo na-delay na kase because of pandemic, kaya di kami nagkakaroon ng selection, but we’ve got 8 new players, panay babae in preparation sa AIMAG,” saad ni Tancontian.

25th title ni De Los Santos, Guinness World record holder na

ni Gerard Peter - @Sports | December 2, 2020

Itinuturing ni Filipino online karateka sensation Orencio James De Los Santos na isang malaking karangalan ang mapanalunan ang ika-25th titulo nito laban sa pambato ng Hungary na si Botond Nagy na isang dekalibreng karateka sa kanilang bansa.

Dinaig ng 30-anyos na dating National Team member ang kasalukuyang Guinness World record holder na si Nagy ng gawin nito ang pinakamabilis na roundhouse kicks sa karate sa buong mundo sa oras na 0.476 segundo. Pasok din ito sa 34th place sa Olympic ranking at patuloy na susubok na makapasok sa Summer Olympic Games na nakatakdang ganapin simula Hulyo 23-Agosto 8 sa Tokyo, Japan. “It was a very meaningful 25th Gold medal win for me because my final opponent, Nagy Botond, is Hungary’s best kata player. He is no. 34 in the Olympic Ranking and a Guinness World Record holder. It was a tough fight, and an honor for me to face a kata player of such caliber,” pahayag ni De Los Santos sa panayam ng Bulgar sa online interview. “You can say that he’s the Olympic hopeful for Hungary,” dagdag ng De La Salle University graduate sa paghanga sa Hungarian karateka.

Dinaig ni De Los Santos ang 26-anyos na masasabing pinakamahusay na kata player ng Hungary sa madikitang laban na 24.9-24-5 sa finals ng Katana Intercontinental Karate League E-Tournament #4 E-Kata Seniors male 16-years and older Top 8. Bago rito ay tinalo niya sa round 1 si Cornelius Johnsen ng Norway, kasunod si Nejc Sternisa ng Slovenia sa round 2, habang tinalo ni Nagy sina Alfredo Bustamante ng U.S. at Silvio Cerone-Biagioni ng South Africa.

“I’m very sure he is, since he’s at the top 40 for the Olympic Rankings. And he’s the best senior male kata player for Hungary,” wika ni De Los Santos nang matanong ang tsansa ni Nagy na makapasok sa Olympics sa susunod na taon.

Ito na ang unang titulo ng 6th-time Philippine National Games champion ngayong buwan ng Disyembre kasunod ng 5-sunod na titulo sa Nobyembre na tinapos ng panalo sa prestihiyosong 5th edition ng SportData eTournament World Series, at ang mga tagumpay sa Golden League Karate E-Tournament #3, E-Champions Trophy World Series 2, Okinawa, Nox Dojo Markham City Open eTournament at Athlete’s E-Tournament #2.