Jerusalem-Kuse may trilogy fight, nabigo si El Gringo

by Gerard Arce @Sports News | May 18, 2026

Photo: Melvin Jerusalem vs Kuse 2 / Circulated

Inaasahang magaganap ang ikatlong paghaharap o trilogy sa pagitan ng bagong World Boxing Council (WBC) minimumweight champion Siyakholwa Kuse ng South Africa at dating Filipino titlist Melvin “El Gringo” Jerusalem ngayong taon na tinitingnang idaraos sa isang ‘neutral country.’

Ito’y matapos matuldukan ang five-fight winning streak ni Jerusalem sa bisa ng 12-round unanimous decision laban sa dating challenger sa main event bout ng Manny Pacquiao Presents: Blow-by-Blow “Thrilla in Manila II” noong Oktubre.

Tabla ang kanilang harapan kasunod ng 116-112, 116-111, at 115-112 para pumabor sa hometown favorite na si Kuse (10-3-1, 4KOs), habang mabigong madepensahan ni Jerusalem (25-4, 12KOs) ang korona sa ika-apat na pagkakataon. Ang tatlong hurado ay sina Samantha Bulner ng Australia, Jun Bae Lim ng South Korea, at Zanashir Taznaa (Mongolia), habang ang fight supervisor ay si Patrick Cusick. 

“Respeto sa champion (Kuse). Medyo napaaga lang ‘yung cut, second round pa lang, kaya na-disturb ‘yung flow ng laro ni Melvin. Nahirapan s’yang maka-adjust kase malaki yung cut sa kaliwang mata niya. Kahit humihinto at the end of the round, pero kapag tinatamaan dumudugo pa rin,” pahayag ni head trainer Michael Domingo sa panayam ng Bulgar Sports sa telepono kahapon.

“Nasa contract naman ‘yung rematch at mag-meeting pa iyong both sides. We’re expecting na this year ‘yung rematch. Kung ako ang tatanungin, as much as possible sa neutral country na lang gaya ng Japan gawin yung third fight,” dagdag ni Domingo, na medyo diskumpiyado rin sa kinalabasan ng scoring ng mga hurado. 

“Nasunod naman ‘yung game plan namin, pero pagdating ng eighth round, ‘di na siya gumagalaw masyado at makatakbo kasi nag-cramps na siya. Kapag gumalaw siya, baka mag-worsen at ma-TKO pa, kaya lumaban na siya nang sabayan,” paliwanag ni Domingo. “Sa ngayon pahinga muna at waiting sa usapan kung sino mag-promote. Reset muna tayo.” 

Berco 7th sa Karate One-Youth League

by Gerard Arce @Sports News | May 16, 2026

Photo: Tumirada ng upak si Khyle Aranas ng Philippine Team sa katunggaling New Zealand sa kanilang mahigpitang engkuwentro sa Karate Youth League One Manila 2026 Junior Kumite (male category) na ginanap MOA Arena, Pasay City kahapon. (Reymundo Nillama)

Pinadapa muna si Logan Morrison ng Scotland sa 7-1 at Mwtt Witharana sa 3-1 sa isang banatan, subalit lubhang kinapos kay Hang Lao Cheok ng Macau sa 1-5 para sa bronze medal, at tumapos sa seventh place si Pilipino junior karateka Eduardo Berco III sa male kumite under-61kgs division habang tumindig na nakipagtagisan ang ibang mga Pinoy bets sa pagpapatuloy ng Karate One-Youth League kahapon sa SM Mall of Asia Arena sa Pasay City.

Kaagapay sa pagtatanghal ang Philippine Sports Commission, buong tibay na bumangon mula sa pagkakadapa sa unang laban si Berco kontra Maksym Viechikanov ng Ukraine.

Ibinigay ng husto ng Pinoy bet mula General Santos City ang makakaya upang makuha ang unang medalya ng bansa sa torneong suportado ng SM Group of Companies at Philippine Olympic Committee, gayundin ang Lanson's Place, Citadines Bay City Manila at Milo.

Nakipagbuno sa laban si Rei Alec Servan, na kinapos sa masaklap na 1-2 decision kontra Lucy Choi-Lawrence ng Australia sa junior female -53-kilogram quarterfinals sa torneong kinikilala ng World Karate Federation at inorganisa ng Karate Pilipinas Sports Federation, Inc. Hindi naiwasan ni Servan ang atake ng Aussie na tumama sa mukha para maalpasan ang 1-1 na iskor sa mahigit sa dalawang minuto sa laban.

Nawalan din ng tsansa na makausad sa semifinals sina Zian Alexander Sing sa junior male kumite -61kg division at Kevin Llup sa junior male kumite -55kgs division, ng natalo sa quarterfinal round.

Nalampasan naman ni Llup sa All-Filipino bout si Bernardo Fresco sa referees’ decision sa second round, subalit natalo sa quarterfinals kay Saudi Arabian Abdulrahman Arafat sa dominanteng 4-14 para makapasok sa semifinals.

Gandler kumampi na kay Belen sa Solar Spikers

by Gerard Arce @Sports News | May 15, 2026

Photo: Pormal ng ipinakilala ng Solar Spikers ang pagkuha sa mga heavy hitters na sina Gandler at Santos, gayundin ang beteranong playmaker na si Jaja Maraguinot kasunod ng isinagawang press conference.

Inaasahang hindi na mahihirapan pa sa pagbuhat ng iskoring si rookie star Mhicaela “Bella” Belen para sa Capital1 Solar Spikers matapos humablot ng dalawang bigating Most Valuable Players (MVP) sa katauhan nina Vanie Gandler at Erika Santos.

Pormal ng ipinakilala ng Solar Spikers ang pagkuha sa mga heavy hitters na sina Gandler at Santos, gayundin ang beteranong playmaker na si Jaja Maraguinot kasunod ng isinagawang press conference kahapon.

Nag-ugat ang pagtuntong nina Gandler at Santos sa Capital1 matapos na mabuwag ang dating koponan na Cignal Super Spikers noong nakaraang buwan upang mauwi sa agawan ang 9 na nalalabing koponan para sa mga prize-players ng Cignal.

Dahil sa karagdang puwersa ay makakatulong ng malaki pagdating sa opensa si Belen na mag-isang binubuhat ang koponan, kabilang ang katatapos lang na Premier Volleyball League (PVL) All-Filipino Conference, kung saan tumapos sila sa 4-5 kartada para sa ika-8 pwesto, ngunit nalaglag sa play-in laban sa Galeries Tower Highrisers.

Ginawarang MVP sa nagdaang AFC ang 25-anyos na dating Ateneo Blue Eagles na si Gandler na tumapos ng 4th sa scoring sa pagtatapos ng semifinals sa kabuuang 209 puntos mula sa 182 attacks, 17 kill blocks, at 10 aces, para dalhin sa finals ang Cignal matapos ang dalawang taon.

Parte rin ng arsenal ng Alas Pilipinas women’s national team member ang mapabilang sa spiking sa pang-siyam at pang-pito sa serving at receiving, upang kilalaning isa sa mga inaabangang manlalaro sa liga, kaakibat ang silver medal sa 2025 Asian Nations Cup sa Hanoi, Vietnam at 2 tansong medalya sa Southeast Asian V.League. Nakuha ng dating DLSU Lady Spikers na si Santos ang MVP trophy sa 2025 PVL On Tour para sa kanyang ‘breakout performance.’