Ang Senado at ang tunay na panalangin

ni Fr. Robert Reyes @Kapaayapaan / Patakbo-takbo | May 23, 2026

Ano ang magagawa ng tunay at taimtim na panalangin? Ito ang makikita sa buong buhay ng ating Panginoon. Marami Siyang ginawa para sa mga taong may iba’t ibang pangangailangan. Pinakain Niya ang mga nagugutom, kinalinga ang mga namimighati at may mabibigat na pinagdaraanan. Malapit Siya sa mga bata at kinagigiliwan nila.

Gumawa rin Siya ng maraming himala—mula sa pagpapalakad sa mga pilay, pagpaparinig sa mga bingi, pagpapamulat sa mga bulag hanggang sa pagbuhay sa mga patay tulad ng kaibigan Niyang si Lazaro.

Ngunit kapag sumasapit ang gabi, tila nagmamadali Siyang lumayo at magtungo sa tahimik na lugar upang manalangin. Para sa mga nakamasid, tila nahahati sa dalawa ang Kanyang buhay—ang pagkilos para sa tao at ang pananahimik upang makipag-isa sa Ama. Ngunit para sa mga tunay na nakaunawa kay Hesukristo, iisa lamang ang dalawang ito. Ang Kanyang pagkilos ay bahagi ng Kanyang panalangin, at ang Kanyang panalangin ay bahagi rin ng Kanyang pagkilos. Hindi mapaghihiwalay ang dalawa.

Sa katunayan, iisa ang lahat sa buhay ni Hesus—iisa ang loob at labas, salita at gawa, isip at puso. Ito rin ang mensahe ng mga pagbasa nitong mga nakaraang araw tungkol sa “Mataas na Maka-paring Panalangin ni Kristo” (High Priestly Prayer). Ipinanalangin ni Kristo na ang Kanyang mga alagad ay laging magsalita at kumilos sa Kanyang ngalan. Higit sa lahat, ipinanalangin Niya ang pagkakaisa, tulad ng pagkakaisa Niya sa Ama.

PAGKAKAISA. Ito ang tila kulang na kulang ngayon sa iba’t ibang antas ng lipunan, lalo na sa Senado. At kung may pagkakaisa man, marami ang nagtatanong kung ano ang tunay na dahilan nito. Ano ba ang pundasyon ng pagkakaisa ng mayorya sa ilalim ni Senate President Allan Peter Cayetano? Matatag ba talaga ang kanilang samahan? Makakatulong ba ito sa proseso ng impeachment? Ano ang magiging papel ng mayorya at minorya? Magkapareho ba sila ng layunin?

Hindi maikakaila na marami ring batikos na ibinabato sa ilang miyembro ng mayorya. At kasabay nito, lumalalim ang pagdududa at kawalan ng tiwala sa pagitan ng mga magkakabilang panig.

Nang ipanalangin ni Kristo ang pagkakaisa, hindi lamang ito simpleng pagkakasundo kundi pagkakaisang nakabatay sa katotohanan at sa Diyos. Ngunit kung susuriin ang ugat ng maraming hidwaan sa bansa, tatlong bagay ang madalas na nakikita: kasinungalingan, salapi at kapangyarihan.

Una, nagiging sanhi ng matinding pagkakahati ang kasinungalingan at magkakaibang bersyon ng katotohanan. Ikalawa, ang umiikot na salapi na madalas ay ginagamit upang impluwensiyahan ang mga desisyon at pananaw ng tao. At ikatlo, ang maling paggamit ng kapangyarihan para sa pansariling interes kaysa sa kapakanan ng bayan.

Mabigat na kombinasyon ang tatlong ito—kasinungalingan, salapi at kapangyarihan. Hindi madaling labanan ang maling impormasyon lalo na sa panahon ng social media. Hindi rin madaling talikuran ang impluwensiya ng pera at kapangyarihan.

Kaya’t bagama’t patuloy nating naririnig ang mga panalangin ng mga lider at mambabatas, higit na hinihintay ng mamamayan ang panalanging nasasalamin sa gawa—mga gawang marangal, matapang at makatarungan. Sapagkat ang tunay na panalangin ay hindi lamang binibigkas sa salita kundi isinasabuhay sa pagkilos para sa katotohanan, pagkakaisa at kabutihan ng nakararami.

Kuwento ni Sadako at libong papel na tagak, dulot ay mensahe ng pangkapayapaan

ni Fr. Robert Reyes @Kapaayapaan / Patakbo-takbo | May 18, 2026

Mahigit isang buwan na ang nakararaan nang magtipon-tipon sa simbahan ang ilang bata mula sa mga paaralan at pamayanan ng Parokya ng Ina ng Laging Saklolo sa Project 8, Quezon City.

Naganap ito kasunod ng pagsiklab ng tensiyon sa pagitan ng Iran at Israel, na lalo pang umugong dahil sa pagsuporta ni Pangulong Donald Trump ng Estados Unidos sa Israel. Patuloy pa rin noon ang digmaan sa Gaza Strip sa ilalim ng pamumuno ni Israeli Prime Minister Benjamin Netanyahu.

Hindi na natin tatalakayin pa rito ang mga kontrobersyal na usapin tungkol sa digmaan, kung sino ang tama o mali, at ang mga dahilan sa likod nito. Ang mahalaga ay ang malinaw na panawagan ni Papa Leone XIV: “Anumang digmaan ngayon ay mali.” Mali ito dahil hindi dapat ginagamit ang armas, karahasan, at kamatayan upang makamit ang anumang layunin. May iba at mas makataong paraan upang harapin ang mga suliranin ng mundo.

Kailangang-kailangan ngayon ng daigdig ang tunay na kapayapaan. Kapag tiningnan natin ang kalikasan, makikita ang tuloy-tuloy na karahasan, abuso, at inhustisyang ginagawa ng tao laban dito. Kaya mahalaga ang “Katarungang Pangkalikasan” na kaakibat ng “Kapayapaang Pangkalikasan,” na tinalakay nang malalim ni Papa Francisco sa kanyang aklat na “Laudato Si.” Gayundin, sa bawat digmaan ng mga bansa, hindi lamang kalikasan ang winawasak kundi pati buhay at dignidad ng kapwa tao. Sa huli, parehong nasisira ng tao ang kalikasan at ang kanyang kapwa.

Isang makapangyarihang simbolo ng kapayapaan ang iniwan ni Sadako Sasaki, isang 12-anyos na batang Haponesa na namatay noong Oktubre 25, 1955. Dalawang taong gulang lamang si Sadako nang bombahin ang Hiroshima noong Agosto 6, 1945.

Nakaligtas man siya sa mismong pagsabog, nagkaroon naman siya ng leukemia dahil sa matinding epekto ng radiation.

Habang nasa ospital, nakita ni Sadako ang mga papel na tagak na ginagawa at isinasabit ng mga bata at matatanda. Ipinaliwanag sa kanya ng kanyang ama ang paniniwalang Hapones na ang sinumang makagawa ng isang libong papel na tagak ay pagkakalooban ng katuparan ng kanyang mithiin. Dahil dito, nagsimulang gumawa si Sadako ng mga papel na tagak habang umaasang gagaling siya. Ngunit bago niya matapos ang isang libong tagak, siya ay namatay.

Hindi man natupad ang kanyang pangarap, naging inspirasyon naman siya sa maraming kabataan sa Japan. Nagtipon-tipon ang mga bata upang makalikom ng pondo para sa isang iskultura ni Sadako kasama ang simbolo ng isang libong papel na tagak. Hanggang ngayon, makikita ang kanyang estatwa sa Hiroshima Peace Memorial Park bilang paalala ng kahalagahan ng kapayapaan.

Maging sa aming parokya ay nabuhay ang kuwento ni Sadako. Isang batang lalaki ang nakarinig ng kanyang istorya sa aking homiliya noong unang araw ng Simbang Gabi noong Disyembre 2025. Dahil lagi siyang natatalo sa chess, nangarap siyang maging kampeon. Kalaunan ay nagtagumpay siya at naging kampeon nga. Bilang pasasalamat, niregaluhan niya ang parokya ng isang libong papel na tagak na siya mismo ang gumawa.

Dahil dito, hinikayat din namin ang mga bata ng parokya na gumawa ng kani-kanilang papel na tagak bilang pakikiisa sa panawagan ni Papa Leone XIV para sa kapayapaan. Sumulat kami kay Arsobispo Charles Brown, ang kinatawan ng Santo Papa sa Pilipinas, upang hilinging maipadala kay Papa Leone XIV ang mga papel na tagak.

Pumayag naman ang Nuncio at nangakong bibisita sa aming parokya noong Sabado, Mayo 16, 2026.

Buhay na buhay pa rin ang kuwento ni Sadako. At habang may mga taong patuloy na nananalig sa kapayapaan, mananatiling buhay ang kuwento ng Diyos ng Kapayapaan. Amen.

Impeachment at dinastiya

ni Fr. Robert Reyes @Kapaayapaan / Patakbo-takbo | May 10, 2026

Kalulunsad lamang noong nakaraang Biyernes ang “Dapat Isa Lang,” isang malawakang koalisyon ng iba’t ibang sektor, civil society groups, at mga indibidwal na nagsusulong ng tunay at lehitimong Anti-Dynasty Law.

Sa kasalukuyan, may bersyon ng Anti-Dynasty Bill na isinusulong nina Sandro Marcos at Bodjie Dy—kapwa mula sa mga kilalang dinastiya. Nililimitahan ng kanilang panukala ang pagbabawal hanggang second degree consanguinity at affinity, na nangangahulugang marami pa ring magkakapamilya at magkakamag-anak ang maaaring makapasok sa pamahalaan. Sa kabilang banda, isinusulong ng “Dapat Isa Lang” ang mas mahigpit na panukala—pagbabawal hanggang fourth degree consanguinity at affinity.

Samantala, sa darating na Lunes ay inaasahang magtatapos ang deliberasyon sa House of Representatives kaugnay ng mga articles of impeachment laban kay Bise Presidente Sara Duterte. Upang maipadala ito sa Senado, kinakailangang makuha ang suporta ng hindi bababa sa one-third ng mga miyembro ng Kamara. Sa mga nagdaang araw, lumalabas na sapat ang bilang ng mga pumirma upang maisulong ito. Gayunpaman, nananatili ang posibilidad ng pagbabago sa huling sandali.

Dahil dito, marami ang nananalangin para sa maayos na proseso. Magkakaroon ng misa sa ganap na ika-1:00 ng hapon bilang panawagan para sa katotohanan at pananagutan. Isasagawa ito sa pangunguna ni Fr. Greg Redoblado, OFM, na pumayag maging main celebrant.

Ang usapin ng pananagutan ay matagal nang hamon sa bansa. Sa iba’t ibang administrasyon, madalas na hindi lubos na napapanagot ang mga may sala. Bagamat may ilan na nakukulong, kadalasan ay sa mas komportableng kalagayan—hospital arrest o house arrest—na malayo sa karaniwang sitwasyon ng ordinaryong mamamayan.

Sa halip na ang mga pangunahing personalidad ang managot, kadalasan ay ang kanilang mga tauhan ang napaparusahan. Samantala, may ilan namang patuloy na malaya at aktibo, kahit nahaharap sa mga isyu.

Ipinapakita nito na ang problema ay hindi lamang iilang indibidwal, kundi isang sistemang matagal nang umiiral at pinoprotektahan ang sarili. Malaki rin ang papel dito ng political dynasties, na nananatiling makapangyarihan sa iba’t ibang antas ng pamahalaan.

Kapansin-pansin na marami sa mga pumirma sa impeachment ay mula rin sa mga dinastiya. Kaya’t lumilitaw ang tanong: tunggalian ba ito ng mga dinastiya? Sa mas malalim na pagtingin, magkaugnay ang isyu ng impeachment at political dynasties—parehong nakaugat sa sistemang nangangailangan ng reporma.

Sa kabila nito, nagsimula na ang mahahalagang hakbang. Sabay na umuusad ang impeachment at ang kampanya laban sa political dynasties. Sa mga prosesong ito, unti-unting nabubuo ang paninindigan ng mamamayan para sa katotohanan, katarungan, at tunay na pananagutan.