Isinilang sa Year of the Monkey, kwela sa mga tropa pero malungkot ‘pag mag-isa

ni Maestro Honorio Ong @Forecast | March 2, 2023

Sa pagkakataong ito, talakayin naman natin ang mga katangian at magiging kapalaran ng animal sign na Monkey o Unggoy ngayong 2023 o Year of the Water Rabbit.

Ang Unggoy o Monkey ay silang mga isinilang noong taong 1932, 1944, 1956, 1968, 1980, 1992, 2004, 2016, at 2028.

Ang Year of the Monkey o Unggoy ay pinaghaharian din ng impluwensya ng planetang Sun sa Western Astrology. Gayundin, ang Year of the Monkey ay kumakatawan sa zodiac sign na Leo.

Sinasabing higit na maharot at masayahin ang mga Unggoy na isinilang sa panahon ng tag-araw o tag-init kung ikukumpara sa mga Unggoy na isinilang sa panahon ng tag-ulan o taglamig.

Isa sa mga pangunahing katangian ng Unggoy ay malakas ang loob, hindi natatakot na magbaging-baging nang paisa-isang kamay sa ugoy ng kapalaran at kahit minsan ay hindi nila inalala kung sila ay mahuhulog.

Ang pagiging malakas ng loob ang kadalasang nagtutulak sa isang Unggoy na sumubok ng mga bagay na mapanganib. Ngunit ang kahanga-hanga sa kanilang tadhana, gaanuman kalaki ang panganib ng isang sitwasyon na kanilang pinasukan, tiyak na sa dakong huli, sila ay ililigtas ng langit, kaya siguradong hindi sila mapapahamak.

Bukod sa mahilig sumuong sa mga panganib, nagpapasigla rin sa damdamin ng Unggoy ang pakikipagsapalaran. Tunay ngang minsan ay natatalo, subalit mas madalas siyang nananalo sa anumang uri ng sapalaran na kanilang sasalihan.

Dahil likas na masayahin at maliksing kumilos ang Unggoy, hindi sinasadyang nahahawahan niya ng kaharutan at kasiglahan ang mga taong nakapaligid sa kanila, kaya ‘yung mga tatamad-tamad, kapag nakasama ang isang Unggoy ay tiyak na sisipagin, susulak ang dugo at magiging maligaya.

Habang ang mga likas na malungkutin ay matututong ngumiti kahit paano at magiging maligaya sa piling ang kumikero at mapagbirong unggoy.

Mahusay ding magpatawa ang mga Unggoy at mag-entertain ng kanilang mga kasama. Kaya kapag may kaibigan kang Unggoy o may Unggoy sa isang umpukan, tiyak na hindi sila mababato dahil siya ang tiyak na magpapatawa at lilibang sa mga taong nakapaligid sa kanya.

Kaya ang pamilya na may Unggoy sa kanilang tahanan ay itinuturing na mapalad, dahil ang nasabing Unggoy na nagdadala ng saya at ligaya sa bawat miyembro ng mag-anak, ay siya ring aakit ng dagdag pang suwerte at magandang kapalaran sa buong pamilya.

Pangkaraniwan ding mabilis mag-isip at kumilos ang Unggoy, kaya kapag may problema ang pamilya, grupo o barkadahan na may kasaping Unggoy, madali nilang masosolusyunan ang kanilang suliranin sa pamamagitan ng mabilisang pormula o epektibong paraan na maiisip agad ng tuso at matalinong Unggoy.

Sa kabila ng katotohanan na ang Unggoy ay talaga namang masarap kasama, mapagpatawa at masayahin, ang hindi alam ng marami, sa kabila ng mga ito, siya pala ay may pusong mamon at may pagkamaramdamin.

Kaya masasabing ang tunay na larangan ng Unggoy ay nahahawig sa isang payasong mapagpatawa sa tanghalan ng buhay. Ngunit walang nakakabatid na sa kaibuturan ng kanilang pagkatao o puso ay may malalim na kalungkutan at lumbay silang nadarama.

Itutuloy

Dapat gawin ng mga isinilang sa Year of the Goat o Sheep base sa taon ng kapanganakan

ni Maestro Honorio Ong @Forecast | February 28, 2023

Ipagpatuloy natin ang pagtalakay sa mga katangian at magiging kapalaran ng animal sign na Kambing o Goat, na tinatawag ding Tupa o Sheep, ngayong Year of the Water Rabbit.

Ang Kambing o Goat, Tupa o Sheep ay silang mga isinilang noong taong 1931, 1943, 1955, 1967, 1979, 1991, 2003, 2015, at 2027.

Kung ikaw ay Tupa o Kambing na isinilang noong 1955 at 2015, ngayong 2023, magaang papasok sa kaban-yaman mo ang mga materyal na bagay na halos hindi mo na paghihirapan. Kusang dadami ang panahon mo sa mga bagay na may kaugnayan leisure activities na lalo pang magpapasaya ng iyong buhay.

Para sa mga isinilang noong 1967, maraming magagandang balita ang darating ngayong Year of the Water Rabbit. Hindi lang magagandang balita sa iyong kapalaran ang bubulaga, bagkus darating din ang mga kaibigan at malalapit sa buhay na galing sa malalayong lugar. Sa kanilang pagdating, ikaw ang unang mababalatuhan at makikinabang nang husto sa materyal na bagay at magandang mga balita na kanilang dala-dala.

Maaari ring sobrang malibang ka sa magagandang kapalaran na darating, pero hindi ito dapat mangyari dahil kapag nakalimutan mo ang iyong responsibilidad o nakalimutang asikasuhin ang mga bagay na dapat gawin, babalikwas ang pagdating maganda mo sanang kapalaran. Kaya sa buong taon, kahit ano’ng ganda pa ng buhay o suwerte na iyong maranasan, panatilihin mo pa rin ang pagiging responsable. Dapat ay patuloy ka pa ring gumawa ng mabuti at matuwid, alinsunod sa inaatas sa iyong tungkulin. Sa ganyang paraan, kung hindi ka pabaya at mayabang, patuloy na magiging maganda ang kapalaran mo sa buong taon.

Samantala, ang mga Kambing o Tupa na isinilang noong 1979 na may masamang karanasan sa nagdaan, ngayong taon, ang mga ito ay mabilis na lilipas. Dahil sa taon ng Water Rabbit, ang lahat ng bagay ay magiging bago sa iyong paningin. Kaya dapat lang na itapon mo na ang mga lumang gamit tulad ng mga kasangkapan sa kusina na wala nang hawakan, bulok, basag at may pingas na.

Itapon mo na rin ang mga lumang relasyon at mga kaibigan na nagpasakit lamang ng iyong ulo sa nakaraan. Sa mga bagong bagay na bibilhin, matatanggap o ireregalo sa iyo o mga bagong tao o kaibigan na darating, tiyak na ikaw ay susuwertehin. Gayundin, maraming bagong pangyayari ang magaganap tulad ng bagong propesyon, pagkakakitaan, lupain, bahay, sasakyan, kasuotan, negosyo, kakilala at nakakakilig na love interest.

Sa mga isinilang noong 1931 at 1991, bagama’t magiging magastos ang 2023, kung maihahalintulad sa agos ng tubig, sadyang smooth at kampanteng damdamin ang mga magaganap sa buong taon. Ang pangangailangan at magagandang kapalaran na inilaan sa iyo ng langit ay kusang darating ngayong taon nang hindi ka masyadong malulungkot, mapapagod at mag-e-effort.

Oo, ang mga suwerte mo ay parang agos ng ilog na dahan-dahang pumapasok sa malawak na karagatan.

Samantala, ang mga isinilang noong 1943 at 2003 naman ay kailangang magpumilit at magpursige sa taong ito. Hindi puwede na gawin mong attitude ang tulad ni Juan Tamad, na nakahiga sa kawayang papag at maghapong nakanganga at hinihintay na mahulog ang hinog na bayabas sa kanyang bunganga. Hindi mo ito dapat gawin ngayong 2023, sa halip, kung may nais kang makamit, mag-effort ka. Habang ginagawa mo ito, aani ka ng masagana at masarap na bunga ang bawat pagsisikap na iyong gagawin. Dagdag pa rito, sa ngayong Year of the Water Rabbit, sinasabing mag-ingat ka rin sa mga biglaang pakikipagrelasyon na darating dahil may tendency na bigla itong mawala. Kung nais mo ng panghabambuhay na companion na magpapaligaya sa iyo, hayaan mong unti-unting ma-develop ang inyong pagkakaibigan upang ang nasabing ugnayan ay maging maligaya at panghabambuhay nang relasyon. Tandaan mo na ang mamahaling ginto na nahuhukay sa lupa ay hindi muna makinis. Bagkus, ito ay dinadaan sa salaan hanggang kuminang.

Ganundin ang mga pangyayaring magaganap sa iyo sa buong 2023, kung paanong napulot mo ang isang tipak na ginto na medyo marumi, kailangan mong punasan at pagpalaing maigi upang ito ay magkaroon ng halaga, na siya namang magdadala sa iyo sa isang maunlad, maligaya at mas masaganang karanasan sa buong Year of the Water Rabbit.

Itutuloy

Isinilang sa Year of the Goat o Sheep, kaiinggitan ng mga pekeng kaibigan

ni Maestro Honorio Ong @Forecast | February 25, 2023

Ipagpatuloy natin ang pagtalakay sa mga katangian at magiging kapalaran ng animal sign na Kambing o Goat, na tinatawag ding Tupa o Sheep, ngayong Year of the Water Rabbit.

Ang Kambing o Goat, Tupa o Sheep ay silang mga isinilang noong taong 1931, 1943, 1955, 1967, 1979, 1991, 2003, 2015, at 2027.

Ngayong Year of the Water Rabbit, maraming surpresa at kakaibang suwerte ang magaganap at ipagkakaloob sa Kambing o Tupa. Sa iba’t ibang aspeto o larangan ng kanyang buhay, may sari-sari at marami siyang biyayang matatanggap.

Siya ay mabibiyayaan ng wagas at bonggang suwerte dahil ang Tupa o Kambing ay tugma sa umiiral na animal sign ngayong 2023.

Kabilang sa magagandang kapalaran na darating ay mga surpresang bagay na may kaugnayan sa love life at career. Kung wala ka pang karelasyon, ngayong 2023, magkakaroon ka ng kasintahan.

Kung matagal ka nang nag-a-apply sa abroad o may hinihintay kang mahalagang tawag or job opportunity, ngayon darating ito nang walang kahirap-hirap.

Bukod sa maraming magagandang oportunidad na darating, aangat ang kabuhayan ng Tupa o Kambing sa buong taon. Kumbaga sa magsasaka, magandang magtanim o mag-invest ang Tupa o Kambing dahil tiyak na siya ay aani nang sagana.

Ngayong Year of the Water Rabbit, maraming mga pagtitipon at iba’t ibang okasyon ang dadaluhan ng Tupa o Kambing, na magbibigay sa kanya ng kakaibang sigla at magagandang oportunidad ng pag-angat ng kabuhayan.

At dahil magkakaroon ng iba’t ibang suwerte at magagandang kapalaran ang Tupa o Kambing, siguradong siya ay muling kaiinggitan. Kaya ngayong 2023, dapat ding mag-ingat ang Tupa o Kambing sa mga intriga, ganundin sa mga nagkukunwaring kaibigan na may masamang binabalak sa kanya. Ibig sabihin, dapat maging matalino, mapagmatyag at hindi basta-basta magtiwala sa kung kani-kanino kahit pa kaibigan mo siya. Sa taong ito, maging maingat ka sa pagpili ng kakaibiganin at pagkakatiwalaan at tandaan mo na hindi ka maiiwasang mapagsamantalahan sa taglay mong kabaitan.

Kasabay ng pagyabong ng iyong career at pagdating ng mga suwerte, maraming bagong kakilala ang maaakit at didikit sa iyo. Kaya kung wala ka pang karelasyon, tulad ng nabanggit, maaari ka nang magkaroon ngayon. Subalit kung dati ka nang may karelasyon, mag-ingat ka dahil maaaring may madagdag o bagong karelasyon na palihim na darating.

Ang ikinaganda pa ngayong 2023, ang mga mithiin na hindi natupad noon, ngayong taon ay magkakaroon ng paisa-isang katuparan hanggang sa magkatotoo ang lahat ng magagandang bagay na noon mo pa pinapangarap.

Kaya lang, dahil maraming suwerte at magagandang kapalaran ang darating sa Tupa o Kambing, may babala na maging pabaya siya sa kanyang diskarte at kalusugan.

Ipinapayo na maging maingat ka sa kalusugan at anumang gagawing pagpapasya ay dapat ding marahan upang hindi ka magkamali ng desisyon, na maaaring maglagay sa iyo sa kapahamakan.

Sa pag-ibig, kung hindi magpapakahinhin, may babala rin ng hindi pinaghandaang pag-aasawa o pagkakaroon ng anak ngayong taon.

Sa pagpapamilya, sinasabi ring maganda at paborableng mabuntis ang Kambing o ang Tupa ngayong Year of the Water Rabbit upang ang sanggol na mabubuo ay isilang sa 2024, na suwerte dahil ito ay Year of the Dragon.

Tandaan ding sa buong 2023, sa lahat ng aspeto ng buhay, higit na magiging mapalad ang Tupa o Kambing mula sa ika-3 ng Hunyo hanggang sa ika-31 ng Hulyo at mula sa ika-5 ng Oktubre hanggang sa ika-28 ng Nobyembre.

Itutuloy