Hanggang sa tumanda na… ALESSANDRA, PANGARAP MAGING DYESEBEL, NEVER NAMAN INALOK

ni Erlinda Rapadas @Teka Nga | March 4, 2026

Photo: IG _msderossi

Isa pala sa pangarap ni Alessandra de Rossi ang makagawa ng role bilang sirena na mala-Dyesebel ni Marian Rivera. 

Ngunit wala namang producer na nag-offer sa kanya ng ganoong role at nainip na siya sa paghihintay hanggang sa umabot siya sa edad na hindi na babagay sa kanya ang maging sirena. 

Kaya tinanggap na ni Alessandra ang katotohanan na hindi para sa kanya ang role na maging Dyesebel. Gusto pa naman niyang magamit ang kanyang galing sa paglangoy. 

Nang maging artista ay idinadasal niyang mabigyan siya ng role na sirena sa pelikula, ngunit sa mga heavy drama role siya kinilala. 

Well, nagkamit siya ng ilang acting awards at recognition. Hindi man natupad ang pangarap niyang maging sirena sa pelikula, kinilala naman siya bilang seryosong aktres at kaya na niyang mamili ng proyektong gusto niya.

---

Hindi na dapat pansinin pa ni Mavy Legaspi ang mga negative comments sa kanya ng mga bashers sa kanyang style ng pagho-host sa Pinoy Big Brother Celebrity Collab Edition (PBBCCE2.0). 

Naiintindihan naman ng marami na baguhan pa lang siya sa larangan ng pagho-host, kaya hindi siya dapat ikumpara kina Luis Manzano, Robi Domingo, Billy Crawford, atbp.. 

Nagsisimula pa lang si Mavy na pumalaot sa showbiz at willing naman siyang pag-aralan ang mga bagay-bagay upang mahasa nang husto. 

Ito ang magsisilbing malaking challenge para sa kanya, dapat niyang patunayan na may karapatan siyang maging bahagi ng showbiz. For sure, marami naman ang tutulong sa kanya. 

In time, makakasanayan na rin ni Mavy Legaspi ang pagho-host. Kailangan lang niya ang lakas ng loob at determinasyon. Gagabayan din siya ng kanyang mga magulang. 

Maaari rin siyang humingi ng advice kina Luis Manzano, Robi Domingo at Billy Crawford.

---

Malaki na raw ang bayarin…

ODETTE KHAN, NAOSPITAL DAHIL SA PNEUMONIA, TODO-HINGI NG TULONG

PATULOY ang panawagan ng anak ng veteran actress na si Odette Khan para sa medical assistance dahil nasa ospital pa rin ang batikang aktres dahil sa sakit na pneumonia. 

Malaki na ang hospital bill at kailangan na ng financial assistance mula sa mga taong may mabubuting puso. 

Huling napanood si Odette Khan sa Metro Manila Film Festival (MMFF) 2025 movie na Bar Boys 2: After School (BB2AS). 

For sure, tutulong ang buong cast ng BB2AS tulad nina Rocco Nacino, Carlo Aquino, Enzo Pineda, Kean Cipriano, atbp.. Sana ay maiparating din kina Sen. Robin Padilla at Bong Go ang kalagayan ngayon ni Odette Khan. 

Well, sana ay tumulong din sina Sharon Cuneta, Coco Martin, Vice Ganda, atbp..

Feeling sobrang banal… MISTER NI IZZY NA SI ALVIN, DAPAT NA RAW MAGPA-PSYCHIATRIST

ni Erlinda Rapadas @Teka Nga | February 28, 2026

Photo: Instagram @izzytrazona_aragon

Nagtagumpay si Alvin Aragon na makuha ang atensiyon ng publiko nang magbitaw siya ng mga matatapang na pahayag kontra sa LGBTQIA+ community. 

Marami siyang personalidad na nasagasaan dahil nagbanggit pa siya ng mga pangalan ng mga celebrities na may mga anak na lesbian at gay na dahilan din kung bakit siya naba-bash nang todo sa social media. 

Mismong ang King of Talk na si Boy Abunda ay hindi nakapagpigil at pinatulan ang pang-aalipusta ni Alvin sa mga gays. Sa halip na maganda sana ang kanyang pagbabalik dahil sa exposure niya sa social media, umani siya ng mga negatibong komento mula sa iba’t ibang sektor. 

Nasobrahan daw sa kanyang pagpapakabanal ang mister ni Izzy Trazona kaya marami ang nagsasabing dapat siyang magpakonsulta sa isang psychiatrist.

---

Sobrang payat…

ARA, MUKHA NANG ANOREXIC

Kapansin-pansin ang sobrang pagpayat ngayon ni Ara Mina, kaya labis na nag-aalala ang kanyang mga fans dahil mukha na siyang anorexic. 

Bakit daw kailangan niyang magbawas ng timbang, eh, okey naman ang dati niyang pangangatawan? 

Tuloy, marami ang nag-iisip na baka may mabigat na problema ang aktres kaya bumabagsak ang kanyang katawan. Mas okey na mabilog si Ara Mina dahil mas lumulutang ang kanyang sex appeal. 

Anyway, baka naman sa sobrang pagtutok niya sa kanyang mga negosyo ay naapektuhan na ang kanyang kalusugan. Need din niyang mag-relax at magbakasyon. 

At this point of her life, hindi niya kailangang magpaalipin sa trabaho. Stable na siya financially at may career pa.

---

HINDI pala si John Lloyd Cruz ang makakapareha ni Bea Alonzo sa bago niyang seryeng gagawin sa GMA Network kundi si Tom Rodriguez. 

Matagal na kasing nagre-request ang mga Bea at John Lloyd fans na magkaroon sila ng reunion project, tutal ay nasa GMA pa rin si John Lloyd. 

May ilang netizens naman ang nagsa-suggest na pagsamahin sina Marian Rivera at Bea Alonzo sa isang drama series. Tiyak na walang magpapatalo sa kanilang mga eksena. 

Samantala, tiyak na paghahandaan nang husto ni Tom ang pagsasama nila ni Bea sa seryeng kanilang gagawin. Alam ng aktor kung gaano ka-intense umarte ang aktres dahil kinakarir ni Bea ang kanyang character at professional siyang magtrabaho. Hindi siya pa-diva sa set. 

Magsisilbing challenge kay Tom Rodriguez ang makatambal si Bea Alonzo. Kailangang pantayan ang galing ni Bea bilang aktres.

---

MARAMING viewers ang nakaka-miss kay Janna Dominguez. Matagal-tagal din siyang hindi napapanood sa sitcom na Pepito Manaloto (PM) bilang si Maria, na kasambahay nina Manilyn Reynes bilang Elsa at Michael V. bilang Pepito. 

Kahit medyo tatanga-tanga si Maria ay marami ang naaaliw sa kanyang role. Parang may kulang talaga kapag wala siya sa mga episodes ng PM. 

Tulad ni Mosang, matagal na rin sa PM si Janna Dominguez. Okey ang tandem nina Mosang at Arthur Solinap. Natural na natural ang kanilang pagpapatawa kaya nagmarka sila sa comedy serye. 

Gamay na gamay na sila nina Manilyn Reynes at Michael V. at magaan kasi silang katrabaho. 

Well, patuloy ang pagkakamit ng tagumpay at pagkilala sa Pepito Manaloto bilang Best Comedy Show.

Matapos mag-solo noon… SUGAR, TINANGGAP ULI NG SEXBOMB GIRLS

ni Erlinda Rapadas @Teka Nga | February 26, 2026

Photo: Sugar Mercado / File

Marami ang natutuwa na muling tinanggap si Sugar Mercado bilang isa sa mga Sexbomb Girls. 

Matagal siyang nahiwalay sa original na grupo at nag-solo. Naging co-host din siya noon sa game show ni Willie Revillame na Wowowin.

Ngayon, habang nagbabalik ang ningning at kasikatan ng Sexbomb, welcome pa rin sa grupo si Sugar. Marami silang offers ngayon upang mag-show abroad. Gusto silang makitang muli ng mga kababayan natin sa United States of America (USA), Middle East, Canada, Australia, atbp..

Pero si Sugar Mercado ay hindi makakasama sa world tour ng Sexbomb Girls dahil committed siya sa Stars On The Floor (SOTF), at isa siya sa mga makikipag-showdown sa ibang kalahok.

---

DUMAGSA ang mga nakiramay sa huling gabi ng lamay ng Lola May ni Mariel Rodriguez sa Heritage Chapel sa Taguig. 

Magkasamang dumating sina Toni Gonzaga at Direk Paul Soriano. Naroroon din sina Amy Perez at Nadia Montenegro, pati na sina Sen. Camille Villar at Ruffa Gutierrez.

Kasabayan pala ni Lola May sina Dulce at Sampaguita na nagpunta rin sa lamay. 

Bilang pamamaalam kay Lola May, nag-alay ng ilang awitin si Dulce bago pa iuwi ni Mariel ang urn ng kanyang lola.

Si Sen. Robin Padilla ay full support sa pagdamay kay Mariel sa pagpanaw ni Lola May. Ang mag-asawa rin ang personal na nag-asikaso sa lamay at sa mga nakiramay.

Malaking kawalan para kay Mariel ang pagpanaw ng kanyang lola na kasama niya habang siya ay lumalaki. Ito rin ang number one fan niya na nagbigay sa kanya ng payo para makamit ang kanyang mga pangarap sa career. 

Ang lola ni Mariel Rodriguez ay dating sikat na singer, kilala sa pangalang May Villarica.

---

MARAMI ang nagtatanong kung career move ba ang paglipat ni Rita Daniela sa Viva Artist Management. Labing-isang taon siyang nasa pangangalaga ng Sparkle GMA Artist Center at nabigyan ng magandang exposure at mga shows tulad ng My Special Tatay (MST), One of the Baes (OOTB), at Dakilang Ikaw (DI). 

Regular din siyang napapanood sa All-Out Sundays (AOS) at madalas isama sa mga regional shows.

Kaya bagama’t nakakagulat ang desisyon ni Rita na iwan ang Sparkle GMA Artist Center, maaaring marami pa siyang gustong gawin para sa kanyang career, lalo na ngayon na may anak siya na dapat itaguyod. 

Sa Viva Artists Agency, mabibigyan siya ng chance na ma-explore pa ang kanyang kakayahan bilang singer at performer.

---

KAPANSIN-PANSIN ang bagong hairstyle ngayon ng Kapuso actress na si Ashley Ortega. Gaya raw ito sa pinausong estilo ni Kaila Estrada na tinutularan ng ilang kabataan.

Ngunit paliwanag ni Ashley, bahagi ito ng kanyang character sa bagong serye ng GMA-7, ang Apoy sa Dugo (ASD). Gustuhin man niyang baguhin, hindi puwede dahil kailangan sa kanyang role ang bagong hairstyle.

Mula’t sapul ay hindi api-apihan ang role ni Ashley sa kanyang mga serye. Malakas ang kanyang personalidad kaya madalas ay offbeat at palaban ang kanyang mga role. 

Sila ni Elle Villanueva ang nasa major cast ng Apoy sa Dugo, kasama si Derrick Monasterio.