Misis ni Chiz, bagong buhay na raw… HEART, TUMATANDA NA, PAGOD NANG RUMAMPA SA FASHION SHOWS ABROAD

ni Erlinda Rapadas @Teka Nga | September 13, 2025

Photo: Heart Evangelista - IG

Bago pa nagpakasal ay may prenup agreement na sina Heart Evangelista at Sen. Chiz Escudero kaya bukod ang pera at mga naipundar na properties ni Heart sa mga ari-arian nila ng senador (conjugal properties).

Milyones ang kinikita ng aktres-fashion icon sa kanyang mga paintings, product endorsements at sa kanyang pagrampa sa mga fashion events sa New York, Paris, at Milan, kaya afford ni Heart na bumili ng mga luxury items na gusto niya. 

Napakarami na niyang Hermès bags, Louis Vuitton, Chanel, Christian Dior at iba pang branded items Milyun-milyon din ang halaga ng kanyang mga alahas at koleksiyon ng relo.

Katwiran ni Heart, bale reward niya sa sarili ang mga luxury stuff na binibili niya, at deserve niyang maging masaya. 

Pero ngayong 40 years old na siya, naipangako ni Heart na babawasan na niya ang pagiging magastos. Hindi na siya magsa-shopping ng mga branded na gamit. Magiging wise at masinop na siya sa kanyang pera, magtitipid na siya at mag-iipon. 

Plano na rin ni Heart na hindi na gaanong rarampa sa mga fashion events sa New York at Paris dahil nakakaramdam na rin daw siya ng pagod. 

Well, at this point of her life, wala nang mahihiling pa si Heart Evangelista. Naabot na niya ang lahat ng kanyang pinapangarap sa buhay at happy naman ang kanyang love life.

---

Piktyur na naka-dirty finger daw sa Lupang Hinirang, inilabas… RAPPLER, NAGSORI SA FAKE NEWS KAY SEN. ROBIN

MASAMA ang loob ni Sen. Robin Padilla sa Rappler dahil sa isang hindi makatotohanang write-up (fake news) na tumuligsa sa kanya ng kawalang-respeto sa ating National Anthem. 

Diumano, nag-“dirty finger” sign si Sen. Padilla habang kumakanta ng Lupang Hinirang sa plenaryo.

Naglabas pa ang Rappler ng larawan na ipinakita ang diumano’y pagdi-dirty finger ng senador. Pero giit ni Sen. Padilla, kailanman ay hindi niya babastusin ang ating Pambansang Awit. Bilang Filipino, malaki ang respeto niya sa ating National Anthem.

Kung pagmamasdang mabuti ang kamay ni Sen. Robin Padilla na nakalagay sa kanyang dibdib, hindi ang hinlalaki o middle finger ang nakaturo paitaas. 

Sa relihiyong Islam, may kahulugan ang pagtaas ng hintuturo — pagbibigay-pugay at respeto kay Allah.

Kaya fake news ang isinulat ng Rappler tungkol sa “dirty finger” ni Sen. Robin. Mabuti na lamang at agad na nag-apologize ang pamunuan ng Rappler at inamin ang kanilang pagkakamali at pagkukulang. 

Tama lamang ang panawagan ng senador dahil malaking kasiraan sa kanyang pagkatao ang maling impormasyon na naisulat.

---

ESPESYAL ang episode ngayon ng Pepito Manaloto (PM) dahil magdiriwang si Chito (Jake Vargas) ng kanyang 30th birthday. May inihandang selebrasyon para sa kanya ang buong cast ng PM.

Fifteen years nang umeere ang comedy-drama serye at binatilyo pa lamang si Jake Vargas nang maging bahagi ng sitcom. 

Si Clarissa naman (Angel Satsumi) ay child star pa lamang noon at ngayon ay 20 years old na. Para nang tunay na magkapatid sina Jake at Angel. 

Solid ang samahan ng buong cast ng PM na kinabibilangan nina Michael V., Manilyn Reynes, Nova Villa, Ronnie Henares, Chariz Solomon, John Feir, Mosang, Arthur Solinap, Maureen Larrazabal atbp..

Malaki ang pasasalamat ni Jake sa PM at kay Michael V., lagi siyang pinapayuhan at binibigyan ng magagandang ideya para tumagal ang kanyang career. 

Nakita rin ng aktor ang pagiging professional sa trabaho ni Bitoy na nagsilbing inspirasyon niya para sundan ang yapak nito bilang comedy genius.

Mister, inakusahang korup, ‘di nakatiis, nagsalita uli… MAINE: ‘DI KO KUKUNSINTIHIN SI ARJO!

ni Erlinda Rapadas @Teka Nga | September 11, 2025

Photo: Maine at Arjo / FIle

Hindi na nga kinaya ni Maine Mendoza ang mga below the belt na tira at pamba-bash sa kanila ng mister na si Cong. Arjo Atayde dahil sa pagsangkot dito sa isyu ng korupsiyon sa flood control projects.

Sa kanyang FB page, muling nag-post si Maine ng mahabang mensahe kagabi kung saan sinabi niyang na-realize niyang dapat ay nanahimik na lang muna siya kesa nagsalita upang ipagtanggol ang mister nang akusahan itong nakinabang sa flood control project ng gobyerno.

Mas lumaki kasi ang isyu at na-bash nang husto hindi lang ang mag-asawa kundi pati

ang kanilang mga kapamilya dahil sa pagtatanggol ni Maine kay Arjo.

Gayunpaman, idiniin ni Maine at muling pinandigan na malinis ang kunsensiya ng kanyang asawa at hindi ito nagnakaw sa pera ng bayan para gumanda ang buhay nila.

Kung totoo raw na may ginawang kasinungalingan at kalokohan si Arjo at mapatunayang guilty ito sa inaakusa sa kanya, hindi niya kakampihan o pagtatakpan ang asawa.

Well, sana nga ay mapatunayan ni Cong. Arjo ang maling akusasyon sa kanya at malinis niya ang kanyang pangalan dahil sayang ang magandang imahe at record na naitala niya sa showbiz at pulitika.  

---

Not guilty daw sa flood control…

JINGGOY: KAHIT MAMATAY NA AKO AT BUONG PAMILYA KO!

DESIDIDO si Sen. Jinggoy Estrada na sampahan ng kasong libelo ang Bulacan 1st District asst. engineer na si Brice Ericson Hernandez na nag-akusa sa kanya na diumano’y tumanggap ng 30% kickback sa isang project sa 1st District ng Bulacan.

Sa panayam ni Karen Davila kay Sen. Jinggoy, nabanggit niya na marami ang nagpayo sa kanya noon na maging maingat sa kanyang pagpuna bilang aktibong bahagi ng Senate Blue Ribbon Committee. Easy target kasi siya upang ilaglag at sirain ang kanyang pagkatao. Vulnerable siya sa mga ibabatong issue dahil iuugnay ito ng kanyang mga detractors sa past issues ng kanyang political career na naging dahilan ng kanyang pagkakakulong noon sa Camp Crame. 

Naabsuwelto siya at napatunayan na wala siyang kasalanan. Ganunpaman, ito ang ginagawang bala ng kanyang mga kalaban. 

Pero hindi niya hahayaan na sirain ng kahit sino ang kanyang pagkatao. Ipagpapatuloy pa rin niya ang kanyang tungkulin bilang isang senador dahil inihalal at pinagkatiwalaan siya ng milyun-milyong Pilipino.

Sumusumpa si Sen. Jinggoy na kahit mamatay siya at ang kanyang pamilya, hindi siya sangkot sa anomalya ng flood control project sa Bulacan. Gagawin niya ang lahat upang linisin ang kanyang pangalan. 

Well, knowing Sen. Jinggoy Estrada, hindi siya basta na lang mananahimik kapag ang kanyang integridad ang sangkot.

---

Kasal nila ni Ryan, malabo na raw matuloy…

“LET IT GO. IT IS WHAT IT IS” - PAOLA

FINALLY, nagparamdam na rin ang ex-fiancée ni Ryan Bang na si Paola Huyong na

puwedeng konektado sa diumano’y pagkansela sa kanilang kasal. 

Mukhang hindi na nga matutuloy ang inaabangan ng lahat. 

Wala naman sigurong third party na involved at hindi rin pera ang dahilan kaya tinapos na nila ni Ryan ang kanilang relasyon kung totoo man.

Sa Instagram (IG), ishinare niya ang isang video kung saan sinasabing sa mga kamay na ng Diyos iasa ang lahat o ang magiging kapalaran ng kung anuman.

Maaaring tungkol ito sa kanilang kasal.

Sey sa clip, “Let it go. It is what it is.”

Well, may ilang nagsasabi na baka isa sa mga dahilan ng paglamig ng kanilang relasyon ay ang kawalan ng panahon ni Ryan Bang kay Paola Huyong dahil abala ito sa kanyang mga negosyo.

---

MARAMING netizens ang nagtataka kung bakit nananatiling tahimik si Rufa Mae Quinto matapos niyang makabalik sa Pilipinas. Kasama niyang dumating ang kanyang unica hija at naiuwi rin niya ang abo ng yumao niyang mister na si Trevor Magallanes.

Ibinigay kay Rufa Mae ng pamilya ni Trevor ang karapatan kung saan niya gustong ilagak ang abo ng kanyang mister. 

Marami ang naghihintay at nag-aabang sa magiging pahayag niya tungkol sa sanhi ng pagkamatay ng dating mister. 

Pero mukhang mananahimik na lamang si Rufa Mae at ayaw nang pag-usapan pa ang namatay na asawa. Ayaw na niyang pagpiyestahan pa ng media ang sanhi ng pagkamatay ni Trevor. 

Kaya, hinihiling niya sa lahat na bilang respeto sa yumaong mister ay bigyan ito ng katahimikan at ipagdasal na lamang.

Nagluluksa pa si Rufa Mae sa pagpanaw nito, pero sisikapin niyang makapag-move on alang-alang sa kanyang anak na si Athena. Kaya, magbabalik-trabaho siya upang maitaguyod ang kanyang unica hija.

Kumanta sa X’mas party… ALDEN, IDINAWIT SA MAG-ASAWANG DISCAYA

ni Erlinda Rapadas @Teka Nga | September 9, 2025

Photo: Sarah, Curlee Discaya at Alden Richards - IG / Senate

Nagpoprotesta ang mga fans at supporters ng Pambansang Bae na si Alden Richards dahil sa idinadawit ang kanilang idol sa isyu ng yaman ng mga Discaya. 

Kinuha kasi noon si Alden sa Christmas Party ng kumpanya nila, kung saan nag-perform at kumanta siya para pasayahin ang mga bisita. 

At that time, hindi pa naman pumapasok sa pulitika si Sarah Discaya. 

Sa larangan ng construction business siya nakilala at dito yumaman. Kaya unfair na idawit at pagbintangan si Alden gayung hindi naman niya personal na kakilala ang mga Discaya. Hindi siya aware na ganoon sila kayaman.

Samantala, marami ang nagtataka sa naging pahayag ni Ara Mina na hindi niya iiwan si Sarah Discaya sa gitna ng controversy na hinaharap nito. Nasaan na raw ngayon ang aktres sa mga nangyayari sa mag-asawa?

Kaibigan niya si Sarah at nakasama nang tumakbo siyang konsehal sa Pasig noong midterm elections. 

Sad to say, pareho silang natalo kahit milyun-milyon ang ginastos nila sa kanilang kandidatura.

---

NAGBIGAY na ng pahayag si Cong. Arjo Atayde tungkol sa pagkakadawit niya sa issue ng flood control projects ng Department of Public Works and Highways (DPWH). Isa siya sa mga pinangalanan ng mga Discaya na nasa listahan ng mga pulitikong nabigyan umano nila ng commission o parte sa mga projects na nakukuha sa DPWH. 

Mariin itong itinanggi ni Cong. Arjo Atayde at sinabing kahit kailan ay hindi siya nakipag-deal sa mga Discaya. Handa niyang idepensa ang kanyang sarili at linisin ang kanyang pangalan.

Marami sa media people ang nagsasabing straight at hindi corrupt na pulitiko si Cong. Arjo. May kaya sa buhay ang pamilya Atayde kahit noong hindi pa siya pumapasok sa political arena. Nakita rin ng lahat ang kanyang pagmamalasakit sa mga mahihirap sa kanyang distrito nang mamahagi siya ng ayuda sa panahon ng kalamidad.

Well, posible kayang may ilang tao na ginagamit ang pangalan ni Cong. Arjo para sirain ang kanyang imahe sa publiko nang hindi niya alam? 

For sure, maging ang kanyang inang si Sylvia Sanchez ay hindi papayag na madawit ang anak niya sa anomalya ng flood control projects.

---

MARAMI rin ang tiyak na kokontra sa bansag ngayon ng mga bashers kay Heart Evangelista na isa raw siyang ‘nepo wife’. Maraming collection ng branded bags at shoes si Heart, at milyones din ang halaga ng kanyang mga naipundar na jewelries. 

Puro signature dresses din ang kanyang isinusuot na gawa ng mga sikat na fashion designers at panay ang biyahe niya abroad — bukod pa sa France, USA, at Paris.

Likas na mayaman ang pamilya ni Heart. Bata pa siya at hindi pa nag-aartista ay branded na ang kanyang mga gamit, at sa exclusive school siya pinag-aral. 

May mga negosyo ang kanilang pamilya at isa na rito ang sikat na Barrio Fiesta resto.

Marami ring malalaking endorsements si Heart at kumikita siya nang milyones, bukod pa sa halaga ng kanyang mga paintings, kaya marami siyang naipundar na properties at iba pang investments. 

Kahit hindi niya napangasawa si Sen. Chiz Escudero, milyonarya na si Heart, kaya niyang bilhin ang lahat ng gusto niya.

Sabi nga niya, kung anuman ang meron siya ngayon, iyon ay hard-earned money na pinaghirapan niyang kitain. Hindi ganoon kadali ang ginagawa niyang pagrampa sa New York at Paris Fashion Week. Madalas siyang ma-stress kaya nagkakaroon siya ng mga pasa sa braso at halos wala siyang pahinga kapag naghahanda sa pagrampa.