Derek, may ibang babae raw kaya iniwan… “ANG GANDA KO PARA MAGHABOL SA ISANG LALAKI!” – ELLEN

ni Erlinda Rapadas @Teka Nga | November 6, 2025

Photo: FB Ellen Meriam Adarna

Gaano katotoo ang bali-balita ngayon na may third party involved sa hiwalayang Ellen Adarna at Derek Ramsay?

May nagkakalat ng isyung nahuli raw mismo ni Ellen na may bagong babae na kinakalantari si Derek at may nakita rin daw siyang ebidensiya sa cellphone nito. 

Napapadalas din daw ang pagbabakasyon nito abroad kaya nilayasan niya ang dating mister at hinakot ang lahat ng kanyang gamit.

Wala na raw balak si Ellen na makipagbalikan pa kay Derek lalo’t kaya naman daw niyang buhayin ang dalawa niyang anak. 

Sabi nga ni Ellen, “Ang ganda ko para maghabol sa isang lalaki!” 

At lagi rin niyang tinatandaan ang payo ng kanyang ama na okay lang na walang lalaki, ang mahalaga ay may anak. 

Kaya hindi pinanghinayangan ni Ellen Adarna si Derek Ramsay. Tuloy ang buhay para sa kanya, hindi siya ang tipo ng babaeng iiyak at magpapakamartir dahil lang sa isang lalaki.

---

PINALIIT ni Anjo Yllana ang kanyang mundo sa ginawa niyang paninira kay Sen. Tito Sotto. 

Kahit na binawi rin niya ito kaagad at sinabing bluff o biro lang ang kanyang pinagsasabi, still, the damage has been done. Hindi na mabubura ang impresyon sa kanya ng lahat, nawala na ang respeto sa kanya ng marami.

Paano pa siya haharap ngayon kay Sen. Tito Sotto at sa iba pang Dabarkads ng Eat… Bulaga! (EB!)? Maging ang mga loyal fans ng TVJ (Tito, Vic at Joey) ay galit ngayon kay Anjo Yllana. 

Dahil din sa wala sa lugar na pag-iingay ni Anjo, naungkat tuloy ang iba pang issues sa kanyang buhay. Isa na rito ang kanyang malaking pagkakautang kay Willie Revillame na hanggang ngayon ay hindi pa niya binabayaran at ito ang isinusumbat sa kanya ngayon. 

Tinawag din si Anjo Yllana na isang laos na komedyante. 

Well, may natitira pa kayang tunay na kaibigan si Anjo Yllana? May producer pa kayang kukuha sa kanya sa pelikula?

---

TAMA lang ang desisyon ng Kapuso actor na si Will Ashley na patulan at kasuhan ang mga taong nambu-bully sa kanya at sa kanyang pamilya. 

Noong una ay hinayaan lang ni Will ang mga bashers na siraan siya. Alam niyang bahagi lang ito ng kanyang career bilang artista. 

Pero nang pati ang kanyang ina ay idamay na ng mga bashers, dito na umalma si Will.

Hindi niya matanggap na i-wish ng mga bashers na mamatay ang kanyang mama. Lumalagpas na sa limitasyon ang ganitong pambu-bully sa kanya. 

At tama rin ang ‘Emman’s Law’ na isinusulong ni Sen. JV Ejercito para sa online bullying na laganap ngayon sa social media. Kailangan nang sugpuin ang ganitong klase ng pambu-bully. 

Maraming celebrities ang nagiging biktima ngayon ng online bullying. Kailangang maging matatag at matutong lumaban ang mga biktima ng online bullying. Nararapat na bigyan ng leksiyon ang mga bullies.

---

MAY malungkot na bahagi rin pala sa buhay ng Kapuso actress na si Sofia Pablo kaya may hugot siya kapag drama ang eksenang ginagawa niya sa serye.

Nailabas ni Sofia ang kanyang sad memories habang nasa Pinoy Big Brother (PBB) house siya. Inamin ni Sofia na iniwan sila ng kanyang ama noong three years old pa lamang siya. Nag-abroad ang kanyang ama kasama ang bago nitong karelasyon.

At naospital noon ang kanyang ina para sa isang operasyon. Wala silang ibang kasama noon kaya ang mga nurse ang nag-alaga sa kanya habang naka-confine

ang kanyang ina.

Naging matatag si Sofia Pablo dahil sa malungkot na karanasan ng kanyang kabataan. Nagpursige siya sa kanyang career upang makatulong sa kanyang ina.

Ganunpaman, sa paglipas ng panahon ay nagawa ni Sofia Pablo na patawarin ang kanyang ama kahit iniwan sila noon. Tinanggap niya ang naging kapalaran, at ang naging kapalit naman ay ang magandang suwerte sa kanyang career. Hindi siya nagtanim ng sama ng loob sa kanyang ama.

Todo-kayod para sa pamilya… SHUVEE, NAGREREKLAMO NA RAW SA SOBRANG PAGOD

ni Erlinda Rapadas @Teka Nga | October 21, 2025

Photo: FB Shuvee Etrata

Hindi na raw kinakaya ni Shuvee Etrata ang sobrang hectic na schedule niya ngayon, kaya nagrereklamo na siya sa kawalan ng pahinga.

Dahil sa biglaan niyang pagsikat matapos lumabas sa Pinoy Big Brother: Celebrity Collab Edition (PBBCCE), dumagsa ang mga offers at endorsements sa kanya. Todo-kayod si Shuvee sa mga mall tours at provincial shows, kaya halos wala na raw siyang pahinga na ang kapalit ay tagumpay na kanyang tinatamasa.

Ganunpaman, dapat daw ipagpasalamat ito ni Shuvee dahil nabibigyan niya ng magandang buhay ang kanyang pamilya. Kailangan niyang magsakripisyo para sa mga mahal niya sa buhay. Hindi lahat ay nabibigyan ng big break sa showbiz.

Maraming dating artista ang hindi nabibigyan ng malalaking endorsements. Siya lang ang bukod-tanging masuwerte na inalok ng mga malalaking produkto.

At dahil maraming nag-aabang sa kanyang pagbagsak, dapat ay panindigan ni Shuvee Etrata ang kanyang showbiz career. Marami na siyang pinagdaanang pagsubok, hindi siya dapat sumuko.

---

Naging matagumpay ang Season 1 ng House of D (HOD) sa YouTube (YT), ang talk show na binuo ni Dina Bonnevie kasama ang mga anak niyang sina Danica at Oyo Sotto, pati na rin ng mga manugang niyang sina Marc Pingris at Kristine Hermosa.

Maraming mahahalagang aspeto ng buhay ang kanilang tinatalakay, kaya nakaka-relate sa show ang maraming viewers.

First time na nag-share ng kani-kanilang experience sina Danica at Oyo bilang mga anak ni Dina, maging sina Kristine at Marc ay may naging partisipasyon sa talakayan, lalo na sa usapin ng pagpapalaki at pagdisiplina sa kanilang mga anak.

Positive ang feedback ng mga viewers sa Season 1 ng show kaya naging hamon para sa kanila kung ano pa ang maaaring ihandog nila sa Season 2. 

May ilang nagre-request na ma-feature o makapag-guest sa HOD si Vic Sotto para sa isang kaswal na tsikahan.

Well, papayag kaya si Bossing? Hindi kaya siya mailang kung ang magiging topic ay tungkol sa kanilang dating pamilya? Si Pauleen Luna na ang bagong pamilya ngayon ni

Bossing. 

Ayon naman kay Dina Bonnevie, open ang kanyang vlog para sa dating mister. At posible rin daw na kahit si Pasig City Mayor Vico Sotto ay maimbitahan bilang guest sa show.

---

MARAMI ang nagsasabing deserve nina Rodjun Cruz at Dasuri Choi ang tanghaling champion sa Stars on the Floor (SOTF) ng GMA-7.

Sa bawat episode ng nasabing dance show, nagpapakita sina Rodjun at Dasuri ng kakaibang energy sa interpretasyon ng kanilang sayaw.

Ramdam ang kanilang passion sa pagsasayaw, kaya napahanga nila ang mga hurado. 

Inialay ni Rodjun ang kanyang tagumpay sa kanyang mag-ina at sa mahal niyang yumaong ina, na bata pa lamang siya ay nangangarap nang magtagumpay siya sa showbiz.

Kaya naman sa finale night ng SOTF, ibinuhos niya ang kanyang effort upang mabigyan ng buhay ang performance nila ni Dasuri.

Super-proud din kay Rodjun ang kanyang kapatid na si Rayver Cruz. Alam daw nito kung gaano ka-dedicated ang utol sa lahat ng ginagawa niya.

GRABENG effort ang ibinuhos ni Jake Cuenca sa kanyang karakter sa suspense-thriller series na What Lies Beneath (WLB).

Sampung buwan siyang nag-immersion kasama ang mga inmates sa isang kulungan, kaya naman sobrang pumayat at haggard na haggard ang hitsura niya.

Ang major cast ng serye na kasama ni Jake ay sina Kaila Estrada, Sue Ramirez, Janella Salvador, Charlie Dizon, JM de Guzman, at Jameson Blake. Ito ay mula sa direksiyon nina Dado Lumibao at Froy Allan Leonardo.

Samantala, marami rin ang nakapansin na medyo chubby ang hitsura ngayon ni JM kaya pinayuhan siyang magbawas ng timbang upang bumagay sa kanyang role. Pang-bida pa naman ang kanyang status, at tiyak na ayaw din niyang magmukhang tatay o tito ng mga kasamahang artista.

Dating mabenta sa endorsements… SHUVEE, NA-BASH DAHIL KINA DU30 AT VICE, BIGLANG NATAMEME

ni Erlinda Rapadas @Teka Nga | October 14, 2025

Photo: Shuvee Etrata / IG

Nagtataka ang mga fans at supporters kung bakit biglang nanahimik si Shuvee Etrata. Noong kalalabas lang niya sa Pinoy Big Brother (PBB) House, kabi-kabila ang kanyang mga guestings at interviews. Dumagsa rin ang offer na mga product endorsements. Mabangung-mabango rin si Shuvee sa social media. Lahat ng kanyang kilos at mga kaganapan ay updated ang kanyang mga tagahanga.

Pero nang lumabas ang lumang video clip kung saan nagkomento siya nang pabor kay former President Rodrigo Roa Duterte (FPRRD), bigla siyang na-bash. At kahit nag-sorry na si Shuvee kay Vice Ganda nang dahil sa ‘dyodyowain o totropahin’ video kung saan sinabihan niyang ‘Eww’ ito, patuloy ang panlalait sa kanya ng mga bashers.

Well, sabi nga, you cannot please everybody. Dahil sa inggit ng iba sa kanyang tinatamong kasikatan ay hinihila siyang pababa upang bumagsak. 

Maaaring pinayuhan si Shuvee Etrata ng GMA Management na manahimik muna upang hindi siya mapahamak. Sobra kasing nagpakatotoo ang aktres, at ito ang ginagamit na panira sa kanya.

Sabi nga, less talk, less mistakes. Kaya tahimik na ang mundo ngayon ni Shuvee Etrata pero hindi ito nangangahulugan na sumusuko na siya. Magpapakatatag siya sa lahat ng pagsubok para sa magandang kinabukasan ng kanyang pamilya.

---

NAGULAT si Kathryn Bernardo nang malaman na nag-venture ang kanyang Mommy Min sa pagpo-produce ng pelikula. Isa si Mommy Min sa mga producers ng UnMarry, isang pumasok na pelikula sa Metro Manila Film Festival (MMFF) 2025. Ang Quantum Films ang major producer ng UnMarry, na pinagbibidahan nina Angelica Panganiban at Zanjoe Marudo, mula sa direksiyon ni Jeffrey Jeturian.

Maging si Atty. Joji Alonso ay hindi makapaniwala na papasukin ni Mommy Min ang pagpo-produce ng pelikula, marami na kasi siyang negosyong naipundar. 

For sure, masusundan pa ang mga pelikulang ipo-produce ng mom ni Kathryn. May sarili naman siyang pera at gamay na rin niya ang mundo ng showbiz at baka sumosyo rin siya kung may movie na gagawin si Kathryn Bernardo sa ibang movie outfits.

Negosyo rin naman ang pagpo-produce ng pelikula at hindi naman pagsisisihan ni Mommy Min Bernardo ang kanyang pagko-co-produce ng pelikulang UnMarry.

---

Ex mo, Barbie, todo-deny…

JAK, OBYUS NA IN LOVE PERO ‘DI MAAMIN SI KYLIE

AYON sa Kapuso actor na si Jak Roberto, hindi raw mahirap mahalin ang isang katulad ni Kylie Padilla. Napaka-genuine raw ng aktres at hindi plastic sa mga taong nakakasalamuha, kaya naging magaan ang kanilang pagtatrabaho sa katatapos na afternoon soap ng GMA-7, ang My Father’s Wife (MFW).

Nali-link ngayon sa isa’t isa sina Kylie at Jak, super sweet kasi sila sa taping. Maging ang kanilang mga co-stars sa MFW ay lagi silang tinutukso dahil mistulang lovers silang hindi na naghihiwalay.

Ganunpaman, nang mag-guest si Jak Roberto sa Fast Talk with Boy Abunda (FTWBA), itinanggi niya na nililigawan niya si Kylie Padilla. Hindi napaamin ni Abunda ang aktor sa real status ng kanilang relasyon ni Kylie. 

Pero base sa kanilang body language kapag magkasama, may something special na mapapansin kahit walang pag-amin na nagaganap.

At obvious din sa mga kilos ni Jak Roberto na may kakaiba siyang saya kapag kasama ang ex-wife ni Aljur Abrenica. So ang tawag kaya doon ay M.U. (mutual understanding) lang sila ni Kylie Padilla?