Kaya no show na sa Fashion Week… PIA, NILAYASAN DAW NG GLAM TEAM NA DATING KAY HEART

ni Erlinda Rapadas @Teka Nga | August 1, 2026

Photo: IG _piajauncey & _iamhearte

Uumuugong ang usap-usapan sa showbiz na kaya hindi na dumadalo si Pia Wurtzbach sa Paris at New York Fashion Week ay dahil nilayasan umano siya ng kanyang glam team. Ang glam team na ito ay dating nagtatrabaho kay Heart Evangelista, pero nasulot nga raw ni Pia.

Well, hindi naman kawalan kay Heart nu’ng nawala ang kanyang glam team dahil magagaling ang pumalit. Besides, marunong na rin siyang mag-make-up sa sarili dahil natuto sa dati niyang make-up artist.

Masaya ang bagong glam team ni Heart dahil nakakatanggap sila ng bonus at mamahaling regalo sa bawat Fashion Week na dinadaluhan ng aktres-model.

Napaka-generous ni Heart sa mga taong nakakatulong sa kanya. Marunong siyang mag-share ng blessings. Hindi rin feeling primadonna si Heart kaya kasundo niya ang kanyang glam team. 

Kaya no comparison kapag pinagsasabong sila ni Pia dahil may sariling tatak si Heart at kinikilala bilang isang fashion icon.

---

Todo-enjoy lang sa relasyon nila… 

NADINE, ‘DI MINAMADALI ANG BF NA PAKASALAN SIYA

MASUWERTE si Nadine Lustre dahil nakatagpo siya ng mabait, matalino at supportive boyfriend na tulad ni Christophe Bariou. Hindi nito pine-pressure ang aktres na bigyan siya ng anak sakaling mauwi sa pagpapakasal ang kanilang relasyon.

Sa kanyang mga interviews ay nabanggit ni Nadine na wala sa plano niya ang magkaroon ng anak. Hindi pa niya tanggap kung anu-ano ang mga physical changes na mangyayari sa kanya once na magpakasal na siya kay Christophe at mabuntis siya.

Naiintindihan naman ito ng boyfriend ni Nadine, at open ito sa posibilidad na adoption. Kung hindi kaya ni Nadine ang magbuntis, susuportahan niya kung anuman ang maging desisyon ng nobya.

Hindi naman nagmamadali ang aktres na magpakasal. Pareho naman silang busy sa kani-kanilang career. May mga negosyo si Christophe, samantalang si Nadine ay nakatutok sa kanyang career. 

Hindi pa niya naaabot ang peak sa showbiz. Marami pa siyang pangarap na gustong makamit.

May mga netizens ang nagsasabing posibleng magbago ang desisyon ni Nadine at nanaisin ding magkaroon ng sariling pamilya. 

Tulad din ni Megan Young na dati ay takot na takot magbuntis kaya hindi sila agad nagkaroon ng anak ni Mikael Daez, ngayon ay ine-enjoy na ng dating beauty queen ang pagiging mommy.

---

MALAPIT nang maabot ng Eat… Bulaga! (EB!) ang pangarap nilang golden anniversary bilang longest-running noontime show. Tatlong taon na lang at 50 yrs. na silang umeere.

Nakaikot na ang EB! sa malalaking networks tulad ng RPN-9, ABS-CBN 2 at GMA-7. Ngayon ay napapanood na sila sa TV5 matapos humiwalay sa dati nilang producer, ang TAPE, Inc..

Sabay-sabay noon na nag-resign sa EB! sina Tito Sotto, Vic Sotto at Joey de Leon (TVJ) kasama ang iba pang hosts. Pinili ng TVJ na mag-produce ng bagong EB! sa TV5.

Ipinagpatuloy nila ito at tinangkilik ng kanilang mga loyal viewers. Dito napapanood ang sikat na segment na Pinoy Henyo na patuloy na kinaaaliwan.

Masaya rin ang segment na Sugod Bahay nina Jose Manalo, Paolo Ballesteros, Miles Ocampo at Carren Eistrup. Gusto rin ng mga viewers ang pagge-guest sa EB! ng mga dating sikat na singers at artista na matagal nang hindi napapanood sa telebisyon.

Natural na natural ang pagpapatawa ng mga hosts na parang isang masayang pamilya.

---

HANDA naman daw si Jake Vargas na pakasalan si Inah de Belen. Ilang taon na rin naman silang nagli-live-in at kilala na nila ang isa’t isa.

Pero kailangan daw na paghandaan muna nila ito dahil malaki rin ang gagastusin sa kanilang kasal. Pauunahin muna diumano nilang makasal ang kapatid ni Inah na si Moira. Siya ang unang nagpaalam upang makasal sa kanyang karelasyon ngayon.

Sa ngayon ay may negosyo sina Inah at Jake na kanilang pinagkakaabalahan. May regular show ang aktor sa GMA-7, ang Pepito Manaloto (PM) na napapanood tuwing Sabado.

Samantala, patuloy ang magandang feedback ng mga viewers dahil sa mga wholesome na episodes at nakaka-relate ang marami sa mga kuwentong ipinalalabas sa PM. Napakagaan at entertaining ng bawat episode at may hatid na aral.

Ayon nga kay Michael V., ang isang nakaaaliw na palabas ay hindi kailangang may slapstick o pisikal na sakitan ng mga cast upang magpatawa. Magagawa iyon nang natural na hindi nakaka-offend ng tao. Iyon ang sikreto ng Pepito Manaloto kaya ito ngayon ang longest-running sitcom sa telebisyon.

Kinumpirma ng Star Magic… KIM, ‘DI INIURONG ANG KASO SA UTOL

ni Mercy Lejarde @Talkies | August 1, 2026

Photo: IG _chinitaprincess

Nilinaw ng Star Magic na itutuloy ng aktres-TV host na si Kim Chiu ang reklamong isinampa niya laban sa kapatid na si Lakambini Chiu, sa kabila ng muling pagkalat ng isang panayam noong 2023 kung saan positibo ang kanyang naging pahayag tungkol dito.

Sa isang opisyal na pahayag na inilabas sa social media, ipinaliwanag ng Star Magic ang panig ni Kim kaugnay ng isyu.

Ayon sa Star Magic, ang panayam na naitala noong 2023 ay muling kumakalat at kasalukuyang pinapanood ng publiko. Gayunman, nilinaw nitong hindi ito nangangahulugang nagbago ang desisyon ni Kim na ituloy ang legal na hakbang laban sa kanyang kapatid.

Ipinaliwanag din ng Star Magic na ang mga pahayag ni Kim noong 2023 ay tumutugma lamang sa sitwasyon sa panahong iyon at ginawa bago pa lumitaw ang mga pangyayaring naging dahilan ng pagsasampa ng reklamo.

Sa opisyal na pahayag, ito ang nakasaad, “Star Magic, on behalf of Ms. Kim Chiu, wishes to issue the following statement for the guidance of the public.

“In 2023, an interview of Kim regarding her sister was recorded and is currently being viewed by the public.

“While the statements made by Kim at the time were true and reflected the circumstances then, they no longer represent the present situation.

“Since then, Kim has discovered material information that came to light in 2025, which prompted her to take legal action.

“As a result, a criminal complaint filed by Kim against Ms. Lakambini Chiu is currently pending before the proper authorities.

“Kim remains firm in her decision to pursue the case through the proper legal process in order to establish the truth, hold the responsible parties accountable, and seek justice.

“This statement is issued solely to clarify the timeline of events and to avoid any misunderstanding arising from previously recorded statements.

“As the matter is now the subject of ongoing legal proceedings, we respectfully ask for the public’s understanding and for Kim’s privacy to be respected while the case takes its proper course.

“Thank you for your continued love and support for Kim.”

Well, wala namang magagawa ang madlang people kung desidido pa rin si Kim na ituloy ang kaso. Wish lang ni yours truly na maayos ang hindi pagkakaunawaan ng magkapatid na Kim at Lakam. 

---

LOVE overload! 

Ibinahagi ng OPM singer-songwriter na si Juan Karlos ang kanyang sweet anniversary message para sa kanyang partner na beauty queen na si Dia Maté.

Sa kanyang social media post, nagbahagi rin ang singer ng mga larawan nilang dalawa habang nag-e-enjoy sa dagat bilang pagdiriwang ng kanilang espesyal na araw.

Sa kanyang mensahe, sinabi ni Juan Karlos, “Every time I witness your eyes looking at me, it makes me feel like how I feel when I watch the sunset.

“Matagal ko nang hinangad na matikman ang tunay na kahulugan ng pag-ibig. At nang dumating ka sa buhay ko, du’n ko lang napagtanto na ang pagmamahal na

nararapat para sa akin ay ikaw.

“To my beautiful baby girl, my best friend, my ride or die, my superstar, Happy Anniversary! Mahal na mahal kita! @diamate.”

In fairness, napakilig ni Juan Karlos ang maraming kababaihan sa comment section ng kanyang post.

---

PANGMALAKASANG kolaborasyon ang hatid nina Maki at James Reid sa kanilang bagong awitin na Luck.

Inihahalintulad ng alternative indie-pop song ang pag-ibig sa isang sugal—walang kasiguraduhan ang kahihinatnan nito. 

Ipinapakita nito na ang pinakamagagandang kuwento ng pag-ibig ay nagsisimula sa isang matapang na desisyon.

Kasama ni Maki sa pagsulat ng Luck ang top international songwriters at producers na sina Gaby Ramirez, Pontus Kalm, Greg Shilling, at Shintaro Yasuda, na nakapag-compose para sa global artists gaya nina Ariana Grande, BTS, LE SSERAFIM, aespa, at BINI.

Ipinagpapatuloy ng latest music release ng Tarsier Records ang Pink Era ni Maki na sinimulan niya sa nakaraang single na Habangbuhay Pansamantala.

Kamakailan ay dinala ni Maki ang kanyang KOLORCOASTER concert tour sa Indonesia at Singapore, kung saan inawit niya ang hit songs tulad ng Dilaw, Namumula, at Kahel Na Langit.

Nag-guest din siya sa sikat na Indonesian comedy program na Lapor Pak! (LP!) kung saan ipinakita niya ang kanyang husay sa pagpapatawa at pag-arte sa international audience.

Samantala, patuloy ring ipinapakita ni James Reid ang kanyang music style sa pagsasama ng alternative pop, R&B, at modern OPM sa kanyang mga awitin. Sa mahigit isang dekada sa industriya, nakilala siya sa kanyang creative vision at evolving sound.

Nitong Mayo ay inilabas niya ang single na Richest Man Alive at kasalukuyan din siyang napapanood sa ABS-CBN primetime series na Someone, Someday.

‘Yun lang, and I thank you.

‘Di raw sila match… ANDREW E., ‘DI MAKIKIPAG-COLLAB KAY MICHAEL V.

ni Janiz Navida @Showbiz Special | August 1, 2026

Photo: IG _andrewe_dongalo & FB Michael V.

Nakakabilib ang tinaguriang King of Rap na si Andrew E..

Imagine, nu’ng 59th birthday salubong niya last July 29 na ginanap sa G-Side Bar sa QC kasabay ng launching ng bago niyang single titled Pasta na kasama sa bagong album niyang Wholesome Again, pagdating pa lang sa labas ng bar, lahat ng inabutan niyang tao ay kinamayan niya at lahat ng nagpa-selfie ay pinagbigyan.

Nu’ng pumasok na siya sa venue, inisa-isa rin niyang batiin lahat ng nag-aabang sa kanya, hindi lang ang press people at mga guests, kundi lahat talaga ng dumating para ma-witness ang launching ng kanyang bagong song na Pasta.

Nasa 300 siguro ang mga tao that night at bawat isa ay nagpa-selfie kay Andrew E. na lahat ay pinagbigyan naman niya. Bongga, ‘di ba?

Anyway, tulad ng mga una na niyang sumikat na kanta na Humanap Ka ng Panget, Andrew Ford Medina, Banyo Queen, etc., malakas din ang recall ng Pasta na may double meaning kaya bentang-benta agad sa mga listeners.

Ilang lines pa nga lang ng Pasta ang paulit-ulit na kinanta ni Andrew E. that night, aba’t sinasabayan na agad ng mga tao. Ang saya!

Pero paglilinaw ni Andrew sa mga nag-akalang may mura na “P**ang *na mo” ang kanta, “Put a little more” raw ang nasa lyrics kaya mabuting pakinggang mabuti bago kantahin at gayahin.

Samantala, natanong namin si Andrew, ngayong nagbabalik siya sa paggawa ng album, posible kayang magkaroon sila ng collab ng dati pang contemporary niya sa rap na si Michael V.?

Diretsong sagot nito, “Honestly, ate, ever since before, meron akong culture na ‘di ako nakikipag-collaborate. Kasi minsan, you know, hindi match ‘yung ka-collaborate ko. Kasi ang kanta ko, minsan, double meaning and all, ‘di magma-match kung may isang kantang ‘di double meaning. So useless, walang collaborative ano. So, parang for me, para walang tampuhan, ‘di na lang ako makikipag-collaborate with them.”  

How about sa Bubble Gang, puwede kaya siyang mag-guest para magkasama sila ni Michael V.?

Hindi rin daw niya masabi kasi marami na raw bawal sa kanya like magpuyat since naoperahan na siya dahil sa cholesterol blockage.

Kaya nga raw ang birthday wish lang niya sa kanyang 59th birthday ay good health at ang success ng Pasta at ng lima pang kanta na ire-release niya sa mga susunod na buwan na kasama sa Wholesome Again album.

Well, congrats and good luck, King of Rap Andrew E.!

---

Hindi lang kay Angel na bumanat sa aktor… 

DENNIS, RUMESBAK SA MGA NAGSASABING BOBO SI SEN. ROBIN

ISA si Dennis Padilla sa napakaraming celebrity guests ni Ms. Charo Cordial, CEO of Maddox Jewelry, sa katatapos lang na Maddox Iconic Runway: Diamond Jewelry Fashion Show 2026 last Thursday na ginanap sa Shangri-La Hotel.

Bago ang successful fashion show, nakausap namin si Dennis tungkol sa BFF niyang si Sen. Robin Padilla na favorite banatan ngayon sa social media dahil sa mga pahayag nito.

Ani Dennis, kilala naman niya si Robin na sanay na ito at manhid na sa mga banat sa kanya. Pero bilang kaibigan, ang pinakamasakit lang daw para sa kanya ay kapag sinasabihang “bobo” ang aktor-senador.

“I hate that word. Kumbaga, wala namang bobong tao. Saka, parang very insulting. Sa mga bashers, ‘wag naman tayong umabot sa ganu’n kababa. Itaas naman natin ang quality ng pagsasalita natin. May pinag-aralan naman ang mga Pilipino.”

Puwede naman daw i-criticize si Sen. Robin sa mas ‘tame’ na words.

Recently, may naging pahayag si Ted Failon at maging si Angel Locsin na idinaan pa nga sa FB post ang pag-criticize kay Sen. Robin. 

Hirit ni Dennis, “Mali, mali. Hindi maganda. Saka I’m sure, ‘yang mga comments ng mga tao na ‘yan, tandaan n’yo, babalik sa inyo ‘yan! God will prove you wrong.”

Hmmm… May sagot pa kaya sina Ted at Angel sa sinabi ni Dennis?