Taumbayan ang tunay na talo sa walang katapusang bangayan

by Info @Editorial | June 3, 2026

Sa panahong tila mas nangingibabaw ang akusasyon at bangayan, mahalagang paalalahanan ang lahat na ang tunay na sukatan ng pamahalaan ay hindi kung sino ang nananaig sa pulitika, kundi kung paano nito napaglilingkuran ang taumbayan.

Hindi maikakaila na nahaharap ngayon ang Senado sa matinding pressure. Sunud-sunod ang mga banta ng kaso at pag-aresto laban sa ilang senador. Bukod kay Sen. Jinggoy Estrada, may iba pang senador ang sinasabing dadamputin din. Pati si Senate President Alan Peter Cayetano at mga empleyado, balak umanong sampahan ng kaso kaugnay naman ng naganap na pamamaril sa Senado.

Dahil sa mga ito, iginiit ni SP Cayetano na hindi dapat hayaang maimpluwensiyahan ng takot o pressure politics ang institusyon.

Sa gitna nito, ang tanong naman ng publiko, ano na ang nangyari sa bilyun-bilyong ninakaw ng mga dating kawani at opisyal ng gobyerno at mga kasabwat na kontraktor?

Kaya mas dapat harapin ng buong Senado ang hamon na manindigan bilang isang 'co-equal branch of government' at ituloy ang imbestigasyon sa flood control scam hanggang sa mapanagot ang lahat ng sangkot. 

Dahil kapag ang Senado ay nagsimulang kumilos dahil sa pressure, takot, o political bargaining, unti-unting nawawala ang tunay nitong papel bilang isang independent institution.

Sa huli, hindi lamang kalayaan ng Senado ang dapat ipaglaban kundi ang kakayahan nitong magtrabaho para sa publiko sa kabila ng lahat ng ingay sa pulitika. Sapagkat kapag ang oras at lakas ng mga pinuno ay nauubos sa bangayan, ang tunay na talo ay hindi ang mayorya o minorya—kundi ang sambayanang Pilipino.

LGUs, dapat handa rin sa balik-eskwela

by Info @Editorial | June 2, 2026

Sa nalalapit na pagbubukas ng klase, magiging abala na naman ang mga lansangan sa pagdagsa ng mga mag-aaral. 

Dahil dito, mahalagang pagtuunan ng pansin hindi lamang ang kahandaan sa mga gamit pang-eskwela kundi higit sa lahat ang kaligtasan at seguridad ng mga estudyante.

Taun-taon, may mga mag-aaral na nalalagay sa panganib dahil sa masasamang-loob, buwis-buhay na kalsada, mga pasaway na motorista, at iba pang suliraning pangkaligtasan sa paligid ng mga paaralan. 

Kaya naman, kinakailangang maging maagap ang mga lokal na pamahalaan, paaralan, at mga otoridad sa pagpapatupad ng mga programang magpoprotekta sa mga kabataan. 

Dapat tiyakin ang presensya ng kapulisan o mga tanod, maayos na daloy ng sasakyan, at ligtas na kapaligiran sa loob at labas ng paaralan.

Mahalaga rin ang papel ng mga magulang sa paggabay sa kanilang mga anak tungkol sa tamang pag-iingat habang bumibiyahe at nasa paaralan. 

Ang disiplina at pagiging mapagmatyag ay makakatulong upang maiwasan ang mga aksidente at iba pang panganib.

Ang edukasyon ay susi sa magandang kinabukasan, ngunit hindi ito magiging ganap kung nalalagay sa alanganin ang kaligtasan ng mga mag-aaral. 

Kaya sa pagbabalik-eskwela, dapat magtulungan ang lahat upang matiyak ang kaligtasan ng lahat. 

Imbestigasyon sa flood control scam, tapusin na

by Info @Editorial | June 1, 2026

Kasabay ng ingay ng impeachment at palit-liderato sa Senado, agad na binalikan ang isa sa pinakamabigat na isyu na ‘di dapat masapawan ng anumang kontrobersiya—ang flood control scandal.

Sa ilalim ni Senate President Alan Peter Cayetano, muling binuksan ang imbestigasyon sa mga maanomalyang flood control project. Bumuo ng isang flood control subcommittee sa pamumuno ni Senador Rodante Marcoleta.

Sa una pa lang, dapat ay malinaw na ang mandato: walang “sacred cows,” walang protektadong interes, at walang exempted sa imbestigasyon. 

Matatandaang sinuspinde noon ni Sen. Panfilo Lacson, dating namumuno sa Blue Ribbon Committee, ang nasabing imbestigasyon. Nakatengga rin ang partial report dahil kulang sa pirma ng mga senador para pormal na maisponsor sa plenaryo. 

Pero ngayong binuhay na ang imbestigasyon, umaasa ang publiko na magiging patas at lalabas na ang buong katotohanan. 

Ang perang nawawala at nasasayang ay pera ng taumbayan. Hindi ito dapat mabahiran ng pamumulitika; sa halip, dapat manaig ang pananagutan. 

Pagod na, asang-asa, at sawang-sawa na ang mga Pilipino sa walang katapusang bangayan at drama sa pulitika. Ang gusto ng ordinaryong mamamayan ay resulta, totoong serbisyo, at mga institusyon ng gobyerno na talagang nagtatrabaho. 

At sa halip na magbanatan, tutukan na lang kung paano gagamitin ng nakararami ang ipinagkatiwalang kapangyarihan. Kung may pang-aabuso, ibunyag. Pero sana, ang kritisismo ay ibatay sa katotohanan at resulta, hindi sa hinala at sariling interes. 

Deserve ng bawat Pilipino ang gobyernong matino at hindi ang walang katapusang teleserye sa pulitika.