May ‘K’ lang dapat ang ilagay sa gobyerno

by Info @Editorial | September 1, 2025

Sawang-sawa na ang taumbayan sa mga opisyal at empleyado ng gobyerno na walang alam at nagpapakasasa lang sa pera at kapangyarihan. 

Kaya malinaw ang panawagan: Salain nang mas maigi ang mga iniluluklok sa puwesto.

Hindi dapat nauuna ang koneksyon kaysa sa kuwalipikasyon. Hindi dapat inuuna ang utang na loob kaysa sa tunay na kakayahan. 

Ang mga nasa gobyerno, lalo na sa matataas na posisyon, ay dapat may ‘K’, karanasan, kakayahan at katapatan.

Hindi puwedeng ilagay ang sinuman sa puwesto dahil lang kaibigan, kamag-anak, o kakampi sa pulitika.

Hindi rin sapat na walang kaso — dapat malinaw ang record, malinis ang pangalan, at may napatunayang serbisyo sa bayan. Kung may bahid na ng korupsiyon, bakit pa bibigyan ng kapangyarihan?

Sa serbisyo-publiko nakasalalay ang kapakanan ng mamamayan. Kaya’t dapat lang na ang ilagay sa bawat posisyon ay ang pinaka may “K” — hindi dahil kilala, kundi dahil karapat-dapat.

Kung gusto nating umasenso, magsimula tayo sa mas mahigpit na pagsala sa mga taong magiging kinatawan at lider sa gobyerno.

Kung hindi marunong rumespeto sa batas, walang ‘K’ maging pulis

by Info @Editorial | August 31, 2025

Nakakagalit. Nakakahiya. Nakakatakot. Ito ang mga salitang paulit-ulit na pumapasok sa isipan tuwing may balitang pulis na sangkot sa krimen.Pulis na nagnanakaw. Pulis na tumatanggap ng kotong. Pulis na nang-aabuso.

Pulis na gumagamit o nagtutulak ng ilegal droga. Pulis na pumapatay nang walang dahilan. Sila ang mga taong dapat nanghuhuli ng masama, pero sila mismo ang gumagawa nito.Hindi natin maikakaila — may mga pulis na tapat sa tungkulin. Pero gaano pa ba karaming masasamang pulis ang kailangang mahuli bago tayo matauhan? 

Hindi sapat ang paulit-ulit na “iimbestigahan.” Kailangan ng mas mabigat na aksyon.

Hindi dahilan ang “stress sa trabaho” o “gipit sa buhay.” Lahat tayo dumaranas n’yan, pero hindi lahat ay pumapatay o nagnanakaw. Kapag pulis ka, mas mataas ang inaasahan. May kapangyarihan ka, pero may mas malaking pananagutan.

Ang mas masaklap, minsan mismong mga opisyal pa ang nagtatakip. Saan pa tayo lulugar kung ang tagapagtanggol ay siya ring umaabuso?

Dapat lang na tanggalin, kasuhan, at ikulong ang mga pulis na kriminal. Hindi sila exempted sa batas — sila pa nga ang dapat unang sumunod dito. Kung hindi sila marunong rumespeto sa batas, wala silang karapatang magdala ng baril at uniporme.

Korupsiyon sa iba pang gov’t projects, kalkalin

by Info @Editorial | August 30, 2025

Paulit-ulit ang mga pangako ng transparency at good governance, pero nananatiling malalim ang ugat ng korupsiyon sa iba’t ibang proyekto ng gobyerno. 

Bawat taon, lumalabas ang mga ulat ng overpriced na kagamitan, ghost projects, at mga proyektong natapos lamang sa papel — habang ang pondo ng bayan ay nauuwi sa bulsa ng iilan.

Sa ngayon, anomalya sa flood control projects ang hinuhukay. Kamakalawa lang nang ibulgar naman na maging ang school buildings ay pinagkaperahan din daw ng mga opisyal. 

Ang masaklap, ang mga naaapektuhan nito ay ang mga ordinaryong mamamayan. Ang pondo na dapat sana’y para sa serbisyong panlipunan ay nauubos sa mga "kickback" at "under the table deals". 

Sa halip na makakita ng progreso, ang mamamayan ay naiipit sa palyadong mga proyekto.

Hindi sapat ang simpleng paglalantad. Kailangang kalkalin, busisiin, at papanagutin ang mga nasa likod ng mga kuwestiyonableng proyekto. 

Bukod dito, dapat suportahan ng publiko ang mga whistleblower na may tapang magsiwalat ng katiwalian. Ang isang malinis na gobyerno ay hindi lamang tungkulin ng mga nasa puwesto — ito ay responsibilidad nating lahat bilang mamamayan.

Kung hindi natin kakalkalin ang ugat ng korupsiyon sa mga proyekto ng pamahalaan, patuloy tayong malulubog sa kahirapan. Panahon na para magising, kumilos, at manindigan.