Rally laban sa korupsiyon, gawing ligtas at mapayapa

by Info @Editorial | September 12, 2025

Kasunod ng mga nabulgar na anomalya sa flood control projects kung saan pinaniniwalaang sindikato na ang nasa likod nito, mas lalong tumindi ang galit ng taumbayan.

Dumarami ang nananawagang makialam at umaksyon. 

Ang kilos-protesta laban sa korupsiyon ay lehitimo, makatarungan, at kinakailangan.

Ngunit ito’y dapat isagawa sa paraang ligtas, mapayapa, at may malinaw na layunin.Hindi dapat maging dahilan ang protesta para sa karahasan o kaguluhan. 

Mas epektibo ang mensahe kung may disiplina ang pagkilos, may koordinasyon sa awtoridad, at malinaw ang panawagan:

Panagutin ang mga korup. Ilabas ang katotohanan. Itigil ang pandarambong at ibalik ang lahat ng ibinulsa.Sa kabilang banda, ang mga nasa posisyon ay hindi dapat magbingi-bingihan. Ang galit ng taumbayan ay hindi basta emosyon — ito ay pagkadismaya, gutom, at takot. 

Kung walang gagawin ang kinauukulan, posibleng mangyari ang mas malawak at mas malakas na pagkilos.

Nagkalat na pekeng ID, gamit na gamit sa krimen

by Info @Editorial | September 12, 2025

Sa kabila ng mahigpit na batas, talamak pa rin ang paggawa at bentahan ng pekeng ID — mula sa gobyerno hanggang sa pribadong sektor. 

Hindi mo na rin kailangang pumunta sa mga gumagawa dahil meron na rin online, grabe!

Ang masama, hindi lang ito simpleng panloloko. Malaking pera ang nawawala sa gobyerno — bilyones. Naaabuso ang benepisyo, naaagrabyado ang tunay na nangangailangan.

May mga nahuhuli, oo. Pero tuloy pa rin ang negosyo dahil mabagal umano ang proseso ng lehitimong ID, kulang sa enforcement, at kulang sa kaalaman ang publiko. Mas madali pa raw kumuha ng fake kaysa sa tunay.

Kaya dapat pabilisin ang paglalabas ng totoong ID. Gawing real-time ang pag-verify nito.

Mahalaga rin ang non-stop na operasyon laban sa mga gumagawa at nagbebenta ng fake IDs.

Gayundin, turuan ang publiko kung paano umiwas sa maling gawain, huwag tangkilikin ang mga ilegal.

Ang ID ay simbolo ng tiwala at pagkakakilanlan. Huwag nating hayaan itong gawing negosyo ng pandaraya na ang masaklap, ginagamit din sa iba't ibang krimen.

Maging mulat kontra-korupsiyon

by Info @Editorial | September 11, 2025

Habang binabaha ang maraming lugar sa bansa, lumalabas ang mas malalang problema — korupsiyon sa flood control projects. 

Sa halip na solusyon, naging negosyo ito para sa ilang tiwaling opisyal.

Ayon sa mga lumalabas sa imbestigasyon sa Kongreso, may mga proyektong binayaran na kahit hindi naman natapos, may overpricing, at may mga kickback na ibinibigay umano sa ilang opisyal. 

Ginagamit ang pondo ng bayan para sa sariling interes ng iilan. Habang ang karaniwang Pilipino, paulit-ulit na nababaha at nawawalan ng tirahan.

Kaya dapat, alam natin ang nangyayari.

Dapat sinusubaybayan natin ang imbestigasyon, kilalanin ang mga sangkot, at manindigan para sa pananagutan. Kung wala tayong alam, madali tayong paasahin at lokohin.

Ang pondo para sa flood control ay galing sa ating buwis. Kaya may karapatan tayong malaman kung saan ito napunta. 

Ang pananahimik ay parang pagsang-ayon sa mali.

Kung gusto natin ng pagbabago, kailangan nating maging mulat. Hindi ito trabaho lang ng gobyerno — responsibilidad din natin bilang mamamayan na magbantay at magsalita.

Kung hindi tayo kikilos, tayo rin ang tuluyang lulubog sa baha at sa korupsiyon.