Ayusin ang mass transport para mas maraming mag-commute

by Info @Editorial | September 19, 2025

Isa sa mga pangunahing suliraning kinakaharap ng bansa, lalo na sa Metro Manila, ay ang mabigat na trapiko at kakulangan sa sistema ng pampublikong transportasyon. 

Araw-araw, libu-libong Pilipino ang nagsasakripisyo ng oras, pera, at kaligtasan para lamang makarating sa trabaho o paaralan.

Kung nais ng pamahalaan na mabawasan ang trapik at guminhawa ang daloy ng buhay sa mga lungsod, dapat tutukan ang pagpapalakas sa mass transport system. Kailangan ng modernisasyon, disiplina, at konkretong aksyon.Panahon na para sa seryosong aksyon. Hindi makatarungan na ang mga mamamayang sumusunod sa batas, nagtatrabaho araw-araw, at nagbabayad ng buwis ay araw-araw ding pinapahirapan sa biyahe. 

Ang karanasan sa pampublikong transportasyon ay repleksyon ng uri ng pamahalaan na mayroon tayo. At sa kasalukuyan, malinaw na maraming dapat ayusin.

Kung nais nating umunlad bilang bansa, kailangang unahin ang mga batayang serbisyo — at isa na rito ang maayos na mass transport. Ang pagko-commute ay hindi dapat maging kalbaryo, kundi isang maayos na bahagi ng araw ng bawat Pilipino.

Multa sa ilegal na pagtatapon ng basura, bantayan

by Info @Editorial | September 17, 2025

Ipatutupad na ang P5,000 multa sa mga mahuhuling nagtatapon ng basura sa maling lugar. Layunin nitong linisin ang kapaligiran at disiplinahin ang mga tao. Pero makatarungan ba ito para sa lahat?

Hindi maitatanggi na seryoso ang problema sa basura. Kailangang may managot. Sa ganitong punto, makatuwiran ang mas mabigat na multa para matuto ang tao.

Gayunman, hindi maikakaila na mabigat din ang P5,000 para sa karaniwang mamamayan. Para sa minimum wage earner, halos kalahating buwang kita ito.

Kung ang layunin ay disiplina, baka sa iba, maging pahirap ito lalo na kung walang sapat na kaalaman o pasilidad para sa tamang pagtatapon.

Bukod pa rito, dapat bantayan ang maayos na pagpapatupad. Baka magamit lang ito sa pangongotong. Dapat malinaw, pantay, at makatarungan ang proseso.

Sa huli, tama lang na managot ang mga walang pakialam sa basura. Dahil sa pagiging pabaya, maraming buhay ang nalalagay sa alanganin.

Sa ‘Pinas, mala-teleserye ang korupsiyon, ‘di matapos-tapos

by Info @Editorial | September 17, 2025

Kada taon, paulit-ulit na may bagong kaso ng korupsiyon. May mga opisyal na iniimbestigahan at may sabayang hearing sa Senado at Kamara. 

Ngayong taon, dahil sa mas matindi at mala-sindikatong nakawan, may independent commission pa. 

Pero sa opinyon ng publiko, baka wala na namang mangyari. Walang mapaparusahan. Walang makukulong. Laging imbestigasyon lang — parang teleseryeng hindi matapos-tapos.

Ganito na ba talaga ang kalakaran? Isang malaking palabas na lang ang lahat? Kapag may isyu, magpapatawag ng presscon, magpapakita ng galit, pero pagkalipas ng ilang buwan, wala na. Limot na. Tapos uulit na naman ang mga abusado sa kapangyarihan at sugapa sa kayamanan.

Habang ganito ang sistema, patuloy na nanakawan ang taumbayan. Ang perang dapat para sa ospital, paaralan, kalsada, at ayuda — kinukurakot. Samantalang ang ordinaryong Pilipino, todo-tiis sa mahal ng bilihin, at palpak na serbisyo-publiko.

Kung seryoso talaga ang gobyerno laban sa korupsiyon, dapat may resulta. Dapat may managot. Hindi sapat ang puro imbestigasyon. Kailangang tapusin ang kaso, ikulong ang tiwali, at ibalik ang ninakaw.

Tama na ang “forever” na imbestigasyon. Panahon na para ipakita na may totoong hustisya sa ‘Pinas.