Year of the Dog, mas gustong tumulong sa kapwa kesa mag-ipon

ni Maestro Honorio Ong - @Forecast 2020 | September 24, 2020

Sa pagpapatuloy ng pagtalakay sa magiging kapalaran ng bawat animal sign, pag-usapan natin ang ugali at magiging kapalaran ng Dog o Aso ngayong Year of the Metal Rat hanggang sa 2021 o Year of the Metal Ox.

Kung ikaw ay isinilang noong 1934, 1946, 1958, 1970, 1982, 1994, 2006 at 2018, ikaw ay mapabibilang sa animal sign na Aso o Dog.

Bukod sa mabilis magduda o laging naghihinala nang hindi maganda sa kapwa, kilala rin ang Aso sa pagiging malihim. Kaya naman kapag siya ay naging kaibigan mo, hindi mo agad makakabisado ang kanyang ugali dahil kapiraso lamang ng kanyang katangian ang ipakikita at ipadarama niya sa iyo. Likas kasi sa kanya na hindi ibinubunyag ang kanyang personal na buhay, maliban na lamang kung tiwalang-tiwala na siya sa iyo. Kaya naman sa unang pagkikita at inusisa mo nang husto ang mga personal niyang buhay, siguradong sa halip na magkalapit ang loob n’yo, tiyak na lalo siyang lalayo sa iyo.

Sa pakikipagkapwa, bagama’t masakit magsalita at may pagka-prangka, hindi naman niya basta-basta inilalabas ang kanyang galit at pagkainis sa walang katuturang mga bagay. Ibig sabihin, dahil may pagkasupistikado ang kanyang personalidad, hindi siya basta nakikipag-away o nakikipagtarayan. Sa halip, nasasabi lamang niya ang masasakit na mga salita at pakikipagtarayan kapag punumpuno siya ng galit at sama ng loob sa iyo. Dahil para sa isang Aso, ang pagpapasensiya ay higit na mahalaga sa lahat ng bagay at hangga’t kaya pa niyang magpaubaya, magpasensiya, magtiis at magbigay, gagawin at gagawin niya ito. Ngunit kapag napuno na talaga siya, tulad ng nasabi na, sobrang sakit niyang magsalita at sobrang sama kung magalit. Gayunman, ang ikinaganda sa isang Aso, hindi naman siya nagtatanim ng sama ng loob sa kanyang nakakagalit. Sa halip, laging bukas ang kanyang puso sa pagpapatawad at pakikipagkasundo.

Ang isa pa sa mga katangian ng Aso na kakaiba ay hindi siya materyoso. Ang nais lamang niya ay komportableng buhay at hindi siya mahilig mag-ipon, magkuripot at magpayaman. Para sa kanya, higit na mabuti ang magpakain sa mahihirap at kapus-palad, kaysa ipanglustay at ipampasarap ang sobrang pera. Tunay na may mabuting kalooban ang isang Aso sa kaibuturan ng kanyang puso na laging handang tumulong sa mga naaapi, mahihirap, kapus-palad at wala nang inaasahan pa sa buhay. At dahil sa kabutihang-loob na ito ng Aso, sa tuwi-tuwina, siya naman ay lalong pinagpapala ng nasa itaas, kaya bihira kang makakikita ng Aso na kapos sa buhay. Kumbaga, langit mismo ang laging sumusubaybay sa kanila at saanman sila mapadpad ay lagi nang ipagkakaloob sa kanila ang suwerte at magagandang kapalaran, lalo na sa panahong ito ng pandemya at sa susunod pang mga taon ng kanyang buhay.

Itutuloy

Kapakanan ng kaibigan, inuuna ng Year of the Dog kaysa sa sarili at pamilya

ni Maestro Honorio Ong - @Forecast 2020 | September 22, 2020

Sa pagpapatuloy ng pagtalakay sa magiging kapalaran ng bawat animal sign, pag-usapan natin ang ugali at magiging kapalaran ng Dog o Aso ngayong Year of the Metal Rat hanggang sa 2021 o Year of the Metal Ox.

Kung ikaw ay isinilang noong 1934, 1946, 1958, 1970, 1982, 1994, 2006 at 2018, ikaw ay mapabibilang sa animal sign na Aso o Dog.

Bagama’t isa sa pinakamatalinong nilalang sa 12 animal signs na ipinatawag ni Lord Buddha sa kanyang palasyo, madalas sa mga pagdedesiyong ginagawa, laging may pagdadalawang-isip at pag-aalinlangan ang Aso. Kaya sa halip na maghakot ng maraming tagumpay at ligaya sa buhay, ang mga ito ay nababalam, naglalaho o nauusyami sa kawalan. Minsan naman, tuluy-tuloy na sanang magiging maligaya at matagumpay ang isang Aso, pero dahil habang ginagawa niya ang isang proyekto nang may pagdadalawang-isip pa rin ang kanyang sarili, hindi niya lubos na nae-enjoy ang masarap na lasa ng pagwawagi at tagumpay. Gayunman, kung sa bawat kilos at gawain ng Aso ay tuluy-tuloy niyang ipatutupad ito, walang pagdadalawang-isip at mabilis niyang gagawin at tatapusin ang isang proyketo o plano na kanyang pinag-isipan, higit na magiging matagumpay at masarap ang lasa ng ligaya at pagwawagi para sa isang Aso, higit lalo sa buong 2020 hanggang 2021.

Kaya naman kung ikaw ay isang Aso at may naiisip kang magandang proyekto ngayong 2020, walang pagdadalawang-isip mo itong ipatupad dahil sa ganyang paraan, matitiyak ang iyong ligaya at tagumpay.

Dagdag pa rito, ang Aso ay isa sa pinakamasarap kasama at kaibigan dahil sa kanyang pagiging tapat at loyal. Bukod sa pagiging tapat na kaibigan, siya rin ay matulungin at laging handang lumingap at dumamay sa mga kaibigan niyang nangangailangan.

Kadalasan, inuuna niya ang kapakanan ng kanyang kaibigan kaysa sa kanyang sarili, na nagiging dahilan upang ma-misinterpret ng kanyang pamilya ang aksiyon niyang ito kung saan iisiping mas mahal niya ang kanyang mga kaibigan kaysa sa pamilya. Pero hindi naman ganu’n ‘yun, sa halip, tunay lang na sobra-sobra ang pagmamalasakit ng Aso sa kanyang mga kaibigan, lalo na sa panahong siya ay nasa kagipitan at talagang nakikita niyang nangangailangan ng kanyang tulong ay hinding-hindi niya ito matatanggihan.

Dagdag pa rito, mabilis magpasya ang Aso, lalo sa mga hindi niya kilala. Sa unang kita pa lamang niya ang isang tao, nasasagap agad ng kanyang intuition kung ang samahan ay mauuwi sa pagkakaibigan o pagtatalusira. Kaya naman hindi na pinatatagal ng Aso kung sakaling naramdaman niyang mabuti kang tao dahil ibibigay agad niya sa iyo ang kanyang tiwala. Kabaligtaran naman nito, kapag naramdaman niyang hindi ka magiging mabuting kaibigan sa unang pagkikita pa lang, tiyak na mahihirapan kang makuha ang kanyang tiwala at pagmamahal. Kadalasan, tama ang kanyang mabilis na paghusga at pandama sa mga taong una pa lang niyang nakikita at nakakasalamuha, pero minsan ay sumasablay din naman ang kanyang pang-amoy.

Itutuloy

Mabagal na pagpapasya...

Dahilan kaya nasasayang ang magagandang oportunidad ng isinilang sa Year of the Dog

ni Maestro Honorio Ong - @Forecast 2020 | September 19, 2020

Sa pagpapatuloy ng pagtalakay sa magiging kapalaran ng bawat animal sign, pag-usapan natin ang ugali at magiging kapalaran ng Dog o Aso ngayong Year of the Metal Rat hanggang sa 2021 o Year of the Metal Ox.

Kung ikaw ay isinilang noong 1934, 1946, 1958, 1970, 1982, 1994, 2006 at 2018, ikaw ay mapabibilang sa animal sign na Aso o Dog. Ito ang ika-11 sa 12 animal signs sa Chinese Astrology kung saan siya rin ang zodiac sign na Libra sa Western Astrology na may kaakibat na planetang Venus.

Ang mapalad na oras para sa isang Aso ay mula alas-7:00 ng gabi hanggang sa alas-9:00 ng gabi, sa mapalad na direksiyong kanluran (west) at hilagang-kanluran (north-west).

Sinasabing higit na agresibo at matapang ang Aso na isinilang sa gabi kung ikukumpara sa maamo at mabait niyang kapatid na isinilang sa umaga o tanghaling-tapat.

Kilala sa pagiging tapat at makatarungan ang Aso, habang ang kababaang-loob ay isa rin sa kanyang mga pangunahing ugali, kaya karamihan sa kanila ay itinuturing ding mababait at maawain, lalo na sa mga nangangailangan at kapus-palad.

Ang problema lamang, isang negatibong ugali rin ng Aso ang pagiging mabilis magduda at hindi agad-agad nagtitiwala sa kanyang kapwa. Kaya naman mahirap mong makuha agad ang loob niya, lalo na kung ikaw ay hindi pa niya lubusang kakilala. Kumbaga, sa umpisa, paghihinalaan ka muna niya ng hindi maganda bago kayo tuluyang maging matalik na magkaibigan. Pero kapag nakasama ka na niya at natuklasang okey at mabait ka, roon mo lang makukuha ang kanyang loob at tiwala.

Kaya naman sa unang pagkikita, maaaring sa pag-ibig at pakikipagtransaksiyon sa negosyo, tulad ng naipaliwanag na, hindi mo agad makukuha ang pagsang-ayon ng isang Aso. Sa halip, hindi mo lang alam na posible pa ngang pinaghihinalaan ka niya ng hindi maganda, pero hindi niya ‘yun sasabihin o ipahahalata sa iyo.

Ang isa pang negatibong ugali ng Aso na dapat iwasan upang makamit ang maligaya at matagumpay na buhay ay ang pagdadalawang-isip. Palagi nang may labanang nagaganap sa kaibuturan ng puso ng Aso, kaya naman hindi siya agad-agad na makapagdedesisyon. Dahil matagal magpasya, nasasayang ang mga ginto at magagandang oportunidad na dumarating sa kanyang buhay. Kung matutunan niya na magdesisyon agad, marami sana siyang ligaya, pag-unlad at pagtatagumpay na aanihin sa taniman ng kanyang mga kararanasan at pakikipagsapalaran.

Kaya nga kung ikaw ang isang Aso, iwasan mong magpakupad-kupad at alipinin ng pagdadalawang-isip, sa halip, mas maganda kung lagi mong bibilisan ang mga pagpapasya at pagdedesisyon. Sapagkat sa ganyang paraan, matitiyak ang iyong tagumpay at wagas na kaligayahan, hindi lamang ngayong 2020 at 2021 kundi maging sa buong buhay mo.

Itutuloy