Imbyerna sa live-in partner na maluho

Dear Roma Amor - @Life & Style | December 31, 2020

Dear Roma,

Ako si Nadine at gusto kong humingi ng payo about sa kinakasama ko. Meron na kaming anak at ngayon, palagi kaming nagtatalo sa usaping pera. Magkaiba ang pag-iisip namin dahil lumaki siyang mayroon at ako naman ay hirap sa buhay at breadwinner ng pamilya.

Hindi pa kami kasal dahil sa totoo lang, ayaw ko pa kasi mas inuuna ko ang needs ng anak ko. Ngayon, nakikitira kami sa mga biyenan ko at masasabi kong blessed ako sa kanila.

Online seller ako at nakakaipon kahit paano dahil sa pagtitinda, habang ‘yung partner ko ay napakaluho. Gusto ko lang naman na bawasan niya ang luho niya at hindi ako humihingi sa kanya dahil mga pangangailangan lang ng anak namin, okay na ako.

‘Yung kinikita ko naman, iniipon ko dahil pinapalaki ko ang puhunan ko para mas malaki ang income ko.

Kinausap ko siya na bawasan ang pagbili ng mga bagay na hindi kailangan at ang ending, nagtalo na naman kami kasi pinaiintindi ko sa kanya na hindi habambuhay nand’yan ang parents niya. Palagi niyang sinasabi na nagmamadali ako sa mga bagay at hindi ako makapaghintay.

Ang gusto ko lang naman, magkaroon kami ng sariling bahay dahil gusto kong makita ‘yung mga pinaghihirapan ko kakatinda. Gayundin, gusto kong tulungan niya ko mag-ipon at bawasan ang kanyang luho dahil madalas siyang umutang sa pampuhunan ko. Ano ang dapat kong gawin? — Nadine

Nadine,

Sa totoo lang, napakahirap ng ganyang sitwasyon, lalo pa at may anak na kayo. Malaking bagay na nand’yan ang mga magulang niya para sa inyo pero tulad ng sinabi mo, hindi habambuhay n’yo silang maaasahan. Panahon na para magseryoso ang partner mo pagdating sa paghawak ng pera at luho niya. Kaya ang maipapayo ko ay hayaan mo siya sa paggastos, pero oras na maubusan siya ng pera, ‘wag mo siyang pautangin o bigyan ng kahit na ano. Tapos mag-ipon ka at patuloy na palaguin ang iyong negosyo para ma-secure mo ang future n’yo ng anak mo. Talagang challenging ito, pero ‘pag natupad lahat ng pangarap mo para sa iyong anak, worth it ito. Good luck!

Feeling ‘di bet ng mga kapatid ni BF

Dear Roma Amor - @Life & Style | December 30, 2020

Dear Roma,

Tawagin mo na lang akong Angie. Magka-live-in na kami ng BF ko at nakatira kami sa bahay ng lola niya sa mother’s side. Okay naman ang pakikitungo sa akin ng mga kamag-anak niya, pero alam mo, pakiramdam ko ay ayaw sa akin ng mga kapatid niya.

Minsan, para silang nagdadabog at nagpaparinig ‘pag nasa bahay ako, kaya minsan tuloy, parang gusto ko nang yayain na bumukod ang BF ko, kaso, hindi pa stable ang mga trabaho namin. Ano ba ang dapat kong gawin para kahit paano ay magustuhan naman ako ng mga kapatid niya? —Angie

Angie,

Kung gusto mong mapalapit sa mga kapatid ng iyong boyfriend, siguro simulan mo ito sa pag-alam sa mga bagay na gusto nila. Malay mo, pare-pareho pala kayo ng gusto at ito ang maging simula ng pagiging malapit n’yo. Puwede ring mag-volunteer kang tumulong sa kanila pagdating sa gawaing-bahay. Kumbaga, pakiramdaman mo muna at for sure, magkakasundo rin kayo. Okie?

Tutol makitira ang biyenan, hipag at mga pamangkin sa bahay dahil palaasa

Dear Roma Amor - @Life & Style | December 20, 2020

Dear Roma,

Ako si Jasmin, married at may anak na. Gusto kong itanong kung may ibang paraan ba para sabihin sa aking mister na ayaw kong kasama tumira sa bahay ang kanyang ina, kapatid at mga anak nito?

Nanay niya ang nagsabi na rito siya titira kasama ng baby namin at paniwala niya rin na kasama niyang titira rito ang anak niyang babae at mga anak nito. Inanunsyo niya sa mga kumare at kamag-anak na ang vacant rooms namin sa bahay ay para sa kanila.

Sa totoo lang, demanding ang nanay niya at palaging nanghihingi sa amin imbes na magtrabaho siya dahil wala naman siyang sakit. Nang manganak ako, naghigpit ng padala ang mister ko, kaya napilitan siyang magbukas ng maliit na pagkakakitaan. Masama ang loob niya nang kinailangan niyang kumita para pandagdag sa mga gastos niya, maliban sa buwanang padala ng partner ko. Matagal na rin niyang kinukulit ang mister ko na kunin siya kahit wala siyang ipon at nakaasa sa padala, gayundin, puro utang at hingi sa amin.

Para sa akin, okay lang tumulong at magpadala ng nakalaang budget para sa kanya, pero hindi ko gusto na palagi siyang nakaasa at masama ang loob kapag napipilitang kumilos para sa sarili niya.

Marami rin siyang hindi maipaliwanag na expenses at palaging humihingi ng dagdag na padala sa partner ko kahit may anak na kami. Ang nangyari, ilang buwan kaming over budget at mas mahal ang gastos namin sa kanya kesa sa anak namin. Ang kapatid naman ay hindi rin magaling humawak ng finances, puro utang sa iba at hindi masyadong nadidisiplina ang mga anak.

Nakausap ko na ang partner ko na hindi ako payag na may makitira sa amin, pero ang opinyon niya ay maganda ang sama-sama, pero ayaw ko talaga. May iba bang paraan para maiparating na hindi talaga ako sang-ayon dito? —Jasmin

Jasmin,

Walang ibang paraan kundi kausapin nang masinsinan ang mister mo. Ipanunawa mo na may sarili na kayong pamilya at prayoridad, kaya dapat, unahin n’yo ‘yun at hindi ang ibang tao.

Alam niya naman siguro ang ugali ng kanyang ina, pero pinipili niyang manahimik at magbigay na lang dahil tulad ng paniniwala niya na “pamilya” pa rin sila. Sa kabilang banda, mahirap din kasing may ibang kasama sa bahay, lalo na kung hindi maganda ang ugali o pakikisama.

Kaya nga dapat bumukod ang anak na nag-asawa, para walang kahati sa atensiyon at prayoridad ang kanyang pamilya. Siguro, ikonsidera n’yo rin ang magiging epekto sa inyong anak kung may kasamang “palaasa” at mga batang hindi disiplinado. Kung ganyan ang kalalakihan niya, oks ba ‘yun para sa inyo?

Mahaba-habang usapan at maraming pasensiya ang kailangan mo para sa usaping ito, kaya anuman ang maging desisyon n’yo, for sure, para ‘yun sa ikabubuti ng pamilya n’yo. Good luck!