Magdasal ka na, sister (1)

ni Maria Angela Gonzales @Kuwentong Pag-Ibig | November 2, 2023

Sunud-sunod na pamamaril ang ginawa ni SPO3 Maritoni Martinez sa target paper dahil sa kanyang inis. Isang linggo na kasi siyang walang misyon na hinahawakan at nakakaramdam na siya ng matinding pagkainip. Ang ayaw niya kasi sa lahat ay 'yung nababakante.

Malalim na buntong hininga ang kanyang ginawa dahil kailanman hindi pa siya nabibigyan ng misyon na puno ng aksyon. 'Yun bang mayroong habulan at barilan o kaya naman ay maging undercover agent siya dahil umano isa siyang babae kung kaya hindi bagay sa kanya ang ganu'ng trabaho.

“Partner, ang galing mo talaga!” Wika ng boses na kilalang-kilala niya, ito ay si SPO3 David Rosales, sabay tapik sa kanyang balikat.

Matalim na tingin ang kanyang binigay dito. “Huwag mo nga akong ma-partner-partner d'yan!” Inis niyang sabi.

“Bakit naman?”

“Hindi mo nga ako isinasama sa mga misyon mo, eh!” Nakangusong sagot nito.

“Delikado kasi ang mga misyon na napupunta sa akin,” katuwiran nito.

“Eh, bakit tinawag mo pa akong partner?” Buwisit niyang tanong.

“Hindi man kita maka-partner sa trabaho, puwede naman kitang maging partner sa buhay.”

“Puwede ba?!!” Inis niyang sagot dito.

Si David ay isang guwapong lalaki, ngunit hindi ito ang type niyang lalaki. Ayaw kasi ni Maritoni sa mapuputing lalaki dahil mukha umano itong bading sa kanyang paningin. Gayunman, alam naman niyang lalaking-lalaki si David. Basta, hindi lang niya ito type.

“Guwapo naman ako, ah. Kamukha ko nga raw si Alden Richard. Oh, tingnan mo may dimple pa ako,” pa-cute nitong sabi.

“Hindi pa rin kita type.” Nakabusangot niyang sabi.

“Mala-Maine ba ang type mo?” Seryosong tanong nito.

Pinanlakihan niya ito ng mata. “Excuse me, babaeng-babae ako, ‘no!”

“Mabuti naman, at least may pag-asa pa ako."

Hindi na niya ito sinagot dahil kahit naman partner niya ito, alam niyang masasaktan pa rin ito 'pag binabasted niya ito ng paulit-ulit.

Ayon kasi rito, dati pa siyang gusto nito at feeling daw nito ay nauwi na sa pag-ibig ang damdamin nito para sa kanya.

“Mabuti naman at nandito ka, Martinez.”

Agad niyang nilingon ang nagsalita. Ito pala ang Director ng Task Force Dragons, isang investigative agency.

“Mayroon akong assignment na ibibigay sa’yo.”

“Ano po 'yun?” Excited niyang tanong.

Matagal na kasi niya itong kinukulit na bigyan siya ng assignment na talaga naman maiibigan niya, at siyempre 'yung puno ng aksyon. Sa halip na sagutin nito agad ang kanyang tanong, inabot muna nito sa kanya ang isang tabloid. Kumunot ang noo niya nang mabasa niya ang headline na MADRE, PINUGUTAN NG ULO.

“Panglima na ito, ah?!”

“At 'yan ang magiging misyon mo. Kailangan mong magtungo sa Sitio Madasalin, at magpanggap na isang madre para mahuli ang serial killer na walang habas na gumagawa niyan.”

Itutuloy…

BF na puro luho pero ‘di keri magbayad ng utang, gusto nang iwanan

Dear Roma Amor - @Life & Style | March 1, 2021

Dear Roma,

Matagal na kami ng boyfriend ko pero hanggang ngayon, feeling ko hindi pa talaga kami ready sa marriage dahil hindi ko makita na handa na siya sa responsibility. Nang nagka-work siya, pinatuloy ko siya sa apartment ko, pero lumipat kami sa mas malaki dahil nagsabi siyang magse-share naman siya sa rent, pero palagi akong nag-aabono sa lahat ng bayarin. Iniintindi ko dahil wala siyang fixed schedule ng release ng commission dahil sa sales siya. Magbabayad lang siya kung kailan at magkano niya gusto. Dumating sa point na nagkaroon siya ng problema sa bayarin sa kotse kaya nag-loan ako sa company namin dahil wala siyang malapitan.

Kapag nakuha niya ang commission niya, inuuna niyang bumili ng luxury items tulad ng relo, sapatos sa halip na magbayad ng utang. Nakapagbayad-bayad naman siya, pero malaki pa ang kulang niya. Nakakainis kasi hindi niya priority magbayad ng utang dahil hindi naman siya sinisingil. Nagka-business siya at okay naman, pero ‘yung kinikita niya ay ipinambibili niya ng alahas at naubos ang pera niya.

Nang dumating ang panahon na ako ‘yung nangailangan, nanghihingi ako sa kanya ng tulong pero wala akong maasahan. I know that relationship is not about money, pero parang nahihirapan ako dahil ako ang umaako ng responsibilidad. Okay siya sa love and care, pero paano ‘pag may pamilya na kami? Dumarating sa point na sinasabi ko sa sarili kong, “Ayoko ng ganito.” —Bam

Bam,

Tulad ng palagi nating sinasabi, kailangan mo munang makipag-usap sa iyong partner pagdating sa ganitong topic. Isa pa, kaya “partner” ay dahil dapat magkasama kayo sa hirap o ginhawa, tandem, kumbaga. Mas okay mamuhay mag-isa nang alam mong wala kang matatakbuhan kesa may partner ka nga, pero para ka namang mag-isa.

Tandaan, kung ngayon pa lang ay hindi kayo nagkakasundo, paano pa sa future? Gayundin, kung siya talaga ang para sa iyo, ipararamdam niya na secured ka, financially at emotionally kaya kung wala kang makikitang progress matapos n’yong mag-usap, isip-isip na. Good luck!

Single mom na nahihiyang humingi ng sustento sa ex-husband

Dear Roma Amor - @Life & Style | February 7, 2021

Dear Roma,

Ako si Mameng at may isang anak na babae. Hiwalay na ako sa asawa at nagtatrabaho bilang sales lady sa isang department store. Nakatira kami ng anak ko sa parents ko at ang nanay at tatay ko ang nag-aalaga sa kanya habang nagtatrabaho ako. Taon na rin ang binilang na wala kaming komunikasyon ng ex-husband ko, pero hindi ba dapat ay suportahan niya kaming mag-ina kahit may iba na siyang pamilya? Kaso, kahit papaano ay ayaw kong humingi ng tulong sa kanya dahil baka isipin niya piniperahan ko siya. –Mameng

Mameng,

Ang paghihiwalay n’yong mag-asawa ay walang kaugnayan sa pagsuporta sa inyong mag-ina. Obligasyon ng dati mong asawa ang pagbibigay ng sustentong pinansiyal. Kahit na may pamilya pa siyang iba at hiwalay na kayo, ang katotohanang kayo ay legal na kasal dapat lang na patuloy niya kayong suportahan at hindi pabayaan. Kailangan mo lang na kausapin siya nang mabuti at sabihin ang lahat ng problema. Huwag kang mahiya at isipin mong ginagawa mo ito para sa kinabukasan ng iyong anak. Good luck sa ‘yo.