11-anyos, nagkabukol sa spine at bali ang buto sa binti bago namatay sa Dengvaxia

ni Atty. Persida Rueda-Acosta - @Daing mula sa hukay | September 9, 2022

May mga pagkakataon na tila nalalaman ng tao na papalapit na ang mga huling sandali ng kanyang buhay. Kaya naman ang bawat segundo ay nais niyang ilaan sa minamahal niyang pamilya.

Ganito kaya ang naramdaman ni Jian Subing-Subing, anak nina G. Eric at Gng. Senen Subing-Subing ng Lapu-Lapu City, Cebu, nang maglambing siya isang hapon sa kanyang ina? Aniya, “Noong ika-17 ng Disyembre 2018, naglalambing ang aming anak. Ayaw na niyang mailayo sa akin. Pagsapit ng alas-4:00 ng hapon, tatlong beses siyang huminga nang malalim hanggang sa siya ay tuluyan nang iginupo ng mga sakit na nararamdaman niya sa katawan.”

Si Jian, 11, ang ika-124 sa mga naturukan ng Dengvaxia na under Clinical Trial Phase 3 (WHO, Peter Smith) at nakaranas ng sintomas na kasama sa common pattern of four serious adverse effects (anaphylactic allergic reaction, viscerotropism (pamamaga, paglaki at pagdurugo ng laman-loob), neurotropism (pamamaga at pagdurugo ng utak), and increase in severity of dengue disease) na sumasang-ayon sa Sanofi Declaration of Four (4) Identified and Expected Risks in its Submission for Authorization sa Food and Drug Administration (FDA) {22 Disyembre 2015} - na sumailalim sa forensic examination ng PAO Forensic Team, pagkatapos hilingin ng kanilang pamilya. Si Jian ay isang beses naturukan ng Dengvaxia noong Hunyo 17, 2017. Ang nasabing pagtuturok ay nangyari sa isang health center sa Mactan, Lapu-Lapu City, Cebu. Ayon sa kanyang mga magulang, siya ay masayahin, masigla, aktibo at malusog na bata. Dagdag pa nila, “Siya ay mahilig maglaro at aktibong miyembro ng drum and bugle corps ng kanyang paaralan. Kailanman ay hindi pa siya nagkaroon ng malubhang karamdaman na nangangailangang siya ay madala sa ospital, bukod nitong kamakailan kung saan siya ay malubhang nagkasakit na humantong sa kanyang pagpanaw.”

Ang pagkakasakit ni Jian ay nagsimula noong Nobyembre 2017. Masakit ang kanyang hita at likod. Ang mga ito ay hina-hot compress at nilapatan ng kanyang mga magulang ng efficascent oil, kaya naiibsan ang sakit, subalit bumabalik din. Nagkakalagnat din siya tuwing sumasakit ang kanyang hita at likod. Pagdating ng taong 2018, ganito ang nangyari kay Jian, hanggang sa bawian siya ng buhay noong Disyembre 17, 2018:

• Pebrero - Dinala siya sa isang medical clinic sa Cebu City. Sinuri ang kanyang potassium level at normal naman ito. Niresetahan siya ng pain reliever para sa mga pananakit sa kanyang katawan.

• Marso - Hindi na niya maigalaw ang kanyang binti at hindi na rin siya makalakad. Dinala siya sa isang ospital sa Lapu-Lapu City, ni-refer siya ng doktor sa isang ospital sa Cebu City na siya naman nilang ginawa. Iminungkahi ng doktor na ipa-MRI siya.

• Abril 2018- Noon lang naisagawa ang MRI kay Jian dahil pumila pa diumano ang kanyang mga magulang. Nang lumabas ang resulta noong Abril 12, 2018, nalaman na siya ay may Pott’s Disease. May nakitang bukol sa kanyang spine; muling iminungkahi ng doktor na i-biopsy ang nakuhang sample ng bukol sa kanya. Ang pag-biopsy ay hindi nagawa dahil sinabihan ng doktor ang mag-asawang Subing-Subing na maaari diumanong subukan kung kayang pagalingin ng pag-inom ng gamot para sa TB ang sakit ni Jian. Hindi bumuti ang kanyang kalagayan sa kabila ng pag-inom ng naturang gamot, bagkus, lalo siyang pumayat.

• Agosto - Namaga ang kanyang kaliwang binti at muli siyang dinala sa espesyalista. Ayon sa doktor at base sa resulta ng CBC, mataas ang kanyang uric acid, kaya siya ay niresetahan ng gamot. Isinailalim din siya sa bone structure examination. Nalaman na may bali ang buto ng kanyang kaliwang binti, at ni-refer siya sa espesyalista sa buto.

• Setyembre 17 - Na-admit siya sa isang ospital sa Cebu dahil sa bali sa buto ng kaliwang binti niya at Pott’s Disease. Hindi niya mapigilan ang pag-ihi at pagdumi. Palaging mainit ang kanyang katawan at palaging nagpapawis. May lumabas ding mga kulani sa kanyang mukha at kilikili. Nanatili siyang hindi makatayo.

• Oktubre - Na-MRI at na-biopsy ang bukol na nakuha sa kaliwang binti niya. Ayon sa doktor, kritikal na ang kanyang lagay at tinaningan na siya na ilang buwan na lang ang itatagal niya. Nawawalan na ng pag-asa ang pamilya niya, inuwi nila si Jian at du’n inalagaan. Nais nilang makasama si Jian sa mga huling araw niya. Ipinagpatuloy niya ang pag-inom ng gamot, ngunit hindi na gumandang muli ang kanyang kalagayan.

• Nobyembre - Bukod sa madalas na masama ang kanyang nararamdaman, nagdudugo rin ang kanyang gilagid.

• Disyembre - Nagpatuloy ang hindi maganda niyang nararamdaman, umiksi na rin ang binti niya at naging mainitin ang kanyang ulo. Hindi nawala ang pananakit ng kanyang katawan, gayundin ang kanyang ulo. Takot na rin siyang pumunta sa ospital, kaya hindi na siya nadala ng kanyang pamilya. Pagsapit ng Disyembre 17, 2018, alas-4:00 ng hapon, tuluyan nang pumanaw si Jian. Nakasaad sa kanyang Certificate of Death na ang sanhi ng kanyang pagpanaw ay “Acute Coronary Syndrome” (Immediate Cause); “Sepsis Sec. To Hypostatic Pneumonia And Decubitus Ulcers” (Antecedent Cause); “Pott’s Disease” (Underlying Cause).

Sabi ng kanyang mga magulang, “Napakasakit ng biglaang pagpanaw ni Jian. Hindi namin maiwasang mag-isip kung ano’ng klase ng gamot ang naiturok sa kanya at ikinamatay pa niya ito. Naging pabaya ang mga taong gumawa ng pagbabakuna kay Jian. Hindi ipinaliwanag sa amin kung ano ang puwedeng maging epekto ng nasabing bakuna sa kalusugan niya”

Sinabihan ng mga doktor ang mag-asawang Subing-Subing na ang Pott’s Disease ay namamana o genetic in nature. Ang reaksyon nila rito,“Wala sa aming pamilya ang may history ng Pott’s Disease, kaya imposibleng magkasakit na lamang ng ganito ang aming anak nang walang maliwanag na kadahilanan.”

Wala naman silang nalalaman sa kanilang pamilya na nagkaroon ng ganitong uri ng karamdaman at nakaranas ng parehas ng mga naranasang hirap ni Jian, kaya malaking palaisipan sa kanila ang pagkakaroon niya ng ganitong uri ng karamdaman. Ang dinanas na ito ni Jian ay hinahanapan nila ng kapaliwanagan at ang sinapit niyang kamatayan sa murang gulang ay inihahanap ng katarungan. Ang PAO at PAO Forensic Team na kanilang hiningan ng tulong ay patuloy nilang kasama hanggang sa mabigyan ng hustisya ang laban para kay Jian.

Kulani, bukol sa tagiliran at leukemia, dinanas ng 12-anyos na namatay sa Dengvaxia

ni Atty. Persida Rueda-Acosta - @Daing mula sa hukay | September 2, 2022

Ang mga anak ay pinaka-iingatang kayamanan ng kanilang mga magulang. Kay sarap isipin na dahil sa mga kayamanang ito ay kay saya rin ng buo nilang pamilya. Kaya lang, may mga pagkakataon na ang itinuturing na hiyas o ginto na mga batang ito ay bigla na lang kinukuha sa kanilang mga mahal sa buhay dahil sa isang trahedya.

Ang sakit na hatid ng kapahamakang ito ay mistulang dulot ng salarin na pataksil na kumubli sa dilim ng gabi nang mang-agaw ng buhay. Naganap ang mapait na pangyayaring ito sa pamilya ni G. Arnel Valenzuela ng Antipolo City, Rizal, nang mabuwis ang buhay sa isang trahedya ng nag-iisa niyang anak na si John Arvyn Valenzuela, Dengvaxia vaccinee.

Si John Arvyn, 12, ay namatay noong Marso 10, 2019. Siya ang ika-123 sa mga naturukan ng Dengvaxia na under Clinical Trial Phase 3 (WHO, Peter Smith) at nakaranas ng sintomas na kasama sa common pattern of four serious adverse effects (anaphylactic allergic reaction, viscerotropism (pamamaga, paglaki at pagdurugo ng laman-loob), neurotropism (pamamaga at pagdurugo ng utak), and increase in severity of dengue disease), na sumasang-ayon sa Sanofi Declaration of Four (4) Identified and Expected Risks in its Submission for Authorization sa Food and Drug Administration (FDA) {22 Disyembre 2015} - na sumailalim sa forensic examination ng PAO Forensic Team, pagkatapos hilingin ng kanilang mga pamilya. Si John Arvyn ay tatlong beses naturukan ng Dengvaxia: una, noong Abril 8, 2016; pangalawa, noong Nobyembre 14, 2016, at pangatlo, noong Hunyo 22, 2017. Ang nasabing pagtuturok ay nangyari sa kanilang paaralan. Ayon kay G. Arnel, si John Arvyn ay masayahin, masigla, aktibo at malusog na bata. Mahilig siyang maglaro ng basketball at kasama sa varsity team ng kanyang paaralan. Dagdag pa ni G. Arnel, “Kailanman ay hindi pa siya nagkaroon ng malubhang karamdaman na nangangailangang siya ay madala sa ospital, bukod lamang noong nagka-primary complex siya noong 7-anyos siya, at ang pagkakaalam ko ay normal ‘yung nararanasan ng karamihan ng mga bata sa kanyang edad.”

Mula Enero hanggang Pebrero, 2019, narito ang mga pagbabago sa kalusugan at pag-uugali ni John Arvyn:

• Enero 17- Matamlay at madalas siyang natutulog. Naging bugnutin at mainitin din ang ulo niya.

• Pebrero 21- Namanas ang kanyang mukha. Nagkaroon din siya ng malalaking kulani sa likod ng tainga at sa ibabang bahagi nito. Nagkapasa rin ang kanyang dibdib at binti. Sa tuwing tinatanong siya kung may nararamdaman siyang kakaiba sa kanyang katawan, nagagalit siya. Madalas din siyang mauhaw at inom nang inom ng tubig.

• Pebrero 25 at 26 - Nasa trabaho si G. Arnel, kaya ang kanyang hipag na si Aduelueza Cania, ang nagdala kay John Arvyn sa isang ospital sa Marikina City. Aniya, pinatingnan nila ang kanyang anak dahil sa mga pagbabago sa katawan at kalusugan nito. Nalaman niya sa kanyang hipag na tinanong ng huli ang doktor kung posibleng Dengvaxia vaccine ang sanhi ng sakit ng kanyang anak. Sumagot diumano ang doktor na, “Maaaring Dengvaxia vaccine ang sanhi ng mga pababago sa kanyang kalusugan.” Sinabihan si G. Arnel ng doktor na kailangan siyang ilipat sa mas malaking ospital, at ginawa naman nila ‘yun. Gayunman, hindi pa rin nawawala ang mga kulani, pasa sa dibdib at binti niya. Isinailalim siya sa iba‘t ibang pagsusuri at nalaman nilang siya ay may Leukemia. Ayon sa doktor, kailangan siyang i-admit sa ospital dahil hindi maganda ang kanyang kalagayan. Kaya naman siya ay sinalinan ng dugo noong Pebrero 26, 2019.

• Pebrero 28 - Isinailalim siya sa bone marrow test, at nalaman na may severe Leukemia siya. Hindi na gumanda ang estado ng kalusugan niya mula noon.

Sa buwan ng Marso 2019, nakapaloob ang mga huling araw ni John Arvyn. Narito ang ilang mga detalye:

• Marso 6 - Nahirapan siyang huminga at muling sinalinan ng dugo.

• Marso 7 - Dumami ang kanyang mga kulani. Nagkaroon din siya ng bukol sa tagiliran at sinalinan ulit siya ng dugo.

• Marso 9 at 10 - Nag-umpisa ang chemotherapy ni John Arvyn. Hindi naging maayos ang pakiramdam niya. Kinabukasan (Marso 10), nahilo siya at bandang alas-6:30 ng gabi, nang siya ay isasailalim sana sa x-ray, hindi na siya makagalaw at siya ay nanginig. Sumunod siyang nag-agaw buhay at sinubukang i-revive, subalit sa kasamaang-palad ay nabigo sila at tuluyan nang pumanaw si John Arvyn.

Nakasaad sa kanyang Certificate of Death na ang sanhi ng kanyang hindi inaasahang pagpanaw ay “Congestive Heart Failure” (Immediate Cause); “Anemia” (Antecedent Cause); “Acute Lymphoblastic” (Underlying cause). Ani G. Arnel, “Napakasakit para sa aking pamilya ng pagpanaw ni John Arvyn. Hindi ko maiwasang mag-isip kung anong klase ng gamot ang naiturok sa aking anak at ikinamatay pa niya ito. Naging pabaya ang mga taong gumawa ng pagbabakuna sa kanya.

“Hindi kami kasama nang siya ay nabakunahan ng Dengvaxia. Hindi naman kami naabisuhan kung anong klase ng gamot ang ituturok sa kanya at kung ano ang maaaring maging epekto ng nasabing bakuna sa kalusugan niya.”

Ayon pa kay G. Arnel, “Siya ay nag-iisang anak namin at tanging nagbibigay-ligaya at inspirasyon sa amin upang magpatuloy sa kabila ng mga hamon sa buhay.”

Kay hirap para sa pamilya Valenzuela na magpatuloy sa buhay ngayong wala na si John Arvyn. Ngunit ang sitwasyon nilang ito ngayon ang pinakamatindi ring dahilan kung bakit hindi sila sumusuko sa laban para sa kaso ni John Arvyn. Bilang tugon sa kanilang mga hiniling na libreng serbisyo-legal at forensic examination, ang PAO at PAO Forensic Team ay kasama nilang lumalaban upang makamit ang katarungan at nawa’y may matutunan ang mga kinauukulan sa mapait na bahagi na ito ng kasaysaysan sa ating bayan.

Hustisya para sa newborn na paulit-ulit nawalan ng heartbeat dahil sa naiwang tourniquet sa braso!

ni Atty. Persida Rueda-Acosta - @Daing mula sa hukay | August 26, 2022

Ang premature na mga batang isinilang ay pinagyayaman at isinasailalim sa medical supportive care tulad ng paglalagay sa incubator, patuloy na pagmo-monitor ng kanyang vital signs at iba pang tulad na pangangailagang medikal. Kasabay nito ang walang katumbas na pagmamahal ng mga magulang na nagbibigay ng init at nagpapalago sa sinisintang supling. Ang premature na sanggol na si Dwayne Aizen Dungca Carabeo ay buong init na niyakap ng pagmamahal at aktuwal na pag-aaruga ng kanyang mga magulang na sina Gng. Airine R. Dungca at G. Angelito E. Carabeo ng Silang, Cavite. Buong pananabik nilang hinintay ang paglabas ni Baby Aizen sa ospital, ngunit ang sumalubong sa kanila ay ang malamig nitong bangkay.

Si Baby Aizen ay ipinanganak noong Hulyo 11, 2022 at namatay noong Hulyo 31, 2022. Siya ay 20 araw pa lamang na naipapanganak nang bawian ng buhay sa isang ospital sa Trece Martires City, Cavite. Ayon sa Death Certificate, ang kanyang Cause of Death ay: Immediate: (Hypoxicischemic Encephalopthy Sec. to Aspiration); Antecedent: (Disseminated Intravascular Coagulopathy); Underlying Cause) Sepsis of the Newborn, Prematurity 33 weeks).

Noong Hulyo 11, 2022, isa si Baby Aizen sa kambal na ipinanganak ni Gng. Airine. Ang kanyang kakambal ay si Dwayne Angelo o Baby Dwayne. Narinig ni Gng. Airine na umiyak ang kanyang kambal. Aniya, “Malulusog silang lumabas, bagama’t sila ay premature.” Dahil premature ang kambal, sila ay inilagay sa incubator. Isinailalim sila sa iba’t ibang klase ng laboratory examinations at nanatili sa Neonatal Intensive Care Unit (NICU) para sa constant monitoring. Noong Hulyo 13, 2022, nakalabas ng ospital si Gng. Airine, habang naiwan du’n sina Baby Angelo at Baby Aizen. Noong Hulyo 14, 2022, dahil mataas ang bill ng kambal, sinabihan ang mag-asawang Carabeo ng pediatrician na maaari na silang i-transfer sa ibang ospital dahil kaya na nila nang walang incubator; malalakas na diumano ang katawan nila. Dahil dito, inilipat na sila ng ospital. Kinuhanan sila ng dugo sa emergency room at nang naayos na ang kanilang admission, inilagay sila sa isang kuwarto na ginawang isolation room nila. Isinailalim sila sa Phototherapy at kinabitan ng monitors ang kanilang heartbeat at oxygen. Habang sila ay isinasailalim sa Phototherapy, sila ay walang damit at nakasuot lamang ng diaper at cover sa kanilang mga mata. Narito ang ilan pang detalye sa mga nangyari kay Baby Aizen sa nasabing ospital na nauwi sa kalunos-lunos niyang kalagayan dulot ng pagkakaiwan ng tourniquet sa kanyang braso at humantong sa walang kasimpait niyang kamatayan:

• Hulyo 18, 2022 - Noong umaga ay itinigil na ang Phototherapy, inalis na rin ang monitors na nakakabit sa kambal at pinadamitan na sila. Si Gng. Airine ang nagdamit sa kambal dahil siya rin ang nagbabantay sa kanila. Bandang alas-12:30 ng tanghali, sinabihan sila ng doktor na tatanggalan ng pusod ang kambal. Matapos itong gawin, sinabihan niya ang mga Carabeo na kukunan ng blood samples ang kambal.

Nakakuha agad ng sample kay Baby Angelo, subalit kay Baby Aizen ay medyo nahirapan siya dahil ilang beses niya itong tinurukan sa iba’t ibang parte ng katawan. Matapos ang humigit-kumulang isa’t kalahating oras, dahil hindi pa rin siya nakakuha ng kailangan niyang blood sample, tinawag niya ang isa pang doktor upang tulungan siya, subalit hindi pa rin nila ito nagawa. Dahil nanlalambot na si Baby Aizen, iyak nang iyak at hindi pa rin sila nakakuha ng dugo, sinabihan na ang mga Carabeo na kinabukasan na lang ito gagawin.

• Hulyo 19, 2022 - Noong titimbangin na ang kambal, nakita ni Gng. Airine nang inalisan niya ng damit si Baby Aizen na mayroong tali sa kaliwang braso niya at namamaga na ito. Nakita rin ng isang nurse, nurse assistant at doktor ang naiwang tali sa braso ni Baby Aizen. Inalis ng nurse assistant ang tali nang sabihan siya ng nurse na tanggalin ito. Nang naihiga na si Baby Aizen, sinabihan pa si Gng. Airene ng isang doktor na ang premature babies ay prone sa pasa, pero sinagot niya na hindi ito pasa lamang kundi dahil sa naiwanang tali sa braso niya na tumagal nang napakahabang oras.

• Hulyo 20, 2022 - Dahil sa nangyaring ito, nag-file ng reklamo sa ospital ang mag-asawang Carabeo. Kinausap sila ng apat na doktor at sinabihan sila na bibigyan nang agaran at patas na imbestigasyon ang insidente. Tinanong sila ng nasabing mga doktor kung ano ang gusto nilang mangyari at sinabi nila na pagalingin nila si Baby Aizen at i-update sila sa kanilang reklamo. Sa kasamaang-palad, anang mag-asawa, hindi nila tinugunan ang naturang reklamo. Dagdag pa nila, “Binigyan nila kami ng surgeon na magbabantay at manggagamot sa braso ni Baby Aizen. Sinabihan kami ng doktor na oobserbahan nila si Baby Aizen nang 24-48 hours. Habang inoobserbahan nila si Baby Aizen, nilagyan lamang nila ng gasa at antibiotics, wala naman na silang ginawang iba. Kapag tinatanong namin sila kung ano na ang kalagayan ni Baby Aizen, palagi nilang sinasabi na okay lang siya. Lumipas ng isang linggo, wala pa rin silang klarong diagnosis sa braso ni Baby Aizen. Mula nang namaga ang kanyang braso, hindi na siya masyadong malikot at naging matamlay na siya.”

• Hulyo 27, 2022 - Isinailalim siya sa cut-down procedure. Hahanapan diumano nila ng mas malaking ugat kung saan ikakabit ang kanyang swero. Idinaan lahat sa leeg ni Baby Aizen ang kanyang swero pati ang kanyang mga antibiotics. Nang ginawa nila ito, napansin ni Mang Angelito na umiikot ang mga mata ni Baby Aizen noong nagpaalam ang ama sa kanyang sanggol na mauuna na niyang iuwi si Baby Angelo sa bahay. Sa pag-aakalang bunga lamang ito ng mga gamot na ibinibigay sa kanya, hindi na sinabi ni Mang Angelito sa doktor ang kanyang nakita.

• Hulyo 28, 2022 - Matapos siyang painumin ng gatas ng nurse, nagsuka si Baby Angelo at nanginginig naman ang buong katawan ni Baby Aizen. Tumawag si Gng. Airine ng nurse, pero pagkalipas ng isang oras, saka lamang may dumating na nurse at tiningnan lang niya si Baby Aizen. Nang sinabi niya sa ospital na hirap na huminga si Baby Aizen, saka pa lang may tumawag ng doktor. Pagdating ng doktor, nag-suction siya dahil baka diumano may bumara sa lalamunan ni Baby Aizen. Sinabihan nila si Gng. Airene na mataas ang sugar level ni Baby Aizen at nilagyan siya ng oxygen dahil nahihirapan siyang huminga. Subalit hirap pa rin siyang huminga, kaya muling tinawag ni Gng. Airene ang doktor. Inalis ng huli ang oxygen sa ilong ng sanggol at naglagay na lamang sila ng karton para maihipan ang oxygen sa kanyang ilong. Bandang alas-7:00 ng umaga, nang nag-rounds ang doktor, sinabihan niya si Gng. Airene na wala diumanong heartbeat si Baby Aizen kaya ire-revive nila ito. Isinailalim siya sa CPR at nag-inject sila ng gamot para magkaroon siya ng heartbeat. Matapos ang tatlong subok ay bumalik ang heartbeat ni Baby Aizen;

Nang naibalik ang kanyang heartbeat, tuloy-tuloy ang kanyang seizure. Matapos nito, may mga inilagay nang apparatus sa kanya. Nang tinanong ng mag-asawang Carabeo kung bakit tuloy-tuloy ang seizure niya, ang sagot lang sa kanila ay epekto ito ng pagkawala ng heartbeat niya. Ang sabi sa ospital ay inilagay na nila sa maximum level ang mga gamot na ibinibigay kay Baby Aizen. Pagdating ng alas-7:00 ng gabi, nawala ang seizure niya. Pinabili nila si Mang Angelito ng fresh frozen plasma para maisalin diumano kay Baby Aizen at naisagawa ito.

• Hulyo 29, 2022 - Sinalinan ulit si Baby Aizen ng red blood cell. Matapos nito, sasalinan diumano siya ng anim na bags ng platelet, na nagawa naman. Tumitigil-tigil na ang kanyang heartbeat at nare-revive lamang siya.

• Hulyo 30, 2022 - Sinuri ng sarili nilang pediatrician ang kambal. Tiningnan niya ang heartbeat ni Baby Aizen at sinabi niya na tumigil ulit ang heartbeat niya at na-revive naman nila. Matapos maibalik ang heartbeat ni Baby Aizen, dinagdagan na naman siya ng apparatus at marami nang nakakabit sa kanya. Maya’t maya ay mino-monitor nila ang kanyang heartbeat.

Bandang ala-1:30 ng hapon, may kumausap sa mag-asawang Carabeo at sinabihan sila na hindi na diumano nagre-response ang mga mata ni Baby Aizen at hindi na rin tinatanggap ng kanyang katawan ang mga gamot na ibinibigay sa kanya. May mga sintomas na diumano na brain dead si Baby Aizen at ang oxygen niya ay nakadepende na lamang sa makina na nakakabit sa kanya. Ang naging kasagutan ng mag-asawang Carabeo na kapag talagang tumigil na ang kanyang heartbeat at wala na ring pag-asa na magising pa siya ay hindi na nila pabibigyan pa ng gamot na pampatibok ng puso. Sinabi nila ‘yun dahil naaawa na sila sa kalagayan ni Baby Aizen. Magang-maga na ang katawan niya sa dami ng isinasaksak sa kanya.

• Hulyo 31, 2022, alas-9:30 ng umaga - Muling huminto ang heartbeat ni Baby Aizen. Tinanong nila ang mga magulang nito kung papayag pa silang bigyan siya ng gamot pampatibok ng puso, pero sinabi nila na huwag na dahil kawawa si Baby Aizen. Noong araw na ‘yun, pumanaw na siya.

Matinding kalungkutan ang bumalot sa puso ng mag-asawang Carabeo, ngunit ang dibdib nilang ito na punumpuno ng pagmamahal sa kanilang kambal ay humihiyaw ng katarungan para kay Baby Aizen. Buong-buo ang kanilang loob na ilaban ang kaso ni Baby Aizen at naging instrumento ang programang #PALA (Persida Acosta’s Legal Advice) ng inyong lingkod. Kasabay ng ating pagtugon sa kanilang hiling na libreng serbisyo-legal, ang tugon din ng PAO Forensic Laboratory Division (FLD) para sa hiling nilang forensic examination sa mga labi ni Baby Aizen. Malinaw ang sinabi ng Director ng PAO-FLD na si Dr./Atty. Erwin P. Erfe, “Maliwanag sa forensic investigation ng PAO na ang naiwang tourniquet sa braso ng bata ang naging sanhi ng pagkabulok ng kamay, pagkalat ng infection, at multiple organ failure sa sanggol.”

Sa harap ng walang buhay na si Baby Aizen at kanyang mga magulang, aking binitiwan ang pangako ng hustisya para sa mga Carabeo. Isang pangakong bibigyan namin ng hustisya ang kanyang sinapit. Ito ay pangakong aming itinataguyod ang katuparan sa legal na pamamaraan.