After mabulgar na may 2 anak na rin kay AJ ang ex-mister… KYLIE, IFINLEX SA SOCMED ANG FAMILY PIC NILA NI ALJUR

ni Ambet Nabus @Let's See | August 26, 2025

Photo: Aljur Abrenica at Kylie Padilla - IG

Lumabas last Sunday (Aug. 24) ang socmed (social media) post ni Kylie Padilla na nagpapasalamat kay Aljur Abrenica dahil sa ‘daddy duties’ sa mga anak nila.

May pinuntahang circus ang mag-iina at sinamahan sila ni Aljur, that resulted to having them a family picture na ikinagalak ng mga nakasubaybay sa kanila.

Sey pa ni Kylie, nanatili naman silang magkaibigan ng dating asawa at maayos ang co-parenting system o agreement nila.

Sa naturang post, sinabi nitong hindi lang daw naibabalita na matagal na silang nag-uusap ni Aljur at very open ang mga linya ng komunikasyon nila lalo’t para sa kanilang dalawang anak.

At dahil lumabas nga kamakailan na mayroon na rin palang dalawang anak si Aljur sa current partner nitong si AJ Raval, marami ang nagwa-wan-plus-wan na obligado nga ang aktor na ilabas na sa socmed (social media) ang kanyang ‘daddy duties’ sa mga anak niya kay Kylie Padilla.

---

“PARA lang hindi na s’ya kuwestiyunin sa panalo n’ya,” reaksiyon din ng netizen sa ginawang pambubuking ni Jeric Raval sa anak na si AJ at partner nitong si Aljur Abrenica.

Mas pinag-usapan nga ang pagkukuwento ni Jeric na may dalawa na ngang anak sina AJ at Aljur, at ine-enjoy niya ang kanyang pagiging lolo sa mga ito.

At dahil tinalo nga ni Jeric sa katatapos na FAMAS Awards Night as Best

Supporting Actor ang gaya nina Ruru Madrid, Jhong Hilario, Sid Lucero, Will Ashley at Joel Torre, siyempre, marami ang nagtaas ng kilay.

“Magaling s’yang maglihis ng intriga. Kesa nga naman kulitin pa s’ya kung bakit n’ya tinalo ang mga umano’y higit na magagaling sa kanya, iniba na lang n’ya ang kanyang narrative,” hirit pa ng mga intrigerong Marites. Hahaha!

Pero ganu’n naman talaga ang mga award-award, ‘noh? Laging may intriga sa mga winners. Ano bang pakialam natin kung sa panlasa ng mga umupong jury ay higit na lumutang si Jeric Raval?  

---

KAHIT ang gaya ng The Clones (TC) segment ng Eat… Bulaga! (EB!) ay hindi rin nakaligtas sa mga batikos.

Sa nakaraang grand finals para sa Classic Male category nila that featured the clones o kaboses nina Basil Valdez, Elvis Presley, Matt Monro, Julio Iglesias at Eddie Peregrina, sangkaterba rin ang mga hindi masaya ang reaksiyon.

‘Yung kaboses ni Basil Valdez ang nanalo (to which we agree na talagang kuhang-kuha at dikit na dikit sa boses ng idol natin) and yet, may mga nagkukuwestiyon na dapat daw ay nanalo rin ‘yung kaboses ni Matt Monro.

Naging runners-up kasi ‘yung boses-clone nina Eddie Peregrina at Elvis Presley.

“Kaya nga bigla na naman silang gumimik na magkaroon ng resbak o wild card para pabalikin ‘yung mga naging runner-up at natalo,” sey ng mga netizens.

At dahil damay na damay si Kapatid Allan K. bilang nagiging bahagi pala ng kanyang The Klownz ang mga nananalo sa show, hindi rin maiiwasang intrigahin siyang ‘may influence o hand’ umano ito sa resulta ng contest.

Binanggit nilang example ang ilan sa mga naging kalahok (at mga nanalo pa) na may regular na pala na ‘puwesto’ sa naturang comedy bar?

Ahhh, so?

Eksperto: WHO, bigong tugunan ang paninigarilyo sa loob ng 2 dekada

ni Chit Luna @News | August 23, 2025

Photo File: World Health Organization (WHO)

Iginiit ng mga eksperto na hindi naging epektibo ang polisiya ng World Health Organization (WHO) sa pagkontrol ng tabako, dahil halos walang naging pagbabago sa bilang ng naninigarilyo kahit mahigit dalawang dekada na mula nang ipatupad ang Framework Convention on Tobacco Control (FCTC).

Sa 2025 Global Forum on Nicotine (GFN) sa Poland, sinabi ng mga panelist na ang mahigpit na pagbabawal ng WHO ay hindi tumutugma sa mga estratehiyang nakabatay sa ebidensya para sa harm reduction — na makatutulong sa mahigit isang bilyong naninigarilyo na huminto o lumipat sa mas ligtas na alternatibo.

Ang tobacco harm reduction ay tumutukoy sa mga hakbang na naglalayong bawasan ang panganib ng mga sakit dulot ng paninigarilyo sa pamamagitan ng paggamit ng mga produktong gaya ng heated tobacco, nicotine pouches, at e-cigarettes imbes na magpatuloy sa paggamit ng tradisyonal na sigarilyo.

Sa naturang sesyon na pinamagatang “Reflections on the Framework Convention on Tobacco Control at 20”, nagtipon-tipon ang mga eksperto mula sa larangan ng pampublikong kalusugan, oncology, at adbokasiya ng mamimili upang suriin ang naging implementasyon ng FCTC.

Binigyang-diin ng mga panelist na dapat maging pangunahing batayan ng modernong tobacco control ang agham, pagkakapantay-pantay, at karapatang pantao. Nanawagan silang iwanan ang malawakang pagbabawal at itaguyod ang mga patakarang praktikal, batay-sa-ebidensya, at nagbibigay-daan sa inobasyon habang gumagalang sa dignidad ng tao.

Kabilang sa mga nagsalita sina Propesor Tikki Pangestu, dating Director ng Research Policy & Cooperation sa WHO at kasalukuyang Visiting Professor sa Yong Loo Lin School of Medicine, National University of Singapore; Asa Saligupta, director ng ENDS Cigarette Smoke Thailand (ECST); Dr. Derek Yach, dating WHO cabinet director at executive director para sa noncommunicable diseases and mental health, na nanguna sa pagbabalangkas ng FCTC; Propesor David Khayat, Pranses na oncologist at co-author ng Paris Charter Against Cancer; at Jeannine Cameron, tagapagtatag ng JCIC International Consultancy.

Binigyang-diin pa ni Pangestu ang impluwensya ng WHO sa mga bansang mababa at katamtaman ang kita, na madalas ay walang sapat na kakayahang bumuo ng sariling polisiya. “The elephant in the room is the WHO,” aniya. “As long as that position doesn't change, many countries are going to continue with apathy”.

Pinuna naman ni Saligupta ang papel ng Bloomberg Philanthropies at ilang NGO sa paghuhubog ng mahigpit na patakaran kasang-ayon ng WHO. “They use ideology over evidence, they’re ignoring science and pushing prohibition,” aniya, kasabay ng babala na ang maling impormasyon at labis na regulasyon ay humahadlang sa mga naninigarilyo sa mga bansang gaya ng Thailand — kung saan ipinagbabawal pa rin ang vaping — na magkaroon ng mas ligtas na opsyon.

Samantala, kinilala ni Yach ang kahalagahan ng FCTC sa kasaysayan, ngunit binatikos ang hindi pantay-pantay na implementasyon nito at ang pag-iwas na isama ang harm reduction.

Nanawagan si Khayat para sa isang mas makataong, education-based na polisiya sa kalusugan, at tinutulan ang “quit or die” na pananaw bilang hindi makatotohanan para sa mga hirap sa pagkaadik sa nikotina.

Ipinahayag naman ni Cameron na ang makabuluhang pagbabago ay dapat magmula sa pambansang pamahalaan at hindi sa mga international na ahensya. “The WHO gets to decide nothing. It’s the national governments that must act,” aniya.

Sa Pilipinas, sinuportahan ni Dr. Lorenzo Mata, Jr., presidente ng Quit for Good, ang panawagan para sa reporma. “The WHO has fallen short of its target and failed to help more than a billion smokers globally,” ani Mata.

Dagdag pa niya: “Because of its prohibitionist ideology, the WHO has only alienated smokers and nicotine consumers, demonizing them for their habits. It is time for the WHO to adopt a more compassionate approach and acknowledge the rights of consumers to choose what is best for them.”

Kooperasyon sa ASEAN kailangan laban sa iligal na kalakalan

ni Chit Luna @News | August 9, 2025

Photo: Binigyang-diin ang kahalagahan ng koordinasyon sa pagitan ng PNP, National Intelligence Coordinating Agency, at mga barangay bilang early warning system. Sa pamamagitan ng Task Force Against Counterfeit Goods, “nagbigay-daan sa PNP na protektahan ang mga consumer at sugpuin ang counterfeit supply chains.”

Nanawagan ang mga opisyal ng Pilipinas ng mas mahigpit na pagtutulungan sa ASEAN upang labanan ang lumalalang banta ng illicit trade. Sa isang high-level briefing noong Agosto 5, 2025, binigyang-diin ng mga eksperto na ang bukas na hangganan ng rehiyon, magkakaibang regulasyon, at hindi pantay na pagpapatupad ng batas ay nagpapahina sa depensa laban sa mga kriminal na operasyon.

Idinaos ng Financial Times sa Shangri-La The Fort, Taguig City, ang pagtitipong may temang “Combatting Illicit Trade in Southeast Asia.”

Ayon kay Nestor Sanares, Undersecretary for Peace and Order ng DILG, ang iligal na kalakalan ay banta sa ekonomiya at kaligtasan ng mamamayan. “Pinapalakas ng illicit trade ang korapsyon, pinopondohan ang mga kriminal na network at sinasamantala ang kahinaan ng mga tao,”. Dagdag pa niya, “ang smuggling, counterfeiting, trafficking, o iligal na droga ay transnational na mga krimen na malalim ang ugat at patuloy na nagbabago.”

Binigyang-diin ni Sanares ang kahalagahan ng koordinasyon sa pagitan ng PNP, National Intelligence Coordinating Agency, at mga barangay bilang early warning system. Sa pamamagitan ng Task Force Against Counterfeit Goods, “nagbigay-daan sa PNP na protektahan ang mga consumer at sugpuin ang counterfeit supply chains.”

Mahalaga rin aniya ang cross-border cooperation; ang pakikipagtulungan sa Malaysia, Indonesia, at Thailand ay nakapigil sa pagpasok ng kontrabando bago makarating sa bansa.

Para kay BIR Commissioner Romeo Lumagui Jr., “ang sama-samang pagsisikap ng mga ahensiya ng gobyerno at ng publiko ang siyang magtatakda kung magpapatuloy ang iligal na kalakalan.” Kabilang sa mga hamon ang malawak na baybayin ng Pilipinas, makabagong smuggling scheme, at lumalaking digital marketplace.

Ayon kay Lumagui, ang illicit trade sa sigarilyo at alak ay nagdudulot ng bilyun-bilyong pisong pagkalugi na sana’y para sa edukasyon, kalusugan, at imprastruktura. “Ang mga iligal na produkto — na hindi regulado at madalas na hindi ligtas — ay naglalantad sa mga tao, lalo na sa mga kabataan at mahihirap, sa mga substandard na produkto at nakakapinsalang sangkap,” dagdag niya.

Sa nakalipas na dalawang taon, nagtayo ang BIR ng mga multi-agency task forces para magsagawa ng organisado at intelligence-driven na operasyon. Isa sa mga pinakamalaking raid ay nagresulta sa pagliligtas sa 155 mangga-gawang biktima ng trafficking sa isang iligal na pabrika ng sigarilyo sa Bulacan. Ang insidente ay nagbunga ng tax case na mahigit P596 milyon at kasong human trafficking laban sa dayuhang nagpapatakbo nito.

Kinilala rin ni Lumagui ang papel ng publiko: “Ang mga tips, leads at iba pang impormasyon mula sa mga miyembro ng publiko ay malaking tulong sa BIR sa pagtukoy ng mga establishments na sangkot sa iligal na kalakalan.”

Binigyang-diin niya ang pangangailangan ng real-time authentication tools at mas mahigpit na border controls para sa mas epektibong kooperasyon sa ASEAN. “Makakatulong sa hinaharap ang paggamit ng teknolohiya, patuloy na pag-update ng regulatory framework, pagpapalawak ng cross-border information sharing at pagpapatatag ng matibay na partnership sa pagitan ng mga gobyerno, negosyo at civil society para pigilan ang illicit trade,” aniya.