Disaster preparedness at resilience ng bansa, mas paigtingin

ni Bong Go @Bisyo Magserbisyo | July 24, 2025

Hindi biro ang kalamidad na kasalukuyang dinaranas ng napakarami nating mga kababayan. Ang Bagyong Crising, Bagyong Dante, at ang Habagat ay patuloy na nagdadala ng malalakas na ulan at pagbaha sa iba’t ibang lugar sa bansa. Maliban dito, merong dalawang Low Pressure Area (LPA) na kakapasok lang sa bansa na mataas ang posibilidad na maging ganap na bagyo.  

Ramdam ng bawat pamilyang nasalanta ang bigat ng pinsala — libu-libong kababayan natin ang napilitang lumikas, maraming tahanan ang lubog sa baha, at masakit mang isipin, may mga buhay na nawala.

Ipinararating ko sa pamilya ng mga nasawi at sa libu-libong Pilipinong apektado ng kalamidad ang aking taus-pusong pakikiramay at lubos na pakikidalamhati. Nananawagan naman ako sa lahat ng concerned government agencies na gawin ang lahat para matugunan ang pangangailangan ng mga kababayan. Sa kapwa ko mga Pilipino, magtulungan tayo sa abot ng ating makakaya.

Bilang Chairman ng Senate Committee on Health and Demography, ang lagi nating paalala ay bigyang prayoridad ang kaligtasan at kalusugan. Huwag sana nating ipagsapalaran ang buhay para sa mga kagamitan. Ang gamit ay mabibili at mapapalitan, pero ang buhay kapag nawala ay hindi na maibabalik. A lost life is a lost life forever.

Pero kasabay nito, responsibilidad ng gobyerno na siguraduhing may ligtas at maayos na evacuation centers ang mga kababayan nating lumilikas. Kaya naman isinulong natin noon bilang principal author at co-sponsor ang ngayo’y Republic Act No. 12076 o Ligtas Pinoy Centers Act.

Patuloy kong ipaglalaban ang full implementation ng batas na ito na layong magtatag ng permanente at kumpletong evacuation centers sa bawat lungsod at bayan sa bansa. Panahon na para protektahan ang buhay at dignidad ng ating mga evacuees sa pamamagitan ng mga pasilidad kung saan maayos ang hygiene, ligtas ang mga bata at matatanda, may access sa serbisyong medikal, at may sapat na espasyo para sa lahat.

Kaugnay nito, inihain natin ang Senate Bill No. 173 na layong itatag ang Department of Disaster Resilience. Kung maisasabatas, ang DDR ay pamumunuan ng isang cabinet-secretary level na opisyal para mas matutukan ang disaster preparedness, response, rehabilitation, at recovery efforts. Mahalaga ang restoration of normalcy o agarang pagbalik sa normal na pamumuhay ng mga kababayan pagkatapos ng kalamidad.

Bilang tugon naman sa pangangailangan ng mga pamilyang nawalan ng tahanan, inihain natin ang Senate Bill No. 415 o Rental Housing Subsidy Program bill. Kung magiging batas, hangad nating matulungan ang calamity victims na magkaroon ng pansamantalang tulong pabahay habang inaayos ang kanilang kabuhayan at tahanan.

Kabilang rin sa ating mga panukala ang Senate Bill No. 669 na kung maisasabatas ay magtatakda sa pagbibigay ng hazard pay sa disaster responders sa tuwing may kalamidad. Sakripisyo at panganib ang kinakaharap nila para mailigtas ang mga kababayan, kaya’t dapat lang na masuklian ito kahit papaano.

Bilang inyong senador, at sa tulong ng kapwa ko mga mambabatas, magtatrabaho ako para maisulong ang mga batas at programa na maglalapit ng serbisyo sa bawat Pilipino.

Ngayong Hulyo, ipinagdiriwang natin ang National Disaster Resilience Month (NDRM), isang mahalagang pagkakataon upang paigtingin ang kamalayan ng bawat Pilipino sa kahalagahan ng kahandaan at katatagan. Importante na magkatuwang ang pagtugon ng gobyerno at ang pagiging handa ng mamamayan. Tandaan natin na responsibilidad nating lahat ang kaligtasan ng bawat isa.

Samantala, agad na tumulong ang aking Malasakit Team sa 27 pamilyang naapektuhan ng sunog sa Baguio City kasama si Councilor Vladimir Cayabas.

Nag-abot din tayo ng tulong sa 166 scholars mula sa iba’t ibang paaralan na ginanap sa WCC Aeronautical and Technological College North Manila at 41 scholars sa iba’t ibang paaralan sa La Union.

Dinaluhan ng Malasakit Team ang Buena Liga 17U Games Opening Ceremony sa Agusan del Norte kasama si Buenavista Mayor Jun Roble, gayundin ang 25th Class Anniversary at Induction of Honorary Member ng Officer Candidate Course “Mapitagan” Class 21-2001 sa pangunguna ng Class President na si LT Colonel Reginar Perez.

Kasama ni M@B Partylist Congresswoman Girlie Veloso, dumalo ang aking opisina sa inauguration ng mga bagong pasilidad sa East Avenue Medical Center (EAMC) kabilang ang Neonatal Intensive Care Unit, Central Endoscopy Unit, at Oxygen Generating Plant.

Dumalo rin ang Malasakit Team sa turnover ng bagong Super Health Center sa Dumingag, Zamboanga del Sur sa imbitasyon ni Mayor Gerry Paglinawan.

Muling paalala sa mga kababayan, ibayong pag-iingat. At bilang inyong Mr. Malasakit, umasa kayong hindi ko sasayangin ang pagkakataong ibinigay ninyo sa akin para ipagpatuloy ang pagseserbisyo. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga batas para sa health workers, guro, atleta, OFWs at vulnerable sector

ni Bong Go @Bisyo Magserbisyo | July 17, 2025

Patuloy ang aking hangarin na mailapit ang mga serbisyo ng gobyerno sa mga pinakanangangailangan nito, lalo na sa mga kababayan nating mahihirap at walang ibang malalapitan kundi ang pamahalaan. Kaya naman bilang inyong senador at health reforms crusader, personal kong inihain sa Senado nitong ikalawang linggo mula nagbukas ang 20th Congress ang ikalawang batch ng 10 priority bills natin.

Ang mga panukalang ito ay nakatuon sa kapakanan ng health workers, guro, atleta, overseas Filipino workers, at mga miyembro ng vulnerable sector, tulad ng senior citizens, at mga biktima ng kalamidad.

Isinusulong natin ang panukalang Advanced Nursing Education Program na layong mabigyan ang ating mga nurse ng pagkakataong makapag-aral sa graduate-level education at specialized clinical training. Kung maisasabatas, hangad nating iangat ang kanilang kakayahan bilang ambag sa pagpapalakas ng ating healthcare system.

Para sa ating mga atleta, lalo na ang mga differently-abled, naghain tayo ng panukalang Expanded Benefits for Para-athletes. Kapag naging batas, mabibigyan ang ating national para-athletes ng pantay na insentibo tulad ng ibang atleta sa international competitions.

Inihain din natin ang Delayed Birth Registration Bill na hangad mapadali ang proseso ng late registration para sa mga Pilipinong hanggang ngayon ay hindi pa rehistrado. Ipaglalaban natin na maging batas ito para makatulong sa registration ng humigit-kumulang 3.7 milyong Pilipino na walang birth certificate.

Prayoridad din natin na maisabatas na ang Medical Assistance for Indigent and Financially Incapacitated Patients (MAIFIP), para matiyak na tuluy-tuloy ang medical assistance sa mga mahihirap at indigent patients sa lahat ng Department of Health (DOH) hospitals at specialty centers.

Isinusulong din natin ang panukalang monthly allowance para sa mga guro at non-teaching personnel sa mga pampublikong paaralan. Kung maging ganap na batas, dagdag pagkilala ito sa kanilang napakahalagang papel sa edukasyon at sa kinabukasan ng kabataan.

Nag-file din tayo ng panukalang pagtatatag sa Philippine Senior Citizens Hospital and Research Institute. Kung magiging batas, magkakaroon tayo ng isang specialized facility para sa kalusugan ng ating mga nakatatanda, kalakip ang research at training sa geriatric medicine.

Patuloy nating ipinaglalaban para maging batas ang Magna Carta for Barangay Health Workers Bill na layong mabigyan ng sapat na benepisyo at security of tenure ang ating modern-day heroes. Ang ating BHWs ay pangunahing katuwang ng lokal na pamahalaan sa pagbibigay ng serbisyong pangkalusugan sa mga komunidad.

Tuloy din ang pagsulong natin para maging batas ang Philippine National Games bill bilang grassroots sports platform para mahasa ang mga atletang Pilipino at mailayo ang kabataan sa bisyo.

Kung magiging batas naman ang isa pa nating priority bill, mai-institutionalize na ang OFW Hospital sa San Fernando City, Pampanga sa ilalim ng Department of Migrant Workers. Hangad natin na matiyak na may specialized care at 24/7 telehealth services para sa ating mga OFW at kanilang pamilya.

Para naman sa mga informal settler families at mga nawalan ng tirahan dahil sa sakuna, ipaglalaban natin ang Rental Housing Subsidy Bill. Kung maisasabatas, matutulungan natin silang magkaroon ng disenteng pansamantalang tirahan habang lumilipat sa formal housing market.

Sa tulong ng mga kapwa ko mambabatas, patuloy nating isusulong ang mga batas at programa na maglalapit sa mga Pilipino ng mga serbisyo ng pamahalaan. Magtulungan tayo para matiyak na walang maiiwan sa pag-unlad, lalo na ang mga hopeless at helpless.

Samantala, naghain kami nina Senator Bato dela Rosa at Senator Robin Padilla ng resolusyon nitong July 14, para ipanawagan na isailalim sa house arrest si dating Pangulong Rodrigo Duterte habang nasa The Hague, Netherlands.

Matanda na si Tatay Digong at marami nang karamdaman. Nasa kultura nating mga Pilipino na hindi pinapabayaan ang mga matatanda. Ibigay sana natin kay Tatay Digong ang kaunting malasakit lalo na’t patuloy niyang pinagsisilbihan ang mga Pilipino na kanyang minamahal. Patuloy din nating ipagdasal ang kalusugan, kaligtasan, at kalayaan ni Tatay Digong.

Tuluy-tuloy naman tayo sa pag-iikot sa bansa upang malaman ang mga pangangailangan ng ating mga kababayan. Noong July 11, binisita natin ang bagong tayong public market, tennis court, at multi-purpose building sa Alburquerque, Bohol.

Bilang Vice Chairman ng Senate Committee on Finance, sinusuportahan ng inyong Senator Kuya Bong Go ang mga proyektong pangkaunlaran para sa mga komunidad.

Dumalo rin tayo sa 428th Foundation Day at 3th Suba Festival ng Loboc, Bohol kasama sina Mayor Raymond Jala at Councilor Efren Mandin.

Noong July 14, personal tayong namahagi ng dagdag na tulong para sa mga mahihirap na kababayan sa Santiago City, Isabela. Pagkatapos nito, nagtungo tayo sa Tabuk City,

Kalinga kung saan binisita natin ang Super Health Center doon at ang Malasakit Center sa Kalinga Provincial Hospital. Nagkaroon din tayo ng meet-and-greet kasama ang mga lider doon sa imbitasyon nina dating Mayor Chao-ig Malannag at dating Lubuagan Vice Mayor Jun Saclag.

Nagpapasalamat din tayo sa lokal na pamahalaan ng Tabuk City dahil kinilala tayo bilang adopted son ng lungsod. 

Isang malaking karangalan na ibinansag nila sa akin ang pangalang "Charutag," na ang ibig sabihin sa Kalinga dialect ay "with solicitude" o "with deep care and concern." Isa itong inspirasyon para ipagpatuloy ang ating layunin na serbisyo at malasakit para sa kapwa Pilipino.

Bukod pa rito, namahagi rin ng tulong ang aking opisina sa mga biktima ng sunog, kabilang na ang 65 sa Pasay City at 35 pa sa Parañaque City.

Nakiisa rin ang aking Malasakit Team sa turnover ng Super Health Center sa Siayan, Zamboanga del Norte; at sa European Chamber of Commerce of the Philippines (ECCP) Healthcare Forum sa Makati Diamond Hotel kasama si Executive Director Florian Gottein.

Hinding-hindi ko sasayangin ang pagkakataong ibinigay n’yo sa akin para ipagpatuloy ang pagseserbisyo bilang inyong senador. Magtatrabaho ako para sa Pilipino dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Sa pag-unlad ng ‘Pinas, dapat walang Pinoy na maiiwan

ni Bong Go @Bisyo Magserbisyo | July 10, 2025

Noon pa lang bago maging senador ang inyong Kuya Bong Go, suportado ko na ang mga batas at inisyatiba kung saan pantay-pantay ang bawat Pilipino at walang dapat maiiwan sa ating pagsulong at pag-unlad. Pero nakakalungkot dahil hindi natin maitatanggi, may mga lugar sa bansa na napag-iiwanan. 

Bilang inyong senador, ipinaglalaban natin ang mga batas at programa na talagang may pakinabang sa kapwa natin Pilipino. Mula sa kalusugan, trabaho, edukasyon, at infrastructure development, tulad ni dating Pangulong Rodrigo Duterte, naniniwala ako na ang serbisyo ng pamahalaan ay dapat walang pinipili. Halimbawa rito ang “Build, Build, Build” program ng dating Pangulo na lumikha ng maraming trabaho para sa ating mga kababayan sa iba’t ibang panig ng bansa dahil sa mga ipinatayo at iniayos na mga kalsada, paliparan, pantalan at malalaking economic hubs.

Ang inyo pong Mr. Malasakit ay isang proud Bisaya at Batangueño na lumaki sa Mindanao. Nakita ko noon pa man ang mga sira-sirang kalsada, kakulangan sa maayos na serbisyong pangkalusugan at mga imprastraktura sa iba’t ibang bahagi ng bansa lalo na sa Mindanao. Kaya naman mahalaga na isulong natin ang mga development project na makakatulong sa rehiyon, tulad halimbawa ng Mati City Airport project sa Davao Oriental na ating sinusuportahan bilang Vice Chairman ng Senate Committee in Finance.

Umasa kayo na magtatrabaho ako kasama ng aking mga kapwa mambabatas para maisulong ang mga batas na maglalapit ng serbisyo ng gobyerno sa mga Pilipino. 

Tuluy-tuloy rin tayo sa paghahatid ng serbisyo sa ating mga kababayan. Noong July 1 ay nasa Davao Oriental tayo at nakiisa sa 58th Founding Anniversary ng probinsya. Sinaksihan din natin ang panunumpa sa tungkulin ng mga bagong halal na lokal na opisyal sa pangunguna ni Governor Nelson Dayanghirang. 

Personal nating binisita at pinagkalooban ng tulong ang 45 residente ng Barangay 773, San Andres Bukid, Maynila na naging biktima ng insidente ng sunog. 

Nasa Island Garden City of Samal tayo noong July 2 at dumalo sa pasinaya at inagurasyon ng isinaayos na barangay hall sa Limao. 

Sinaksihan natin noong July 4 ang National Commission of Senior Citizens Regional Office XII Ribbon-Cutting and Blessing sa General Santos City, isang proyektong ating sinuportahan dahil malapit sa ating puso ang mga nakatatanda. Kung hindi dahil sa kanila, wala tayo sa mundong ito kaya dapat lamang na bigyan sila ng importansya. Dumalo rin tayo sa ginanap na 6th Commencement Exercises ng Davao del Sur State College, sa paanyaya ni College President Augie Fuentes. Bilang Chairman ng Senate Committee on Youth, binigyang-diin natin na mahalaga ang edukasyon para sa mga kabataang dahil sila ang pag-asa ng bayan at kabilang sa kanila ang mga susunod na lider ng ating bansa.

Muli tayong sumabak noong July 6 sa Still Got Game 50 & Up basketball tournament sa Mandaluyong City. Bilang Chairman ng Senate Committee on Sports, hinihikayat ko ang mga kababayan anuman ang edad na maging aktibo pa rin sa sports. Mabisa rin itong sandata para mailayo, lalo na ang ating mga kabataan, sa kaway ng droga at iba pang bisyo. Get into sports, stay away from drugs to keep us healthy and fit!

Naimbitahan din tayo sa paggunita sa International Year of Cooperatives sa Davao City. Bilang miyembro ng Senate Committee on Cooperatives, naniniwala akong malaki ang papel ng mga kooperatiba sa pagpapalago ng ating ekonomiya at pagpapaganda ng kabuhayan ng mga kababayan. 

Lagi kong sinasabi na basta kaya ng panahon at ng aking katawan, tutulong ako sa abot ng aking makakaya. Nitong Lunes, July 7, sa loob lang ng isang buong araw ay bumisita tayo sa limang barangay sa dalawang lungsod ng Maynila at Valenzuela. Aabot sa 515 sa mga kababayan nating biktima ng sunog ang personal nating nahatiran ng kaunting tulong. Meron ding tulong mula sa national government na natanggap ang mga fire victim sa Valenzuela City para ipambili ng materyales pampaayos ng kanilang mga bahay, na ating sinuportahan.

Bilang principal author at co-sponsor ng batas, muli ko ring ipinanawagan na gawing prayoridad ang full implementation ng Ligtas Pinoy Centers Act, na layong magtayo ng maayos at permanenteng at dedicated na evacuation centers sa bawat lungsod at bayan sa bansa. Pera ng Pilipino ang gagamitin dito kaya’t dapat lang na ibalik sa kanila sa pamamagitan ng maayos na serbisyo.

Kaugnay nito, patuloy nating isinusulong ang pagtatatag ng Department of Disaster Resilience upang magkaroon ng mas maayos at mabilis na koordinasyon at rehabilitasyon.

Ipinadala ko naman ang aking Malasakit Team sa iba’t ibang bahagi ng ating bansa para maghatid ng tulong. Naalalayan natin ang 229 residente ng Barangay Tabunok, Talisay City, Cebu na naging biktima ng sunog.

Nagkaloob din tayo ng dagdag na tulong sa 57 biktima ng insidente ng sunog sa Kalamansig, Sultan Kudarat. Nakatanggap din sila ng tulong pinansyal mula sa national government.

Sinaksihan ng aking tanggapan ang groundbreaking ng itatayong Super Health Center at ang 75th Founding Anniversary sa Diffun, Quirino kasama si Mayor May Calaunan; gayundin ang Federation of School Sports Association of the Philippines (FESSAP) 13th Asian University Basketball Championship; at ang 249th US Independence Day Reception sa Taguig City.

Magtatrabaho ako sa abot ng aking makakaya para sa kapwa Pilipino. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.