Salamat sa mga medical technologist, isa sa mga haligi ng healthcare system

ni Bong Go @Bisyo Magserbisyo | December 5, 2025

Nitong December 2, naimbitahan ako bilang keynote speaker sa Philippine Association of Medical Technologists, Inc. (PAMET) 61st Annual National Convention. Pagtitipon ito ng mga lider, delegado, at practitioners mula sa iba’t ibang rehiyon na nagtitipon upang talakayin ang direksyon ng kanilang propesyon.

Bilang Vice Chairman ng Senate Committee on Health, naniniwala ako na kailangang iangat ang regulasyon natin sa isang propesyong nakabase sa agham at teknolohiya. Ito ang dahilan kung bakit itinulak ko ang Senate Bill No. 172 o ang New Medical Technology Law. Layunin nitong iangat ang professional standards, i-update ang scope of practice, at kilalanin ang mga bagong teknolohiyang ginagamit sa diagnostic science.

Mabilis na umuusad ang medical technology sa buong mundo, samantalang ang framework natin ay 56 taon na. Kung hindi tayo sasabay, apektado ang kalidad ng health services at mga pasyente ang kawawa.

Bahagi ng aking health reforms crusade ang pagsusulong na ang bawat miyembro ng healthcare workforce ay may pag-asang umangat sa piniling tungkulin. Ang training at specialization ay hindi pabor na hinihingi — ito ay kasangkapan para sa kaligtasan ng pasyente. Ito ang binigyang-diin ko sa mga medical technologists: bawat resultang ipinapasa nila ay may kasamang responsibilidad na kadalasang hindi nakikita ng publiko, ngunit kritikal sa diagnosis at gamutan. Maraming buhay ang nakasalalay sa kalidad ng kanilang trabaho.

Malaki ang dapat nating ipagpasalamat sa medical technologists dahil sila ang isa sa mga haligi ng healthcare system na tahimik na gumagawa sa likod ng bawat operasyon, bawat gamutan, at bawat pagbangon ng pasyente. Patuloy ang kanilang serbisyo; tungkulin kong tiyaking hindi sila malilimutan sa polisiya at batas.

Samantala, noong November 26, personal tayong dumalo sa Opening Ceremony ng MB Cup Citywide Tournament Season 2 sa Quezon City bilang Chairman ng Senate Committees on Sports at on Youth, kung saan 114 na barangay ang lumahok sa citywide basketball tournament. Ang makabuluhang kaganapang ito, inisyatibo ni Councilor Mikey Belmonte, ay patuloy na nagtataguyod ng pagkakaisa, disiplina, at malusog na kompetisyon sa kabataan sa pamamagitan ng sports.

Nakibahagi rin tayo sa send-off program para sa ating mga atletang Pilipino na sasabak sa 33rd Southeast Asian Games noong November 28, at buong puso kong ipinahayag ang aking suporta at pagbati sa Team Philippines. Buo ang aking paniniwala na may kapangyarihan ang sports na pagkaisahin ang Pilipinas, pinagbubuklod ang ating mamamayan sa ilalim ng iisang bandila. Galing ay ilabas, galing ng Pilipinas!

Noong nakaraang linggo, ang ating Malasakit Team ay naghatid ng iba’t ibang tulong sa mga Pilipino habang tumulong sila sa mga displaced workers sa Balete, Lian, at Padre Garcia sa Batangas; Muntinlupa City; at Masinloc, Zambales. Ang mga biktima ng sunog sa Lipa City at Talisay, Batangas; at Surigao City, Surigao del Norte ay nabigyan din ng tulong ng team. Bukod dito, ang mga biktima ng bagyo mula sa La Carlota City at Moises Padilla sa Negros Occidental ay nakatanggap din ng ayuda.

Naanyayahan din tayo sa KATuwang sa Kalusugan Karavan sa Meycauayan City, Bulacan. Nagbigay rin ng karagdagang suporta ang ating Malasakit Team sa mga TESDA graduates mula sa Nov Training and Assessment Center, Inc. sa Bamban, Tarlac; Raphael Alessandri Foundation Academy sa General Santos City; at Winzelle International College Inc. and Advancetech International Manpower Training Center sa Zamboanga City.

Samantala, sa pagpapatuloy ng Senate deliberations para sa taunang pambansang budget, ipaglalaban natin ang mga programang talagang mapapakinabangan ng taumbayan. Dapat mabantayan ang paggamit ng pondo nang wasto at hindi mapunta sa korupsiyon. I am one with the Filipinos in this fight and crusade against corruption.

Dapat mapanagot ang mga tunay na mastermind ng malawakang korupsiyon.

Patuloy kong paglilingkuran ang mga kapwa ko Pilipino nang may pagmamahal at malasakit dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga nangangailangan ng ayuda, ‘wag nang pahirapan!

ni Bong Go @Bisyo Magserbisyo | November 28, 2025

Sa hearing ng Senado para sa panukalang 2026 budget ng Department of Social Welfare and Development nitong Nobyembre 24, muli nating pinaalalahanan ang DSWD na huwag haluan ng pulitika ang pamamahagi ng ayuda at iba pang social assistance. Hindi dapat pahirapan pa ang mga mahihirap nating kababayan. Ang tunay na pagmamalasakit ay walang pinipili at pinapaboran.

Marami ang pumupuna na noong bago mag-eleksyon, bumabaha ang ayuda. Ngayong tapos na ang eleksyon at sunud-sunod ang kalamidad, parang bumabagal naman ang tulong. Ayon mismo sa DSWD, nagamit na ang halos 100% ng pondo ngayong taon para sa Assistance to Individuals in Crisis Situations o AICS program kaya kailangan ng dagdag na budget para rito. Babantayan natin ito at dapat siguraduhin ng DSWD na nagagamit ang pondo para sa mga kapwa natin Pilipino na tunay na nangangailangan.

Sa tulong naman ng aking mga kasamahan sa Senado, ipaglalaban natin ang pensyon ng napakaraming indigent senior citizens na nasa waitlist ng DSWD. Sa ngayon, kulang pa ang pondo para sa aabot sa isang milyong wait-listed na lolo at lola. Dapat nating gawing prayoridad ito dahil malaking bagay sa ating senior citizens ang P1,000 na pensyon kada buwan pambili ng kanilang pagkain, gamot, at iba pang gastusin.

Inihayag natin ang buong suporta sa lahat ng mga tauhan ng DSWD at sa proposed budget ng kagawaran. Muling paalala natin na huwag pabayaan ang iba’t ibang vulnerable sector kabilang na ang mga single parent, indigent patients, at lalo na ang mga mahihirap nating kababayan na namatayan o lubhang apektado ng nagdaang mga kalamidad. Sana ay parating bukas ang mga opisina ng DSWD dahil ang mahalaga, may malalapitan ang ating mga kababayan na walang ibang matatakbuhan kundi ang pamahalaan.

Noong November 20, ipinakita natin ang suporta natin sa Cooperative Development Authority (CDA) ng Visayas; nagbigay tayo ng tulong sa 65 na kooperatiba mula Regions VI, VII at VIII. Kinabukasan naman, November 21, personal tayong nakapunta sa CDA distribution sa Davao City kung saan nabigyan ng tulong ang 86 kooperatiba mula Regions XI, XII at XIII. Namahagi rin tayo ng hiwalay na tulong para sa mga micro, small at medium na mga kooperatiba.

Samantala, noong November 22, bilang Chairman ng Senate Committees on Sports at on Youth, personal tayong dumalo bilang guest of honor and speaker sa Philippine Eskrima Kali Arnis Federation (PEKAF) Mindanao Qualifying Tournament (Arnis) opening ceremony sa University of the Philippines Mindanao sa Davao City, sa imbitasyon ni PEKAF President, Majority Leader Senator Migz Zubiri.

Noong nakaraang linggo, bumisita ang ating Malasakit Team sa iba’t ibang kababayang nangangailangan at tumulong sa mga biktima ng bagyo sa Dueñas sa Iloilo; Bayombong at Bambang sa Nueva Vizcaya; Agno sa Pangasinan; Masantol sa Pampanga; Tuguegarao City, Solana, Tuao, at Enrile sa Cagayan; San Juan sa Batangas; Baguio City; Bay sa Laguna; Daet sa Camarines Norte; at San Jose sa Camarines Sur.

Samantala, tumulong din tayo sa mga biktima ng sunog sa Davao City; micro-entrepreneurs sa San Rafael, Iloilo; Valencia City, Bukidnon; at Pikit, North Cotabato. Tumulong rin ang Malasakit Team sa mga iskolar sa Bataan Peninsula State University at TESDA graduates ng Raphael Alessandri Foundation Academy sa General Santos City.

Dumalo rin ang ating Malasakit Team sa turnover ng Super Health Center sa Brgy. Lobogon, Aloran, Misamis Occidental.

Sa pagpapatuloy ng Senate deliberations para sa taunang pambansang budget, ipaglalaban natin na talagang mapapakinabangan ng taumbayan ang pondo ng gobyerno. I am one with the Filipinos in this fight and crusade against corruption. Dapat mapanagot ang mga tunay na mastermind ng malawakang corruption.

Bilang inyong senador, sisikapin ko sa abot ng aking makakaya na maihatid ang dekalidad na serbisyo-publiko para sa ating mga kababayan, lalo na ang mga mahihirap. Dapat palagi nating itaguyod ang kanilang kapakanan, protektahan ang kanilang mga karapatan, at tiyakin na maaabot sila ng mga pangunahing serbisyo at programang pantulong ng pamahalaan, kasama na ang mga nakatira sa malalayong lugar. Sila ang dapat unang pagsilbihan — ang mga mahihirap nating kababayan.

Bilang inyong Mr. Malasakit, bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Repormang pangkalusugan, isulong para sa mas maayos na serbisyo sa mahihirap

ni Bong Go @Bisyo Magserbisyo | November 21, 2025

Bilang Vice Chairman ng Senate Committee on Health, inihayag natin sa deliberasyon ng Senado para sa 2026 national budget ang ating suporta para sa panukalang pondo ng Department of Health nitong November 17. Pero binigyang-diin ko ang malaki pa ring kakulangan lalo na sa hangarin natin na zero-balance billing. Bilang isang health reforms crusader ay matagal na nating mithiin ito para sa lahat ng mga pasyente, hindi lamang sa mga naka-admit sa charity ward. 

Patuloy din nating babantayan ang pondo ng PhilHealth ngayong plano nang ibalik sa susunod na taon ang PhP60 billion excess funds nito noong 2024. Tinutulan natin noon ang posibleng pagkakagamit ng sobrang pondo ng PhilHealth sa mga non-health related projects. Sana hindi na ito maulit. Ang pondo ng PhilHealth ay dapat gamitin lamang sa health! 

Binigyang-diin ko rin ang mabagal na pagpapatupad ng Super Health Centers program ng DOH. Sa 800 na target, 200 lang ang operational at marami ang hindi nagagamit o hindi pa tapos. Nananawagan ako sa DOH na makipagtulungan sa mga LGUs para maging operational ang mga ito at siguruhin na hindi sila maging “white elephant.”

Tulungan dapat ng DOH ang mga LGUs sa pag-deploy ng personnel para mapakinabangan ang Super Health Centers. Maganda ang layunin ng mga ito lalo na para sa mga mahihirap nating kapwa na nasa malalayong lugar. Ang Super Health Centers ay naaayon din sa Universal Health Care Law bilang primary health facility.

Hindi tayo titigil sa panawagan natin sa DOH na ayusin ang pagpapatupad ng mga programang pangkalusugan, siguraduhing tama ang paggamit ng pondo, at unahin ang mga pasyente. Patuloy kong isusulong ang mga repormang pangkalusugan para sa mas maayos na serbisyo lalo na sa mahihirap nating kapwa Pilipino.

Samantala, noong nakaraang linggo, bumisita ang ating Malasakit Team sa iba’t ibang kababayan na nangangailangan, kasama na ang mga biktima ng Bagyong Tino sa San Jose, Basilisa, Tubajon, Libjo, Dinagat, Cagdianao, at Loreto sa Dinagat Islands; sa Consolacion, Liloan, Compostela, Danao City, Naga City, Balamban, Toledo City, Poro, Tudela, San Francisco, at Pilar, sa lalawigan ng Cebu; sa Binalbagan, San Enrique, Pontevedra, Hinigaran at La Castellana, Negros Occidental; at sa San Ricardo, St. Bernard, Bontoc, Padre Burgos, Pintuyan, Limasawa, Tomas Oppus at Hinunangan sa Southern Leyte.

Tinulungan din natin ang mga biktima ng Bagyong Uwan sa Hermosa, Bataan; sa Baler, Casiguran, Dilasag, Dinalungan, Dingalan, Dipaculao, Maria Aurora, at San Luis sa Aurora; at sa Virac, Pandan, Baras sa Catanduanes.

Tumulong din tayo sa mga biktima ng sunog sa Davao City, at Baclaran, Parañaque City. Nag-abot din tayo ng tulong sa ilang maliliit na negosyante sa Dapa, Siargao Island at Surigao City sa Surigao del Norte; at sa Valencia, Bohol.

Naimbita rin tayo sa KATuwang sa Kalusugan Karavan sa Obando, Bulacan at sa pamamahagi ng mga iskolarship sa Scientia Vox Mantrade Institute sa Taal, Batangas; sa Mati City, Davao Oriental; at Bataan Peninsula State University.

Sa pagpapatuloy ng Senate deliberations para sa pambansang budget, ipaglalaban natin na talagang mapapakinabangan ng taumbayan ang pondo ng gobyerno. I am one with the Filipinos in this fight and crusade against corruption. Dapat mapanagot ang mga tunay na mastermind ng malawakang korapsyon. Just seek the truth. Huwag ilihis ang katotohanan. Tumbukin at mapanagot ang mga corrupt.

Bilang inyong Mr. Malasakit, patuloy akong magseserbisyo dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.