Paghahanda at bayanihan ngayong panahon ng kalamidad

ni Bong Go @Bisyo Magserbisyo | November 7, 2025

Tuwing panahon ng bagyo, hindi lang ulan at hangin ang kalaban natin kundi ang kawalan ng kahandaan. Damang-dama natin ang pananalasa ng Bagyong Tino na nagdudulot ng matinding pag-ulan, malalakas na hangin, pagbaha at pagguho ng lupa sa ilang bahagi ng Luzon, Visayas, at Mindanao. Patuloy ang pag-update ng mga otoridad hinggil sa lakas, galaw, at pinsalang iiwan nito kaya’t dapat tayong manatiling alerto at handa sa lahat ng oras. Higit sa lahat, patuloy din tayong magdasal at manalangin sa Diyos upang bigyan tayo ng lakas ng loob at gabay sa gitna ng pagsubok.

Muli kong ipinapaalala sa ating mga kababayan: huwag balewalain ang mga babala ng Philippine Atmospheric, Geophysical and Astronomical Services Administration (PAGASA) at ng inyong lokal na pamahalaan. Sa panahon ng kalamidad, ang disiplina at pakikipagtulungan ang pinakamabisang proteksyon. Tulad ng madalas kong sabihin, mas mabuti nang mag-ingat kaysa magsisi.

Naniniwala ako na ang kalusugan at kaligtasan ay magkaugnay. Kapag nasisira ang mga bahay at imprastraktura, naapektuhan din ang mga pasilidad pangkalusugan at ang kakayahan ng mga pamilya na manatiling ligtas at malusog. Kaya’t sa aking patuloy na health reforms crusade, sinisiguro kong ang ating mga komunidad ay hindi lamang nakatutok sa pagbangon pagkatapos ng sakuna, kundi sa pagiging handa bago pa man ito tumama.

Bilang principal author at co-sponsor ng Republic Act No. 12076 o ang Ligtas Pinoy Centers Act, isinusulong ko ang tuluy-tuloy na pagpapatupad ng batas na ito upang matiyak ang pagtatayo ng mga permanente, disaster-resilient, at fully equipped evacuation centers sa buong bansa. Mahalaga ito upang may ligtas na mapupuntahan ang ating mga kababayan sa tuwing may kalamidad.

Ako po ay nakikiusap sa mga kasamahan ko sa gobyerno. Bigyang prayoridad ang evacuation centers dahil batas naman po ito kaysa nasasayang sa flood control na ginagawang gatasan ng iilan.

Kaya nga po nananawagan ako: imbes na gamitin sa flood control, gamitin na lang sa evacuation center. Ilang libo ang pwedeng ipatayo kaysa mapunta sa pagnanakaw ng iilang oportunista. Kaya gamitin ang pera ng tao sa tama. Tumbukin natin ang may sala talaga. 'Yung may kalokohan, 'yung mastermind. Kailangan na makulong ang mga buwaya at managot ang nararapat managot.

Bukod dito, muling kong inihain ang Senate Bill No. 173 o ang Department of Disaster Resilience Act, na layuning lumikha ng isang ahensyang tututok lamang sa disaster risk reduction, preparedness, response, at rehabilitation—isang hakbang para mapalakas ang koordinasyon at pagiging epektibo ng ating mga programa laban sa sakuna.

Habang binabantayan natin ang epekto ng Bagyong Tino, sama-sama tayong magdasal at isama po natin sa ating mga panalangin sa Diyos ang mabilis na pagbangon ng ating mga kababayan na nasalanta ng kalamidad. Walang bagyong mas malakas sa isang bansang nagkakaisa para sa kaligtasan at kapakanan ng bawat Pilipino.  Sa mga tinamaan na ng Bagyong Tino, lalo na sa Kabisayaan, umaapela tayo sa mga ahensya ng gobyerno na tulungang makabangon kaagad ang ating mga kababayan.

Noong October 30, personal kong dinalaw at tinulungan ang 1,233 na kababayan mula sa iba’t ibang sektor sa Lupon, Davao Oriental. Patuloy kong sisikapin na makapag-abot ng tulong at suporta sa ating mga nangangailangan na kababayan sa abot ng aking makakaya.

Noong nakaraang linggo naman, nagtungo ang Malasakit Team sa iba’t ibang bahagi ng bansa upang maghatid ng tulong at agad na tumulong sa mga nasunugan sa Jaro, Iloilo City; Cagayan de Oro City; at San Andres Bukid, Manila.

Nag-abot din ng tulong ang Malasakit Team sa mga micro-entrepreneur sa La Paz, Loreto, San Luis, at Bunawan sa Agusan del Sur; at Tandag City, Surigao del Sur.

Bukod dito, ilang mga iskolar din ang tumanggap ng mga regalo mula sa Malasakit Team katuwang ang Greenland Integrated Farm sa Basey, Samar.

Bilang inyong Mr. Malasakit, hangad ko ang kaligtasan ng lahat dahil naniniwala ako na ang kalusugan ay katumbas ng bawat buhay ng bawat Pilipino. Kaya naman po patuloy akong magseserbisyo sa abot ng aking makakaya dahil bisyo ko ang magserbisyo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kanser ng lipunan, panahon nang labanan

ni Bong Go @Bisyo Magserbisyo | October 31, 2025

Noong Oktubre 27, buong pasasalamat nating tinanggap ang Humanitarian Service Award mula sa Rotary Club of Bukluran Quezon City. Malaking karangalan ito para sa akin bilang isang lingkod-bayan, pero mas malaking karangalan ang makapagserbisyo at makatulong sa mga kababayan nating nangangailangan. Hindi ko kailanman hinangad ang anumang parangal, pero ang ganitong pagkilala ay nagsisilbing inspirasyon sa ating patuloy na paghahatid ng malasakit at tunay na serbisyo sa kapwa Pilipino.

Bilang isang mambabatas, matagal ko nang itinuturing na tungkulin ang maging kasama ng mga grupo at organisasyong tunay na naglilingkod. Malapit sa puso ko ang Rotary dahil kapareho namin ang paniniwala na ang serbisyo ay dapat ibigay nang walang hinihintay na kapalit. Tulad ng madalas kong banggitin sa kanila, ipinagpapatuloy ko ang laban para sa mas maayos na serbisyong medikal sa bansa, lalo na para sa mga pinakamahihirap na Pilipino.

Bahagi ng aking health reforms crusade ang pagtatatag ng mga Malasakit Centers — mga one-stop shops kung saan mas madali nang makakuha ng tulong medikal mula sa iba’t ibang ahensya ng gobyerno. Ngayon ay mayroon nang 167 Malasakit Centers sa buong bansa na nakatulong na sa milyun-milyong Pilipino na makapagpagamot nang hindi iniintindi ang dagdag gastos. Kasabay nito, itinutulak ko rin ang pagtatayo ng mga Super Health Centers upang matiyak na kahit sa mga malalayong lugar, may access sa primary care, konsultasyon, at maagang pagtukoy ng sakit. Ang palaging kong paalala sa DOH at LGUs, dapat ma-implement nang maayos ang mga Super Health Centers, huwag maging white elephant and make it operational. Maganda ang layunin ng Super Health Center, at malaki ang tulong nito lalo sa mga mahihirap na pasyente.

Hindi rin ako titigil sa pagsusulong ng mga espesyal na serbisyong medikal sa mga rehiyon sa pamamagitan ng Republic Act No. 11959, na ako ang principal sponsor at isa sa mga may-akda. Sa batas na ito, itinatayo ang Regional Specialty Centers sa mga DOH hospitals upang hindi na kailangang bumiyahe ng malayo ang mga pasyente para lamang sa espesyal na gamutan.

Habang nakikinig ako sa mga mensahe ng mga Rotarian, lalo kong naramdaman kung gaano kalakas ang diwa ng volunteerism at malasakit kapag nagsanib. Sabi ko nga, kahanga-hanga ang Rotary sa patuloy nitong pagsasabuhay ng “service above self” — isang motto na hindi lang salita kundi paninindigan ng tapat na paglilingkod sa kapwa. Kapag pinagsama ang serbisyo ng pamahalaan at ng mga organisasyong tulad ng Rotary, mas malawak ang naaabot na tulong at mas maraming buhay ang nababago.

Huwag din nating kalimutan na bahagi ng pagseserbisyo sa bayan ay ang paglaban sa mga kanser ng lipunan tulad ng korupsiyon. I am one with the Filipino people in this crusade! Papanagutin natin ang tunay na mga mastermind sa flood control at ghost projects scandal. Hindi tayo papayag na malihis ang issue at dapat maparusahan ang mga tunay na may kasalanan.

Samantala, noong October 22, personal tayong nagtungo sa Barangay 127 sa Pasay City upang maghatid ng tulong sa 100 biktima ng sunog. Doon ay binisita rin namin ang pamilya ni Jamzy Jamero, isang 10-taong-gulang na tanging nasawi sa nasabing sunog, upang ipaabot ang aming pakikiramay at magbigay ng dagdag na tulong sa panahong kanilang pinagdaraanan.

Noong October 23, inimbitahan din kami sa ika-55 Annual Convention ng Philippine Association of Schools of Medical Technology and Public Health (PASMETH) sa Caloocan City.

Habang noong October 27, personal din tayong nagtungo sa Malabon City upang tulungan ang 459 na mga biktima ng sunog sa lungsod. Naghatid tayo ng tulong upang kahit papaano ay maibsan ang hirap na kanilang pinagdadaanan sa gitna ng trahedya.

Nitong October 28, nagtungo rin tayo sa Brgy. Pulang Lupa Uno, Las Piñas City upang makiramay at mag-abot ng tulong sa mga pamilyang nasunugan. Kasama ng aking Malasakit Team, tinugunan namin ang agarang pangangailangan ng 69 na pamilyang naapektuhan ng insidente.

Samantala, noong nakaraang linggo, bumisita ang Malasakit Team sa iba’t ibang komunidad upang maghatid ng tulong sa mga biktima ng sunog sa Iloilo City, Cagayan de Oro City, Sta. Cruz sa Davao del Sur, Cebu City, at Quezon City.

Nagbigay rin kami ng tulong sa mga maliliit na negosyante at mahihirap na pamilya sa ilang bayan sa Agusan del Sur, Tarlac at Bulacan; at mga barangay workers sa Cebu City.

Patuloy akong maglilingkod sa abot ng aking makakaya dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kaisa ako ng mga Pinoy sa krusada kontra-korupsiyon!

ni Bong Go @Bisyo Magserbisyo | October 24, 2025

Kaisa ako ng sambayanang Pilipino na sumusuporta sa anumang imbestigasyon hinggil sa mga anomalya sa flood control at mga ghost project. Dapat managot ang lahat ng may kinalaman sa kalokohang ito na nagpapahirap sa ating bayan. Ang taumbayan ay matagal nang naghihintay na maparusahan ang mga tunay na mastermind ng katiwalian.

Bilang inyong senador, kaisa ako ng mga Pilipino sa krusada laban sa korupsiyon. Nanawagan ako sa lahat ng imbestigador ng gobyerno — ungkatin natin ang katotohanan. Hinihikayat ko rin ang mga saksi na ilantad ang buong katotohanan. Kung malinis ang konsensya, walang dapat katakutan. Kung wala kang ginawang masama, wala kang dapat itago.

Sa buong buhay ko, lalo na bilang lingkod-bayan, lagi kong pinanghahawakan ang delicadeza. Inaalagaan ko ang aking dangal at pangalan. Hindi ko sasayangin ang tiwalang ibinigay ng ating mga kababayan. Naninindigan ako para sa pananagutan at katapatan sa serbisyo.

Hindi papayag ang mga Pilipino na malinlang o lituhin ng mga may gustong itago ang katotohanan. Kailangang magkaisa tayong lahat — mula sa karaniwang mamamayan hanggang sa pinakamataas na opisyal — para tapusin ang ganitong uri ng katiwalian.

Panahon na para managot ang mga tunay na salarin. Dapat matapos ang isyung ito nang malinaw at tapat upang makabalik ang lahat ng kawani ng gobyerno sa kanilang tunay na tungkulin, ang maglingkod nang tapat sa taumbayan.

Ngayon higit kailanman, kailangang magkaisa tayo laban sa korupsiyon. Ang laban na ito ay laban ng bawat Pilipino. Sama-sama nating ipaglaban ang katotohanan at integridad sa pamahalaan.

Samantala, bilang adopted son ng Maragondon, Cavite, personal kaming nakipag-ugnayan sa lokal na pamahalaan ng Maragondon, sa pangunguna ni Mayor Lawrence Arca, upang magbigay ng tulong pinansyal sa 2,930 senior high school at college students noong October 16.

Noong nakaraang linggo naman, walang sawang nag-ikot ang ating Malasakit Team sa iba’t ibang komunidad upang maghatid ng karagdagang tulong. Agad nilang tinulungan ang mga biktima ng sunog sa Caloocan City.

Nagbigay din tayo ng dagdag na tulong sa mga biktima ng sunog na unti-unti nang nakakabangon sa Bacoor City, Cavite, na nakatanggap din ng tulong mula sa pambansang pamahalaan upang muling makapagsimula.

Bukod dito, namahagi rin ng tulong ang ating Malasakit Team sa mga kababayan nating naapektuhan ng pagbaha sa Malita, Davao Occidental.

Sa tulong ng pambansang pamahalaan, nakapagbigay din tayo ng dagdag na tulong sa mga mahihirap na solong magulang sa Cebu City. Nagpaabot din tayo ng tulong sa mga bagong TESDA graduates sa Palawan.

Bilang lingkod-bayan, wala akong ibang hangarin kundi ang ikabubuti ng ating bansa at ang makamit natin ang hustisyang nararapat para sa bawat Pilipino. Patuloy akong makikipagtulungan sa anumang imbestigasyon at maglilingkod nang buong puso sa ating mga kababayan, sa abot ng aking makakaya — dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.