Ligtas na evacuation centers, isinusulong para sa mga biktima ng kalamidad

ni Bong Go @Bisyo Magserbisyo | February 20, 2026

Noong nakaraang linggo, sunud-sunod ang aking pagbisita o pagtulong sa mga lugar na naapektuhan ng sunog at ng Bagyong Basyang. Pinuntahan natin mismo ang mga nasunugan at nagpadala tayo ng tulong sa mga pamilyang inilikas dahil sa baha at malakas na hangin. Nakipag-usap tayo sa kanila, inalam ang agarang pangangailangan, at naghatid ng kaunting tulong.

Sa bawat lugar na aking napuntahan, makikita ang tibay ng Pilipino. May mga nawalan ng bahay, may mga nasira ang kabuhayan, ngunit nananatiling matatag. Marami ang nagsabi sa akin na magsisimula silang muli. Iyan ang likas sa atin—kahit ilang pagsubok ang dumaan, bumabangon pa rin.

Bilang lingkod-bayan, tuluy-tuloy ang aking pagtatrabaho, tuluy-tuloy ang pagmamalasakit. Hindi dapat huminto ang serbisyo dahil ang pangangailangan ng tao ay hindi rin humihinto. Sabi ko nga sa mga kababayan nating nasalanta, nandito lang ako para tumulong sa abot ng aking makakaya at sisikapin kong maihatid ang kinakailangang suporta upang makabangon sila sa lalong madaling panahon.

Huwag tayong mawalan ng pag-asa. Ang gamit ay napapalitan, pero ang buhay ay hindi. A lost life is a lost life forever. Magtulungan lang tayo, sino ba naman ang magtutulungan kundi tayong mga kapwa Pilipino.

Sa mga lugar na tinamaan ng sunog, nakita ko ang hirap ng mga pamilyang biglang nawalan ng tirahan – may mga batang nag-aaral pa rin sa kabila ng nangyari o kaya naman may mga magulang na iniisip agad kung paano magsisimula ulit ng kabuhayan. Sa mga evacuation center naman, kapansin-pansin ang siksikan at kakulangan sa maayos na pasilidad sa ilang lugar. Dito ko lalong nakita ang pangangailangang paghusayin pa ang ating disaster preparedness at mga pasilidad para sa mga evacuees.

Hindi sapat ang agarang suporta lamang. Mahalaga ang pangmatagalang solusyon. Kaya patuloy kong isinusulong ang mas matibay na mga programa para sa disaster resilience at pabahay upang mas maprotektahan at masuportahan ang ating mga komunidad.

Ako ang principal author at co-sponsor ng Republic Act No. 12076 o ang Ligtas Pinoy Centers Act. Layunin ng batas na ito ang pagtatayo ng permanente, matibay, at kumpletong evacuation centers sa buong bansa. Dapat may maayos, ligtas, at disenteng lugar ang mga kababayan natin tuwing may sakuna. Hindi sila dapat nakikipagsiksikan sa mga pasilidad, katuld ng mga paaralan, na hindi sapat para sa kanilang pangangailangan.

Bukod dito, muli kong inihain ang Senate Bill No. 173 o ang panukalang Department of Disaster Resilience Act. Layunin nitong magtatag ng isang hiwalay at dedikadong ahensya na magbubuklod sa disaster risk reduction, preparedness, response, at rehabilitation sa ilalim ng iisang institusyon. Mas magiging malinaw ang koordinasyon at mas magiging mabilis ang aksyon kung may iisang ahensyang nakatutok dito.

Likas sa mga Pilipino ang pagiging matibay sa harap ng pagsubok. Ngunit hindi ibig sabihin nito ay hahayaan na lang natin ang paulit-ulit na paghihirap. Bilang inyong senador, magtatrabaho ako, lalo na sa panahong nangangailangan ang kapwa natin Pilipino.

Noong February 11, personal nating tinulungan ang 33 biktima ng sunog sa Barangay 580, Sampaloc, Maynila. Habang noong February 13 naman, nagtungo tayo sa Barangay 76-A, Davao City upang tumulong sa 199 na Davaoeño na naapektuhan at lumikas dahil sa kamakailang insidente ng sunog.

Kasabay nito, ang ating team ay nagbigay din ng tulong sa iba’t ibang kababayan na nangangailangan, kabilang ang mga biktima ng sunog sa Puerto Princesa City, Palawan; Brgy. Punta Dumalag III, Davao City; Marilao, Bulacan; at Las Piñas City. 

Nagbigay rin ang team ng tulong sa mga naapektuhan ng Tropical Storm Basyang sa iba’t ibang bayan sa Agusan del Norte, tulad ng Cortes and Carmen sa Surigao del Sur; at Cabadbaran City, Tubay, at Kitcharao.

Samantala, nakatanggap din ng karagdagang tulong ang mga scholar ng Seamen Center sa kanilang graduation sa Sariaya, Quezon, pati na rin ang mga displaced workers sa Batangas City. Tumulong din tayo sa mga indigent students sa Baguio City.

Pinuntahan naman ng aking team ang blessing ng bagong Super Health Center sa Talakag, Bukidnon. 

Hindi kami titigil sa pagsuporta at paggawa ng mga batas para sa mga Pilipino dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Komprehensibong serbisyo para sa OFWs, edukasyon, at kalusugan

ni Bong Go @Bisyo Magserbisyo | February 13, 2026

Noong February 9, naghain ako ng mga panukalang batas sa Senado. Kung maisabatas ang mga panukalang ito, layunin ng mga ito na hanapan ng tugon ang pangangailangan ng iba’t ibang sektor ng ating lipunan —manggagawa, estudyante, pasyente, senior citizens, at mga komunidad sa mga probinsya.

Para sa mga Overseas Filipino Workers (OFWs), inihain ko ang Senate Bill No. 1776 o National Reintegration Bill. Layunin nitong ayusin at pag-isahin ang programang tulong ng iba’t ibang ahensya para sa mga umuuwing OFW—mula sa job fairs, pagkilala sa kanilang kasanayan, hanggang sa suporta sa kabuhayan at pagnenegosyo. Mahalaga sa akin na hindi natatapos ang suporta sa oras ng kanilang pag-uwi.

Sa usapin ng paggawa, inihain ko rin ang SBN 1778, na naglalayong magbigay ng survivorship benefits sa mga naiwang pamilya ng mga retiradong opisyal ng National Labor Relations Commission (NLRC), bilang pagkilala sa kanilang serbisyo.

Para sa edukasyon at kalusugan ng kabataan, inihain ko ang SBN 1780 o Mandatory School Clinics Act, na naglalayong maglagay ng school clinic sa bawat pampublikong elementary at high school. Bilang isang health reforms crusader, mahalagang matugunan nang maaga ang mga simpleng isyung pangkalusugan ng mga bata. Kasama rin dito ang SBN 1781 at SBN 1805 na may hangaring makapagtatag ng mga bagong public high school sa Davao Oriental.

Para sa higher education, inihain ko ang SBN 1782. Isusulong natin na gawing regular campuses ang mga extension campus ng Davao Oriental State University sa Baganga, Cateel, at Tarragona.

Inihain ko rin ang SBN 1779 o Nursing Home for Senior Citizens Act na layong magkaroon ng nursing home sa bawat rehiyon. Nag-file din tayo ng mga panukalang batas na hangad palakasin ang health care system sa pamamagitan ng pagpapatayo ng mga bagong ospital sa iba’t ibang bahagi ng bansa.

Para sa mga kawani ng gobyerno, inihain ko ang SBN 1786 na kung maisabatas ay magbibigay ng civil service eligibility sa mga matagal nang casual at contractual employees sa gobyerno. Para sa pagkain at sustainability, nandiyan ang SBN 1787 o Zero Food Waste Act, na naglalayong maipamahagi ang ligtas na sobrang pagkain sa mga nangangailangan.

Suportado rin ang maliliit na negosyo sa pamamagitan ng SBN 1777, na naglalayong i-institutionalize ang Shared Services Facilities Project para sa MSMEs. Para sa mga dentista sa gobyerno, inihain ko ang SBN 1788. Hangad nito na itaas ang kanilang salary grade.

Kasama rin sa ika-limang batch ang SBN 1785 na nagmumungkahi ng amendments sa Special Education Fund, at ang SBN 1791 o Bureau of Immigration Modernization Act na nakatuon sa upgrading ng mga sistema at istruktura ng ahensya.

Bilang inyong senador, prayoridad ko ang kapakanan ng kapwa nating Pilipino mula sa iba’t ibang sektor. Ang lahat ng ito ay bunga ng pakikinig ko sa iba’t ibang sektor. Dapat sumabay ang batas sa aktuwal na kalagayan ng mga tao sa makabagong panahon.

Kamakailan lamang, pinarangalan po tayo ng Gawad Bayani ng Kalusugan Award sa ginanap na World Cancer Day 2026 celebration na inorganisa ng Redscope Communications, Inc. noong February 4. Lubos po akong nagpapasalamat sa pagkilalang ito, but with or without an award, magpapatuloy po akong maglingkod sa ating mga kapwa Pilipino, lalo na sa mga cancer patients, nang may buong malasakit at pagmamahal.

Habang tayo ay nagpapatuloy, nawa’y patuloy tayong humugot ng inspirasyon at lakas mula sa ating mga cancer cancer warriors sa pagbalangkas ng mga batas at pagsusulong ng mga programang magpapabuti sa kanilang kalagayan.

Samantala, noong February 3, binisita po natin ang 45 pamilyang naapektuhan ng sunog sa Pasay City. Isinagawa rin ang karagdagang assessment upang matukoy ang posibleng rehabilitation interventions para sa kanila.

Nakisaya rin tayo sa opening ceremony ng Filipino-Chinese Athletic Association Basketball League sa pangunguna ni FCAAI Chairman Wilbert Loa. Bilang Chairman ng Senate Committee on Sports, malaki ang suporta ko sa mga ganitong aktibidad na nagbibigay oportunidad sa ating mga atleta. Lagi kong paalala:  get into sports, stay away from drugs, to keep us healthy and fit.

Bukod dito, naghatid din ng tulong ang ating team sa mga residenteng naapektuhan ng mga insidente ng sunog sa Puerto Princesa City sa Palawan; Quezon City; Santa Rosa City, Laguna; Bacoor City, Cavite; at Marikina City. Naghatid din ang aking team ng tulong sa mga residenteng naapektuhan ng Bagyong Basyang sa Iligan City, sa Cagayan de Oro City, Lagonglong at Gingoog City sa Misamis Oriental, at sa mga bayan ng Surigao del Norte sa Mainit, Claver, Bacuag, Tagana-an, Sison, at San Francisco.

Nakipag-ugnayan din ang ating team sa lokal na pamahalaan ng Macabebe, Pampanga, upang makapagbigay ng karagdagang tulong sa mga indigent residents.

Bilang isang lingkod-bayan, patuloy po akong magsisikap na maghanap ng mas marami pang paraan na makatulong upang mapabuti ang buhay ng ating mga kapwa Pilipino dahil bisyo ko ang magserbisyo at naniniwala ako na ang serbisyo sa tao ay serbisyo din sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

PhilHealth funds, para sa pasyente, hindi sa ibang proyekto

ni Bong Go @Bisyo Magserbisyo | February 6, 2026

Bilang isang health reforms crusader, mahalaga sa akin ang sapat, maayos at napapanahong pagbabayad ng benepisyo ng Philippine Health Insurance Corporation (PhilHealth) para sa ating mga kababayan. Malaking tulong sa mga Pilipino, lalo na ang mga mahihirap, ang iniulat ng PhilHealth na marami umanong benefit claims ang napakinabangan ng mga pasyente nitong nakaraang taon.

Lagi kong sinasabi, ang pondo ng PhilHealth ay dapat gamitin sa health. Pera ito ng taumbayan at dapat lamang na ibalik sa kanila sa pamamagitan ng maayos na serbisyong medikal. Karapatan ng mga pasyente na maramdaman ang ginhawang dulot kapag nababawasan ang pasanin sa gastos. Sa panig ng mga ospital, mahalaga ang tuluy-tuloy na daloy ng pondo upang maipagpatuloy ang serbisyong medikal.

Sa sesyon ng Senado nitong Martes, muli tayong nanawagan para matugunan ang tinatawag kong "double whammy" sa pondo ng PhilHealth noong isang taon – ang P60 bilyong "excess funds" na ilegal at imoral na kinuha sa PhilHealth para gamitin sa ibang proyekto, at ang zero budget ng ahensya sa 2025.

Salamat sa Supreme Court dahil ipinag-utos na ibalik sa PhilHealth ang P60 bilyon. Pero paano naman ang pondong ipinagkait sa mga pasyente dahil sa zero budget allocation noong isang taon? Napakarami sanang Pilipinong may sakit ang natulungan nito, napakaraming buhay sana ang naisalba. Mariin ang ating panawagan na maibalik ito sa taumbayan.

Bilang inyong senador, patuloy kong isusulong ang mga batas, programa, at reporma na mangangalaga sa kalusugan ng mga Pilipino lalo na ng mahihirap nating mga kababayan.

Samantala, tuluy-tuloy ang pagbibigay-tulong natin sa mga kababayan nating nangangailangan. Nitong January 28, personal tayong nagtungo sa Makati City para maghatid ng assistance sa mga pamilyang nasunugan doon. Nakasama ko rin ang mga barangay officials sa pag-iikot sa lugar ng insidente. Sa sumunod na araw, January 29, binigyang-pugay natin ang mga Barangay Health Workers nang dumalo tayo sa UNI Global Union Philippine Liaison Council (UNI-PLC) BHW Island Cluster Training and Planning Session sa B Hotel, Quezon City.

Personal din nating binisita ang mga residenteng nasunugan sa Barangay 139, Zone 15, Pasay City at nagbigay ng tulong sa mga ito. 

Nagpatuloy rin ang aking team sa pagbibigay ng agarang tulong sa mga biktima ng sunog sa Quezon City; Manay, Davao Oriental; Puerto Princesa City, Palawan; Sta. Rosa, Laguna; at Iligan City, Lanao del Norte. Nagbigay rin kami ng tulong sa ilang indigent na residente sa Macabebe, Pampanga. Bukod dito, naghatid din kami ng ayuda sa mga biktima ng lindol sa Lebak, Sultan Kudarat.

Nagpaabot din tayo ng pakikiramay at tulong sa mga naiwang pamilya ng mga sundalong killed in action (KIA) na sina Sgt. Gilbert P. Arnoza, Sgt. Junel M. Calgas, Pfc. Sean Mark A. Laniton, at Ssg. Diosito A. Araya, na nasawi sa isang ambush incident noong January 23 habang ginagampanan ang kanilang tungkulin.

Kaugnay ng parehong insidente, kinamusta rin natin ang wounded-in-action (WIA) na si Cpl. Rollen dela Cruz ng 10th Infantry Battalion sa Camp Evangelista, Cagayan de Oro City, bilang pagpapakita ng malasakit, pagkilala sa kanilang sakripisyo, at pagbibigay-diin sa kanyang patuloy na suporta at panalangin para sa mga uniformed personnel at kanilang mga pamilya.

Bilang mambabatas, gagawin ko ang aking trabaho sa abot ng aking makakaya upang mapabuti ang buhay ng ating mga kababayan dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.