Tulong medikal at serbisyong may malasakit, patuloy na ilapit sa mga nangangailangan

ni Bong Go @Bisyo Magserbisyo | Feb. 5, 2025

Sa lumipas na mahigit isang siglo, malaking bahagi ng kasaysayan ng bansa at ng kalusugan ng mga Pilipino ang Philippine General Hospital. 

Ito ang pinakamalaking tertiary hospital ng gobyerno at nagbibigay serbisyo sa mahigit 700,000 pasyente kada taon. Sa kabila nito, kapos ang PGH sa bilang ng mga kama kung kaya’t lumalampas sa 200 percent ang occupancy rate nito. Ang resulta, hindi lang isa kundi hanggang tatlong pasyente ang nagsisiksikan sa isang kama minsan habang ang iba ay napipilitang maghintay sa pasilyo para lang malapatan ng lunas.  

Nitong Lunes, February 3, inaprubahan na sa Senado sa ikatlo at huling pagbasa ang Senate Bill No. 2928, na naglalayon na madagdagan ang bed capacity ng PGH na mula 1,334 ay magiging 2,200. Ang inyong Senator Kuya Bong Go ang may-akda at principal sponsor ng panukala. Nagpapasalamat ako sa aking mga kapwa mambabatas sa pagsuporta sa panukalang ito. 

Ang PGH ay isang mahalagang institusyon para sa ating mga kababayang nangangailangan ng libre at dekalidad na serbisyong medikal. Kapag tuluyang naging ganap na batas ang SBN 2928, mas maraming pasyente ang matutulungan at mabibigyan ng mas maayos na pangangalaga. 

Bilang Chairperson ng Senate Committee on Health, prayoridad nating mapaganda ang serbisyo sa PGH. Naglagay tayo rito noon ng Malasakit Center na isang one-stop shop para hindi na magpalipat-lipat ang pasyente sa paglapit sa DOH, DSWD, PCSO, at PhilHealth para humingi ng tulong medikal dahil pinagsama-sama na natin sila sa iisang kuwarto. Isa ang PGH sa unang nagkaroon ng Malasakit Center, at patuloy ang suporta natin doon tulad ng aming regular na palugaw para sa mga pasyente at frontliners.

Alam nating marami ang lumalapit sa PGH para magpagamot, kaya dapat lang na tiyakin natin na may sapat na tulong para sa kanila.

Nang magkaroon dito ng sunog noong 2021, agad tayong umalalay para maipaayos ito at hindi maantala ang operasyon. Sinuportahan din natin ang pagpopondo, sa ating kapasidad bilang Vice Chairperson ng Senate Committee on Finance, para makapagpatayo rito ng mga karagdagang pasilidad. Kabilang dito ang "halfway house" o "watchers' hall" para may pansamantalang matutuluyan ang mga bantay ng pasyente na natutulog lang sa sahig o sa upuan. 

Ang pagdaragdag ng hospital beds — hindi lang sa PGH — kundi maging sa iba pang pampublikong ospital ay isa sa marami pang kailangang hakbang para unti-unti nating mapalakas ang ating healthcare system. Sa nakalipas na halos anim na taon ng ating pagiging senador, naging principal sponsor tayo ng 82 batas — ang 80 rito ay para sa pag-a-upgrade ng ating health facilities. 

Health is wealth, at ang kalusugan ay katumbas ng buhay ng bawat Pilipino. Hindi tayo titigil sa pagsusulong ng mga reporma para mapabuti ang ating healthcare system. Patuloy nating ilapit ang serbisyong medikal sa ating mga kababayan. Ilapit natin ang serbisyong may malasakit sa mga nangangailangan.

Samantala, tuluy-tuloy naman tayo sa pagseserbisyo. Naging guest of honor and speaker tayo sa Labong Lodge 59 132nd Installation of Elected and Appointed Officers for Masonic Year 2025 to 2026 noong February 1 na ginanap sa Maynila sa imbitasyon ni Worshipful Master and Coun. Gerald Teruel. Nakiisa rin tayo sa ginanap na Berde Come Back: 2025 La Salle Greenhills Alumni Homecoming sa Mandaluyong City.

Dumalo tayo sa Liga ng mga Barangay Eastern Samar Chapter Provincial Congress, Seminar Workshop, and Benchmarking for LGU Best Practices noong February 3 na ginanap sa Quezon City sa paanyaya ni Gov. Ben Evardone. Personal din nating pinangunahan ang pamamahagi ng tulong para sa 46 kooperatiba sa CALABARZON, na ginanap sa Dasmariñas City, Cavite kasama ang Cooperative Development Authority bukod sa tulong pinansyal mula sa kanilang Malasakit sa Kooperatiba na programa. 

Kahapon, February 4, may 223 na kooperatiba naman sa Maynila ang personal nating pinagkalooban ng tulong kasama ang CDA, sa ilalim ang kanilang Malasakit sa Kooperatiba na programa. 

Sinaksihan naman ng aking opisina ang paglulunsad ng Super Health Center sa Carcar City, Cebu kasama si Mayor Patrick Barcenas.

Ipinadala ko rin ang aking Malasakit Team sa iba’t ibang komunidad, at naalalayan natin ang mga naging biktima ng insidente ng sunog gaya ng 31 residente ng Tondo, Maynila; 77 sa Cebu City; at 32 sa Tacloban City.  

Nagbigay tayo ng tulong sa 250 mahihirap na residente ng Lumban, Laguna katuwang si Coun. Ann Anoñuevo. Sa ating inisyatiba ay napagkalooban din ang mga benepisyaryo ng tulong pinansyal mula sa lokal na pamahalaan. 

Naghatid din tayo ng suporta para sa 90 scholars ng University of Batangas, Lipa Campus. May palugaw tayo sa ginanap na Araw ng Biñan Laguna Feeding Program, bukod pa ang tuluy-tuloy nating katulad na inisyatiba sa mga ospital na may Malasakit Center para sa mga pasyente, kanilang bantay at hospital staff. 

Patuloy akong magseserbisyo sa inyo dahil bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Isang karangalan ang makapagserbisyo sa kapwa Pilipino

ni Bong Go @Bisyo Magserbisyo | Feb. 1, 2025

Lagi kong ipinagpapasalamat sa Panginoon ang pagkakataong mapaglingkuran ko nang tapat ang ating mga kababayan. Ang tiwala at suporta ng aking mga kapwa Pilipino ang nagbibigay sa akin ng inspirasyon na ipagpatuloy ang aking pagseserbisyo sa abot ng aking makakaya.

Ang lagi kong paalala sa sarili, palaging magpasalamat at huwag sayangin ang pagkakataon na naibigay sa akin para makatulong sa iba lalo na sa mga nangangailangan.

Nagpapasalamat din tayo dahil nananatiling buo ang tiwala sa atin ng ating kapwa Pilipino, base na rin sa pinakahuling mga survey tulad ng Social Weather Stations (SWS) na inilabas nitong January 28, kung saan nasa ikatlo hanggang ikaapat na puwesto tayo sa 2025 senatorial race.

Umasa kayo na ang probinsyanong tulad ko na binigyan ninyo ng pagkakataong makapagserbisyo ay lalo pang magtatrabaho dahil iyan naman ang mandatong ibinigay ninyo sa akin.Katunayan, bilang Chairperson ng Senate Committee on Health, ay muli tayong magpapatawag ng hearing sa darating na February 5, para patuloy na isulong ang mga reporma sa sektor ng kalusugan at palakasin ang ating healthcare services.

Paalala natin sa publiko, gamitin ninyo ang komite para makapaghayag ng inyong mga hinaing, saloobin, at suhestiyon.

Tulad ng ipinangako ng inyong Senator Kuya Bong Go, hindi tayo titigil sa pagbabantay para mapaganda ang mga serbisyo at benepisyong medikal lalo na para sa mahihirap.

Muli nating kukumustahin ang mga repormang ipinangako at mga ipinapatupad na ng PhilHealth. Hindi tayo papayag na hanggang “promise” lamang ang mga ito matapos nating madiskubre ang sobra-sobra nilang reserve funds. Dapat ang pera ng PhilHealth ay gamitin para sa health!

Ang PhilHealth ay hindi negosyo na dapat mag-ipon ng pondo. Ito ay medical insurance para sa lahat upang may masasandalan tayo kapag nagkasakit.

Kaya dapat nilang gamitin ang kanilang pondo para mapakinabangan ng taumbayan. Galit ang Pilipino dahil kaltas sa sahod natin ‘yang kontribusyong nakokolekta ng PhilHealth na dapat suklian nila ng maayos na serbisyo at sapat na benepisyo kapag nagkasakit.

Patuloy rin nating pagtitibayin pa ang mga programang nakapaghatid na ng tulong sa milyun-milyong Pilipino. Tulad na lamang ng Malasakit Centers Act o Republic Act No. 11463 na tayo ang principal author at sponsor.

Sa tulong ng mga kasamahan ko sa gobyerno, umaasa tayo na madadagdagan pa ang 166 Malasakit Centers sa buong bansa at ang 15 milyong Pilipinong natulungan na nito.

Isinulong din natin ang patuloy na pagpapatayo ng Super Health Centers sa buong bansa na naghahandog ng primary healthcare, konsultasyon, at early detection services sa mga komunidad.

Mayroon na tayong mahigit 600 Super Health Centers na napondohan sa ating pagsisikap bilang Vice Chair ng Senate Finance Committee, katuwang ang DOH, LGUs, at mga kapwa mambabatas — at madadagdagan pa ito ngayong taon.Principal sponsor din tayo at isa sa may-akda ng RA 11959, o ang Regional Specialty Centers Act, na naghahatid ng specialized medical care sa lahat ng rehiyon sa pamamagitan ng pagtatayo ng specialty centers sa mga regional hospital na pinamamahalaan ng DOH.

Mga paraan ito upang ilapit ang serbisyo ng gobyerno sa tao, lalo na pagdating sa kalusugan.

Tututukan din natin ang implementasyon ng mga bagong batas na ating isinulong tulad ng RA 12077, o ang Student Loan Payment Moratorium During Disasters and Emergencies Act na tayo ay co-author at co-sponsor; RA 11997, o ang “Kabalikat sa Pagtuturo Act,” na nagkaloob ng dagdag na teaching supply allowances sa public school teachers; ang RA 12076 o ang Ligtas Pinoy Centers Act, na tayo ang principal author, na layong magtatag ng evacuation centers sa bawat sulok ng bansa para maprotektahan ang dignidad ng ating evacuees; gayundin ang mga batas na magpapaganda sa serbisyo ng iba’t ibang mga ospital sa maraming bahagi ng bansa.

Samantala, nakiisa tayo sa ating mga kababayan sa pagsalubong sa Chinese New Year noong January 29 sa paanyaya ni dating Manila Mayor Isko Moreno.

Naging bahagi tayo ng ginanap na PDP National Campaign Coordination Meeting sa Davao City na pinangunahan nina party chairman at former President Rodrigo Duterte at Senator Robin Padilla, ang party president.Kahapon, January 31, nasa Sultan Kudarat tayo at pinangunahan ang pamamahagi ng tulong para sa 1,000 mahihirap na residente mula sa Lebak, at 1,000 din sa Sen. Ninoy Aquino (SNA) kasama sina Vice Mayor Rafael Flauta III ng SNA, Mayor Frederick Celestial at Vice Mayor Bong Alarcon ng Lebak, at pati na rin sa pakikipagtulungan nina Maguindanao del Sur Governor Bai Mariam Mangudadatu at Sultan Kudarat Gov. Datu Pax Ali Mangudadatu.

Sa ating pakikipagtuwang sa lokal na pamahalaan, nabigyan din ang mga benepisyaryo ng tulong pinansyal.

Naghatid naman ng tulong ang aking Malasakit Team sa iba’t ibang komunidad at naalalayan natin ang 12 biktima ng insidente ng sunog sa Davao City.Napagkalooban ng dagdag na tulong ang 188 scholars ng WCC Aeronautical College, Inc. sa Caloocan City na ating sinuportahan bilang Chair ng Senate Committee on Youth.

Natulungan naman ang 79 na nawalan ng hanapbuhay sa Calamba City, Laguna katuwang si Mayor Ross Rizal — na sa ating pakikipagkapit-bisig sa DOLE ay nabigyan ng pansamantalang trabaho.

Sinuportahan din natin ang turnover ng mga bitamina at iba pang mahahalagang gamot para sa 23 barangay ng Malinao, Albay, sa pakikipagtulungan ni Councilor Carol Ziga.

Tuluy-tuloy din ang ating palugaw initiative sa mga ospital na may Malasakit Center para sa mga pasyente, kanilang bantay at hospital staff. Lagi kong naririnig kay Tatay Digong na sa pagseserbisyo: “Just do what is right.” At ‘yan ang patuloy kong sinusunod.

Gawin lang ang tama, unahin ang kapakanan ng mga mahihirap, at hinding-hindi ka magkakamali. 

Minsan lang tayong dadaan sa mundong ito. Kung anong kabutihan o tulong na puwede nating gawin sa ating kapwa, gawin na natin ngayon dahil hindi na tayo babalik sa mundong ito.

Bilang inyong Mr. Malasakit, patuloy akong magtatrabaho at magseserbisyo sa inyo sa abot ng aking makakaya. Bisyo ko ang magserbisyo at naniniwala ako na ang serbisyo sa tao ay serbisyo sa Diyos.

Sipag at serbisyo ang puwede kong ialay sa ating mga kababayang Pilipino. Umasa kayo na dodoblehin ko ang aking pagtatrabaho dahil ‘yan naman ang focus ko simula’t sapul, ang magserbisyo at magampanan ang ating mandato. Ako ang inyong Senator Kuya Bong Go, laging bukas ang aking opisina para sa inyong lahat!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Proteksyunan ang kapakanan at karapatan ng mga uniformed personnel

ni Bong Go @Bisyo Magserbisyo | Jan. 29, 2025

Totoo na ang ating mga sundalo, pulis, at iba pang uniformed personnel ay laging nahaharap sa iba’t ibang uri ng panganib sa pagtupad ng kanilang mandato. Sinusunod nila ang kanilang sinumpaang tungkulin na panatilihin ang kapayapaan at kaligtasan ng ating bansa, at ipinatutupad ang batas nang may tapang at paninindigan. Sila rin ang ating sandalan at tagapagligtas sa panahon ng mga sakuna at krisis. 

Gayunpaman, may mga pagkakataon na nahaharap sila sa mga isyung legal sa kanilang matapat na pagtupad sa tungkulin. Sa mga sitwasyong tulad nito, dapat tiyakin ng ating pamahalaan na hindi maramdaman ng mga uniformed personnel na nag-iisa sila para ipagtanggol ang kanilang mga sarili. 

Kaya nitong Lunes, January 27 ay naaprubahan na sa Senado sa ikatlo at huling pagbasa ang Senate Bill No. 2814, o ang Free Legal Assistance for Military and Uniformed Personnel (MUP) Act, na tayo ang principal author. Bilang Vice Chairperson ng Committee on National Defense, pinasalamatan natin ang ating mga kapwa mambabatas sa kanilang suporta sa panukala. Kung tuluyang maging ganap na batas, layunin ng SBN 2814 na magkaloob ng free legal assistance sa ating MUPs na mahaharap sa problemang legal sa kanilang pagtupad sa tungkulin. 

Simula’t sapul at buhat pa noong panahon ni dating Pangulong Rodrigo Duterte, ay laging naririyan ang aking buong suporta sa ating mga sundalo, pulis, at iba pang uniformed personnel. Hindi natin sila pinababayaan. Naging instrumento tayo para madoble ang kanilang suweldo sa ilalim ng Duterte administration. Ang tanging hiling lang natin sa kanila, gawin nang tama ang kanilang mandato na naaayon sa batas, laging unahin ang interes ng bansa, at proteksyunan ang mga Pilipino lalo na ang mga mahihirap.

Samantala, hindi rin tayo humihinto sa pagseserbisyo sa mga kapwa natin Pilipino. Nasa Occidental Mindoro tayo noong January 25 at personal na sinaksihan ang inagurasyon ng itinayong Super Health Center sa Mamburao. Personal din nating pinangunahan ang pamamahagi ng tulong sa 178 nawalan ng tirahan sa Rizal, Calintaan at Sablayan, na sa ating inisyatiba ay nabigyan din ng tulong pinansyal ng pamahalaan sa ilalim ng programang ating isinulong para may pambili sila ng materyales na pampaayos ng kanilang tahanan. 

Bilang adopted son ng probinsya ng Occidental Mindoro at pati ng bayan ng Sablayan, dumalo rin tayo sa groundbreaking ng itatayong Sablayan Sports Complex — na napondohan sa ating kapasidad bilang Vice Chairperson ng Senate Committee on Finance at kaakibat ng ating inisyatiba na grassroot sports development bilang tayo ang Chairperson ng Senate Committee on Sports. Binisita rin natin ang Super Health Center sa Sablayan na ating isinulong bilang Chairperson ng Senate Committee on Health. 

Noong January 26, nakisaya naman tayo sa Dinagyang Festival sa Iloilo. Pareho kong dinaluhan ang mga selebrasyon na ginanap sa Freedom Grandstand at Iloilo Provincial Capitol. Nagbigay-pugay tayo sa mainit na pagtanggap nina Governor Arthur Defensor Jr., Iloilo City Mayor Jerry Treñas, Congresswoman Jam Baronda, at iba pang mga lokal na opisyal. 

Bukod sa Dinagyang Festival, binisita rin natin ang Malasakit Center na nasa Western Visayas Medical Center at nagpameryenda ng lugaw para sa mga pasyente, kanilang mga bantay at hospital staff. Namahagi rin tayo ng tulong tulad ng food packs sa mga healthcare worker at hospital staff doon.

Dumalo naman tayo noong January 27 sa ginanap na Philippine Sportswriters Association Awards Night sa Maynila sa paanyaya ni PSA President Nelson Beltran. Bilang Chairman ng Senate Committee on Sports at on Youth, tayo ang nag-present ng award kay Carlos Yulo na hinirang bilang Athlete of The Year, at ng Hall of Fame award kay Hidilyn Diaz. 

Sinaksihan naman ng aking opisina ang turnover ng itinayong Super Health Center sa San Luis, Agusan del Sur noong araw ding iyon. 

Kahapon, January 28, ang mga kababayan natin sa Pampanga ang aking binisita. Personal nating pinangunahan ang pamamahagi ng tulong para sa 1,200 mahihirap sa Bacolor, na sa ating pakikipagtuwang sa lokal na pamahalaan ay napagkalooban din ng tulong pinansyal. Pinangunahan din natin ang pagkakaloob ng tulong para sa 200 maliliit na negosyante sa lugar, na sa ating inisyatiba ay nakatanggap din ng livelihood kits mula sa DTI. 

Ipinadala ko naman ang aking Malasakit Team sa iba’t ibang komunidad para maghatid

ng tulong. Naalalayan natin ang mga naging biktima ng sunog sa apat na barangay sa Pasay City.

Tinulungan nating makabangon muli ang mga nawalan ng tirahan sa North Cotabato kabilang ang 11 sa Aleosan, pito sa Midsayap, at tatlo sa Libungan. Nabigyan din sila ng emergency housing allowance mula sa NHA na ating isinulong para may pambili sila ng materyales na pampaayos ng kanilang tirahan.

Namahagi rin tayo ng dagdag na tulong sa mga student scholar kabilang dito ang 325 sa Cagayan, 40 sa Benguet, at 55 pa sa ginanap na orientation sa Benguet State University. 

Nagbigay tayo ng tulong para sa 88 maliliit na negosyante sa Baras, Rizal katuwang si Mayor Wilfredo Robles, na sa ating inisyatiba ay nabigyan din ng tulong pangkabuhayan ng pamahalaan. 

Patuloy na magseserbisyo ang inyong Senator Kuya Bong Go sa abot ng aking makakaya. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.