PhilHealth, kailangang sabayan ang inflation sa pagbibigay ng ayuda sa miyembro

ni Ka Ambo - @Bistado | October 8, 2022

Nilinaw ng PNP sa Senado na wala nang krimen na iniuugnay sa operasyon ng Philippine Offshore Gaming Operators (POGO).

Mainam naman.

◘◘◘

BATAY ang impormasyon sa datos mula nang isagawa ang pagdinig ng Senate Committee on Public Order and Dangerous Drugs noong September 15.

Inihayag ito sa joint hearing ng nasabing komite at ng Committee on Ways and Means noong Lunes.

◘◘◘

IBINASURA ng naturang datos ang opinyong nagiging grabe ang kriminalidad dahil sa POGO.

Inamin ni NCRPO acting Regional Director PBGen. Jonnel Estomo, na mas pinaigting nila ang police visibility at wala nang naitalang krimen kaugnay sa POGO sa NCR, Regions 3 at 4.

◘◘◘

KINATIGAN ang naturang report nina Region 3 ARD PBGen. Cesar Pasiwen at Region IV-A ARD PBGen. Jose Melencio Nartatez, Jr.

Naniniwala si Estomo na posibleng may nananabotahe lamang dahil ang mga krimeng binabanggit ay naganap noon pang Hulyo.

◘◘◘

NANG tanungin ni Sen. Sherwin Gatchalian, nanindigan ang NCRPO chief na kayang solusyunan ang krimen sa Kamaynilaan at sa buong bansa.

Hindi rin makatwiran na gamiting dahilan ang krimen para pigilin ang lehitimong operasyon ng POGO na nagpapasok ng buwis sa bansa at nagbibigay ng trabaho sa mga tao.

◘◘◘

SA gitna ng krisis, maraming tao ang dumaranas ng depresyon at sakit—hindi maayos na maipaliwanag ng mga eksperto.

Mahalaga ang tulong ng PhilHealth sa sitwasyong ito ng mamamayan ngayon.

◘◘◘

MAY kasabihan, ang sakit sa puso ay sakit “pang-mayaman”, paano na ang ordinaryong mamamayan?

Alam mo bang kailangan ang halos isang milyon piso sa coronary artery bypass graft surgery?

Buwan-buwan ay kinakaltasan ang suweldo ng mga obrero ng PhilHealth at umaasang makakatulong ito kung sakaling magkasakit nang grabe ang mga miyembro.

◘◘◘

SA isang briefing ng PhilHealth para sa Senate Committee on Government Corporations and Public Enterprise noong October 5, ibinunyag ni committee chairman Senator Alan Peter Cayetano, na ang package ng PhilHealth para sa nabanggit na procedure ay P550,000 lamang pero ang actual cost sa ospital ay aabot sa P907,000.

Ibig sabihin, kailangan pang magdelihensya ng dagdag-P357,000 para maoperahan.

◘◘◘

MARAMING Pinoy ang namamatay nang hindi na nagpapaopera at nagagamot.

Nabatid na anim sa bawat sampung Pilipino ay namamatay na lang nang hindi man lang nakapagpapatingin sa doktor.

◘◘◘

SA isang survey noong 2019, aabot sa 99% ng mga Pilipino ang hindi bumibili ng gamot na inirereseta.

Aabot sa 44.7% ng gastos sa healthcare ay ang mamamayan mismo ang gumagastos imbes na ang PhilHealth o ibang insurers.

◘◘◘

NANINIWALA si Cayetano na kailangang i-adjust na rin ang serbisyo ng PhilHealth.

Ito ay dahil na rin sa inflation o mataas na presyo ng bilihin at serbisyo.

Kapos ang ayuda na ibinibigay ng PhilHealth kaya’t dapat i-review at i-update ang benefit packages ng PhilHealth.

Angat ang speech ni P-BBM sa gen assembly ng UN

ni Ka Ambo - @Bistado | September 22, 2022

PERFECT ang talumpati ni Pangulong Ferdinand Marcos, Jr. sa general assembly ng UN.

Napakahusay ng kanyang delivery.

◘◘◘

MAS gumanda pa sana kung nahaluan ng kahit ilang pangungusap, na-Tagalog o naka-Ilokano—bilang panghimagas o pang-“break” sa oratoryo.

Maraming Pinoy sa US at sa buong mundo na sumusubaybay sa Pangulo.

◘◘◘

KOMPLETOS-RECADOS ang talumpati at walang duda na natapatan niya, kung hindi man ay nahigitan ang talumpati ng kanyang ama na si Pangulong Marcos, Sr.

Maraming nagsasabi, nabuhay talaga si Marcos.

◘◘◘

SA totoo lang, ang talumpati ni P-BBM ay pang-world leader dahil nakapokus ito sa survival ng sangkatauhan at panghinaharap.

Ipinakikita rin dito ang pag-angat ng mga Pinoy bilang modernong nasyon sa ibabaw ng lupa.

◘◘◘

MALINAW ang mensahe ni P-BBM, indispensable partner ang US ng Pilipinas.

Batay mismo 'yan sa tradisyon at umiiral na kasunduan.

Gayunman, nananatili ang Pilipinas—na walang kaaway at kaibigan ng lahat ng bansa.

◘◘◘

SA likod ng pagdalaw sa US, dapat maging simula ito ng seryoso at masiglang kalakalan ng dalawang bansa.

Mas mainam ay mahimok ni P-BBM ang malawakang industriyalisasyon ng Pilipinas katuwang ang mga US investors.

◘◘◘

KUNG seryoso ang US na tulungan at makipag-partner sa Pilipinas, mabilis tayong makakarekober at uunlad tungo sa tindig ng Vietnam, South Korea, Singapore at Japan.

Maganap sana ito sa termino ni P-BBM.

◘◘◘

MASINOP na naisingit ni P-BBM ang posisyon ng Pilipinas sa West Philippine Sea nang banggitin niya ang “rules-based” na kasunduan sa United National Law of the Sea.

Nilinaw din nito ang pag-iwas ng bansa sa anumang gusot na magiging sanhi ng paghihiwa-hiwalay ng mga bansa.

◘◘◘

PAGKAKAISA, pagtutulungan at kapayapaan ang “kumpas” dapat ng lahat ng lider ng mga bansa.

At kasama d'yan ang umuunlad nang Pilipinas.

◘◘◘

IBINANDO ng Pangulo ang pambihirang pagkakaisa ng Muslim at Kristiyano sa Mindanao sa pagkakabuo ng BangsaMoro Autonomous Region.

Isang markado ito ng wagas na kapayapaan sa Timog ng bansa.

Maraming umaasa sa pag-unlad ng Pilipinas sa kamay ni Marcos, Jr.

ni Ka Ambo - @Bistado | September 21, 2022

TILA magtatagal pa ang giyera ng Russia at Ukraine.

Nakakaresbak kasi ang Ukraine sa tulong ng ibang bansa.

◘◘◘

NAKAKADEPENSA naman ang Russia sa embargo ng US at mga kaalyado.

Tumitibay ang Ukraine laban sa Russia.

Pero, tumitibay din ang Russia kontra sa US at mga kaalyado nito.

◘◘◘

NAGKAKAINITAN naman ang US at China dahil sa Taiwan.

Kung ano ang nararanasan ng Ukraine, posibleng ganyan ding senaryo ang mararanasan ng Taiwan kung sakaling dambungin ng China.

◘◘◘

KINUMPIRMA ni US President Joe Biden na dedepensahan nila ang Taiwan kung sakaling salakayin ng China.

Parehong-pareho ng sitwasyon sa Ukraine.

◘◘◘

IMBES na Russia, ang China ang posibleng sumalakay sa Taiwan—at tulad sa sitwasyon ngayon ng Moscow, magdedeklara rin ng embargo ang US at kaalyadong bansa kontra Beijing.

Nasa America ngayon si President Marcos, Jr at kung sakaling sumiklab ang Taiwan-China war, aktuwal na iiral ang US-PHL Mutual Defense Treaty.

Kung sino ang kalaban ng US, siya ring kalaban ng Pilipinas.

◘◘◘

NAPAKAGANDA ng talumpati ni P-BBM sa New York Stock Exchange.

Malinaw ang kanyang promosyon sa Pilipinas.

◘◘◘

MAKAKATULONG nang malaki sa ekonomiya ng Pilipinas ang pagdalaw ni P-BBM sa Amerika.

Makikinabang dito ang bansa.

◘◘◘

MARAMI ang nagsasabi, magkamukhang-magkamukha ang estilo sa pagtatalumpati ng matandang Marcos at ng kanyang junior.

Marami ang umaasa sa ibayong pag-unlad ng Pilipinas mula sa asiste ng US at kaalyadong bansa.