Oks ang strategy ni P-BBM kontra droga

ni Ka Ambo - @Bistado | October 19, 2022

WALANG pinakaimportanteng elemento sa ibabaw ng mundo, kundi ang buhay.

'Yan ang esensya ng ating existence o pagiging nilalang.

◘◘◘

NUMERO unong prayoridad ang buhay.

Natutuwa tayo dahil nakapundasyon ang kampanya ni P-BBM kontra sa illegal drugs sa pag-iwas sa pagdanak ng dugo.

◘◘◘

TALIWAS kay ex-PRRD na prayoridad ang pagsugpo sa illegal drugs kahit magbuwis ng buhay ang mga suspek, mas nakatutok ang giyera kontra ilegal na droga ni P-BBM sa makataong pamamaraan.

Nakita natin ito nang makumpiska ang P6.7 bilyong halaga ng ilegal na droga—nang walang dumanak na dugo.

◘◘◘

WALA ring nasaktan sa mga naarestong suspek sa magkahiwalay na pagsalakay sa Tondo, Maynila at Pasig City.

Dahil d'yan, mas malaki ang tsansa na maituro ang mastermind at mabunyag ang modus-operandi—dahil “buhay ang suspek”.

◘◘◘

MAY ilang dokumento na nag-uugnay sa isang Police Master Sgt. Rodolfo Mayo, Jr. sa kalakalan ng ilegal na droga.

Sinasabing intelligence officer ng Philippine National Police Drug Enforcement Group (PDEG) si Mayo sa Metro Manila.

◘◘◘

Nabatid na lending ang negosyo ng suspek sa Sta. Cruz, Maynila na pinaniniwalaang legal front.

Sinisiyasat din ang posibilidad na “recycled” ang epektos mula sa mga nakaraang operasyon ng pulisya.

Huh, delikado 'yan.

◘◘◘

PINASISIGLA ngayon ni P-BBM ang PNP- Drug Related Data Integration Generation System (DRDIGS) sa pangunguna ng Directorate for Operations.

Ito ang nagsilbing digital library ng lahat ng impormasyon na ginagamit kontra droga.

◘◘◘

BAHAGI ng iniipong impormasyon sa database ang pag-monitor ng rehabilitasyon ng mga drug users.

Nakatutok ito sa demand-reduction strategy, na kasabay ng supply-reduction strategy.

Malinaw ang estratehiya—pero “walang tokhang-tokhang” o estilong vigilantes.

◘◘◘

KUNG tutuusin, walang basehan ang inaakusang EJK sa giyera kontra droga ngayon—sapagkat iginagalang ang karapatang-pantao ng mga suspek.

Ang buhay na suspek ay siyang susi sa pagtuturo sa mastermind at disyembre sa pagbubunyag ng sikretong modus ng mga kawatan.

◘◘◘

MALINAW din na walang inaasahang “collateral damage” o madadamay na inosenteng sibilyan sa giyera kontra droga.

'Yan ay mas mapayapang pagsugpo ng illegal drugs at kriminalidad na tatak ng bagong Marcos, Jr. Administration.

◘◘◘

TULOY na ang barangay at SK election sa Oktubre, 2023.

Pinalawak lamang ang “period of campaign”.

Kaawa-awa ang mga kapos sa badyet.

◘◘◘

PERO, ipinetisyon sa Korte Suprema ang pagpapaliban sa eleksyon.

Dapat aksiyunan agad ang hinihinging TRO—upang makapag-move on na ang mga kumokontra kung sakaling ibasura ito.

◘◘◘

NAKAPUNTO ang protesta sa “kapangyarihan ng Kongreso” na magtalaga gamit ang batas o magpalawig ng termino ng mga “elected officials”—nang walang basbas ng Konstitusyon.

Kung paano ito reresolbahin ng Korte Suprema at dedesisyunan nang teknikal—ay magsisilbing malaking precedent—sa paulit-ulit na pagpapaliban ng mga “nakatakdang halalan” sa bansa.

Malabo ang depensa ng PNP sa "kaduda-dudang pagbisita" sa mga taga-press

ni Ka Ambo - @Bistado | October 17, 2022

MAY ulat na dinadalaw ng mga parak ang mga aktibong journalist.

Aba’y magdala man lang kayo ng sariling ninyong “kape”.

Pero nang may magreklamo, itinigil na ang aktwal na pagdalaw.

Hindi kaya “under surveillance” na lang?

Hindi na magpapakape si Kunay.

He-he-he!

◘◘◘

HINDI malinaw ang paliwanag o depensa ng PNP kaugnay ng “kaduda-dudang pagdalaw”, lalo na’t maselan ang sitwasyon sa seguridad ng mga mamamahayag.

Alam natin, hindi lahat ng naka-uniporme o may ID ng PNP—ay lehitimo ang aktibidad.

Dapat nating maunawaan, ng ilang taga-PNP ay nasasangkot ng aktuwal na krimen.

◘◘◘

MAHALAGANG maging transparent ang PNP—dapat silang magbigay ng katanggap-tanggap na paliwanag.

Hanggang ngayon, kakaunti ang nakauunawa sa kahalagahan ng “pamamahayag” at kung ano ang sustansya ng katagang “Freedom of the Press”.

◘◘◘

NAMAMAHINGA na si Digong.

Pero, nananatili pa rin siyang popular.

Bakit?

Ito ay dahil sa kanyang estilo ng pagsingit ng “joke” sa kanyang mga pormal at hindi pormal na talumpati.

◘◘◘

SISTE ang katumbas ng “joke”.

Ibig sabihin, ma-“siste” si Digong.

'Yan ang paglalarawan ng mga Tagalog sa Bisayang si Digong.

'Yan mismo, kaya’t minahal siya ng masa.

Ganun lang kasimple.

◘◘◘

SA tingin natin, ganyan din ang estilo ng kanyang nakatandem na si Sen. Peter Alan Cayetano.

Masiste rin si Sen. Alan, pero medyo pormal ang kanyang siste kompara kay Digong na pang-masa talaga.

◘◘◘

MAS angkop na gamitin ang “hugot’ kaysa siste sa mga sinasabing joke ng senador.

Ginagamit ng senador ang kanyang “hugot” upang bigyang-diin ang isyu at 'yan ay isa niyang teknik.

◘◘◘

TULAD noong Huwebes sa budget hearing ng DPWH sa Senado, pahapyaw niyang binanggit na “padadalhan niya ang mga opisyal nito ng vitamins para gumanda ang memory nila”.

Pa-“hugot” pero may patama.

◘◘◘

BINIBIGYANG-DIIN lamang dito ay ang pag-iwas ng away-away o salungat sa gitna ng krisis.

Kailangan ang “Solomonic solution”, kailangan magtagpo-tagpo at magkaisa ang lahat—anuman ang kulay pulitika o ideolohiya—alang-alang sa ating bansa.

Ganun lang!

Bigyan muna ng hanapbuhay ang mga trabahador ng POGO bago tuluyang ipasara

ni Ka Ambo - @Bistado | October 15, 2022

ISA tayo sa mga natutuwa dahil nilagdaan na ang pagpapaliban ng barangay at SK election.

Sa totoo lang, puwede nang “mangampanya”.

◘◘◘

DAHIL mayroon nang malinaw na batas, aktuwal nang magmamaniobra ang mga aspirante.

'Yun nga lang, huwag sanang ipagpaliban muli ang eleksyon sa Oktubre 2023.

◘◘◘

MAGKAKAROON muli ng voter’s registration.

At dahil may malinaw nang petsa ang eleksyon, walang duda, marami ang maghahakot ng kani-kanyang “flying voters”.

Matatadtad na rin ang social media ng kung anu-anong post at “fake news”.

'Yan na ang isang maselang sitwasyon na mahirap makontrol.

Kumbaga, free-for-all.

◘◘◘

MAGKAKAMPANYAHAN ang mga aspirante kahit wala pang official election calendar.

At magaganap ito sa gitna ng krisis na nararanasan.

◘◘◘

MARAMI ang walang trabaho at ang ilan na masuwerteng nakabalik sa trabaho.

Pero nanganganib ding “masisante” ang ilang may trabaho na dahil sa krisis at sanhi ng pagbaba ng halaga ng piso kontra dolyar.

◘◘◘

KABILANG dito ang maselang sitwasyon ng mga nagtatrabaho sa lehitimong Philippine Offshore Gaming Operators (POGOs).

May nagyayabang na nakabalik na raw sa dating porma ang ekonomiya kaya’t puwede nang palayasin ang mga POGO operators.

Eh, paano 'yung mga Pinoy na nagtatrabaho rito?

◘◘◘

ANG mga anti-POGO ay karaniwang nagmula sa hanay ng mga ilustrado at elitista.

Alam ba ninyong aabot sa 23,000 POGO workers ang mawawalan ng pantustos sa kanilang pamilya?

Ilang bibig ang magugutom, ilang sanggol ang mawawalan ng pambili ng gatas?

◘◘◘

ANG bilang ng apektado ng pagsisante ay mula lamang sa Association of Service Providers and POGO (ASPAP) na galing sa 16 Philippine Amusement and Gaming Corp. (PAGCOR)-licensed POGOs at 68 service providers.

Pero, higit na marami ang apektadong “indirect workers” na nakadikit sa POGO operations, tulad ng mga nasa transport industry, karinderya, restaurant at iba.

◘◘◘

AYON sa Senado, economic manager at NEDA—marami ang pwedeng ipalit sa POGO, pero “kuwento-kuwento” lang.

Dapat espesipikong kunin ang datos o mga pangalan ng mga mawawalan ng trabaho—at ilipat o aktwal silang bigyan ng bagong trabaho—bago isarado ang POGO.

◘◘◘

IWASAN sana ang imahinasyon, espekulasyon at “pangako”, dapat kongretong datos, aktwal na trabaho at sitwasyon ang pagbabatayan ng mga desisyon.

Ibig sabihin, bigyan muna ng trabaho ang mga masisisante at saka magdesisyon.

◘◘◘

Tandaan: Patuloy ang paghina ng piso kontra dolyar, hangga’t wala pa ang binabanggit na “alternatibong industriya”, aba’y huwag muna ninyong tanggalin ang POGO.

Kumbaga, tiyakan ngayon dapat ang mga desisyon at wala munang “emosyon” at haka-haka.

Hindi ba puwedeng hinay-hinay muna alang-alang sa sikmurang kakalam-kalam?