Agenda sa pagbisita ni Harris, kooperasyon sa proyektong enerhiya

ni Ka Ambo - @Bistado | November 22, 2022

NASA bansa ngayon si US Vice-President Kamala Harris.

Ire-“reset” ng pagdalaw ni Harris ang relasyon ng US at Pilipinas.

◘◘◘

HUH, bakit “reset” ang ginamit na termino sa pagbisita ng pangalawang leader ng US sa Pilipinas?

Sa kompyuter, kapag inire-reset ay may hindi ordinaryong error na hindi kayang aregluhin ng technician.

Kunsabagay, maaaring ang tinutukoy ay naging relasyon ng US at Pilipinas noong panahon ni Digong.

◘◘◘

HINDI tayo sang-ayon sa ginamit na katagang “reset”.

Hindi nakaranas ng error o negatibong relasyon ang Pilipinas sa kabuuan ng termino ni Digong.

◘◘◘

KUMBAGA, naareglo ba ni P-BBM ang “LQ” ng Pilipinas at US noong panahon ni Digong?

Kumbaga, naglambingan lang sina Digong at Obama.

He-he-he!

◘◘◘

KUNG tutuusin, naghinay-hinay na si Digong bago matapos ang kanyang termino nang ibasura niya ang kontrata sa pagbili ng helicopter sa Russia.

Sa totoo lang, lantaran din niyang binatikos ang pagsalakay ng Russia sa Ukraine at nilinaw nitong hindi “siya katulad ng kanyang dating idolo”—dahil marami ang namatay sa naturang digmaan.

◘◘◘

GAYUNMAN, taliwas kay Digong, lantaran ang pagsuporta ni P-BBM sa US government.

At nilinaw nito, imposibleng makakilos ang Pilipinas nang wala ang kooperasyon ng US.

◘◘◘

BATAY sa umiiral na batas sa kamandag ng probisyon ng US- Philippine Mutual Defense Act, hindi puwedeng kumawala o tumakas ang Pilipinas sa pagsuporta sa US—at vice-versa.

Magkakambal talaga ang US at Pilipinas batay sa batas at kultura.

◘◘◘

ISANG agenda sa pagbisita ni Harris ay ang kooperasyon sa proyektong enerhiya.

Nagkasundo na ang dalawang bansa sa pagpapagamit sa Pilipinas ng “nuclear energy” upang maibsan ang climate change.

◘◘◘

NAUNA nang inihayag din ng Malacañang ang “nuclear energy” cooperation sa France.

Kumbaga, gagamit ng nuclear energy ang Pilipinas, kahit wala ritong planta ng nuclear.

Magandang balita ito.

◘◘◘

PREPARADO na ang lahat ng eskwelahan para sa 100% face-to-face class sa Enero, 2023.

Ibig sabihin, aktuwal nang balik-normal.

◘◘◘

KUNG balik-normal, ibig sabihin ay balik-problema rin sa urban area.

Naririyan na naman ang matinding trapik at krimen sa lansangan.

Sana’y maging alerto ang PNP—at tiyaking gumagana ang mga CCTV at police patrol.

Game of the Generals?

ni Ka Ambo - @Bistado | November 21, 2022

HINDI nakaligtas sa mga “marites” maging ang loob at labas ng kampo ng military.

Ere kasing social media ay nagpa-level-up ng tsismisan!

◘◘◘

ISIPING mong imina-marites mismo ang ulat na ibabalik sa aktibong serbisyo ang naka-floating na si dating dating Armed Forces of the Philippines (AFP) Chief of Staff (CSAFP) Gen. Andres Centino.

Aba’y nagtataas ng kilay ang isang mataas na opisyal.

◘◘◘

ERE ang 'wento: Binabaklas ngayon si Centino na naging CSAFP noong Nobyembre 12, 2021 sa ilalim ni ex-PRRD.

Pero, noong Agosto 8, 2022—bigla siyang pinalitan ni General-Vicente Bartolome Bacarro.

◘◘◘

HINDI umano kinakatigan ng Board of Generals ang designation ni Bacarro dahil ang kanyang compulsory retirement date ay September 8, 2022.

Pero dahil sa Republic Act No. 11709, ang bagong batas na nagtatakda ng fixed term para sa mga senior officials na itinatalaga sa key position ay nakalusot nang maayos ang appointment nang walang hussle.

◘◘◘

DAHIL din sa bagong batas, may tatlong taong termino si Bacarro bilang CSAFP.

Nilagdaan ni Duterte ang RA 11709 noong Abril 2022 at naging epektibo ito noong Hulyo 1.

Kaya si Bacarro ang kauna-unahang AFP chief na nabigyan ng tatlong taong termino kahit naging 56-anyos na siya noong September.

◘◘◘

ERE ang isyu: ang 4-star rank na dapat ibibigay sa isang CSAFP ay hindi puwedeng ibigay kay Bacarro dahil hawak pa ito ni Centino na ang compulsory retirement date ay sa February 4, 2023 pa.

Habang aktibo sa serbisyo si Gen. Centino, hindi makukuha ni Gen. Bacarro ang apat na estrelya.

◘◘◘

IMINA-'MARITES' na nominado si Centino bilang ambassador to India pero sa ngayon ay nasa floating status pa siya sa militar.

May bulung-bulungan na bibigyan ito ng ibang puwesto.

D'yan na nag-iinit ang puwet ng mga intrigero.

◘◘◘

AYON sa isang barbero, imbyerna ang isang mataas na opisyal kay Gen. Centino.

Ang termino naman dito ng mga parlorista ay “kinakanal” si Centino.

◘◘◘

SA pagsagip kay Centino mula sa floating status, sino kaya ang nagsisintir?

Noong Agosto, sinabi ng Malacañang na itatalaga si Gen. Centino sa bagong posisyon na “befitting a former chief of staff.”

“Befitting a former chief of staff” ba ang pagiging ambasador?

He-he-he!

◘◘◘

ANO ba ang angkop na puweto sa isang dating CSAFP?

Defense chief puwede pero paano naman ang retiradong heneral at dating CSAFP na si Undersecretary Jose Faustino, Jr.?

Maselan, hindi ba?

◘◘◘

PUWEDE rin namang italaga ulit bilang CSAFP si Centino pero paano naman si Gen. Bacarro?

Medyo masalimuot.

Maghihintay tayo ng “bago” sa mga barbero at parlorista.

Iisa ang malinaw, dapat lang na bigyan ng bagong responsibilidad si Centino, sayang naman ang kanyang karanasan.

He-he-he!

◘◘◘

MALAPIT nang matupad ang plataporma-de-gobyerno ni P-BBM na P20 ang magiging presyo ng bigas.

'Yan mismo ang ating rekomendasyon na ibenta ang P20 kada kilo ng bigas sa mga Kadiwa store.

Nagawa na ito noong panahon ni Pangulong Marcos, Sr.—mababang presyo ng bigas at iba pang produkto sa Kadiwa.

◘◘◘

KUNG nakapagbibigay ng cash assistance, bakit naman hindi pwedeng i-subsidized ang presyo ng bigas sa Kadiwa?

Hindi ipamimigay nang libre ang bigas, bagkus ay magbabayad ang mga konsyumer.

◘◘◘

DAPAT maglagay ng Kadiwa sa mga public market at talipapa.

D'yan na magiging bukambibig muli ang “Marcos, Marcos, Marcos!”

Idle Land Tax at Tax Holiday ang dapat pagdebatehan, hindi gasgas na isyu sa Land Use Act

ni Ka Ambo - @Bistado | November 20, 2022

Nagdebate sa Senado kaugnay ng kumbersyon ng mga lupang tinataniman ng palay tungo sa gamit komersyo at pang-industriya.

Hindi maiiwasan ang kumbersyon.

◘◘◘

ANG inyong abang-lingkod ay lehitimong magsasaka sa Bulacan.

At maraming nalilihis sa isyung ‘yan dahil sa kawalan ng aktwal na karanasan at pagsasaliksik.

◘◘◘

ANG industriyalisasyon at komersiyalisasyon ng lugar ay hindi kailanman maiiwasan.

Ang kumbersyon ng lupain kahit pa tinataniman ng palay ay indikasyon ng ibayong pag-unlad ng isang lugar.

◘◘◘

KAHIT isa tayong magsasaka, maling pigilin ang kumbersyon.

Pero, ang itengga ang bukirin gamit ang kumbersyon sa matagal na panahon ay dapat ipagbawal.

Ibig sabihin, kapag nai-convert ito tungo sa gamit sa industriya o komersyo—dapat agad itong i-develop o maging productive sa loob ng isa o dalawang taon.

◘◘◘

ANG malaking problema, tulad sa Bulacan at iba pang lugar—itinetengga o nagiging idle lands ang mga bukirin na pinakyaw o binili ng mga korporasyon sa murang halaga.

Ang pagtetengga nang ilang taon—ay iskema upang palobohin o maghintay ng mas mataas na presyo “sa real estate trading”.

Malinaw na ang pagpakyaw sa mga bukirin—ay pinagkakakitaan na tulad sa “stock trading”—pinalolobo ang presyo ng lupa—nang hindi binubungkal.

‘Yan ang malaking kasalanan at ‘yan ay paglabag sa batas.

◘◘◘

HINDI “national land use act” ang kailangan, bagkus ay pagpapanatili sa mga ricelands o lupain na maging productive.

Mula sa kakarampot na “income” bilang ricelands, walang masama na i-convert ito para sa industrial use o commercial purposes—na higit napakikinabangan ng bansa at mamamayan.

Pero, itiniwangwang ang dating productive land nang matagal na panahon—ay kasalanang mortal.

◘◘◘

ANG kailangan ay patungan ng “idle land tax” ang mga korporasyon na namamakyaw ng ekta-ektaryang lupain pero itinetengga o nakatiwangwang lamang ng ilang dekada.

Gasgas nang isyu—ang bukirin na ginawang subdivision o ginawang pabrika, hindi ito masama at lehitimo ‘yan at moral.

Sa totoo lang, maraming magsasaka ang “biglang yaman”, matapos ibenta ang kanilang bukirin sa mataas na halaga—tungo sa komersyalisasyon.

Walang nilabag na batas d’yan at ‘yan ay tugon sa moralidad.

◘◘◘

ANG pagpapalaki ng produksyon ng palay—ay kakambal ng pagpaparami ng binubungkal na lupain—pero hindi para pigilin ang kumbersyon, bagkus ay bungkalin ang mga nakatiwangwang na lupain sa mga panot na kabundukan.

Ang paglalagay ng irrigation system at paggamit ng heavy equipment upang mataniman ng palay—ang mga idle lands—ang siyang pinakaepektibong sistema at iskema para maparami ang produksyon ng palay.

Industrial farming ang tawag d’yan na dapat mag-invest ang mga pribadong korporasyon kasabay pag-aalok ng tax holiday ng gobyerno.

◘◘◘

ANG isyu ng idle land tax at tax holiday sa industrial farming ang dapat pinagdedebatehan sa Kongreso at hindi ang gasgas na isyu sa land use act.

Bakit hindi ‘yan ang pinag-uusapan?

Likas bang bopol ang mga mambabatas o may iba silang agenda bukod sa pagpapapogi lamang sa publiko?