Libreng pagkain sa mga estudyante

ni Ka Ambo - @Bistado | November 26, 2022

PALULUWAGIN na ang importasyon ng e-vehicles.

Napakalaking tama!

◘◘◘

DAPAT sabayan ang importasyon ng e-vehicles ng pagpapababa sa singil sa konsumo ng elektrisidad.

Dapat gumawa ng direktiba kaugnay sa g malawakang paggamit ng e-vehicles sa mga tanggapan mismo ng pamahalaan.

◘◘◘

ABA’Y napalaking bawas sa konsumo ng petrolyo ang paggamit ng electric car.

Kapag lumiit ang demand sa petrolyo, siyempre’y awtomatik na bababa ang presyo.

◘◘◘

ANG malawakang paggamit ng e-vehicle ay magpapalaki ng demand sa elektrisidad, kaya’t dapat sabayan ito ng malawakang paggamit ng solar energy.

Sa totoo lang, dapat direktang makipag-ugnayan ang gobyerno sa mga bansang gumagawa ng solar panels, tulad ng China, Germany, Japan at Taiwan upang makaangat ng murang solar panel.

◘◘◘

KUNG tatanggalin ang taripa sa e-vehicle, dapat kasabay tanggalin ang taripa sa solar panel o iba pang gamit sa solar energy.

Mas maganda nga’y isabay ang pag-aalis ng taripang ginagamit sa “renewable energy”, tulad ng inverter o mismo ng mga gamit sa pag-assemble ng turbine.

◘◘◘

KUNG mas darami ang e-vehicles, lilikha ito ng malawak na demand sa elektrisidad—mababalewala rin dahil lolobo ang presyo ng kuryente.

Common sense lang ‘yan.

◘◘◘

DAPAT paghandaan ng gobyerno ang seryosong face-to-face classes.

Obligahin ang PNP at DSWD na maglagay ng help desk bisinidad ng mga eskwelahan.

◘◘◘

MAY okay kung maglalagay ng feeding center sa public school upang magkaroon ng sapat na pagkain ang mahihirap na estudyante.

Hindi dapat magbigay ng cash assistance, dapat libreng pagkain.

◘◘◘

ANG pagbibigay ng libreng pagkain sa nagugutom ay hindi obligasyon ng gobyerno, bagkus ito’y banal na responsibilidad ng bawat mamamayan.

Isa rin itong “human right”—ang mabuhay sa gitna ng krisis.

Panalo ang diskarte ni Bongbong

ni Ka Ambo - @Bistado | November 25, 2022

Isang nakatutuwang agenda sa pagdalaw naman ni US VP Kamala Harris, na tumulong upang makagamit ang Pilipinas ng nuclear energy.

Ibig sabihin, makikiisa ang US upang mapababa ang presyo ng elektrisidad at siyempre, magkaroon din ng sapat na suplay.

◘◘◘

NUCLEAR energy din ang ipinapangako ng France at kinukumbida rin si P-BBM na mag-state visit sa Paris.

Aba’y bibihirang oportunidad ito na dapat sunggaban.

◘◘◘

INIHAYAG ng DOE na ilalatag nila ang mga rekisitos upang masimulan ang feasibility study sa pagtatayo ng maliliit na nuclear plant sa bansa na mas ligtas at praktikal.

Prayoridad na pagtatayuan nito ang Mindanao at Palawan upang matiyak ang kaligtasan ng mga residente kung sakaling magkaroon ng aksidente.

◘◘◘

SA totoo lang, ang lahat ng pinakamauunlad na bansa sa daigdig ay may kani-kanyang nuclear plant.

Kung hinayaang gamitin ang Bataan Nuclear Plant na ipinatayo ni Pangulong Marcos, hindi sanay isa nang 'Tiger economy' ang Pilipinas dahil sa episyente at murang halaga ng elektrisidad na gamit sa industriya.

◘◘◘

MARAMI ang natutuwa sa bunga ng biyahe ni P-BBM sa ibang bansa kabilang ang Thailand, Indonesia at Cambodia.

Nakopo niya ang multi-bilyong pisong investments pledges.

◘◘◘

HINIKAYAT ni P-BBM ang mga kapitalista sa APEC na magnegosyo sa Pilipinas dili kaya’y tumanggap ng OFWs para sa kanilang industriya.

Kumbaga, two birds in one-shot!

◘◘◘

KAHIT ang ilang miyembro ng Kamara ay binabati si P-BBM sa kanyang diskarte.

“President Marcos has again proven himself as the best marketing strategist. He was able to promote our country as an investment hub for food, agriculture and energy opportunities, among others,” wika ni Rep. Jayjay Suarez ng Quezon.

◘◘◘

AYON kay Suarez, direktang nakipag-usap si P-BBM sa mga ehekutibo ng Thai-based Siam Cement Group (SCG).

Nakipag-one-on-one talk din siya sa mga lider ng Kingdom of Saudi Arabia, France, Australia, New Zealand at China.

◘◘◘

BILANG kapalit, personal na inanyayahan si P-BBM na dumalaw sa mga naturang bansa.

Pinasalamatan naman ni FL Liza Araneta, Marcos ang Royal Family ng Thailand at maging ang mamamayan dito sa masiglang pagtanggap.

◘◘◘

“OUR President was well received and widely applauded by leaders all over the world,” pagdidiin ni Suarez.

Isang magandang oportunidad ang mga state visit upang personal na maisulong ang Pilipinas bilang sentro ng pag-unlad sa Asia.

Malaya na ang Pinoy kumilos at maglamyerda

ni Ka Ambo - @Bistado | November 23, 2022

NAKALIGTAS na mula sa mabigat na pagsubok ang halaga ng piso kontra dolyar.

Nahimasmasan na, hindi umabot sa P60 kada palitan.

Klap-klap-klap!

◘◘◘

MALAYA na ang mga Pinoy na kumilos at maglamyerda.

Dapat makabalik na ang ginhawa sa buhay.

◘◘◘

SA aktwal, may negosyong nananatiling nakaangat kasabay ng pandemic.

May ilang ding naka-jackpot sa panahon ng krisis.

◘◘◘

MAS marami ang nagsarado, nalugi at nalugmok na negosyo.

Marami pa rin ang hindi nakakaahon.

◘◘◘

MARAMING pamilya ang naulila ng mga kaanak.

Maraming nasirang pamilya dahil sa sobrang kahirapan.

◘◘◘

MARAMI pa rin ang walang hanapbuhay.

Pero, ang pagkakaiba—aktwal nang nasisilayan ang liwanag ng pag-recover.

Magandang regalo ito sa Pasko.

◘◘◘

HINDI lang kabiguan ang pinaghahandaan, mas dapat paghandaan ang positibong sitwasyon upang hindi maaksaya ang magagandang oportunidad sa paligid.

Magplano ng mga aktibidad upang makopo natin ang biyaya ng 2023.

◘◘◘

KAPANSIN-PANSING marami pa rin ang tulala, shocked o may depresyon dahil sa pandemic.

Hindi sila makapagdedesisyon ng maayos—at hindi nila makikita at mararamdaman ang mga oportunidad na maaaring kumatok sa kanilang pintuan.

◘◘◘

OPORTUNIDAD at hindi cash ang dapat ibigay ng gobyerno.

Oportunidad kung paano magkaroon ng ikabubuhay.

◘◘◘

DAPAT bumaba ang mga tauhan ng gobyerno sa mga barangay.

Magkaroon dapat ng assessment o pagsusuri kung paano sasaklolohan ang mga residente—sa lalong madaling panahon.