Maraming paraan para mapaunlad ang agrikultura, ayaw lang kumilos ng mga nakaupo

ni Ka Ambo @Bistado | February 6, 2023

ISA tayo sa naniniwala na hindi dapat gampanan ni P-BBM ang pagiging Agriculture secretary.

Kumbaga, dapat ay nakapokus ang isang kalihim sa isang malaking problema.

◘◘◘

DAPAT ay nakatutok sa isang departamento ang kalihim upang maasikaso ito.

Matagal nang may sandamukal na ismagler sa sektor ng agrikultura.

◘◘◘

ANG mga magsasaka ay ginagamit lang ng mga mandarambong.

Hindi nakikinabang ang mga magsasaka, bagkus, nagkakamal ng mga salapi ang mga ‘traders’ gamit ang produktong agrikultura.

◘◘◘

KAPAG ‘traders’, magkatuwang sa pandarambong ang mga ismaglers at opisyal ng gobyerno.

Hindi kailangan ang debate sa isyung ‘yan.

◘◘◘

PARA direktang tulungan ang magsasaka, hindi presyo ang dapat tutukan. Bagkus, kailangan ding tutukan ang pagpapalawak ng mga bukirin.

Kapag presyo ang isyu, ang direktang tinutukoy d’yan ay traders o middlemen, hindi ang mga magsasaka na sangkot sa produksyon.

◘◘◘

ANG magsasaka ay siyang gumagalaw sa produksyon. Ang trader, middlemen, biyahero o ahente ang nakikinabang sa presyo o merkado.

Dapat ay maunawaan ‘yan ng kalihim o presidente na siyang tumatayong DA secretary.

◘◘◘

SA agrikultura o iba pang industriya, ang konsyumer ay bahagi ng pagkilos. Ibig sabihin, ibang isyu ang konsyumer, trader at magsasaka.

Kakaunti ang ganap na nakakaunawa niyan.

◘◘◘

MAGING ang matataas na opisyal ng gobyerno, kasama na ang mga taga-Palasyo ay walang sapat na karanasan, kaalaman at edukasyon hinggil sa isyu ng agrikultura.

‘Yan ang dahilan kung bakit nagkakaletse-letse.

◘◘◘

ANG pagiging kongresista o senador ay hindi kasingkahulugan ng pagiging eksperto, husay o talino. Nakaupo sila sa gobyerno mula sa simpleng popularidad, dami ng campaign fund, donor o libreng publisidad mula sa larangan na kanilang ginagalawan.

Uulitin natin, walang sapat na kaalaman ang ilang mambabatas kaugnay sa agrikultura.

Ibig sabihin, maaaring magbigay sila ng dispalinghadong opinion o suhestyon dahil sa kakapusan sa pang-unawa sa problema.

◘◘◘

SENTIDO-KUMON na ang pagpapalaki ng lupain na ginagamit sa agrikultura ang aktuwal na susi sa pagbaba ng presyo ng agri products.

Napakateknikal niyan, pero bakit hindi nauunawaan ng mga mambabatas at ehekutibo?

‘Yan ay dahil wala silang karanasan nang aktuwal sa larangan ng pagsasaka at kung hindi man, bahagi sila ng “sapot ng korupsyon” sa pamahalaan.

◘◘◘

SHORTCUT ang pagbungkal sa mga panot na bundok at nakatiwangwang na lupain upang mataniman at magbunsod ng industrial farming.

Ang malalaking korporasyon ay dapat bigyan ng insentibo sa industrial rice farming, onion production, garlic production at vegetable production.

◘◘◘

KUNG nagagawa ng malalaking korporasyon na mag-invest sa poultry, piggery, plantation ng prutas o sugar cane, bakit hindi sila itulak sa rice farming at vegetable production?

Magsasaka ang makikinabang sa industriyalisasyon ng pagsasaka katuwang ang malalakingkorporasyon. ‘Yan ang magpapababa ng presyo.

Makakapag-export pa ang Pilipinas imbes na mag-import at maging biktima ng mga pusakal na ismaglers na nasa loob ng pamahalaan mismo.

Mahirap bang isipin yan o talagang ayaw mag-isip ng mga bopol na nasa pamahalaan?

Dahilan kaya 'di puwedeng pumalag ang 'Pinas sa gusto ng US

ni Ka Ambo @Bistado | February 5, 2023

Sa aktuwal, ibinabala ng isang US general na hindi maiiwasan ang komprontasyon ng US at China sa pinag-aagawang karagatan.

Tinataya ng US general na magaganap ito sa 2025.

◘◘◘

BUBUHAYIN ng US at Pilipinas ang RP-US Mutual Defense Treaty kung saan tinukoy na ang paggamit ng apat pang military base malapit sa WPS para maging himpilan ng mga US military assets.

‘Yan na talaga ‘yan. No ifs, no buts!

◘◘◘

HINDI puwedeng tumanggi o mag-inarte ang Pilipinas.

Bakit?

Sapagkat mula nang mawala ang US bases sa Subic at Clark, nakapostura nang todo ang China.

◘◘◘

NGAYON, nakikita mismo ang kamalian sa pagpapalayas sa US troops dahil binabastos talaga ng China ang soberanya ng Pilipinas.

At diretso lang sila sa preparasyon sa isang “giyera na hindi maiiwasan” sa hinaharap.

◘◘◘

OPO, hindi maiiwasan ang “giyera” sa West Philippine Sea, na siya ring paniniwala ng mga eksperto na kinukumpirma mismo ng isang US general.

Ano ang ibig sabihin nito?

Dapat magdesisyon nang malinaw, espesipiko at konkreto ang gobyerno ng Pilipinas.

◘◘◘

HINDI puwede rito ang pakiyeme-kiyeme. Hindi puwede ang plastic o pagkunwari.

Walang neutral-neutral d’yan.

◘◘◘

HINDI puwedeng neutral ang Pilipinas kapag nagkaputukan sa old China Sea.

Ngayon pa lamang ay ihiwalay na ang kulay pula sa kulay puti.

Kapag hindi pumili ng kakampi ang Pilipinas, magmimistulang “kinulang damit” na ibinabad nang matagal kaya ubod ng baho ang amoy kapag binanlawan.

◘◘◘

TAMA ang desisyon ni Pangulong Marcos Jr. na pumanig o sundin ang kapritso ng US.

Hindi siya puwedeng pumalag.

Dahil kapag pumalag ang Pilipinas, hindi malayong gumuho o maalibadbaran ang kanyang administrasyon mula sa paghahasik ng lagim ng mga lihim na espiya ng mga dayuhan.

Paglilinis sa pambansang pulisya sa ilalim ng Marcos admin, dapat matagumpay

ni Ka Ambo @Bistado | February 4, 2023

Kailangang maging malinis ang imahe ng pulisya.

Mula nang mawala sa puwesto si ex-PNP Chief Guillermo Eleazar, nag-backslide ang mga parak.

◘◘◘

ANG terminong “backsliding” ay unang ginamit sa panahon ng Martial Law nang ipakilala ang “Bagong Lipunan”.

Hindi lang ang military at pulisya ang isinailalim sa matinding disiplina dahil kasama na ang mga government officials at ordinaryong mamamayan.

◘◘◘

ANG mga nagbabalik sa masamang ugali o behavior sa panahon ng Bagong Lipunan ni dating Pangulong Marcos Sr, ay binabansagang “backslider”.

Mula noon, nalimutan na ang pagtatangka na ayusin ang moralidad ng mga Pinoy.

◘◘◘

MARAMI ang nakikiusap na gawing patas ng pulisya ang pagtrato sa mamamayan.

Ito ay upang hindi sila maakusahang may pinapanigan sa paghawak ng mga kaso.

Kamakailan, may kakaibang sitwasyon na naranasan ang isang kongresista.

◘◘◘

MAY kaugnayan ito sa isyung na-revoke diumano ang mga lisensyadong baril na pag-aari ni Negros Oriental 3rd District Rep. Arnie Teves.

Ito ay dahil diumano sa kakulangan o maling dokumento na isinumite nito sa Philippine National Police (PNP).

◘◘◘

SINASABING kakaiba ito dahil tila pinasolo at ipinahayag ito sa media, samantalang sigurado na hindi lamang ang mambabatas ang nagkaroon ng ganitong karanasan.

Bakit kaya kinakailangang ilabas sa pahayagan at tanging si Teves ang pinangalanan ng kapulisan? Nakakapagduda ang motibo.

◘◘◘

ANG naturang kongresista lang ba ang pulitiko na nagkaroon ng ganitong kaso sa PNP?

Paano ang ibang pulitiko o ordinaryong nagmamay-ari ng baril na hindi naka-renew o mayroon ding kulang o mali sa requirements?

◘◘◘

SA hinaba-haba ng panahon, bakit ngayon lang nakita o napuna ang ganyang sitwasyon?

May nasa likod ba ng pagpapakalat ng pangyayari na ito?

◘◘◘

SA totoo lang, dapat maging patas at gumalaw nang akma ang PNP upang maging buo ang tiwala ng mamamayan sa ating mga kapulisan.

Hindi dapat mabahiran ng pulitika ang pambansang pulisya.

◘◘◘

NAPAKAGANDA ng mithiing purgahin o balasahin ang pulisya dahil kailangang magbagong-anyo ito sa ilalim ng administrasyong Marcos.

May sapat pang panahon para makarekober mula sa negatibong imahe ang PNP.

Ipagdasal nating magtagumpay sila sa kanilang pagnanasang ayusin ang mga sigalot at gusot sa loob at labas ng pambansang pulisya.