Ginawa ni Vice Ganda para sa public school, tulong o paandar?

ni Ka Ambo @Bistado | October 30, 2025

Matagal na nating binabanggit-banggit sa kolum na ito ang pagiging plastic at pakitang-tao ng ilang “pilantropo” kuno.

Kung tutulong ka sa kapwa, dapat ay lihim na lihim lang.

----$$$--

KAPAG iniyabang at ipopropaganda ang charity — hindi charity ‘yan at hindi pagtulong.

Ang popularidad na inaani ng pilantropo kuno — ay awtomatikong singil o bayad sa kanyang ipinopropagandang pagtulong.

----$$$--

MARAMING ganyan sa social media, ang “bayad sa tulong” -- ay paghigop ng maraming engagement, views, like at comment.

Iyan ang monetization.

----$$$--

IYAN mismo ang inilalarawan sa isyu na kinasasangkutan nina Vice Ganda at Heart Evangelista.

Ano ang moral high ground ni Vice Ganda sa pagtulong kuno sa isang public elementary school na idinidikit kay Heart?

Tulong o paandar?

----$$$$--

IKINUWENTO kasi ng komedyante sa noontime show na may “bulok na paaralan” daw sa “probinsya ni Heart Evangelista”.

Iniyabang niya na nagpagawa siya ng eskwelahan dito at nagkaloob ng reading materials.

Ano ang motibo ng kanyang pagyayabang?

----$$$---

TAMA lang ang pagpalag ng ayudante ni Heart na si Resty Rosell sa patutsada ni Vice.

May malisya ang “propaganda” ng komedyante lalo pa’t may tsismis na posibleng kumandidato itong senador.

Maaari ring umaakto siyang “attack dog”.

----$$$--

KUNG nais niyang umagaw ng publisidad at manatiling pinag-uusapan  -- bago mag-eleksyon, huwag siyang sumakay sa personalidad ng ibang tao.

Pinakamahalaga, huwag niyang sakyan ang “sitwasyon” ng isang pobreng public school.

----$$$--

DAPAT unawain ni Vice na may sariling pondo ang public school — at imposibleng siya ang “magpagawa ng gusali” — at kung tumulong man siya — iyan ay kusa niya, pero hindi nakasandal sa kanyang tulong ang “operasyon” ng public school.

Dapat siyang humingi ng paumanhin sa mga guro, opisyal at mga magulang ng mga estudyanteng matagal nang nag-aaruga ng naturang institusyon.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Taumbayan, nawawalan na ng tiwala sa gobyerno, delikado ‘yan!

ni Ka Ambo @Bistado | October 27, 2025

Nababahala na ang ordinaryong mamamayan.

Nawawalan na sila ng tiwala sa gobyerno.

Delikado ‘yan.

-----$$$--

SALA-SALABAT kasi ang kaso ng corruption sa lahat ng antas at sangay.

Nawawalan sila ng pag-asa na mahatulan ang mga tunay na may sala.

-----$$$--

HINDI pa rin malinaw ang proseso ng hustisya.

Bakit kinakailangang buuin ang ICI?Hindi ba’t pag-amin ito ng pagiging inutil ng normal na sistema ng pamahalaan?

----$$$--

KAHIT ang ICI ay sinasabing kulang sa ngipin, sapagkat hindi naman ito nilikha ng anumang Republic Act o mismo ng alinmang probisyon ng Konstitusyon.

Mas mainam sana ay palakasin, patibayin at suportahan ang umiiral nang istruktura o sistema ng gobyerno, imbes na lumikha ng isang komisyon batay lamang sa utos o direktiba ng Malacanang.

----$$$--

PAANO kung ang suspek ay nasa loob o nasa paligid ng Malacanang?

Sa ngayon, wasak na wasak ang reputasyon ng Kongreso — Kamara ng mg Representante at Senado.

Sila-sila ang nag-iimbestiga sa kanilang mga “sarili”.

-----$$$--

‘YUNG dati-rating nagtatanong at nambu-bully sa mga inhinyero ng DPWH ay “naging kasama” na ng mga suspek.

‘Yung matataas na opisyal ng DPWH na kumakastigo sa mga inhinyero — ay kasama na rin sa mga suspek.

Paano ‘yan?

-----$$$--

MAY natitira pa bang kahihiyan ang mga bumubuo ng Kamara at Senado?

Sa ibang bansa, sa ilalim ng parliamentary form of government, mabilis na binubuwag ang parlamento at nagtatakda ng eleksyon.

----$$$--

SA parlamento, kapag nawalan na ng tiwala ang publiko, nagkukusa ang Prime Minister na magbitiw — at mabilis na naghahalal ng kanyang kapalit.

Pero, iyan ay sa pasubaling hindi mandarambong, kawatan at talipandas ang mga nahahalal na mambabatas.

-----$$$--

ANG ganyang sistema ay hindi puwede sa Pilipinas.

Una, ‘corrupt’ mismo ang mga botante.

Karaniwang ibinoboto nila ay kung sino ang personal nilang paboritong personalidad — artista, atleta o media.

Hindi pinagbabatayan ng mayorya ng mga botante ang kuwalipikasyon o kakayahang makagawa ng batas.

-----$$$--

MAS marami sa mga botante ay tumatanggap ng pabor sa lider ng mga pulitiko — tulad ng libreng pagkain, salapi at iba pa.

Ang mga incumbent politician — ay aktuwal na nilulustay ang pondo para bigyan ng “pabor” ang mga botante — na inaalagaan ng ayuda -- hindi batay sa pangangailangan ng benepisyaryo, bagkus ay base sa pangangailangan ng pulitiko sa panahon ng eleksyon.

Advance “vote buying” ang tawag diyan.

Paano sila matatalo? Paano sila mapapalayas sa city hall at mga munisipyo?

-----$$$--

HINDI pa nasiyahan, maaanggihan pa sila ng mga “insertion projects” o “discretionary project” kung saan dispalinghado ang proyekto o dili kaya’y garapalang ghost projects.

Hindi kayang imbestigahan ng ICI ang lahat ng katiwalian.

Hindi ba kayo marunong ng “matematika”?

------$$$--

MAIIMBESTIGAHAN ba o matatapos ng “tatlo kataong ICI, ang multi-bilyones” na katiwalian?

Maawa kayo.

Gumamit kayo ng sintido kumon.

-----$$$--

DISPLAY-DISPLAY lang ang lahat.

Hindi natin makukumbinsi ang mayoryang ordinaryong Pinoy sa “eksena” at “propaganda”.

-----$$$--

SA totoo lang, wala nang pag-asa sa proseso ng hudikatura.

Ang tunay kasing “hukom” sa isang demokratikong gobyerno — ay ang mga botante.

----$$$--

TUWING eleksyon -- ang tunay na araw ng “paghuhukom”.

Ang problema, ‘yung hukom ay humahatol batay sa “dami ng sobre at bigas” na natanggap.

----$$$--

ITO ring mga “hukom cum botante” na ito ay ngakngak nang ngakngak sa talamak na katiwalian.

Pero pagdating ng halalan, ‘yun pa rin ang kanilang ibinoboto nang paulit-ulit — mga propesyonal na talipandas!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Kung may ghost projects, posibleng may ghost beneficiaries o ghost recipient

ni Ka Ambo @Bistado | October 23, 2025

Kayraming views ang social experiments ng mga vlogger sa internet.

Mararamdaman dito ang tindi ng pagdarahop ng ilang pamilya sa mga liblib na pook sa bansa.

-----$$$--

SA ilang siyudad, mayroon ding social experiment sa pagtulong sa mga may “mental problem” — at nakabagbag ng damdamin ang mga eksena.

Maraming pribadong tao ang nagkukusang sumaklolo sa kapwa Pinoy na pinagkakaitan ng tulong ng gobyerno!

-----$$$--

SA dinami-rami ng post, wala tayong nakikitang “social experiment” ng DSWD na siyang nakatokang sumaklolo — sa mga hopeless persons.

Tila makakapal ang mukha ng mga nangangasiwa sa DSWD — parang wala siyang Diyos!

----$$$--

ANG pinagkakagastusan ng DSWD ay ang “cash incentive” na hindi “transparent” ang transaksyon.

Pinaniniwalaang isinusugal lang, pinampapa-rebond ng buhok ang mga ibinibigay ng DSWD sa mga naghihirap-hirap.

----$$$--

BAKIT hindi nag-uulat nang regular ang gobyerno kung paano ginastos ang badyet sa sinasabing pagtulong sa mga nangangailangan?

Nasaan ang COA, nasaan ang Ombudsman?

Dahil hindi inilalantad ang proseso kung paano ginastos ang “badyet” sa cash incentives —malaki ang tsansa rito na mistulang flood control projects ang posibleng kinahinatnan.

----$$$--

ANG DSWD at LGU ay may hiwalay na programa — sa mga “inilalarawan” na mahihirap — pero itinatago ang proseso.

Kung may ghost projects, posibleng may “ghost beneficiaries or ghost recipient”.

----$$$--

TAMEME ang COA na bantayan ang proseso ng disbursement — at ikakatwiran din ang gasgas nang “kapos sa staff”.

Hanggang walang maayos na audit report at walang “nagbabantay” na independent group sa disbursement ng mga ayuda — mananatiling suspek ang mga opisyal ng pamahalaan.

----$$$--

MARAMING dapat i-audit, partikular ang “records” sa inilalabas na cash incentives sa mga senior citizens.

Paano matutukoy kung ang nag-receive cash ay ang totoong nakapangalan bilang beneficiaries?

 -----$$$--

WALA bang mag-o-audit kung patuloy pang nakakatanggap ng ayuda ang mga matagal nang patay na senior citizen?

Paano ‘yung senior citizen na lumipat na ng ibang lugar pero nasa listahan pa?

-----$$$--

PAANO natin matitiyak kung ‘totoong tao’ o totoong nagtatrabaho ang tumanggap ng “cash” sa TUPAD?

Dapat ay linawin ang proseso rito — at ilantad sa website, FB pages at social media — ang proseso at transaction sa paglalabas ng pondo.

----$$$--

BAKIT hindi tinutulungan ng DSWD ang mga “nagtitiyaga sa kamote, asin at mais” sa mga liblib na pook?Bakit hindi kinukupkop ng DSWD ang mga may “mental problem” na nagkalat sa lansangan?

----$$$--

HINDI lang makakapal ng mukha ng mga mandarambong sa pamahalaan, wala ring silang konsensya.

Wala silang mga kaluluwa!

Maihahanay sila sa mga tinatawag na “mga halang ang bituka”.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.