‘Pinas handa vs. HIV, mga positibo, ‘wag magdalawang-isip magpagamot

ni Bong Revilla @Anak ng Teteng | December 10, 2023

Nagpamalas ng kahandaan ang pamahalaan hinggil sa hindi na mapigilang pagtaas ng kaso ng human immunodeficiency virus (HIV) makaraang ianunsyo ng Philippine Charity Sweepstakes Office (PCSO) na nakahanda ang gobyerno laban sa lumalalang sitwasyon ng sakit na ito.

Hinimok ng PCSO ang mga Filipino HIV infected na huwag magdalawang-isip na lumapit sa ahensya ng gobyerno, kabilang na ang kagawaran upang makapagbigay ng kaukulang tulong sa mga ito.

Ang anunsyong ito ay nagsilbing kislap sa dilim na nagbigay liwanag sa marami nating kababayan na nagdurusa sa sakit na HIV at wala nang mapuntahan matapos ang pangambang dinanas nila sa tila hindi na maresolbang pagtaas ng kasong HIV sa bansa.

Ang pamahalaan ay gumagawa ng aktibong pamamaraan upang makasiguro na ang mga HIV infected na mga Pilipino ay nabibigyan ng kaukulang gamutan.

Ipinahayag pa ng PCSO na si Pangulong Ferdinand R. Marcos, Jr. at ang Department of Health (DOH) ay magkatuwang na nagtatrabaho para magkaroon ng maraming treatment hubs sa iba’t ibang lugar sa bansa sa gitna ng pagtaas ng HIV cases.

Kamakailan lang, inanunsyo ng DOH na nakapagtayo ang ahensya ng dalawang HIV treatment hubs sa Cordillera Administrative Region (CAR).

Base sa ulat ng DOH, mayroong 50 bagong HIV cases na naitatala sa bansa araw-araw, na lubhang tumaas kumpara sa 22 daily cases noong taong 2022.

Lubhang nakaaalarma ang ganitong ratio ng pagtaas ng HIV at kinakailangang mapagtuunan ng pansin ng ating pamahalaan.

Ang PCSO ay nagbibigay ng tulong para sa gamutan sa pamamagitan ng kanilang Medical Access Program.

Kung susuriin, mahal talaga ang gamutan sa sakit na HIV kaya’t ipinapaalala natin sa ating mga kababayan na ang PCSO ay nagbibigay din ng tulong pinansyal para sa mga HIV patients.

Hinihimok natin ang mga HIV-positive Pinoy na humingi ng tulong sa mga kinauukulang ahensya upang matugunan at mabigyang liwanag na mayroon pa ring halaga ang kanilang buhay sa kabila ng kanilang kinakaharap na sakit.

Ani nga ng mga eksperto, “People living with HIV (PLHIV) could still have a good life,” at hindi ito isang death sentence na nararanasan katulad noong mga nakalipas na wala pang iginagawad na treatment, kumpara ngayon na sa maagap na diagnosis at treatment, magkakaroon pa rin sila ng maayos na buhay.

Positibong pananaw at pagharap sa katotohanan para agad na maresolba at masimulan ang gamutan. Ang paghingi ng tulong sa pamilya, kaibigan, katrabaho ay isang positibong hakbang.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Maayos at maunlad na Pilipinas sa 2024

ni Bong Revilla @Anak ng Teteng | December 29, 2023

Ito na ang huling artikulong isusulat natin para sa taong ito at sa susunod na taon na tayo muling magkakasama-sama at sa lahat ng ating mga tagasubaybay, nawa ay magkaroon kayo ng masaganang Bagong Taon.

Sana ay magtuluy-tuloy ang mga biyayang pumapasok sa ating bansa bunga ng labis na pagpupunyagi ng kasalukuyang pamahalaan na hindi tumitigil upang mabigyan ng magandang kinabukasan ang ating mga kababayan.

Dapat nating bigyang-pugay ang kasalukuyang administrasyon hinggil sa maayos at maunlad na pagsalubong sa 2024 dahil sa pagsisikap nitong makapag-angkat ng trabaho at karagdagang hanapbuhay sa nagdaang buong taon.

Nais ko lang ibahagi ang katuwaan nating ito kasunod ng survey na inilabas ng Pulse Asia na mas marami sa ating mga kababayan ang umaasa na magiging mas maayos at maunlad pa ang ating bansa sa pagpasok ng taong 2024.

Base sa statistics, 92% ng ating populasyon ang nananatiling positibo na kayang-kaya nating harapin ang panibagong taon ng may nakikitang pag-asa at ang pagiging optimistiko ng ating mga kababayan ay isang magandang basehan upang lalong magsumikap ang pamahalaan.

Mataas ang kumpiyansa ng bawat Pilipino na magiging maganda ang pasok ng taon dahil sa pagsusumikap ng ating Pangulong Ferdinand Bongbong Marcos, Jr.(P-BBM) na paigtingin pa ang pagdami ng mga trabaho rito sa ating bansa sa pamamagitan ng pag-secure ng mga oportunidad galing sa ibang bansa.

Nabatid na hindi lamang bilyong pisong halaga ng investment pledges ang naiuwi ni P-BBM kundi mahigit sa 200,000 job opportunities para sa ating mga kababayan sa kanyang opisyal na foreign trips mula sa huling quarter ng 2022 hanggang 2023.

Ayon sa Department of Trade and Industry (DTI) ang mga biyahe ni P-BBM noong nakaraang taon ay lumikha ng 7,100 job opportunities mula Indonesia noong Setyembre 4-6; 14,932 naman mula sa Singapore noong Setyembre 6-7; at 98,000 mula New York noong Setyembre 18-24.

Nag-uwi rin si P-BBM ng 5,500 job opportunities mula sa pagbisita nito sa Thailand noong Nobyembre 16-17; 6,480 trabaho naman mula sa Belgium noong Disyembre 11-14; at 730 trabaho mula sa Netherlands noong nakaraang Disyembre 15-17 na bahagi ng department investment mission.

Para sa taong 2023, binisita rin ni P-BBM ang China noong nakaraang Enero 3-5 na nagresulta sa 32,722 trabaho; 24,000 job opportunities din ang naiuwi mula sa Japan nitong nagdaang Pebrero 8-12; 6,386 naman mula sa Washington, DC noong Abril 30 hanggang Mayo 4; at 8,365 trabaho pa mula Malaysia noong Hulyo 25-27.  

Nagbitbit din si P-BBM ng 450 karagdagang trabaho nang bumisita ito sa Singapore noong Setyembre 14-17; dagdag 2,550 trabaho pa mula naman sa pagbisita nito sa U.S.

noong Nobyembre 14-17; at 15,750 ang nakuha sa Japan noong Disyembre 15-18.

Ayon kay Presidential Adviser on Investment and Economic Affairs Frederick Go, ang sinasabing PhP169 bilyong halaga ng investment pledges sa isinagawang pagbisita ni P-BBM sa Japan ay naisakatuparan na at naipagkaloob na sa ating mga kababayan ang libu-libong trabaho.

Kumbaga, hindi lang basta pangako ang nakalap ni P-BBM dahil sa pinakikinabangan na ito sa kasalukuyan ng marami sa ating mga kababayan at inaasahang madaragdagan pa ang mga oportunidad na ito sa mga darating na panahon.

Nasa tamang direksyon ang tinatahak nating landas tungo sa maayos at maunlad na bansa dahil sa walang humpay na pagsisikap ng ating pamahalaan para mag-angkat ng karagdagang negosyo at trabaho na kailangang-kailangan ng ating bansa.

Sana lang ay magtuluy-tuloy pa ang mga ganitong hakbangin at mas dumami pa ang mga pumapasok na investment at trabahong mabubuksan para sa ating mga kababayan na napakagandang simula nang pagpasok ng panibagong taon.

Malaking bagay na mapababa ng pamahalaan ang unemployment rate sa bansa at dahil sa ipinakikitang pag-asa ng ating mga kababayan ay hindi malayong mas maayos at maunlad na Pilipinas pa ang ating mararating.

Sa lahat ng ating mga kababayan na buung-buo ang pag-asa na tuluyan na tayong makaaahon sa kahirapan ay kaisa ninyo ang inyong lingkod sa pagsalubong sa Bagong Taon.

Gawin nating ligtas at masaya ang pagpasok ng taong 2024 at nawa ay katigan tayo ng Maykapal ng isang masaganang ‘Pinas. Happy New Year!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Mga dapat ingatan ngayong holiday season

ni Bong Revilla @Anak ng Teteng | December 27, 2023

Napakabilis ng araw, kamakailan lang ay nagkukumahog tayo dahil papalapit na ang araw ng Pasko ngunit ngayon ay pinaghahandaan na naman natin pagsapit ng Bagong Taon at sa hindi malamang kadahilanan ay abala ang marami sa ating kababayan hinggil dito.

Karamihan ay may pamahiin o istilo sa pagsalubong sa Bagong Taon na karaniwan ay impluwensya lamang ng ibang lahi at ang iba naman ay marketing strategy upang lumakas ang bentahan ng mga bagay na may kaugnayan sa paghihiwalay ng taon.

Alam naman natin ang ating mga kababayan, partikular ang mga nagsiuwi sa kani-kanilang probinsiya na sinusulit ang kanilang bakasyon kaya maya’t maya ang handaan o paghaharap-harap hanggang sa matapos ang holiday season.

Bago mag-Pasko ay nagbigay ng babala ang Department of Health (DOH) na hindi lamang pag-inom ng alak ang dapat iwasan kundi dapat ding mag-ingat sa mga pagkain upang maiwasan ang non-communicable illness tulad ng diabetes at cardiovascular diseases.

Pero, sana ang babalang ito ay hindi para sa nagdaang araw ng Pasko lamang dahil kabi-kabila pa rin ang handaan hanggang sa sumapit ang Bagong Taon at naglipana ang mga maaalat, matataba at matatamis na pagkain na inihahanda ng ating mga kababayan.

Lalo na ‘yung mga kababayan nating manginginom na sa umpisa ay nag-iingat sa pagkain ngunit, kapag lasing na ay nawawalan na ng kontrol sa pagkain at banat na nang banat ng pulutan.

Kabilang sa dapat nating bawasan ay ang pagkain ng processed foods, gaya ng junk foods, sweetened beverages, mamantikang pagkain na kung hindi talaga maiiwasan ay dapat bawasan upang makatiyak tayo na malusog tayong aabot sa pagsalubong ng Bagong Taon.

Magandang alternatibo ang vegetables o fruit salad para sa mga malalakas kumain o mga pagkaing gulay at isda dahil may kahabaan pa ang mga araw ng handaan at kailangan talaga ng dobleng pag-iingat.

Ayon kasi sa huling datos na inilabas ng Philippine Statistics Authority (PSA), ang heart disease pa rin ang nananatiling nangunguna sa nagiging sanhi ng kamatayan ng mga Pinoy mula Enero hanggang Nobyembre 2022 na may kabuuang 121,558 kaso o 18.3 porsyento para sa nabanggit na panahon.

Nasundan ito ng cerebrovascular disease na may 56,411 na naitalang nasawi at neoplasms na may 57,354 ang binawian ng buhay — samantalang pumalo sa ikaapat na puwesto ang diabetes na sanhi  ng kamatayan ng Pinoy sa pareho ring panahon na nakapagtala ng 32,339 na nasawi.

Hindi naman masamang magsaya ng grabe lalo pa at kasama natin ang mga mahal natin sa buhay ngunit dapat nating bigyang pansin ang paalala ng DOH na umiwas sa grabeng pag-inom ng alak, uminom ng maraming tubig, matulog ng sapat at mag-exercise kahit 30 minuto sa loob ng isang araw.

Pilitin nating maisingit ang pag-eehersisyo sa gitna ng bakasyon dahil isa ito sa pinakaepektibong paraan upang hindi tayo maatake o dapuan ng matinding karamdaman sa gitna ng holiday season.

Huwag ding maging kumpiyansa kahit negatibo tayo sa COVID-19 ay kailangan nating magsuot ng face mask kung susuong tayo sa maraming tao — lalo na sa pagsalubong sa Bagong Taon dahil usung-uso ngayon ang pagkakahawa-hawa ng ubo, sipon, lagnat at trangkaso.

Higit sa lahat dapat din tayong mag-ingat sa pagsalubong sa Bagong Taon dahil sa rami ng nagpapaputok at nito lamang Disyembre 25 ay umabot  sa 16 ang naitalang mga kaso ng fireworks-related injuries.

Ito ay base lamang sa inisyal na ulat ng DOH at hindi pa kabilang dito ang opisyal na ulat ng Philippine National Police (PNP) kung saan isang biktima ang napinsala ang mata ng isang hindi naman humahawak ng paputok.

Kumbaga, nagkataon lamang na nagawi sa lugar na may nagpapaputok ang biktima at sa kasamaang palad ay natalsikan sa mata at ngayon ay habang buhay nang apektado ang kanyang paningin.

Kaya tiyakin nating kahit na sa mga designated area pa magsasagawa ng fireworks display ay makabubuting mag-ingat pa rin, huwag lumapit at tiyaking hindi aabutin ng nagliliparang apoy upang makaiwas sa aksidente.

Ipagkatiwala sa mga eksperto ang paghawak ng paputok at huwag magbabakasakaling sumubok kung wala o kulang naman ang karanasan sa paghawak ng paputok upang mapanatili ang kaligtasan.

Walang pinipili ang sasabugan ng paputok at isa sa pinakahuling biktima ay 6 anyos lamang at sa 16 na bagong biktima ng paputok ay may isang babae at karaniwan ay puro lalaki na hindi lalagpas ang edad sa 35.

Sa ngayon ay nasa 28 na ang kabuuang bilang ng biktima ng paputok at nais kong ipaalam sa inyo sa 36 porsyento sa mga ito ay hindi man lamang nagsindi, nakialam o humawak ng paputok.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com