Umento sa sahod, sagot para makasabay sa disenteng pamumuhay

ni Bong Revilla @Anak ng Teteng | Pebrero 9, 2024

Binabati natin ang ating mga kasamahan sa Senado sa pagbubukas ng pagtalakay sa isa sa pinakamahalagang panukalang batas na dapat pagtuunan ng pansin -- ang umento sa sahod. 

Panahon na para iukit natin sa kasaysayan bilang mga mambabatas na isulong ang pinakamahalagang batas upang talakayin sa plenaryo ang matagal nang isinusulong na panukalang karagdagang sahod para sa manggagawang Pilipino. 

Matatandaang matagal na nating isinusulong ang panukalang batas para sa P150 across-the-board wage increase simula pa ng aking unang termino sa Senado noong 2008 sa ilalim ng 14th Congress.

Walang palya ko ring inihain ang kaparehong panukala sa sumunod na Kongreso — noong ika-15th, 16th, 18th at 19th Congress, at naputol lamang ito dahil hindi ako miyembro noong 17th Congress. 

Lubos tayong nagagalak na matapos ang halos dalawang dekada ay umuusad na para maging isang ganap na batas ang ating hinahangad na dagdag sa sahod ng mga manggagawa.

Ito nga ang isa sa mga ipinunto ko sa aking co-sponsorship speech, na ang aking itinutulak na pagsasabatas ng dagdag-sahod bilang isang neophyte na senador noon, ay umabot na hanggang sa ngayon na isa na akong pinaka-senior na miyembro ng kapulungan. 

Aking naaalala ang naging mahabang pakikibaka ko para sa nasabing batas upang ito ay ma-sponsor sa plenaryo at malakas ang aking paniniwala na tuluyan nang magbubunga ang aking matagal na pakikipaglaban para sa kapakanan ng mga manggagawa. 

Hindi naman natin maitatanggi na hindi sapat ang kinikita ng buwanang sahod para sa hindi mapigilang pagtaas ng mga bilihin kung kaya’t marami pa rin sa ating mga manggagawa ang hindi makasabay sa disenteng klase ng pamumuhay. 

Matagal na rin namang nagtitiis mamaluktot sa maikling kumot ang ating mga manggagawa na panay ang kahig at halos walang matuka, at hindi na alam kung paano ang bukas dahil maging ang kasalukuyang sitwasyon ay hirap nang maitawid. 

Nakakaawa ang maralitang Juan at Juana na hindi iniinda ang lakas ng buhos ng ulan o harapin ang panganib sa taas ng baha makarating lamang sa trabaho para sa kakarampot na sweldo. Gayundin, ang mga pobreng manggagawa na sunog na ang balat sa tirik ng araw habang lumalambitin sa nagtataasang gusali para lamang mayroong pagkain sa hapag-kainan ang kanyang pamilya. 

“The dream of providing a living wage that is not only fair, but truly just in every sense of the word, has, at long last, become within reach. And it is nothing less than much-deserved especially considering that our laborers are considered to be the backbone of the economy,” ayan napa-Ingles tuloy tayo.

Anak Ng Teteng! 

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Ekonomiya lalago, kung may kooperasyon at pagtutulungan

ni Bong Revilla @Anak ng Teteng | Pebrero 5, 2024

Kailangan nating dumoble-kayod para lalo pang lumago ang ating ekonomiya at nasabi ko ito matapos na magpalabas ng datos ang Philippine Statistics Authority (PSA) na bumagal ang takbo ng ating ekonomiya sa huling quarter ng nakalipas na taon na may 5.6 porsyento lamang kumpara sa 7.1% noong 4th quarter ng taong 2022.

Sa inilabas na datos ng PSA bumagal ang tinatawag na consumer spending noong fourth quarter ng 2023 sa 5.3 porsyento at umurong pa ang paggastos ng ating pamahalaan ng 1.8 porsyento.

Ang pangunahing nagpapagalaw sa ekonomiya ng ating bansa sa expenditure side ay ang consumer spending. Sa 5.6% na nilago ng ekonomiya, 4.1% nito ay consumer spending o ang ginagastos ng mga tao at dahil sa apektado ng presyo at kita ng ating mga ginagastos sa mahal ng mga pangunahing bilihin katulad ng pagkain, kaya apektado ang ibang gastusin natin.

Ayon sa datos, natapyasan ang paglago dahil sa pag-urong ng gastos ng pamahalaan ng 1.8%.  Samantala, umurong din ang exports ng 2.6 %. Lumago man ang investments ng 11.2% noong 4th quarter ng 2023, ito ay dahil lamang sa napakaliit na in-improve nito noong parehong panahon ng 2022. Sa buong 2023, 5.4% lamang ang nilago ng investments kung kaya’t bumagal ang ating ekonomiya.

Ang pagpapalago ng ekonomiya ng Pilipinas ay isang malawak na isyu na kailangang pagtuunan ng pansin ng iba’t ibang sektor ng lipunan kabilang na rito ang pagsulong sa investments o ang paghimok sa mga lokal at dayuhang negosyante upang mamuhunan sa ating bansa; paigtingin pa at ayusin ang sistema sa pagproseso ng mga business permits at licenses, gayundin ang agrikultura at ang isa ay sa pamamagitan ng pagtingin ng expenditure side o kung saan napupunta ang ginagastos na pera para sa ekonomiya. 

At dapat din nating pagtuunan ng pansin ang pagsusulong ng mataas na kalidad na edukasyon upang mapalakas ang kakayahan ng mga Pilipino sa kani-kanilang trabaho at tutukan ng ating gobyerno ang sektor ng edukasyon na may mataas na demand sa merkado ng trabaho.

Tutukan ang modernisasyon ng imprastraktura tulad ng paggawa ng makabagong mga kalsada, tulay at paliparan, at ang larangan ng teknolohiya at iba pang public services na lubhang makatutulong at mapapabilis ang pag-asenso ng bawat Pilipino.

Importante rin ang pagbibigay ng lubusang suporta sa agrikultura kung saan ang ating mga bayaning magsasaka ay kailangan ang mabuting produksyon at ani.

Ang ating kalusugan. Dapat din tayong magtalaga ng sapat na pondo sa healthcare system, kabilang na rito ang mga proyektong pangkalusugan na magbibigay tulong sa mga mamamayan.

Ang pagpapalakas ng Small and Medium Enterprises (SMEs) kung saan magbibigay ang gobyerno ng suporta at pondo para sa mga maliliit na negosyante at ang sistema nito ay dapat na mabilis at maayos.

Kinakailangan din nating pagtuunan ng pansin ang turismo katulad ng pagpo-promote sa ating bansa bilang magandang destinasyon na babalik-balikan.

Ang pakikipag-ugnayan natin sa iba’t ibang bansa para mapaigting ang ating kalakalan at relasyong diplomatiko, at ang pagpapalawak ng sistema hinggil sa serbisyong pinansyal lalo na sa mga underserved na sektor ay mga mahahalaga ring aspeto upang lalo pang lumago ang ating ekonomiya.

Naniniwala ako na kung tayo ay magkakaisa at walang mga partisyon at malalang dibisyon o diskusyon kundi’y kooperasyon lamang ng pamahalaan, ng pribadong sektor at mamamayan, ang ating ekonomiya ay dire-diretso ang paglago.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

‘Walang Matigas na Pulis’, mapapanood na uli tuwing Linggo

ni Bong Revilla @Anak ng Teteng | Pebrero 3, 2024

Tuluy-tuloy na ang pananabik na nararamdaman ng ating mga tagasubaybay dahil bukod sa magsisimula na ang pinakabago nating palabas na ‘Walang Matigas na Pulis sa Matinik na Misis’ Season 2, na nakatakdang ipalabas sa GMA Network ganap na alas-7 ng gabi sa Linggo, Pebrero 4, 2024, ay magsasagawa rin tayo ng motorcade na dadaluhan ng malalaking artista na kasama sa ‘Walang Matigas na Pulis’ upang makapiling namin nang personal ang aming tagasubaybay.

Maraming salamat din sa mga sumubaybay sa Season 1 at dahil sa inyong lahat ay nasa Season 2 na tayo na mas pinalaki at mas pinaganda ang mga eksena na ngayon pa lamang ay excited na kaming lahat na mapanood ang mga bagong kabanata ng ‘Walang Matigas na Pulis sa Matinik na Misis’ na ilang panahon din ninyong sinubaybayan. At dahil sa patuloy ninyong pagtangkilik ay nagpasya ang pamunuan ng GMA Network na sundan ng Season 2.

Eto na! Nandito na! Talagang excited na excited na rin akong mapanood ang Season 2 ng naturang serye. Labis namin itong pinaghirapan at pinagpuyatan ng aking mga co-stars para makapaghatid ng saya kasabay ng pahinga sa ating mga mahal na kababayan tuwing Linggo.

Asahan na rin na ang Season 2 ng ‘Walang Matigas na Pulis’ ay maghahatid ng dobleng ligaya sa mga manonood lalo na’t magbabalik sa palabas ang mga batikang artista na minahal ng mga tagapanood noong una sa pangunguna ng inyong lingkod bilang Major Bartolome “Tolome” Reynaldo at Beauty Gonzales bilang Gloria Reynaldo. Kasama rin sa mga babalik sina Niño Muhlach (Style), Dennis Padilla (Major Policarpio), Max Collins (Elize), Angel Leighton (Pretty), Maey Bautista (Kapitana Candida), Carmi Martin (Tiya Lucing), Kelvin Miranda (Gary), Raphael Landicho (Kiko), at ER Ejercito (Juancho).

Napakalaki ng pagbabago ng Season 2 dahil sa mga karagdagang karakter na gagampanan nina Jestoni Alarcon, Ejay Falcon, Michael De Mesa, Jay Manalo, Ramon Christopher Gutierrez, Roi Vinzon, Celeste Cortesi, Herlene Budol, Liezel Lopez, Lianne Valentin, at Mika Salamanca na siguradong magpapatindi pa lalo ng mga eksena.

Sobra akong nagpapasalamat sa lahat ng sumubaybay at tumangkilik sa Season 1 ng ‘WMPMM’ noong nakaraang taon. Kaya ngayong Season 2, mas pinaganda, mas pinatindi, at mas pinainit pa natin ang mga mangyayari. Siguradong mas mapapatawa kayo at mapapahigpit ang kapit sa mga action-packed scenes. Abangan n’yo rin ang mga bago naming kasama sa kabanatang ito. 

Kaugnay nito, bago ipalabas ang pilot episode ng ‘WMPMM’ Season 2 sa Linggo ng gabi, isasagawa muna natin ang isang grand motorcade sa Linggo ng hapon kasama ang lahat ng cast kung saan ito ay daraan sa bayan ng Taguig, Muntinlupa at San Pedro sa Laguna. Inaasahan na maraming tagasuporta ang sasalubong sa parada ng mga kasamang artista.

Kaya nga inaanyayahan natin ang lahat ng ating mga tagasubaybay na makibahagi at makisaya sa gaganaping motorcade at manood ng unang episode ng Season 2 sa Linggo ng gabi. Ang assembly area ay sa Burgoo Resto Vista mall Taguig, 11:00AM, samantalang magsisimula naman ang motorcade ng alas-12:30 ng tanghali at magtatapos ito sa Mesa Restaurant sa Robinson Galleria South San Pedro, Laguna.

Kita-kits tayo sa motorcade sa Linggo ng hapon. Sabik na kaming makita kayong lahat para pasalamatan kayo sa inyong suporta! Gagawin nating parang parade sa piyesta ang motorcade na ito. At ‘wag kalilimutan, sabay-sabay din nating panoorin ang pilot episode sa gabi para maging masaya at may ngiti nating kakaharapin ang bagong linggo.

Sa rami ng problema ng ating bansa ay panahon na upang bigyan naman natin ng pansin ang ating mga sarili para maaliw ng kahit sandali upang maging maganda ang pagsalubong natin sa pagpasok ng panibagong linggo.

Kapag may ngiti sa ating mga labi ay pawang positibong pangyayari ang naghihintay sa bawat isa ngunit kapag nakasimangot sa pagpasok ng bagong linggo ay asahan nating puro negatibo rin ang naghihintay sa atin, kaya sama-sama tayong sumaya sa panonood ng ‘Walang Matigas na Pulis sa Matinik na Misis’ at kita-kits tayo sa motorcade. Masaya ito, promise!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com