‘Glue Ladies’ na nambibiktima ng mga lolo’t lola, tugisin

ni Bong Revilla @Anak ng Teteng | Marso 6, 2024

Nagbigay ng babala ang Philippine National Police (PNP) kamakailan lamang sa ating mga lolo at lola laban sa bagong grupo na binubuo ng mga babae na walang ibang ginawa kundi ang mag-abang ng mga matatandang magwi-withdraw sa mga Automated Teller Machine (ATM) makaraang tumaas ang bilang ng mga biktima na karaniwang mga lolo’t lola.

Ito ang ibinunyag noong Sabado ng Supervisory Office for Security and Investigation Agencies (SOSIA) ng PNP makaraang dumagsa ang reklamo na kadalasang biktima ayon sa SOSIA ay pawang mga matatanda.

Nabatid na karaniwang nagpapanggap na magwi-withdraw din ang mga salarin, kaya hindi sila mapapansin dahil nakapila rin sila sa harap ng ATM at pawang mga babae.

Habang nasa pila ay kinakausap ng ilan ang puntiryang biktima, kaya hindi napupuna na ang kasabwat na mismong nasa machine ay may inilalagay na kung anong bagay para ang susunod na magwi-withdraw ay hindi na lalabas ng kumpleto ang pera.

May mga nakapila na kasabwat na kunwari at tutulong pa, ngunit ang magiging katapusan ng lahat ay aalis ang biktima na hindi nakapag-withdraw sa pag-aakalang may problema ang machine.

Dahil sa puro babae ang miyembro ng umano’y sindikato, hindi naghihinala ang biktima at sa tanggapan na lamang ng pulisya nalalaman na naging biktima na pala ng bagong modus na ito. 

Lumang istilo na ang paglalagay o pag-ipit ng manipis na ruler sa bukana ng machine, ngunit napansin ng sindikato na mas mabilis itong gamitin sa mga matatandang nagwi-withdraw kaya sa maikling panahon ay napakarami agad ng naging biktimang lolo at lola.

Ang paglalagay ng manipis na ruler na mayroong glue rito — na kadalasan umano ay gawa ang ruler sa plastic, fiber glass o steel sheet, at ipapasok ito sa cash dispenser nang sa gayon ay maiiwan o mata-trap ang pera mula sa inilalabas ng ATM machine.

Ang biktima ay aalis na lamang sa harap ng ATM machine sa pag-aakalang nagkaroon lamang ng technical glitch o problema o nag-hang ang machine at mabilis na kukunin ang naipit na pera ng nakasunod sa pila na tila walang nangyari.

Masyadong propesyonal ang mga babaeng miyembro nito, at kahit sa mga shopping mall ay hindi kapansin-pansin ang kanilang mga galaw kaya’t makabubuting huwag nating hahayaang mag-withdraw mag-isa ang ating mga lolo at lola.

Tinawag ng PNP ang mga babaeng sindikato na ‘Glue Ladies’, dahil sa makaraang umalis na ang biktima ay sila naman ang agad na lalapit sa machine at kukunin ang sumiksik na pera na nakadikit na sa ruler.

Nabatid na isa pa umanong modus ng mga ito ay ang paglalagay ng glue sa command keypads upang hindi makumpleto ng client ang kanilang ATM transaction, gayundin maglalagay sila ng adhesive sa card slot para ma-capture o makain ang ATM card at hindi na lumabas.

Sa puntong ito ay mag-aalok pa ng tulong ang kunwaring nagmamalasakit na mga salarin at kukumbinsihin ang biktima na umalis na lamang at may problema ang ATM, habang tulung-tulong na rin ang mga naturang babae sa pagkumbinsi sa biktima para umalis na nang tuluyan.

Sa ganitong pagkakataon, tatanungin na ng nag-alok ng tulong ang personal identification number (PIN) ng biktima, at ang PIN number ay kanilang tatandaan.

Kapag hindi pa rin lumabas ang ATM card ay kanila na itong sasabihan na dumulog sa bank employee o kaya sa mga nakatalagang security guard, at sa sandaling nakaalis ang biktima ay mabilisang kukunin ng mga salarin ang card saka agad na aalis at magwi-withdraw ng pera sa ibang ATM machine gamit na  ang card ng biktima.

Ang mga sinasabing Glue Ladies ay magkukunwari ring mga empleyado ng bangko at mag-aalok ng pag-asiste sa mga depositor at sila ay magbo-volunteer na magdedeposito ng pera sa mga walang kamuwang-muwang na biktima, na kadalasan nga na nabibiktima rito ay mga senior citizen.

Habang abala ang biktima sa pagsusulat sa deposit forms or slips, ang isa sa mga salarin ay kukunin ang pera o kaya naman ay ipagpapalit ito sa similar-looking envelop at agad na lalabas ng bangko dala ang pera ng biktima.

Dahil dito, inaalarma natin ang mga security guard, at mga private security service provider na magsagawa sila ng information drive para maiwasan na ang ganitong modus at mabigyan ng maayos na impormasyon ang publiko laban sa mga sindikatong ito.

Pinakamabuting huwag nating hahayaan ang ating mga lolo at lola na mag-isang mag-withdraw, lalo na sa mga ATM na nakapwesto sa gilid ng mga parking area sa mga mall dahil kahit tanaw natin mula sa ating sasakyan ay hindi natin mahahalata na binibiktima na sila ng ‘Glue Ladies’ dahil sa husay ng mga ito sa ganitong larangan, kaya magdoble-ingat.

Kahit sa loob mismo ng shopping mall ay huwag tayong magtitiwala na iwan ang ating mga lolo at lola para mag-withdraw dahil nakakalat ang ‘Glue Ladies’ sa mga lugar na hindi natin akalaing naroon sila.

Sa bagong modus na ito ay tiyak na santambak muna ang magiging biktima bago pa tuluyang masawata ng PNP ang nabanggit na grupo. Dapat ding tugisin ang mga salarin at huwag nating pabayaan ang ating mga lolo at lola ngayong alam na natin ang ganitong modus.

Malulungkot ako kapag ang pinaghirapan nating batas sa Senado para magkaroon ng diskwento at karagdagang benepisyo ang ating mga minamahal na lolo at lola ay mapupunta lamang sa mga sindikato na ito. Huwag nating hayaang maging biktima ang mga lolo at lola. 

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Pramis P10K para sa mga lolo't lola, natupad na

ni Bong Revilla @Anak ng Teteng | Pebrero 28, 2024

]

Siyempre ay hindi natin makakalimutang pasalamatan ang mga kasamahan natin na katuwang nating nag-tawid ng pangarap na ito. And’yan ang chairperson ng komite na si Sen. Imee Marcos na pinagbigyan ang ating hiling na agaran itong maipasa ng Senado, pati na rin ang iba pang mga umakda at sumuporta sa batas na ito. Ang atin ding pasasalamat sa mga miyembro ng House of Representatives na nakipagtulungan din sa atin upang mabilis na maipasa ang panukalang batas na ito.

Ang noon na inaabangan lamang ng ating mga lolo at lola ay isang realidad na. Kung dati ay tinatanong tayo kung kamusta na ito, ngayon ay malugod natin silang sasagutin na simulan na nilang magpalista sa kani-kanilang Office of Senior Citizens Affairs (OSCA) dahil selyado na ang benepisyo sa ilalim ng Revilla Law.

Napakalaking kasiyahan na naipagkaloob natin sa ating mga lolo at lola itong dagdag-benepisyo. Ika ko nga, binibigyan natin sila ng “something to look forward to and hope for” para mas mapangalagaan ang kanilang buhay at kalusugan. Malaking bagay din nga naman sa mga senior citizen na may natatanggap sila galing sa pamahalaan.

Hindi lang naman ito pangarap ng mga matatanda dahil sa katotohanan lamang ay katuparan din ito ng isa sa aking mga pangarap na mayroong legasiyang maiiwan sa oras na matapos ang aking panunungkulan bilang senador.

Simula noong Lunes matapos mapirmahan ng Pangulo ang Expanded Centenarian Law ay nakatatanggap tayo ng napakaraming mensahe ng pasasalamat at pagbati dahil ganap nang batas ang matagal na nating inilalaban nang pukpukan sa Senado at napagtagumpayan naman natin. Napakalaking bagay sa ating mga senior citizen ang ayudang maipagkakaloob sa kanila ng gobyerno lalo na at alam naman nating marami sa kanila ang may mga maintenance medicines na at iba pang mga pang-araw-araw na pangangailangan.

Pagtanaw na din natin ito ng utang na loob sa kanila sa mga nagawa nila noong kabataan nila.

Ang mga ganitong pangangailangan ng ating mga kababayan ay sinasabi mismo sa atin ng publiko sa panahong isinasagawa natin ang regular nating pag-iikot sa iba’t ibang bahagi ng bansa lalo na sa mga lugar na biktima ng kalamidad.

Umasa kayo na umaraw man o umulan, ipagpapatuloy ko sa abot ng aking makakaya ang magagandang layunin at aking mga nasimulan para sa kapakanan ng ating bayan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

P10k para sa edad 80, 85, 90 at 95, magiging ganap ng batas ngayong Peb. 26

ni Bong Revilla @Anak ng Teteng | Pebrero 2, 2024

Nakatakdang pirmahan ngayong Lunes, Pebrero 26, ni Pangulong Ferdinand ‘Bongbong’ Marcos, Jr. upang maging ganap na batas ang iniakda nating panukala na pagkakalooban ng P10,000 ang mga kababayan nating sasapit sa edad na 80 pataas.

Katunayan ay pinadalhan ng Palasyo ang mga senador na dumalo ngayong araw upang saksihan ang isasagawang signing ceremony.

Wala tayong narinig na may ibe-veto siya. In fact, ipinatawag niya ang mga senador at pipirmahan niya ito sa harapan naming lahat ngayong araw.

Ito ‘yung matagal na nating pinapangarap, at least matutupad na kaya we are very thankful sa mahal na Pangulo dahil maipagkakaloob na natin ang matagal na nating pangarap para sa mga senior citizen sa bansa.

Iniakda natin ang Senate Bill No. 2028 upang makatanggap ng P10,000 cash ang mga kababayan nating umabot sa edad na 80 at P20,000 naman sa 90-anyos. Mananatili naman sa P100,000 ang matatanggap ng mga centenarian o ang mga lolo’t lolang nasa 100 taong gulang o mahigit pa. Medyo may pagbabago lamang dahil kapag umabot na ng 80, 85, 90 at 95-anyos ay makakatanggap ng P10,000 cash, kumbaga at the age of 80 may P10,000 ka na, 85 another P10,000, 90 another P10,000, 95 another 10,000, pagkatapos, when you reached 100, buong P100,000 pa rin ang matatanggap.

Isinumite na rin natin ang panukalang batas para ibaba sa 56-anyos ang senior citizen sa bansa mula sa 60-anyos, ibig sabihin kung 56 ka na, senior citizen ka na, malaking tulong ito para sa mga kababayan nating nasa edad na 56 ay santambak na ang iniinom na gamot dahil makakakuha na sila ng diskwento.

Sana, tulad ng P10,000 na nakatakdang maging ganap na batas ngayong araw ay mapabilis na maging ganap na batas din itong panukala nating gawing 56-anyos na ang mga senior citizen upang mas maaga nilang mapakinabangan ang diskwento.

Ipagdasal natin na maantig ang puso ng mga senador sakaling dumating ang panahon na inilalaban na natin ng pukpukan sa plenaryo ang panukalang batas na ito — para agad pakinabangan.

Sa ngayon, nais nating pasalamatan si P-BBM dahil sa magiging ganap na batas na ang Revilla Law na nagbibigay ng benepisyo sa mga matatanda.

Nais ko lang liwanagin na ang naturang batas ay magbibigay benepisyo para sa mga Pinoy na edad mula 80 hanggang 89 (octogenarian) at mga mayroong edad 90 hanggang 99 (nonagenarian), bukod pa sa 100 taong gulang (centenarian) na ang inyong lingkod din ang principal author na una nating isinumite sa kasalukuyang Congress.

Taus-puso kong pinasasalamatan ang Pangulong Marcos sa pagsasabatas ng ating pangunahing panukala upang amyendahan ang Centenarians Law. Ang matagal na nating ipinaglaban para sa ating mga lolo at lola ay tuluyan na nating napagtagumpayan!

This was my promise to the Filipino elders and I’m proud to say that I fulfilled it. Sa wakas ay makakasama na rin sa mga mabibigyan ng benepisyo ‘yung iba pa sa kanila, hindi lamang ang mga aabot ng isandaang taong gulang.

Sobra talaga akong natutuwa kasi malaking tulong ito para sa ating mga lolo at lola.

Mabibigyan na natin ng cash gift na P10,000 ‘yung mga aabot ng mga 80, 85, 90, at 95-anyos. Malaking bagay ‘yun para sa kanila lalo na’t may mga pangangailangan din sila at gastos para sa gamot, vitamins, supplement, pagkain at iba pa.

Kung inyong maaalala ay unang-una ito sa ating mga isinumite sa pagsisimula pa lamang ng 18th Congress noong 2019, ngunit ngayon lamang naging isang ganap na batas at alam kong marami sa ating mga lolo at lola ang hinihintay na ito.

Sabi nga ng isang salawikain ay, ‘sa hinaba-haba ng prusisyon ay sa simbahan din ang tuloy’. After a long and arduous battle for the welfare of our lolos and lolas, it is with beaming pride to say that we have won the fight.

Pero, hindi rito matatapos ang pagpupursigi natin para mas mabigyan pa ng pagpapahalaga, pagkilala, at pagmamahal ang ating mga lolo at lola. Simula pa lang ito ng bagong laban – laban para sa tuluy-tuloy na pag-angat ng kanilang kapakanan at kalagayan.

Para maging mas epektibong maipatupad ang naturang batas, nagsagawa ng Elderly Data Management System na pamamahalaan ng National Commission on Senior Citizens upang maalalayan at matiyak na ang mga kuwalipikadong benepisyaryo ay makakuha ng benepisyo na karapatan nilang matanggap bilang matatandang Pilipino.

Kasama sa batas natin ang pagtatatag ng database para masiguro na wala tayong makakalimutang abutan ng benepisyo. With all the things our elders have done for our country, we should assure that they will receive all the honor and benefits they deserve.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com