Mga estudyante, problema sa matrikula no more!

ni Bong Revilla @Anak ng Teteng | Marso 22, 2024

Isang napakagandang balita ang bubulaga hindi lang sa mga estudyante kundi sa mga magulang na karaniwang biktima ng ‘no permit, no exam policy’ na matagal ng umiiral sa maraming unibersidad na nagdudulot ng masamang karanasan sa ating mga kababayan.

Ito ay matapos na lagdaan ni Pangulong Ferdinand Bongbong Marcos Jr., (PBBM) noong Marso 11, 2024, upang maging isang ganap na batas na ang ating iniakda na RA 11984 o ang AN ACT MANDATING PUBLIC AND PRIVATE EDUCATIONAL INSTITUTIONS ALLOW DISADVANTAGED STUDENTS WITH UNPAID TUITION AND OTHER SCHOOL FEES TO TAKE THE PERIODIC AND FINAL EXAMINATIONS AND FOR OTHER PURPOSES.

Ang mga mahihirap na estudyante na may utang o hindi makakabayad ng matrikula sa itinakdang panahon ay maaari nang kumuha ng eksaminasyon.

Tatawagin ang batas na ito ng ‘No permit, No Exam Prohibition Act’ at sakop nito ang lahat ng pribado at pampublikong paaralan mula sa Kindergarten hanggang Senior High School, gayundin sa mga unibersidad, kolehiyo at technical-vocational institutions.

Hindi patas ang mundo, kaya nasa kamay nating mga mambabatas na gawing pantay ang laban ng buhay para sa lahat, lalo na sa mga hikahos at salat sa buhay.

Ang alay natin sa kanila ay kayamanang hindi kailanman maaagaw -- ang edukasyon.

Umaasa tayo na magsisilbing pintuan ang batas na ating iniakda para sa mga nangangarap na mag-aaral na mapagbuti pa nila ang buhay sa pamamagitan ng edukasyon.

Kailangan lamang ng sertipikasyon mula sa local social welfare services na magpapatunay sa kondisyon sa buhay ng mag-aaral.

Hindi na mahirap ang requirements na ito dahil napakadali lamang kumuha nito upang hindi maabuso ang batas ng ilan nating kababayan na nakakaisip na agad ng pagsasamantala.

Napakahirap kasi ng mga pinagdaraanan ng mga maralita nating estudyante na ilang araw nag-review tapos ay hindi naman makakapag-exam dahil sa may nangyaring problema na humantong sa hindi agad makabayad ng installment na matrikula.

May ilang estudyante na dahil sa paulit-ulit na karanasan ay mas minabuti pang tumigil na lamang sa pag-aral sa kabila ng angking karunungan at imbes na maiahon sa kahirapan ang pamilya ay napariwara pa dahil sa umiiral na ‘no permit, no exam policy’ kaya ito ang aking naging inspirasyon para iakda ang naturang batas. 

Alam naman natin na ang edukasyon ang pinakamatinding sandata para tahakin ang mundong ito dahil kulang na kulang sa pagkakataong umunlad ang mga taong salat sa edukasyon.

Kaya nga maraming mga magulang ang palaging sinasabi sa kanilang mga anak na wala silang ibang maipapamana kundi ang mapagtapos lamang sila ng pag-aaral dahil alam nila ang hirap na daranasin ng isang hindi sapat ang kaalaman.

Sana lang sa pamamagitan ng pagsisikap nating ito ay makatulong tayo hindi lang sa mga mag-aaral kundi sa mga magulang upang mapagaan ang kanilang sitwasyon sa hinaharap nilang laban sa buhay.

Sa pag-upo natin bilang senador ay wala naman tayong ibang hinangad kundi ang mapagaan ang kalagayan ng marami nating kababayan. Mula guro, OFW, at ibang manggagawa sa bansa, maging mga senior citizen ay hindi natin kinakalimutan lalo na ‘yung aabot na sa 100 taon ang edad.

Ngayong bawal na ang ‘no permit, no exam policy’ ay hindi na tayo makakakita ng mga makadurog eksena ng mga estudyante na nagmamakaawa sa kahera ng mga unibersidad para payagan lamang mag-exam.

Marami kasing mga magulang ang responsable namang magbayad, ngunit dahil sa kahirapan ng buhay ay hindi talaga mapagkasya ang kanilang kinikita na minsan ay nasasabay pa sa may nagkasakit o namatay sa pamilya na hindi naman katanggap-tanggap na paliwanag sa mga unibersidad.    

Ngayon ay taas-noo na ang ating mga estudyante na kahit mahirap sila ay makakakuha na sila ng exam kahit wala silang permit hindi tulad noon na karaniwan ay pinagtatampulan ng usap-usapan sa buong section, ang kaklase nilang hindi pinayagang mag-exam dahil hindi nakabayad.

Grabe ang trauma na idinudulot ng ‘no pemit, no exam policy’ na ito, mabuti at binigyan tayo ng sapat na kaalaman upang maitawid natin sa Senado ang napakahalagang batas na ito.

May mga insidente pang ang mga estudyante na hindi pinag-exam dahil hindi nakabayad ay nagiging puntirya ng mga pambu-bully sa eskwela.

Wala kasing iniwan sa mga online lending ang patakarang ‘no permit, no exam’ na inoobligang magbayad sa oras ang mga nangutang at kung hindi agad nakabayad ay hihiyain sa social media at pagbabantaan pa.

May mga insidente rin na may isang estudyante ang mas pinili pang magpatiwakal dahil sa hindi siya pinayagang mag-exam -- sa kanyang iniwang sulat ay sinabi niyang siya lamang ang tanging pag-asa ng kanyang mga magulang upang mapagtapos ang iba pa niyang kapatid.

Ngunit, ngayong bawal na ang ‘no permit, no exam policy’ ay maluwalhati nang makakapagtapos ng pag-aaral ang marami nating estudyante.

Tutal sa dulo ng lahat ng ito ay hindi naman matatalo ang mga unibersidad dahil sa babayaran din naman sila sa kabuuan.

Hindi natin sinasabing huwag nang singilin ang mga mag-aral, ang sinasabi lang natin ay huwag pigilang mag-exam ang mga estudyante na naantala lamang sa pagbabayad — dahil magbabayad din naman.

Ang inaalis lang natin ay ang makasariling sistema ng mga paaralan at ginagawang panakot ang ‘no permit, no exam policy’ para makasingil at kumita sa oras na gusto nila.

Tapos nagdurusa ang mga estudyante na tila peklat nang hindi mapapawi habambuhay ang minsan ay naging mapait nilang karanasan.

Paalala natin sa mga magulang at estudyante, na aralin ninyong mabuti ang lahat ng detalye ng batas na ito upang sakaling may mga paaralan na lalabag dito ay maipapaliwanag ninyong mabuti na bawal na ito at sabihin ninyong isa ‘yan sa batas na iniakda ni Sen. Bong Revilla Jr.

Naniniwala kasi ako na ang mga paaralan ang isa sa humuhubog sa pagkatao ng ating mga estudyante at hindi sila ang mangunguna para labagin ang batas na ito.

Ngunit, hindi maiiwasan na may ilan din talagang matigas ang ulo at sakaling maulit pa ang ganitong karanasan ay maaari nang magsampa ng asunto ang mga magulang laban sa unibersidad na pinaiiral pa rin ang ‘no permit, no exam policy’-- gamit ang batas na ito.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Ulasimang Bato, Yerba Buena, Ampalaya at Tsaang Gubat, pasado sa clinical trials

ni Bong Revilla @Anak ng Teteng | Marso 18, 2024

Nakakatuwa namang malaman na mayroon tayong apat na plant-based supplements ang nakapasa sa masusing clinical trial na isinagawa ng National Integrated Research Program on Medical Plants-Institute of Herbal Medicine (NIRPROMP-IHM) na nagpatunay sa bisa at kaligtasan ng mga ito.

Nabatid na sumailalim sa iba’t ibang klase ng pagsusuri upang masiguro ang kaligtasan at bisa ng apat na bagong mga gamot na inabot ng halos pito hanggang 10 taon.

Ang apat na bagong gamot ay mula sa Ulasimang Bato o mas kilala sa pangalang pansit-pansitan, Yerba Buena, Ampalaya at Tsaang Gubat.

Ayon sa ilang eksperto mula sa NIRPROMP-IHM sa pamumuno ni Dr. Nelia Maramba, ang Ulasimang Bato ay gamot para sa hyperuricemia (mataas na uric acid sa dugo) at sa clinical test nabatid na wala itong side effects. 

Ligtas umanong gamitin ang Ulasimang Bato para sa paggamot ng mataas na uric acid na nagiging sanhi ng gout.

Nabatid sa mga eksperto na talagang nagpapababa ng serum uric acid levels ng mga tao ang Ulasimang Bato kaya maaari itong gamitin para sa gout o ‘yung talagang mataas ang uric acid levels.

Samantala, ang Yerba Buena naman ay gamot bilang analgesic na pangpawi sa sakit ng katawan. Ito ay maaaring gamitin bilang pain reliever sa operasyon, dysmenorrhea, childbirth at circumcision. Ang Ampalaya ay epektibo sa pagpapababa ng sugar level dahil sa diabetic. Ang Tsaang Gubat ay mabisa naman sa anti-colic o para maibsan ang kabag at gamot rin ito sa mga nakakaranas ng loose bowel movement (LBM) at sakit sa bato.

Sa apat na nabanggit, ang Tsaang Gubat ang nakarehistro na sa Food and Drug Administration habang ang tatlo pang herbal drugs ay naghihintay na lamang ng regulatory approval.

Sa tulong ng Technology Transfer and Business Development Office (TTBDO) at ng University of the Philippines-Manila nasimulan na ang transition ng scientific innovations sa commercial product.

Ayon kay TTBDO Director Dr. Lourdes Marie Tejero, noong 1970s pa lamang ay mayroon ng pangarap na magkaroon ng murang gamot para sa mga Pilipino.

Napakarami kasi ng ating herbal medicines – isa sa tagumpay na ating narating sa herbal medicine ay ang Lagundi na umabot ng isang bilyong piso ang naibenta dahil sa husay simula ng maging gamot, ganoon din ang Sambong na kumita naman ng 17 milyong piso noong 2018.

Ang kasalukuyang tagumpay ng ating herbal medicine ay patunay na napakarami pa nating halaman na may potensyal na maging isang ganap na gamot na dapat pagtuunan ng mga eksperto dahil sa malaking tulong nito para sa marami nating kababayan.

Araw-araw, isa sa pangunahing problema ng karamihan sa ating mga kababayan ay ang napakamahal na presyo ng gamot na maiibsan lamang kung magtutuluy-tuloy ang produksyon ng mga halamang gamot dahil abot-kaya ang halaga nito.

Naniniwala akong hindi magpapabaya ang kasalukuyang pamahalaan hinggil sa pagpapalaganap ng herbal medicine, ang kailangan lamang ay makipag-ugnayan ang mga nasa likod nito sa gobyerno upang maalalayan sila sa lahat ng kanilang pangangailangan para sa mas lalo pang ikauunlad ng herbal medicine sa bansa.

Hindi ba’t may kasabihan na, ‘ang kalusugan ay kayamanan’ kaya napakagandang balita na may mga halaman tayong kapaki-pakinabang, lalo pa sa panahong ito na sobrang mahal na ng lahat ng bilihin kasama na rito ang mga gamot.

Sa mga botika ay napatunayan na nakikipaglaban sa merkado ang Lagundi na nangungunang gamot laban sa ubo at tinatalo nito ang mga imported na kapsula sa kabila ng mga advertisement.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

P10K allowance ng mga titser, pirma na lang ni P-BBM

ni Bong Revilla @Anak ng Teteng | Marso 15, 2024

Sa kabila ng mainit na panahon na ating nararanasan ay walang mapagsidlan ang kaligayahang ating nararanasan dahil nakapagbigay na naman tayo ng malaking kasiyahan sa ating mga guro na doble ang katuwaang nararamdaman dahil sa panukala nating doblehin ang tinatanggap nilang teaching allowance na mula sa P5,000 ay magiging P10,000 na.

Kasadong-kasado na kasi ang ating ‘Kabalikat sa Pagtuturo Act’ dahil matapos himayin ng Bicam Conference Committee ang mga magkakaibang probisyon ng Senado at House of Representatives, kasama ang mga miyembro ng komite, ay malapit na malapit nang pakinabangan ang mga benepisyo sa ilalim nito at tanging ang pirma na lamang ni Pangulong Ferdinand Marcos, Jr. ang hinihintay.

Alam natin na nag-‘evolve’ na ang pagtuturo kung kaya’t dumagdag na rin ang demands na nakaatang sa mga guro para sa mas epektibong pamamaraan ng kanilang pagtuturo.

Isang magandang balita para sa ating mga gurong bayani dahil sa wakas, tanaw na natin ang katuparan ng pangako at pangarap natin para sa kanila.

Napakatagal nang hinihintay ng ating mga guro na maipasa ang nabanggit na panukala na doblehin ang natatanggap nilang teaching allowance. Simula’t sapul ay atin nang kinikilala ang kanilang hindi mapapantayang sakripisyo at pagkalinga sa ating mga mag-aaral sa loob o labas man ng paaralan.

Bilang chairman ng Senate Committee on Civil Service, Government Reorganization and Professional Regulation, ay naisakatuparan na natin ang matagal nang pangarap at adhikain ng ating mga guro. 

Medyo naging emosyonal nga tayo nang maglapitan sa atin ang mga guro na dumalo sa Senado dahil sa katuwaang kanilang nararanasan at walang humpay ang ipinapadama nilang pasasalamat sa inyong lingkod.

Nangilid din ang ating luha sa mata nang mapansin nating ilan sa mga guro ang naluha dahil sa kasiyahang malapit na nilang pakinabangan ang ating panukala.

Kasama kasi ang panukala nating ito sa ating Top Legislative Priorities kaya nga tuwang-tuwa ako nang italaga akong chairman ng komiteng ito sa Senado dahil nagkaroon ako ng pagkakataong talakayin at idepensa ang naturang panukala sa plenaryo.

Sa ating mga guro, nakaukit na sa mga pahina ng kasaysayan ang inyong kadakilaan. 

Nagpapasalamat tayo sa kasamahan sa Senado na kasama rin nating nag-akda ng panukalang ito gaya nina Sen. Robin Padilla, Sen. Sonny Angara, Sen. Bong Go, Sen. Jinggoy Estrada, Sen. Mark Villar, Sen. Bato Dela Rosa, Sen. Win Gatchalian, Sen. Grace Poe, Sen. Tol Tolentino, Sen. Cynthia Villar, ang ating liderato - Majority Leader Joel Villanueva, Senate President Pro-Tempore Loren Legarda, at Senate President Migz Zubiri na tumulong upang itaguyod ang panukalang ito.

Nais ko ring pasalamatan ang House of Representative contingents ng Bicam na sina Rep. Roman Romulo. Rep. Toff De Venecia, Rep. Lani Mercado-Revilla, Rep. Stella Quimbo, at Rep. France Castro na hindi bumitaw at nagsumikap upang maipasa ang panukala para sa kapakanan ng mga guro. At ang buong Kongreso dahil sinuportahan nila ang pagsulong natin sa pangako nating ito.

Lalo pa at alam nating napakaraming hamon ang kinakaharap ng ating mga guro at madalas nga ay abonado pa. Nakikita natin ‘yung kabayanihan nila sa mga nagba-viral na social media posts na sila mismo, mula sa sariling bulsa, ang madalas nagtutustos sa gamit sa silid-aralan. May mga pagkakataon pa na pati pagkain ng mga bata sa recess ay sinasagot na nila, lalo ‘yung mga mag-aaral na talagang salat na salat sa buhay.

Kaya mula sa Teaching Supplies Allowance, ito na ngayon ay “Teaching Allowance” upang mas masakop ang mga pangangailangan ng isang guro tungo sa kanyang pagtuturo.

Hindi natin matatawaran ang kadakilaan ng mga guro sa bansa dahil may mga ilan sa kanila ang kinakailangan pang maglakad ng milya-milya para marating lamang ang mga paaralan na nasa kabundukan. 

Kung wala ang ating mga guro na tumatayong ‘haligi ng ating lipunan’ at tanglaw ng kinabukasan ay hindi susulong ang bansa dahil walang bagong mamumuno, mga manggagamot at panibagong mga guro kung hindi sila tinuruan. 

Sa labis na pagkalinga natin sa mga guro ay makaaasa sila na hindi ito ang wakas, bagkus ay simula pa lamang ito ng marami nating mga hakbang at pagsasamahan sa walang mintis na pagsulong ng mga kahalintulad na reporma.

Huwag naman sanang managhili ang ilan nating manggagawa sa ating mga guro dahil kailangang-kailangan ang ‘Kabalikat sa Pagtuturo Act’ at may mga isinusulong naman tayong pakikinabangan ng ibang manggagawa tulad ng mga OFW at iba pa.

Tandaan natin na malapit sa puso ko ang anumang uri ng manggagawa, kahit ang mga maliliit na manggagawa sa movie industry ay kinakalinga natin, nagkataon lang na una nating isinumite ang kapakanan ng mga guro.

Pero, araw-araw ay iniisip natin ang kapakanan ng lahat ng manggagawa sa bansa dahil ang pangarap ko ay maging maayos ang kalagayan ng mahihirap nating kababayan.

Kahit ang diskuwento para sa senior citizen ay tinutukan natin hanggang maging batas at ang pinakahuli ay ang P10,000 cash gift sa mga lolo at lola natin na sasapit ng 80-anyos at karagdagang P10,000 pa kapag sumapit sa edad na 90 at buong-buong P100,000 kapag sumapit ng 100 taong gulang.

Hindi natin ito sinasabi para ipagyabang, nais ko lang ipaabot ang batas na ito na ang inyong lingkod mismo ang may-akda para sa mga kababayan — upang maiwasan ang pananaghili.

Huwag kayong mag-isip na may sektor na malakas sa akin dahil lahat ay araw-araw kong iniisip kong paano pa maitataas ang kalidad ng pamumuhay ng bawat Pilipino.

Samahan n’yo lang akong manalangin na palagi tayong bigyan ng sapat na kakayahan para mapagtagumpayan natin sa Senado ang mga panukalang batas na ating isinumite para mas marami ang makinabang.

Sa ngayon, maging masaya na muna tayo sa tagumpay ng ‘Kabalikat sa Pagtuturo Act’ para pakinabangan ng mga guro. Kung naipaglaban natin ang kapakanan ng mga guro, hindi imposibleng sa mga susunod na panahon ay ang kapakanan naman ng iba pang manggagawa sa bansa ang ating pupursigihin.

Isa-isa lang, huwag kayong mainip dahil prayoridad ko ang kapakanan ng bawat Pilipino. Kalma lang!

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com