- BULGAR
- Jun 7, 2024
ni Bong Revilla @Anak ng Teteng | June 7, 2024
Personal tayong nagtungo sa tanggapan ni Pangulong Ferdinand ‘Bongbong’ Marcos Jr. noong nakaraang Hunyo 3 upang saksihan ang paglagda nito sa ‘Kabalikat sa Pagtuturo Act’ na mismong ang inyong lingkod ang principal author at sponsor.
Layon ng naturang panukala na bigyang pugay ang labis na pagsisikap at dedikasyon ng mga public school teacher sa pamamagitan ng pagdaragdag ng kanilang annual teaching allowance.
Walang mapaglagyan ang aking tuwa na ganap nang batas ang ‘Kabalikat sa Pagtuturo Act’. Kaya bilang tagapagtaguyod ng mga teacher sa ating bansa ay labis-labis ang aking pasasalamat kay PBBM dahil sa pag-apruba ng panukala.
Higit pang nakakatuwa na agad itong pinirmahan ng Presidente matapos na lagdaan din niya ang aking mga panukalang Expanded Centenarian Law at ang pagbabawal na sa ‘No Permit, No Exam’ policy.
Ang bagong batas na ito ay katuparan ng matagal nang hiling ng mga guro na magkaroon ng dagdag na panggastos para sa kanilang epektibong pagtuturo.
Napakalaking tagumpay para sa mga guro ang pagsasabatas nito dahil sa halos limang taon nating ipinaglaban nang pukpukan sa Senado ang nasabing bill.
Base sa probisyon ng naturang batas, ang teaching allowance ng public school teachers ay nadagdagan ng mula P5,000 ay naging P10,000 simula S.Y. 2025-2026.
Sa kasalukuyan, ang natatanggap na teaching allowance ng mga guro na mas kilala bilang ‘chalk allowance’ ay P5,000 taun-taon. Pero bunsod ng nagtataasang presyo ng bilihin, hindi na ito sumasapat.
Madalas nga ay naglalabas na sila ng pera galing sa kanilang bulsa para may maipambili ng mga gamit sa pagtuturo. At hindi na rin lang chalk o iba pang supplies ang kinakailangan ngayon. Dahil sa blended modality, nandiyan na ang pangangailangan ng mga guro sa internet connection, kuryente, laptop, at iba pa para makapagturo ng maayos.
Ayon sa datos, ang public school teachers ay tumatanggap ng allowance para sa kanilang aktuwal na pagtuturo. Noong 1988 ay mayroon lamang silang P100 allowance, P200 noong 1989-1992, P300 sa taong 1993-2007, P500 noong 2008, P700 noong 2009-2011, P1,000 sa taong 2012-2014, P1,500 noong 2015-2016, P2,500 taong 2017, P3,500 noong 2018-2020, at P5,000 noong 2021 hanggang sa kasalukuyan.
Bukod sa Pangulo, nagpapasalamat din tayo sa lahat ng naging kasangga at kakampi para maabot natin ang pangarap na ito. Sa aking mga kasamahan sa Senado lalo na sa mga co-author, maraming thank you.
Nagpapasalamat din tayo sa ating mga kasamahan sa House of Representatives for joining us in our fight for the passage of this measure. Ultimately, maraming salamat sa mga guro na nangarap kasama namin. Ito ay panalo niyo at panalo rin ng buong sektor ng edukasyon!
Kung tutuusin ay simula pa lamang ito ng mga hakbangin -- kumpara sa sakripisyong ginagampanan ng mga guro hindi lang para sa ating mga mag-aaral kundi sa buong komunidad na kabilang sa paghubog kaya dapat na sila ay kalingain.
Napapanahon talaga ito para sa kapakanan ng mga guro. Isang hakbang pa lamang ito sa marami nating mga ipapasang panukala para bigyang sandata ang mga guro lalo na’t ang kanilang papel na ginagampanan sa buhay ng ating mga kabataan ay hindi matatawaran.
Hindi naman lahat ngunit may mga guro din na walang habas sa paggamit ng chalk lalo na kung nagagalit at ginagawang pambato sa makukulit na mag-aaral. Huwag sanang ganoon.
Anak Ng Teteng!
May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anakngteteng.bulgar@ gmail.com